ଭୁବନେଶ୍ୱର: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସମ୍ବଲପୁର ଗସ୍ତକୁ ନେଇ ଗତକାଲିଠାରୁ ରାଜ୍ୟ ବିଜେପି ଶିବିରରେ ପ୍ରବଳ ଉତ୍ସାହ ଏବଂ ଉଦ୍ଦୀପନା ସୃଷ୍ଟି ହୋଇଥିଲା । ରାଜ୍ୟରେ ମୁଖ୍ୟ ପ୍ରତିଦ୍ୱନ୍ଦୀ ବିଜେଡି ସରକାର ବିରୋଧରେ ମୋଦୀଙ୍କର ଏହା ନିର୍ବାଚନ ପ୍ରଚାରର ଶୁଭାରମ୍ଭ ବୋଲି ଧୂମ୍ ପ୍ରଚାର ହେଲା । ଆଜି ମୋଦୀଙ୍କ ଆଗମନରେ ବିଜେପି ପକ୍ଷରୁ ଆୟୋଜିତ ମୋଦୀ ଗ୍ୟାରେଣ୍ଟି ଜନସଭାରେ ମନମୋହନ ସାମଲ, ବୈଜୟନ୍ତ ପଣ୍ଡାଙ୍କ ସମେତ ରାଜ୍ୟର ବରିଷ୍ଠ ନେତାମାନେ ନବୀନ ସରକାରଙ୍କ ବିରୋଧରେ ପ୍ରବଳ ବିଷୋଦଗାର କରିଥିଲେ । ବିଜେଡି ସରକାରକୁ ହଟାଇ ରାଜ୍ୟରେ ଡବଲ ଇଞ୍ଜିନ୍ ସରକାର ଗଢ଼ାଯିବ ବୋଲି ଗର୍ଜନ କରିଥିଲେ । ତେବେ ଏହି ଗର୍ଜନ ପାଣି ଫୋଟକା ଥିଲା । ପ୍ରଧାନମନ୍ତ୍ରୀ ମୋଦୀ ସଭାମଞ୍ଚକୁ ଆସିଲା ପରେ ତାଙ୍କ ଭାଷଣରେ ବିଜେଡି ସରକାରଙ୍କ ବିରୋଧରେ ପଦୁଟିଏ ବି କହିଲେ ନାହିଁ । ଓଲଟି ତାଙ୍କ ନିଶାନାରେ ଥିଲା କଂଗ୍ରେସ । କେନ୍ଦ୍ରର ପୂର୍ବ କଂଗ୍ରେସ ସରକାରଙ୍କ ବିରୋଧରେ ପ୍ରବଳ ବର୍ଷିଥିଲେ ପ୍ରଧାନମନ୍ତ୍ରୀ ମୋଦୀ । ଆଉ ପ୍ରଧାନମନ୍ତ୍ରୀଙ୍କ ମୁହଁରୁ ରାଜ୍ୟ ସରକାରଙ୍କ ଉପରେ ପଦୁଟିଏ ନ ଶୁଣି ରାଜ୍ୟ ନେତାମାନଙ୍କ ମୁହଁ ଆମ୍ବିଳା ହୋଇଗଲା । ମୁହଁ ଶୁଖାଇ ସେମାନେ ଘରକୁ ଫେରିଲେ । ରାଜନୈତିକ ମହଲରେ ଏହା ଆଜି ଚର୍ଚ୍ଚାର ବିଷୟ ହୋଇଛି ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ସମ୍ବଲପୁର ଗସ୍ତରେ ଆସି ପ୍ରଥମେ ସରକାରୀ ସଭାରେ ଯୋଗ ଦେଇଥିଲେ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସମେତ ଏଥିରେ ଉପସ୍ଥିତ ଥିଲେ ତିନି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ଅଶ୍ୱିନୀ ବୈଷ୍ଣବ, ବିଶ୍ୱେଶ୍ୱର ଟୁଡୁ ଏବଂ ରାଜ୍ୟପାଳ ରଘୁବର ଦାସ । ପ୍ରଧାନମନ୍ତ୍ରୀ ଆଇଆଇଏମର ସ୍ଥାୟୀ କ୍ୟାମ୍ପସ୍ ର ଲୋକାର୍ପଣ କରିବା ସହ ୬୮ ହଜାର କୋଟି ଟଙ୍କାର ୧୮ ଟି ପ୍ରକଳ୍ପର ଉଦଘାଟନ, ଲୋକାର୍ପଣ ଓ ଶିଳାନ୍ୟାସ କରିଥିଲେ । ଏହି ଅବସରରେ ପ୍ରଧାନମନ୍ତ୍ରୀ ମୋଦୀ ମୁଖ୍ୟମନ୍ତ୍ରୀ ନବୀନଙ୍କୁ ମିତ୍ର ସମ୍ବୋଧନ କରି ସୌଜନ୍ୟତା ଦେଖାଇଥିଲା ବେଳେ ନବୀନ ତାଙ୍କ ଭାଷଣରେ ମୋଦୀଙ୍କର ପ୍ରଶଂସା କରିଥିଲେ । ପ୍ରଧାନମନ୍ତ୍ରୀ ମୋଦୀ ଭାରତବର୍ଷକୁ ଏକ ନୂଆ ଦିଗରେ ଆଗେଇ ନେଉଥିବା ନବୀନ କହିଥିଲେ । ଓଡ଼ିଶାର ସର୍ବାଙ୍ଗୀନ ବିକାଶ ପାଇଁ ତାଙ୍କର ସହଯୋଗ ଲୋଡ଼ିଥିଲେ ।
ଏହାପରେ ପ୍ରଧାନମନ୍ତ୍ରୀ ମୋଦୀ ରେମେଡ୍ ଠାରେ ଦଳୀୟ(ଗ୍ୟାରେଣ୍ଟି) ସମାବେଶରେ ଯୋଗଦେଇଥିଲେ । ପ୍ରଧାନମନ୍ତ୍ରୀ ସେଠାରେ ପହଞ୍ଚିବା ପୂର୍ବରୁ ସେହି ମଞ୍ଚରୁ ରାଜ୍ୟ ନେତାମାନେ ଜଣ ଜଣ କରି ନବୀନ ସରକାରଙ୍କ ବିରୋଧରେ ରଣହୁଙ୍କାର ଦେଇସାରିଥିଲେ । କେବଳ ମୋଦୀଙ୍କ ମୁହଁରୁ ବିଜେଡି ସରକାରଙ୍କ ବିରୋଧରେ ଶୁଣିବାକୁ ଅପେକ୍ଷାରେ ଥିଲେ । ହେଲେ ପ୍ରଧାନମନ୍ତ୍ରୀ ମୋଦୀ ତାଙ୍କ ଭାଷଣରେ ବିଜେଡିକୁ ସମାଲୋଚନା ଦୂରର କଥା ରାଜ୍ୟ ସରକାରଙ୍କ ଉପରେ ପଦୁଟିଏ ବି ମତ ରଖିଲେ ନାହିଁ । ସେ ତାଙ୍କ ଭାଷଣରେ କଂଗ୍ରେସକୁ ସମାଲୋଚନା କରିବା ସହ ବିଜେପି ସରକାର ଓଡ଼ିଶା ପାଇଁ କ’ଣ କ’ଣ କରିଛନ୍ତି ତାହାର ତାଲିକା ଦେଇଥିଲେ । ଓଡ଼ିଶା ଉପରେ ତାଙ୍କ ସରକାରଙ୍କ ଫୋକସ୍ ଥିବା ଅବଶ୍ୟ ସୂଚନା ଦେଇଥିଲେ ମୋଦୀ ।
ପ୍ରଧାନମନ୍ତ୍ରୀ ତାଙ୍କ ଭାଷଣରେ କଂଗ୍ରେସକୁ ନିଶାନା କରି କହିଥିଲେ ଯେ ଓଡ଼ିଶା ବିକାଶରେ ପୂର୍ବରୁ କଂଗ୍ରେସ ସରକାର ବାଧକ ସାଜିଥିଲା । କଂଗ୍ରେସ ଓ ସହଯୋଗୀ ଦଳମାନେ ଓଡ଼ିଆ ମାଟିର ଝିଅ ଦ୍ରୌପଦୀ ମୁର୍ମୁଙ୍କୁ ରାଷ୍ଟ୍ରପତି କରିବା ପାଇଁ ବିରୋଧ କରିଥିଲେ । ଏହା ଦ୍ରୌପଦୀ ମୁର୍ମୁଙ୍କୁ କେବଳ ଅପମାନ ନୁହେଁ, ସାରା ଆଦିବାସୀ ସମ୍ପ୍ରଦାୟ ଏବଂ ଓଡ଼ିଶାବାସୀଙ୍କ ପ୍ରତି ଅପମାନ ଥିଲା ।
ବିଜେପି ହେଉଛି ଗରିବଙ୍କ ଜନକଲ୍ୟାଣକାରୀ ସରକାର । ଓଡ଼ିଶା ପ୍ରତି ବିଜେପି ସରକାରର ଅବଦାନର ଉଲ୍ଲେଖ କରି ମୋଦୀ କହିଥିଲେ, ଓଡ଼ିଶାର ସାଢ଼େ ୩ କୋଟି ଲୋକଙ୍କୁ ମାଗଣାରେ ରାସନ ମିଳୁଛି । ଓଡ଼ିଶାର ୨୫ ଲକ୍ଷ ଲାଭାର୍ଥୀ ପକ୍କା ଘର ପାଉଛନ୍ତି । ଗରିବଙ୍କ ପାଇଁ ଆଉ ୨ କୋଟି ଘର ତିଆରି ହେବ । କୌଣସି ଗରିବ ଭାଇଭଉଣୀ କଚ୍ଚା ଘରେ ରହିବେନି । ଦିଲ୍ଲୀରେ କଂଗ୍ରେସ ସରକାର ଥିବା ବେଳେ ଓଡ଼ିଶାକୁ ତାର ହକ୍ ମିଳୁ ନ ଥିଲା । ଏବେ ଓଡ଼ିଶାର ବିକାଶ ପାଇଁ ଅର୍ଥର ଅଭାବ ନାହିଁ ।
ପୂର୍ବ ସରକାର ଓଡ଼ିଶାର ଗରିବୀକୁ ନେଇ ପ୍ରଚାର କରୁଥିଲା । ସମୃଦ୍ଧ ଓଡ଼ିଶାକୁ ବିକାଶରୁ ବଞ୍ଚିତ କରିଥିଲେ । ମାତ୍ର ଆମ ସରକାର ଓଡ଼ିଶାର ବିକାଶ ପାଇଁ ଅହରହ ଉଦ୍ୟମ କରୁଛି । ଗରିବଙ୍କୁ ଲାଭ ମିଳିବା ବିଜେପି ସରକାରର ପ୍ରାଥମିକତା । ଯାହାର କେହି ନାହିଁ ତା’ ପାଖରେ ମୋଦୀ ଅଛି । ମୋଦୀଙ୍କ ଗ୍ୟାରେଣ୍ଟି ମାନେ ଗ୍ୟାରେଣ୍ଟି ପୂରା ହେବାର ଗ୍ୟାରେଣ୍ଟି ବୋଲି କହିଥିଲେ ପ୍ରଧାନମନ୍ତ୍ରୀ ମୋଦୀ ।
