ଭୁବନେଶ୍ୱର: ଏନଡିଏର ରାଷ୍ଟ୍ରପତି ପ୍ରାର୍ଥୀ ଦ୍ରୌପଦୀ ମୁର୍ମୁଙ୍କ ସମ୍ମାନାର୍ଥେ ଆଜି ବିଜେଡିର ଭବ୍ୟ ଆୟୋଜନ ଆଗରେ ଫିକା ପଡ଼ିଯାଇଛି ରାଜ୍ୟ ବିଜେପି ଶିବିରର ସାମୟିକ ଉତ୍ସାହ । ଦ୍ରୌପଦୀଙ୍କ ପ୍ରାର୍ଥୀତ୍ୱରୁ ଫାଇଦା ନେବା ପାଇଁ ବିଜେପି ପ୍ରଥମରୁ ସୁଯୋଗକୁ ହାତଛଡ଼ା କରିଥିଲା । ଏବେ ଭାବିଲା ବେଳକୁ ଆଉ କିଛି ନାହିଁ । ବରଂ ରାଷ୍ଟ୍ରପତି ପ୍ରାର୍ଥୀ ଚୟନରେ ନବୀନ ପଟ୍ଟନାୟକଙ୍କ ତଥାକଥିତ ଭୂମିକା ଆଡକୁ ଲୋକଙ୍କ ନଜର ଚାଲିଯାଇଛି ।
ଆସନ୍ତା ୧୮ ତାରିଖରେ ରାଷ୍ଟ୍ରପତି ନିର୍ବାଚନ ହେବ । ସବୁ ରାଜ୍ୟ ବୁଲି ନିଜ ପାଇଁ ସମର୍ଥନ ଯୋଗାଡ଼ କରୁଛନ୍ତି ଏନଡିଏ ପ୍ରାର୍ଥୀ ଦ୍ରୌପଦୀ ମୁର୍ମୁ । ଏହିକ୍ରମରେ ଆଜି ସେ ଓଡ଼ିଶା ଆସିଥିଲେ । ବିଜେଡି ପକ୍ଷରୁ ତାଙ୍କୁ ବିମାନବନ୍ଦରଠାରୁ ଆରମ୍ଭ କରି ବିଧାନସଭା ସମ୍ମିଳନୀ କକ୍ଷ ପର୍ଯ୍ୟନ୍ତ ଯେଉଁଭଳି ସ୍ୱାଗତ ସମ୍ବର୍ଦ୍ଧନା ଦିଆଗଲା ତାହା ଅଦ୍ଭୂତପୂର୍ବ ଥିଲା । ଦ୍ରୌପଦୀଙ୍କ ଆଗମନ ପାଇଁ ବିଧାନସଭା ସମ୍ମିଳନୀ କକ୍ଷରେ ଏକ ସଭାର ଆୟୋଜନ କରାଯାଇଥିଲା । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସଭାପତିତ୍ୱରେ ଏହି ବୈଠକରେ ବିଜେଡିର ସବୁ ବିଧାୟକ ଓ ସାଂସଦମାନେ ଉପସ୍ଥିତ ଥିଲେ ।
ବୈଠକରେ ନବୀନଙ୍କୁ ଭାଇ ସମ୍ବୋଧନ କରି ଦ୍ରୌପଦୀ ଦେଇଥିବା ମନ୍ତବ୍ୟ ସେଠାରେ ଭାବବିହ୍ୱଳ ପରିବେଶ ସୃଷ୍ଟି କରିଥିଲା । ସେ କହିଥିଲେ, ଭଉଣୀ ମାଗିବା ପୂର୍ବରୁ ଭାଇ ମନ ଚାହିଁ ସବୁ ଦେଇଥାଏ । ମୁଁ ସୁଭଦ୍ରାଙ୍କ ଭଳି ତାଙ୍କ ହାତରେ ରାକ୍ଷୀ ବାନ୍ଧିଥିଲି । ମୁଁ ମାଗିବା ଆଗରୁ ନବୀନ ପଟ୍ଟନାୟକ ମତେ ସମର୍ଥନ ଦେଇଛନ୍ତି । ଏ ମାଟିର ନାଁକୁ ସ୍ୱର୍ଣ୍ଣାକ୍ଷରରେ ଲେଖିବାକୁ ସେ ଚେଷ୍ଟା କରିଛନ୍ତି, ଏଥିପାଇଁ ସେ ଚିର ନମସ୍ୟ ବୋଲି ଦ୍ରୌପଦୀ କହିଥିଲେ ।
ଦ୍ରୌପଦୀଙ୍କ ଭାଇ ସମ୍ବୋଧନରେ ମୁଖ୍ୟମନ୍ତ୍ରୀ ଭାବବିହ୍ୱଳ ହୋଇପଡ଼ିଥିବା ସହଯୋଗୀ ବିଧାୟକମାନେ କହିଛନ୍ତି । ଦଳର ସବୁ ବିଧାୟକ ଓ ସାଂସଦମାନେ ଦ୍ରୌପଦୀ ମୁର୍ମୁଙ୍କ ସପକ୍ଷରେ ନିର୍ଭୁଲ ମତଦାନ କରିବାକୁ ମୁଖ୍ୟମନ୍ତ୍ରୀ ସମସ୍ତଙ୍କୁ ପୁଣି ଥରେ ଅପିଲ୍ କରିଥିଲେ ।
ସେଠାରେ କାର୍ଯ୍ୟକ୍ରମ ସରିବା ପରେ ଶ୍ରୀମତୀ ମୁର୍ମୁ ରାଜ୍ୟ ଅତିଥି ଭବନ ଯାଇ ବିଜେପି ବିଧାୟକ ଓ ସାଂସଦମାନଙ୍କୁ ଭେଟିଥିଲେ । ମୁଖ୍ୟମନ୍ତ୍ରୀଙ୍କ ନିମନ୍ତ୍ରଣକ୍ରମେ ଏହାପରେ ମଧ୍ୟାହ୍ନ ଭୋଜନ ପାଇଁ ନବୀନ ନିବାସ ଯାଇଥିଲେ ।
ନବୀନ ନିବାସରେ ଦ୍ରୌପଦୀ ମୁର୍ମୁଙ୍କୁ ପାଛୋଟି ନେଇଥିଲେ ମୁଖ୍ୟମନ୍ତ୍ରୀ । କିଛି ସମୟ କଥା ହେବା ପରେ ସେମାନେ ମଧ୍ୟାହ୍ନ ଭୋଜନ ଟେବୁଲ ଉପରେ ବସିଥିଲେ । ସେମାନଙ୍କ ସହ ମଧ୍ୟାହ୍ନ ଭୋଜନ କରିଥିଲେ କେନ୍ଦ୍ରମନ୍ତ୍ରୀ ଗଜେନ୍ଦ୍ର ସିଂହ ଶେଖାୱତ୍ ଏବଂ ସାଂସଦ ପିନାକୀ ମିଶ୍ର । ମଧ୍ୟାହ୍ନ ଭୋଜନ ସାରି ଶ୍ରୀମତୀ ମୁର୍ମୁ ଲକ୍ଷ୍ମୌ ଅଭିମୁଖେ ବାହାରିଥିଲେ ।
