ଭୁୁବନେଶ୍ୱର: ଏସସିବି ଅଗ୍ନିକାଣ୍ଡ ଘଟଣାରେ ସ୍ୱାସ୍ଥ୍ୟମନ୍ତ୍ରୀ କାହିଁକି ଇସ୍ତଫା ଦେଉନାହାନ୍ତି? ମୁଖ୍ୟମନ୍ତ୍ରୀ ତାଙ୍କୁ କାହିଁକି ସୁରକ୍ଷା ଦେଇଛନ୍ତି? ବିରୋଧୀ ଦଳର ବିଧାୟକମାନେ ଆଜି ଏହି ପ୍ରଶ୍ନ ପଚାରି ସରକାରଙ୍କୁ ଘେରିଛନ୍ତି । ମୁଖ୍ୟମନ୍ତ୍ରୀଙ୍କୁ ଦୁର୍ବଳ ମୁଖ୍ୟମନ୍ତ୍ରୀ ଏବଂ ସ୍ୱାସ୍ଥ୍ୟମନ୍ତ୍ରୀଙ୍କୁ ସବଳ ସ୍ୱାସ୍ଥ୍ୟମନ୍ତ୍ରୀ କହି କଳା ଟି-ସାର୍ଟରେ ପ୍ରତିବାଦ କରିଛନ୍ତି । ସ୍ୱାସ୍ଥ୍ୟମନ୍ତ୍ରୀଙ୍କ ଇସ୍ତଫା ଦାବିରେ ଅଟଳ ରହିଥିବା ବିଜେଡି ଓ କଂଗ୍ରେସ ବିଧାୟକମାନେ କଳା ଟି-ସାର୍ଟି ପିନ୍ଧି ବିଧାନସଭା ଆସିଥିଲେ । ଟି-ସାର୍ଟ ଆଗରେ ‘ମୁଖ୍ୟମନ୍ତ୍ରୀ ଦୁର୍ବଳ’ ଲେଖାଥିଲା ବେଳେ ପଛରେ ‘ସ୍ୱାସ୍ଥ୍ୟମନ୍ତ୍ରୀ ସବଳ’ ଲେଖାଥିଲା । ସ୍ୱାସ୍ଥ୍ୟମନ୍ତ୍ରୀଙ୍କ ଇସ୍ତଫା ଦାବିରେ ନାରାବାଜି ଚାଲିବାରୁ ବାଚସ୍ପତି ଗୃହକୁ ମୁଲତବୀ ରଖିଥିଲେ । ଏହାପରେ ବିରୋଧୀ ଦଳର ବିଧାୟକମାନେ ସ୍ୱାସ୍ଥ୍ୟମନ୍ତ୍ରୀଙ୍କ ଇସ୍ତଫା ଦାବିରେ ଅଭିନବ ଢ଼ଙ୍ଗରେ ବିଧାନସଭା ଚାରିପଟ ପରିକ୍ରମା କରିଥିଲେ ।
ବିଜେଡି ବିଧାୟକ ଅରୁଣ ସାହୁ କହିଛନ୍ତି, ଏସସିବି ଅଗ୍ନିକାଣ୍ଡ ଘଟଣାରୁ ସ୍ୱାସ୍ଥ୍ୟମନ୍ତ୍ରୀ କେତେ ସବଳ ଆଉ ମୁଖ୍ୟମନ୍ତ୍ରୀ କେତେ ଦୁର୍ବଳ ତାହା ଜଣାପଡ଼ିଯାଉଛି । ପ୍ରଶାସନିକ ଦାୟିତ୍ୱରେ ଥିବା ଅଧିକାରୀଙ୍କ ଦାୟିତ୍ୱହୀନତା ପାଇଁ ୧୩ ଜଣ ରୋଗୀଙ୍କର ରୋଗୀଙ୍କର ଜୀବନ ଚାଲିଗଲା । ଏଥିପାଇଁ ବିଭାଗର ମୁଖିଆ ଭାବେ ସ୍ୱାସ୍ଥ୍ୟମନ୍ତ୍ରୀ ନିଜ ଉପରକୁ ନୈତିକ ଦାୟିତ୍ୱ ନେଇ ଇସ୍ତଫା ଦେବା କଥା । ମାତ୍ର ସେ ଇସ୍ତଫା ଦେଉନାହାନ୍ତି କି ମୁଖ୍ୟମନ୍ତ୍ରୀ ତାଙ୍କର ଇସ୍ତଫା ମାଗି ପାରୁନାହାନ୍ତି । ନିଜକୁ ଲୋକପ୍ରିୟ କହୁଥିବା ମୁଖ୍ୟମନ୍ତ୍ରୀ ତାଙ୍କର ଜଣେ ମନ୍ତ୍ରୀଙ୍କ ଆଗରେ କେତେ ଦୁର୍ବଳ ତାହା ଏଥିରୁ ସହଜରେ ଅନୁମେୟ । ୧୩ ଜଣଙ୍କର ହତ୍ୟାକାରୀ ସେହି ସ୍ୱାସ୍ଥ୍ୟମନ୍ତ୍ରୀଙ୍କ ସହିତ ଗୃହରେ ବସି ଆଲୋଚନା ସମ୍ଭବ ନୁହେଁ ବୋଲି ସେ କହିଛନ୍ତି । ସ୍ୱାସ୍ଥ୍ୟମନ୍ତ୍ରୀ ଇସ୍ତଫା ନଦେଲେ ପରିଣାମ ଭୟାବହ ହେବ ବୋଲି ସତର୍କ ମଧ୍ୟ କରାଇଛନ୍ତି । କଂଗ୍ରେସ ବିଧାୟକ ଦଳ ନେତା ରାମଚନ୍ଦ୍ର କାଡାମ୍ ଅନୁରୂପ ମନ୍ତବ୍ୟ ଦେଇଛନ୍ତି । ଏହି ସରକାରରେ ମୁଖ୍ୟମନ୍ତ୍ରୀ କେତେ ଦୁର୍ବଳ ଓ ଅସହାୟ ତାହା ଜଳ ଜଳ ଦିଶୁଛି ବୋଲି ସେ କହିଥିଲେ ।
ଆଇନମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ବିରୋଧୀ ସଦସ୍ୟଙ୍କ ଆଚରଣକୁ ସମାଲୋଚନା କରିଛନ୍ତି । ଆଜି ଶୂନ୍ୟକାଳରେ ସେ କହିଥିଲେ ଯେ ସାଧାରଣ ଲୋକଙ୍କ ରାଜକୋଷର ଅର୍ଥରେ ବିଧାନସଭା ଚାଲିଛି । ମାତ୍ର ବିରୋଧୀଙ୍କ ହଙ୍ଗାମା ଯୋଗୁଁ ୧୨ କୋଟି ଟଙ୍କା ରାଜସ୍ୱ ନଷ୍ଟ ହେଲାଣି । ପ୍ରତିଦିନ ପ୍ରାୟ ୬୮ରୁ ୭୦ ଲକ୍ଷ ଟଙ୍କା ଖର୍ଚ୍ଚ ହେଉଛି । ୨୪ ବର୍ଷ ଶାସନ କରିଥିବା ଦଳ ବିଧି ବ୍ୟବସ୍ଥା ପାଳନ ନ କରିବା ଦୁର୍ଭାଗ୍ୟଜନକ ବୋଲି ସେ କହିଥିଲେ ।
ଏସସିବି ଅଗ୍ନିକାଣ୍ଡ ଘଟଣାରେ ମୁଖ୍ୟମନ୍ତ୍ରୀଙ୍କ ପଦକ୍ଷେପକୁ ଶାସକ ଦଳର ବିଧାୟକମାନେ ଯଥାର୍ଥ କହିବା ସହ ଦଳୀୟ କନ୍ଦଳରୁ ନଜର ଫେରାଇବା ପାଇଁ ବିଜେଡି ଏଭଳି କରୁଥିବା କହିଛନ୍ତି । ସ୍ୱାସ୍ଥ୍ୟମନ୍ତ୍ରୀଙ୍କ ଇସ୍ତଫା ଦାବିକୁ ସେମାନେ ବାଏଁ ବାଏଁ ଉଡ଼ାଇ ଦେଇଛନ୍ତି ।
ସୂଚନାଥାଉକି, ଏସସିବି ଅଗ୍ନିକାଣ୍ଡ ଘଟଣାରେ ବିରୋଧୀ ଦଳ ନେତା ନବୀନ ପଟ୍ଟନାୟକ ତାଙ୍କର ଆଭିମୁଖ୍ୟ ସ୍ପଷ୍ଟ କରିଛନ୍ତି । ସ୍ୱାସ୍ଥ୍ୟମନ୍ତ୍ରୀ ମୁକେଶ ମହାଲିଙ୍ଗଙ୍କ ଇସ୍ତଫା ପାଇଁ ସେ ଜିଦ୍ ଧରିଛନ୍ତି । ଗତକାଲି ଗଣମାଧ୍ୟମକୁ ପ୍ରତିକ୍ରିୟାରେ ସେ କହିଥିଲେ ଯେ ଏହି ଭୟଙ୍କର ଅଗ୍ନିକାଣ୍ଡ ଘଟରେ ୧୩ ଜଣ ରୋଗୀଙ୍କର ଜୀବନ ଯିବାର ୯ ଦିନ ବିତିଯାଇଥିଲେ ମଧ୍ୟ ଜଣେ ବି କେନ୍ଦ୍ରମନ୍ତ୍ରୀ ହସ୍ପିଟାଲ୍ ପରିଦର୍ଶନରେ ନ ଆସିବା ଦୁଃଖର କଥା । ତାଙ୍କ ସରକାର ଥିବା ବେଳେ ଘରୋଇ ହସ୍ପିଟାଲରେ ଅଗ୍ନିକାଣ୍ଡ ପାଇଁ ଏକାଧିକ କେନ୍ଦ୍ରମନ୍ତ୍ରୀ ଆସିଥିଲେ । ରାଜ୍ୟ ସ୍ୱାସ୍ଥ୍ୟମନ୍ତ୍ରୀ ତୁରନ୍ତ ଇସ୍ତଫା ଦିଅନ୍ତୁ ବୋଲି ସେ ତାଙ୍କର ଦାବିକୁ ଦୋହରାଇଥିଲେ । ସ୍ୱାସ୍ଥ୍ୟମନ୍ତ୍ରୀ ଇସ୍ତଫା ନ ଦେବା ଯାଏଁ ପ୍ରତିବାଦ ଜାରି ରହିବ ବୋଲି କହିଥିଲେ ।
