ଦିଲ୍ଲୀରେ ଦ୍ରୌପଦୀ, କାଲି ନାମାଙ୍କନ

ଭୁବନେଶ୍ୱର: ରାଇସିନା ରେସ୍ ପାଇଁ ଦିଲ୍ଲୀରେ ପହଞ୍ଚିଛନ୍ତି ଦ୍ରୌପଦୀ ମୁର୍ମୁ । ରାଷ୍ଟ୍ରପତି ପଦ ପାଇଁ ଆସନ୍ତାକାଲି ସେ ନାମାଙ୍କନପତ୍ର ଦାଖଲ କରିବେ । ଏନଡିଏ ପ୍ରାର୍ଥୀ ଦ୍ରୌପଦୀଙ୍କ ନାମାଙ୍କନ ଦାଖଲ ପ୍ରକ୍ରିୟାରେ ବିଜେଡି ସାମିଲ ହୋଇଛି । ଦଳର ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିର୍ଦ୍ଦେଶକ୍ରମେ ଦୁଇ କ୍ୟାବିନେଟ୍ ମନ୍ତ୍ରୀ ଜଗନ୍ନାଥ ସାରକା ଏବଂ ଶ୍ରୀମତୀ ଟୁକୁନି ସାହୁ ନାମାଙ୍କନପତ୍ରରେ ପ୍ରସ୍ତାବକ ଭାବେ ଦସ୍ତଖତ କରିଛନ୍ତି । ଆସନ୍ତାକାଲି ନାମାଙ୍କନପତ୍ର ଦାଖଲ ବେଳେ ଏହି ଦୁଇ ମନ୍ତ୍ରୀ ସେଠାରେ ଉପସ୍ଥିତ ରହିବେ ।

ଗତକାଲି ଅପରାହ୍ନରେ ରାଇରଙ୍ଗପୁରସ୍ଥିତ ବାସଭବନରୁ ଜେଡ୍ ପ୍ଲସ ସୁରକ୍ଷାରେ ଭୁବନେଶ୍ୱର ଅଭିମୁଖେ ବାହାରିଥିଲେ ଦ୍ରୌପଦୀ । ତାଙ୍କୁ ଭେଟି ଶୁଭେଚ୍ଛା ଜଣାଇବା ପାଇଁ ବାଟ ସାରା ଲୋକଙ୍କ ଭିଡ଼ ଜମିଥିଲା । ସଂଧ୍ୟା ପ୍ରାୟ ୮ଟା ବେଳେ ସେ ଭୁବନେଶ୍ୱରରେ ପହଞ୍ଚିଥିଲେ । ଏମସିଏଲ୍ ଅତିଥି ଭବନରେ ତାଙ୍କ ରହଣୀ ବ୍ୟବସ୍ଥା ହୋଇଥିଲା । ସେଠାରେ ଦ୍ରୌପଦୀ ପହଞ୍ଚିଲା ମାତ୍ରେ ବହୁ ଶୁଭେଚ୍ଛୁଙ୍କ ଗହଳି ହୋଇଥିଲା । ରାଜ୍ୟ ବିଜେପି ସଭାପତି ସମୀର ମହାନ୍ତି, ସାଂସଦ ଅପରାଜିତା ଷଡ଼ଙ୍ଗୀଙ୍କ ସମେତ ଦଳୀୟ ନେତୃବୃନ୍ଦ ଦ୍ରୌପଦୀ ମୁର୍ମୁଙ୍କୁ ଭେଟି ଶୁଭେଚ୍ଛା ଜଣାଇଥିଲେ । 

ଆଜି ବଡି ସକାଳୁ ମଧ୍ୟ ସେଠାରେ ଗହଳି ଆରମ୍ଭ ହୋଇଯାଇଥିଲା । ସୁରକ୍ଷା ବଳୟ ଭିତରେ ଥିବା ଦ୍ରୌପଦୀ ଯେତେ ସମ୍ଭବ ସମସ୍ତଙ୍କ ସହ ମିଶିବାକୁ ଚେଷ୍ଟା କରିଥିଲେ । ଗତକାଲି ରାତିରେ ଓ ଆଜି ସକାଳେ ପ୍ରଜାପିତା ବ୍ରହ୍ମାକୁମାରୀ ଭଉଣୀମାନଙ୍କ ଦ୍ୱାରା ପ୍ରସ୍ତୁତ ଖାଦ୍ୟ ଖାଇଥିଲେ ଦ୍ରୌପଦୀ । ସକାଳ ୯.୩୦ ରେ ସେ ଏମସିଏଲ୍ ଅତିଥି ଭବନରୁ ବାହାରିଥିଲେ । ଭୁବନେଶ୍ୱର ବିମାନବନ୍ଦରରେ ତାଙ୍କୁ ଶୁଭେଚ୍ଛା ଜଣାଇବା ପାଇଁ ବହୁତ ବଡ଼ ଆୟୋଜନ ହୋଇଥିଲା । ଆଦିବାସୀ ପାରମ୍ପରିକ ନୃତ୍ୟଗୀତରେ ଫାଟି ପଡ଼ିଥିଲା ବିମାନ ବନ୍ଦର ଅଞ୍ଚଳ ।

୧୦.୪୦ ରେ ଭିସ୍ତାରା ବିମାନରେ ଦିଲ୍ଲୀ ଯାତ୍ରା କରିଥିଲେ ଦ୍ରୌପଦୀ । ଦିଲ୍ଲୀରେ ପହଞ୍ଚିଲା ପରେ ସେଠାରେ ତାଙ୍କୁ ଭବ୍ୟ ସମ୍ବର୍ଦ୍ଧନା ଦିଆଯାଇଥିଲା । ବର୍ତ୍ତମାନ ଓଡ଼ିଶା ଭବନରେ ଅବସ୍ଥାନ କରୁଛନ୍ତି ସେ । ତାଙ୍କୁ ଶୁଭେଚ୍ଛା ଜଣାଇବା ପାଇଁ ନେତାମାନଙ୍କର ଗହଳି ଲାଗି ରହିଛି । ସଂଧ୍ୟାରେ ପ୍ରଧାନମନ୍ତ୍ରୀ ଓ ଗୃହମନ୍ତ୍ରୀ ଅମିତ୍ ଶାହାଙ୍କୁ ସେ ଭେଟିବାର କାର୍ଯ୍ୟକ୍ରମ ଅଛି ।

ଆସନ୍ତାକାଲି ନାମାଙ୍କନପତ୍ର ଦାଖଲ ପାଇଁ ପ୍ରସ୍ତୁତି ଶେଷ ହୋଇଛି । ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶରେ ଦିଲ୍ଲୀରେ ପହଞ୍ଚି ମନ୍ତ୍ରୀ ଜଗନ୍ନାଥ ସାରକା ଏବଂ ଟୁକୁନି ସାହୁ ନାମାଙ୍କନପତ୍ରରେ ଦସ୍ତଖତ କରିଥିଲେ । ସାଂସଦ ଡ. ସସ୍ମିତ୍ ପାତ୍ର ମଧ୍ୟ ସେଠାରେ ଉପସ୍ଥିତ ଥିଲେ । ଆସନ୍ତାକାଲି ନାମାଙ୍କନପତ୍ର ଦାଖଲ ବେଳେ ଓଡିଶାର ଏହି ଦୁଇ କ୍ୟାବିନେଟ୍ ମନ୍ତ୍ରୀ ଉପସ୍ଥିତ ରହିବେ । ରାଜ୍ୟରୁ ବିଜେପିର ୧୦ ଜଣ ବିଧାୟକ ମଧ୍ୟ ଉପସ୍ଥିତ ରହିବେ ବୋଲି ଦଳୀୟ ସୂତ୍ରରୁ ଜଣାପଡ଼ିଛି ।