ଭୁୁବନେଶ୍ୱର: କଳାହାଣ୍ଡି ଜିଲ୍ଲା ନର୍ଲାର ବିଜେଡି ବିଧାୟିକା ମନୋରମା ମହାନ୍ତିଙ୍କ ଭୁବନେଶ୍ୱର ସରକାରୀ କ୍ୱାର୍ଟର୍ସରେ ଆଜି ପଶିଥିଲା ନର୍ଲା ପୁଲିସ । ତାଙ୍କ ସ୍ୱାମୀ ତଥା ନର୍ଲା ବ୍ଲକ୍ ଅଧ୍ୟକ୍ଷ ଦୁର୍ଗା ପ୍ରସନ୍ନ ମହାନ୍ତିଙ୍କୁ ଖୋଜିବାକୁ ଆସିଥିଲା । ମାତ୍ର ତାଙ୍କୁ ନ ପାଇ ପୁଲିସ ଫେରିଯାଇଛି । ନର୍ଲା ତହସିଲଦାର ବିଭୁପ୍ରସାଦ ସିଂହଙ୍କୁ ଦୁର୍ଗା ପ୍ରସନ୍ନ ଫୋନ୍ ରେ ହତ୍ୟା ଧମକ ଦେଇଥିବା ଅଭିଯୋଗ ହୋଇଛି । ମାର୍ଚ୍ଚ ୧୪ ତାରିଖରେ ନର୍ଲା ଥାନାରେ ହୋଇଥିବା ଏତଲା ଭିତ୍ତିରେ ପୁଲିସ ତାଙ୍କୁ ଗିରଫ କରିବାକୁ ଖୋଜୁଛି ।
ଆଜି ନର୍ଲା ପୁଲିସର ଏକ ଟିମ୍ ବିଧାୟିକାଙ୍କ ୟୁନିଟ୍-୪ ସ୍ଥିତ ସରକାରୀ କ୍ୱାର୍ଟର୍ସ ଡି-ଏସ୍/୧୫/୨ ଠିକଣାରେ ଆସି ପହଞ୍ଚିଥିଲା । ସେତେବେଳେ ବିଧାୟିକା ଘରେ ନ ଥିଲେ । ପୁଲିସ କବାଟ ବାଡ଼େଇବାରୁ ଚାକରାଣି କବାଟ ଖୋଲି ମାଡାମ୍ ନାହାନ୍ତି ବୋଲି କହିଥିଲେ ମଧ୍ୟ ସେମାନେ ଶୁଣି ନ ଥିଲେ । ତାଙ୍କୁ ଠେଲି ଭିତରକୁ ପଶିଥିଲେ । ଘର ସର୍ଚ୍ଚ କରି ଫେରି ଆସିଥିଲେ । ଖବର ପାଇ ଯୁବ ବିଜେଡି ସଭାପତି ଚିନ୍ମୟ ସାହୁ, ଛାତ୍ର ବିଜେଡି ସଭାପତି ଇପସିତା ସାହୁ ଏବଂ ବିଜେଡି ନେତା ମନ୍ମଥ ରାଉତରାୟ ସେଠାରେ ପହଞ୍ଚି ପୁଲିସକୁ ଘେରିଥିଲେ । ବିଧାନସଭା ଚାଲିଥିବା ବେଳେ ବାଚସ୍ପତିଙ୍କ ବିନା ଅନୁମତିରେ ଜଣେ ବିଧାୟିକାଙ୍କ ଘରକୁ କେମିତି ପଶିଲେ ବୋଲି ପ୍ରଶ୍ନ କରିଥିଲେ । ସ୍ଥାନୀୟ ପୁଲିସକୁ ମଧ୍ୟ ଏ ସମ୍ପର୍କରେ କେମିତି ସୂଚନା ଦିଆଗଲା ନାହିଁ ବୋଲି ପଚାରିଥିଲେ । ବିଧାୟିକାଙ୍କ ସ୍ୱାମୀଙ୍କୁ ଖୋଜିବାକୁ ଆସିଛନ୍ତି ବୋଲି ଧାଡ଼ିକିଆ ଉତ୍ତର ଦେଇ ପୁଲିସ ଚୁପ୍ ରହିଥିଲା ।
ବିିଜେଡି ନେତାଙ୍କ ଅଭିଯୋଗ ଅନୁଯାୟୀ, ନର୍ଲା ତହସିଲଦାରଙ୍କୁ ବିଧାୟିକାଙ୍କ ସ୍ୱାମୀ ହତ୍ୟା ଧମକ ଦେଇଥିବା ନେଇ ପୁଲିସ ଯାହା କହୁଛି ତାହା ସତ୍ୟ ନୁହେଁ । ଅଢ଼େଇ ମାସ ତଳେ କୌଣସି ଏକ କାମକୁ ନେଇ ତହସିଲଦାରଙ୍କ ସହ ବିଧାୟିକାଙ୍କ ସ୍ୱାମୀ ନର୍ଲା ବ୍ଲକ୍ ଅଧ୍ୟକ୍ଷ ଦୁର୍ଗା ପ୍ରସନ୍ନଙ୍କର ସାମାନ୍ୟ ବଚସା ହୋଇଥିଲା । ତାହାକୁ ତହସିଲଦାର ମଧ୍ୟ ଭୁଲି ଯାଇଥିଲେ । ମାତ୍ର ରାଜ୍ୟସଭା ନିର୍ବାଚନରେ ବିଧାୟିକା ମନୋରମା ମହାନ୍ତିଙ୍କର ଭୋଟ କିଣିବା ପାଇଁ ଶାସକ ଦଳର ଉଦ୍ୟମ ଫେଲ୍ ମାରିଲା ପରେ ସେମାନେ ପ୍ରତିଶୋଧପରାୟଣ ହୋଇଛନ୍ତି । ରାଜ୍ୟସଭା ନିର୍ବାଚନର ପୂର୍ବଦିନ ମାର୍ଚ୍ଚ ୧୫ରେ ବିଧାୟିକାଙ୍କ ସ୍ୱାମୀଙ୍କ ବିରୋଧରେ ଏତଲା ରେଜିଷ୍ଟ୍ରି କରାଯାଇଛି । ସେହି ମାମଲାରେ ତ୍ୱରିତ କାର୍ଯ୍ୟାନୁଷ୍ଠାନ ପାଇଁ ପୁଲିସକୁ ନିୟୋଜିତ କରାଯାଇଛି ।
ବିଧାୟିକା ଶ୍ରୀମତୀ ମହାନ୍ତି ମଧ୍ୟ ଏକ ସାମ୍ବାଦିକସମ୍ମିଳନୀରେ ନର୍ଲା ପୁଲିସର ଗୁଣ୍ଡାଗିରିକୁ ତୀବ୍ର ସମାଲୋଚନା କରିଛନ୍ତି ।
ବିଜେଡି ନେତାଙ୍କ ଅଭିଯୋଗକୁ ଖଣ୍ଡନ କରି ଆଇନ ତା ବାଟରେ ଯାଉଛି ବୋଲି କହିଛନ୍ତି ବିଜେପି ମୁଖପାତ୍ର ଅନିଲ ବିଶ୍ୱାଳ ।
