ଭୁବନେଶ୍ୱର: ବିଧାୟକଙ୍କ ଦରମା ବୃଦ୍ଧି ନିଷ୍ପତ୍ତିରୁ ରାଜ୍ୟ ସରକାର ଓହରିଯାଇଛନ୍ତି । ଗତ ଡିସେମ୍ବରରେ ବିଧାନସଭାରେ ପାରିତ ଦରମା, ଭତ୍ତା ଓ ପେନସନ ସଂଶୋଧନ ସଂକ୍ରାନ୍ତୀୟ ବିଲ୍ କୁ ସରକାର ପ୍ରତ୍ୟାହାର କରିବାକୁ ଯାଉଛନ୍ତି । ୪ଟି ବିଲ୍ କୁ ବାତିଲ କରିବା ପାଇଁ ଆଜି ବିଧାନସଭା ସଚିବାଳୟ ପକ୍ଷରୁ ଏକ ଆଧିକାରିକ ନୋଟିସ୍ ଜାରି କରାଯାଇଛି । ସଂସଦୀୟ ବ୍ୟାପାର ମନ୍ତ୍ରୀ ମୁକେଶ ମହାଲିଙ୍ଗ ଏହି ବିଲ୍ ଗୁଡ଼ିକୁ ପ୍ରତ୍ୟାହାର କରିବା ପାଇଁ ଅନୁମତି ମାଗିଛନ୍ତି ।
ବିଧାନସଭାର ଶୀତ ଅଧିବେଶନର ଶେଷ ମୁହୂର୍ତ୍ତରେ ବିଧାୟକଙ୍କ ଦରମା ବୃଦ୍ଧି ସଂକ୍ରାନ୍ତ ଚାରୋଟି ବିଲ୍ କୁ ସର୍ବସମ୍ମତିକ୍ରମେ ଗୃହରେ ପାରିତ କରାଯାଇଥିଲା । ବିଧାୟକଙ୍କ ଦରମା, ଭତ୍ତା ଏକାଥରକେ ସାଢ଼େ ତିନିଗୁଣା ବୃଦ୍ଧି ପାଇଲା । ୯୦ ହଜାରରୁ ବଢ଼ି ୩ ଲକ୍ଷ ୪୫ ହଜାର ଦରମା କରାଯାଇଥିଲା । ମୁଖ୍ୟମନ୍ତ୍ରୀଙ୍କ ଦରମା ୩.୭୪ ଲକ୍ଷ ଟଙ୍କାକୁ ବୃଦ୍ଧି କରାଯାଇଥିଲା । ପୂର୍ବତନ ବିଧାୟକଙ୍କ ପେନସନ ମଧ୍ୟ ୩୦ ହଜାରରୁ ବଢ଼ି ୮୦ ହଜାର ଟଙ୍କା କରାଯାଇଥିଲା । ବିଧାୟକମାନଙ୍କ ଦରମା, ଭତ୍ତା ଓ ପେନସନ୍ ବୃଦ୍ଧିକୁ ଜୁନ୍ ୫, ୨୦୨୪ରୁ ପିଛିଲା ଭାବେ ଲାଗୁ କରିବାକୁ ନିଷ୍ପତ୍ତି ହୋଇଥିଲା ।
ଏହି ନିଷ୍ପତ୍ତି ଯୋଗୁଁ, ଅଧିକ ଦରମା ଓ ଭତ୍ତା ପାଇବାରେ ଓଡ଼ିଶାର ବିଧାୟକମାନେ ଦେଶରେ ପ୍ରଥମ ସ୍ଥାନକୁ ଆସିଗଲେ । ବିଧାୟକମାନଙ୍କ ଅହେତୁକ ଦରମା ବୃଦ୍ଧିକୁ ନେଇ କେବଳ ରାଜ୍ୟରେ ଜନଅସେନ୍ତାଷ ସୃଷ୍ଟି ହେଲାନି, ସାରା ଦେଶରେ ଏହା ଚର୍ଚ୍ଚାର ବିଷୟ ହେଲା । ରାଜ୍ୟର ଆର୍ଥିକ ସ୍ଥିତି ଓ ବିକାଶମୂଳକ କାମକୁ ପ୍ରାଥମିକତା ନ ଦେଇ ବିଧାୟକମାନେ ନିଜ ଦରମା ବଢ଼ାଇବାକୁ ନେଇ ସମାଲୋଚିତ ହୋଇଥିଲେ । ବିରୋଧୀ ଦଳ ନେତା ନବୀନ ପଟ୍ଟନାୟକ ବର୍ଦ୍ଧିତ ଦରମା ଗ୍ରହଣ କରିବେ ନାହିଁ ବୋଲି ପ୍ରଥମେ ନିଷ୍ପତ୍ତି ନେଇଥିଲେ । ଜନଅସନ୍ତୋଷ ବଢ଼ିବାରୁ ଶାସକ ଦଳରେ ଛନକା ପଶିଥିଲା । ବିଧାୟକମାନଙ୍କ ଉପରେ ପ୍ରବଳ ଚାପ ସୃଷ୍ଟି ହେଲା । ମୁଖ୍ୟମନ୍ତ୍ରୀଙ୍କୁ ଭେଟି ଜନମତକୁ ସମ୍ମାନ ଦେବା ପାଇଁ ସେମାନେ ଅନୁରୋଧ କରିଥିଲେ ।
