ସାମ୍ବାଦିକଙ୍କୁ ସ୍କୁଲ କ୍ୟାମ୍ପସ୍ ମନା

ଭୁବନେଶ୍ୱର: ସାମ୍ବାଦିକମାନେ ଖବର ସଂଗ୍ରହ ପାଇଁ ସ୍କୁଲ ହତାକୁ ମନଇଚ୍ଛା ପଶି ପାରିବେନି । ଭିତରକୁ ଯିବା ପାଇଁ ପ୍ରଧାନଶିକ୍ଷକଙ୍କଠାରୁ ଅନୁମତି ନେବାକୁ ପଡ଼ିବ । ଅନୁମତି ନ ନେଇ ଭିତରକୁ ଗଲେ ସାମ୍ବାଦିକ କେସ୍ ଖାଇବେ । ଯଦି ନିୟମ ପାଳନରେ ସ୍କୁଲ କର୍ତ୍ତୃପକ୍ଷଙ୍କଠାରୁ କିଛି ଅବହେଳା ହୁଏ କିମ୍ବା କେଉଁ ସାର୍ ଉପର୍ଧ ଦେଖାଇ ସାମ୍ବାଦିକଙ୍କୁ ସ୍କୁଲ ହତାକୁ ଛାଡ଼ିବେ, ସଂପୃକ୍ତ କର୍ତ୍ତୃପକ୍ଷଙ୍କ ବିରୋଧରେ ଥାନାରେ ଏତଲା ଦିଆଯିବ ।

ଏହି ନିର୍ଦ୍ଦେଶନାମା ଜାରି କରିଛନ୍ତି ଢ଼େଙ୍କାନାଳ ଜିଲ୍ଲା କଙ୍କଡାହାଡ ବ୍ଲକ୍ ଏଜୁକେସନ ଅଫିସର(ବିଇଓ) । ବ୍ଲକ୍ ଅଧୀନରେ ଥିବା ସବୁ ସରକାରୀ ସ୍କୁଲର ପ୍ରଧାନଶିକ୍ଷକଙ୍କୁ ଦିଆଯାଇଛି ଚିଠି । ଆଉ କିଛି ଜାଗାରେ ବ୍ଲକ୍ ଶିକ୍ଷା ଅଧିକାରୀ ଏଭଳି ନିର୍ଦ୍ଦେଶନାମା ଜାରି କରିଥିବା କୁହାଯାଉଛି ।

ସାମ୍ବାଦିକଙ୍କ ଉପରେ ବ୍ଲକ୍ ଅଧିକାରୀଙ୍କ ଏଭଳି ହୁଇପ୍ ର ପ୍ରତିକ୍ରିୟା କଙ୍କଡାହାଡ ବ୍ଲକ୍ ଭିତରେ ସୀମିତ ରହିନାହିଁ । ସାରା ରାଜ୍ୟରେ ତୀବ୍ର ଅସନ୍ତୋଷ ଓ ପ୍ରତିକ୍ରିୟା ସୃଷ୍ଟି କରିଛି । ଆଉ ଏହି ଅସନ୍ତୋଷ ନିଆଁରେ ଘିଅ ଢ଼ାଳିଛନ୍ତ ଖୋଦ୍ ସ୍କୁଲ ଓ ଗଣଶିକ୍ଷାମନ୍ତ୍ରୀ ସମୀର ଦାଶ । ନିୟମ ସପକ୍ଷରେ ଯୁକ୍ତି ରଖିଛନ୍ତି ।

କହିଛନ୍ତି, ଆଜିକାଲି ବହୁତ ଗୁଡ଼ାଏ ୱେବ୍ ମିଡ଼ିଆ ହୋଇଗଲାଣି । ଗାଡିରେ ପ୍ରେସ୍ ଲେଖି ନିଜକୁ ସାମ୍ବାଦିକ ପରିଚୟ ଦେଉଛନ୍ତି । ଅନାବଶ୍ୟକ ଭାବେ ସ୍କୁଲ ଭିତରକୁ ପଶିଯାଉଛନ୍ତି । କିଛି ଜାଗାରେ ଗଣମାଧ୍ୟମର ଭୂମିକା ଆବଶ୍ୟକତାରୁ ବେଶୀ ହେଉଛି । ଅତଏବ ଯାହା ହୋଇଛି ଠିକ୍ ହୋଇଛି ବୋଲି ମନ୍ତ୍ରୀ ଇଙ୍ଗିତ ଦେଇଛନ୍ତି । ଏଭଳି କଟକଣାରେ ଗଣମାଧ୍ୟମର ସହଯୋଗ ଲୋଡିଛନ୍ତି ମନ୍ତ୍ରୀ ।

ପୂର୍ବରୁ କୋଭିଡ୍ ଆଳରେ ସଚିବାଳୟ, ବିଧାନସଭାକୁ ସାମ୍ବାଦିକଙ୍କ ପ୍ରବେଶ ଉପରେ କଟକଣା ଲାଗିଛି । ବଡ଼ ଡାକ୍ତରଖାନାକୁ ବି ସାମ୍ବାଦିକଙ୍କୁ ମନା । ଏବେ ସ୍କୁଲ ପ୍ରବେଶ ଉପରେ କଟକଣା । ଗଣଶିକ୍ଷା ମନ୍ତ୍ରୀଙ୍କ ବୟାନ ପରେ ରାଜ୍ୟ ସରକାରଙ୍କ ଆଭିମୁଖ୍ୟକୁ ବିଭିନ୍ନ ମହଲରେ ନାପସନ୍ଦ କରାଯାଇଛି । ସାମ୍ବାଦିକ ମହଲରେ ଏହା ତୀବ୍ର ପ୍ରତିକ୍ରିୟା ସୃଷ୍ଟି କରିଛି । ରାଜ୍ୟ ସରକାର ଏଭଳି ଆଭିମୁଖ୍ୟ ତୁରନ୍ତ ପ୍ରତ୍ୟାହାର କରନ୍ତୁ ବୋଲି ଦାବି କରାଯାଇଛି । ଯଦି ସାମ୍ବାଦିକତା ନାଁରେ କୌଣସି ବ୍ୟକ୍ତି ଟାଉଟରି କିମ୍ବା ଦଲାଲି କରୁଛନ୍ତି ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ବୋଲି ସେମାନେ ଅନୁରୂପ ଦାବି କରିଛନ୍ତି ।

ସ୍କୁଲ କ୍ୟାମ୍ପସ୍ ରେ ଗଣମାଧ୍ୟମ ପ୍ରତିନିଧିଙ୍କ ପ୍ରବେଶ ବାରଣକୁ କଂଗ୍ରେସ ଓ ବିଜେପି ପକ୍ଷରୁ ମଧ୍ୟ କଡ଼ା ସମାଲୋଚନା କରାଯାଇଛି । ଏହାକୁ ତୁରନ୍ତ ପ୍ରତ୍ୟାହାର ପାଇଁ ସେମାନେ ଦାବି କରିଛନ୍ତି । କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏହି କଟକଣାକୁ ନାପସନ୍ଦ କରି ଗଣମାଧ୍ୟମରେ ବିବୃତ୍ତି ଦେଇଛନ୍ତି ।