ଭୁବନେଶ୍ୱର: କେନ୍ଦ୍ରାପଡ଼ା ଜିଲ୍ଲା ରାଜନଗରରେ ଶାସକ ଦଳର କର୍ମୀଙ୍କ ଗୁଣ୍ଡାଗିରି ଦେଖିବାକୁ ମିଳିଲା । ପରାଜିତ ବିଧାୟକ ପ୍ରାର୍ଥୀ ଲଳିତ ବେହେରାଙ୍କ ନେତୃତ୍ୱରେ ୪୦ରୁ ଅଧିକ କର୍ମୀ ବିଡିଓଙ୍କ କାର୍ଯ୍ୟାଳୟରେ ପଶି ମହିଳା ବିଡିଓଙ୍କୁ ଆକ୍ରମଣ ଉଦ୍ୟମ କଲେ । କମ୍ପ୍ୟୁଟର୍ ଉଠାଇ ବିଡିଓଙ୍କ ଉପରକୁ ଫିଙ୍ଗିଲେ । ସରକାରୀ ଅଫିସ୍ ରେ ବସି କାର୍ଯ୍ୟ କରୁଥିବା ଜଣେ ମହିଳା ବିଡିଓଙ୍କ ପ୍ରତି ଶାସକ ଦଳ ନେତାଙ୍କର ଏଭଳି କାଣ୍ଡ ଆଲୋଡ଼ନ ସୃଷ୍ଟି କଲା । ଘଟଣାକୁ ୨୪ ଘଣ୍ଟା ବିତିଗଲା । ମାତ୍ର କାର୍ଯ୍ୟାନୁଷ୍ଠାନ ଶୂନ । ମୁଖ୍ୟ ଅଭିଯୁକ୍ତ ଲଳିତ ବେହେରା ଛାତି ଫୁଲେଇ ବୁଲୁଛନ୍ତି ।
ସେଦିନ ଘଟଣାର ସମସ୍ତ ଦୃଶ୍ୟ ସିସିଟିଭିରେ କଏଦ ହୋଇଛି ଏବଂ ଏ ସଂକ୍ରାନ୍ତରେ ବିଡିଓ ଜିଲ୍ଲାପାଳଙ୍କୁ ଜଣାଇଛନ୍ତି । ତେବେ ଚାପକୁ ଡରି ଏ ପର୍ଯ୍ୟନ୍ତ ଥାନାରେ ଲିଖିତ ଅଭିଯୋଗ କରିନାହାନ୍ତି । ମାତ୍ର ରାଜନଗର ପଞ୍ଚାୟତ ସମିତି ଅଧ୍ୟକ୍ଷା ଥାନାରେ ଏତଲା ଦେଇଥିଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ହୋଇନାହିଁ । ଆଶ୍ଚର୍ଯ୍ୟର କଥା ଯେ ଗତକାଲି ବିଜେଡି ଏକ ପ୍ରେସମିଟ୍ କରି ଘଟଣାକୁ ନିନ୍ଦା କରିଥିଲେ ମଧ୍ୟ ଦଳର ସଭାପତି ତଥା ବିରୋଧୀ ଦଳର ନେତା ନବୀନ ପଟ୍ଟନାୟକ ଏ ପର୍ଯ୍ୟନ୍ତ ପ୍ରତିକ୍ରିୟା ଦେଇନାହାନ୍ତି । ବୋଧହୁଏ ତଦନ୍ତକୁ ଅପେକ୍ଷା କରି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏହି ଘଟଣା ଉପରେ ଟୁଇଟ୍ କରିନାହାନ୍ତି । ହେଲେ ଟୁଇଟ୍ ମାଷ୍ଟର ଭାବେ ପରିଚିତ ସ୍ଥାନୀୟ ସାଂସଦଙ୍କର କୌଣସି ଟୁଇଟ୍ ନ ଆସିବା କେନ୍ଦ୍ରାପଡ଼ା ଜିଲ୍ଲାରେ ଭୀଷଣ ପ୍ରତିକ୍ରିୟା ସୃଷ୍ଟି କରିଛି । ମାମଲାକୁ ଚପାଇ ଦେବାକୁ ଉଦ୍ୟମ ହେଉଥିବା ଜାଣି ରାଜନଗର ବିଜେଡି ପକ୍ଷରୁ ଆନ୍ଦୋଳନର ପ୍ରସ୍ତୁତି ଚାଲିଛି ।
ସେଦିନର ଘଟଣା କ’ଣ ଥିଲା ତାହାର ଟିକନିକ୍ ତଥ୍ୟ ଆମର ହସ୍ତଗତ ହୋଇଛି । ଲଳିତ ବେହେରାଙ୍କ ନେତୃତ୍ୱରେ ୪୦ ରୁ ଅଧିକ ବିଜେପି କର୍ମୀ ଅଚାନକ ବିଡିଓଙ୍କ ଅଫିସରେ ପହଞ୍ଚିଥିଲେ । ସେତେବେଳେ ବିଡିଓ ତିଳୋତ୍ତମା ପୃଷ୍ଟି ଏକ ଜରୁରୀ କାର୍ଯ୍ୟରେ ତରବର ହୋଇ ବାହାରୁଥିଲେ । ଭିତରକନିକାକୁ ଏକ କେନ୍ଦ୍ରୀୟ ଦଳ ଗସ୍ତରେ ଆସୁଥିବାରୁ ଜିଲ୍ଲାପାଳଙ୍କ ସହ ସେ ଉପସ୍ଥିତ ହେବାର ଥିଲା । ବିଡିଓ ଏକଥା ସେମାନଙ୍କୁ ଜଣାଇଥିଲେ ମଧ୍ୟ କୌଣସି କାମ ପାଇଁ ବାଧ୍ୟ କରି ଅଫିସ୍ ରୁ ବାହାରିବାକୁ ଦେଇ ନ ଥିଲେ । ଆପଣଙ୍କର ଯଦି ନିର୍ଦ୍ଦିଷ୍ଟ କାମ ଅଛି ଲିଖିତ ଭାବରେ ଦେଇଯାନ୍ତୁ, ମୁଁ ଆସିଲେ ବୁଝିବି ବୋଲି ବିଡ଼ିଓ କହିବାରୁ ଲଳିତଙ୍କ ମୁଣ୍ଡ ଗରମ ହୋଇଗଲା । ବିଡିଓଙ୍କୁ ତୁ ତା କହିବା ଆରମ୍ଭ କରିଥିଲେ । ଯିବୁ କ’ଣ, ତତେ ଏଠି ୫ ଘଣ୍ଟା ରଖିଦେବି ବୋଲିଧମକ ଦେଇଥିଲେ । ବିଡିଓ ତାଙ୍କୁ ଶାନ୍ତ କରିବାକୁ ଉଦ୍ୟମ କରୁଥିଲା ବେଳେ ଟେବୁଲ୍ ଉପରେ ଥିବା କମ୍ପ୍ୟୁଟର୍ କୁ ଉଠାଇ ଆଣି ଉପରକୁ ଫିଙ୍ଗି ଦେଇଥିଲେ । ସୌଭାଗ୍ୟକୁ କିଛି କର୍ମୀ ଆଗକୁ ଆସିଯିବାରୁ ବିଡିଓ ବର୍ତ୍ତିଯାଇଥିଲେ ।
ଲଳିତଙ୍କର ଦାଦାଗିରି ନେଇ ପୂର୍ବରୁ ମଧ୍ୟ ଅଭିଯୋଗ ଅଛି । କିଛି ଦିନ ତଳେ ଜଣେ ଜେଇଙ୍କୁ ଅଫିସରେ ବସି ହଙ୍ଗାମା କରିଥିଲେ । ମୋତେ ତୁ ଚିହ୍ନିନୁ ବୋଲି ଧମକ ଦେଇଥିଲେ । ସଂପୃକ୍ତ ଜେଇ ତାଙ୍କ ନାଲିଆଖିକୁ ଡରି ଥାନାରେ ଅଭିଯୋଗ କରି ନ ଥିଲେ ।
ସୂଚନାଥାଉକି, ଏହି ଲଳିତ ବେହେରା ଗତ ସାଧାରଣ ନିର୍ବାଚନରେ ବିଜେପି ପ୍ରାର୍ଥୀ ଭାବେ ରାଜନଗର ବିଧାନସଭା ଆସନରୁ ପ୍ରତିଦ୍ୱନ୍ଦିତା କରିଥିଲେ । ମନମୋହନ ସାମଲଙ୍କର ପାଖଲୋକ । ବୈଜୟନ୍ତ ପଣ୍ଡାଙ୍କର ଅତି ବିଶ୍ୱସ୍ତ । ପୂର୍ବତନ ବିଧାୟକ ଅଲେଖ ଜେନାଙ୍କୁ କାଟି ବୈଜୟନ୍ତ ଏଇ ଲଳିତ ବେହେରାଙ୍କୁ ଟିକେଟ ଦିଆ କରିଥିଲେ । ବିଜେଡି ପ୍ରାର୍ଥୀ ଧ୍ରୁବ ସାହୁ ତାଙ୍କୁ ୧୮ ହଜାରରୁ ଅଧିକ ଭୋଟରେ ପରାସ୍ତ କରିଥିଲେ ।
