ଏହା ଓଡ଼ିଶା ସରକାର ନୁହେଁ, ଅଦାନୀ ସରକାର

କର୍ମୀଙ୍କୁ ଆହ୍ୱାନ- ଲଢ଼ନ୍ତୁ, ମୁଁ ସାଙ୍ଗରେ ଅଛି

ଭୁବନେଶ୍ୱର: କଂଗ୍ରେସର ସର୍ବମାନ୍ୟ ନେତା ରାହୁଲ ଗାନ୍ଧୀ ଆଜି ଭୁବନେଶ୍ୱର ବରମୁଣ୍ଡା ପଡ଼ିଆରେ ଆୟୋଜିତ ସମ୍ବିଧାନ ବଞ୍ଚାଅ ସମାବେଶରେ ଉଦବୋଧନ ଦେଇ ଡବଲ୍ ଇଞ୍ଜିନ୍ ସରକାରଙ୍କ ପୋଲ୍ ଖୋଲିଛନ୍ତି । ରାହୁଲ କହିଛନ୍ତି ଯେ ଏହା ଆପଣଙ୍କ ସରକାର ନୁହେଁ, ଅଦାନୀଙ୍କ ଭଳି ଆରବପତିଙ୍କ ସରକାର । ବିପୁଳ ସମ୍ପଦଭରା ଓଡ଼ିଶାକୁ ଅଦାନୀଙ୍କ ଭଳି ୫/୬ ଜଣ ଉଦ୍ୟୋଗପତିଙ୍କୁ ଲୁଟିବାକୁ ଛାଡ଼ି ଦିଆଯାଇଛି । ଓଡ଼ିଶାର ଜଳ, ଜଙ୍ଗଲ, ଜମି ଏବଂ ଭବିଷ୍ୟତ ସେମାନେ ଲୁଟିବାକୁ ବସିଛନ୍ତି । ଅଦାନୀଙ୍କ ପାଇଁ ମହାପ୍ରଭୁଙ୍କ ନନ୍ଦିଘୋଷ ରଥକୁ ବି ଅଟକେଇ ଦିଆଯାଉଛି । ଏଭଳି ଆରବପତିଙ୍କ ସରକାରକୁ ହଟାଇବାକୁ ପଡ଼ିବ । ମୁଁ ଏହି ସରକାର ବିରୋଧରେ ଲଢ଼ିବାକୁ ପ୍ରସ୍ତୁତ ଅଛି । ଆପଣମାନେ ଆଗକୁ ବଢ଼ନ୍ତୁ । ଲଢ଼ନ୍ତୁ । ଓଡ଼ିଶାର ଭାଗ୍ୟ ବଦଳାନ୍ତୁ ବୋଲି କର୍ମୀମାନଙ୍କୁ ଆହ୍ୱାନ ଦେଇଛନ୍ତି ରାହୁଲ ।

ରାହୁଲ ଗାନ୍ଧୀ ତାଙ୍କ ଭାଷଣରେ ବିଜେପି ସରକାରର ଜନମାରଣ ନୀତି ଉପରେ ବର୍ଷିଥିଲେ । କହିଥିଲେ, ଓଡ଼ିଶାରେ ବିଜେପି ସରକାରଙ୍କ ଏକମାତ୍ର କାର୍ଯ୍ୟ ହୋଇଛି ଗରିବ ଲୋକଙ୍କ ଧନସମ୍ପଦ ଲୁଟିବା । ପ୍ରଥମେ ବିଜେଡି ସରକାର ଲୁଟୁଥିଲା । ଏବେ ବିଜେପି ସରକାର ଲୁଟୁଛି । ବିଜେପି ପୂରା ଦେଶରେ ସମ୍ବିଧାନ ଉପରେ ଆକ୍ରମଣ କରୁଛି । ମହାରାଷ୍ଟ୍ରରେ ନିର୍ବାଚନ ଚୋରି କରି ସରକାର ଗଢ଼ିଛି । ସେଠାରେ ୧ କୋଟି ନୂଆ ଭୋଟର କୁଆଡ଼େ ଆସିଲେ ତାହାର ଉତ୍ତର ମିଳୁନି । ମହାରାଷ୍ଟ୍ର ଭଳି ବିହାରରେ ନିର୍ବାଚନ ଚୋରି କରିବାକୁ ଉଦ୍ୟମ ଚାଲିଛି । ନିର୍ବାଚନ କମିସନ ମୋଦୀ ସରକାରଙ୍କ ହାତବାରିସୀ ହୋଇ ଷଡ଼ଯନ୍ତ୍ର ରଚିଛନ୍ତି । ଓଡ଼ିଶାରେ ମଧ୍ୟ ବିଜେପିର ସେହି ମଡେଲ୍ ।

ରାହୁଲ କହିଥିଲେ, ଓଡ଼ିଶାରେ ୫/୬ ଟି କମ୍ପାନୀ ରାଜ୍ୟକୁ ଲୁଟିବା ପାଇଁ ଛାଡ଼ି ଦିଆଯାଇଛି । ଆଦିବାସୀଙ୍କ ଜଳ, ଜଙ୍ଗଲ, ଜମିକୁ ସରକାର ଏହି ସବୁ ବଡ଼ ବଡ଼ କମ୍ପାନୀ ହାତକୁ ଟେକି ଦେବାକୁ ବସିଛନ୍ତି । ଓଡ଼ିଶାର ଜନତାଙ୍କ ପାଇଁ ବିକାଶ ହେବା ବଦଳରେ ଅଦାନୀଙ୍କ ଭଳି ଧନୀକଙ୍କ ସମ୍ପତ୍ତି ବଢ଼ାଇବା ପାଇଁ ସରକାର କାର୍ଯ୍ୟ କରୁଛନ୍ତି । ମାତ୍ର ଗରିବ, ଚାଷୀ, ମହିଳାଙ୍କ ଦୁଃଖ ଶୁଣିବାକୁ କେହି ନାହାନ୍ତି । ଓଡ଼ିଶାରେ ୪୦ ହଜାରରୁ ଅଧିକ ମହିଳା ଗାଏବ ହୋଇଛନ୍ତି । ଏମାନେ କୁଆଡ଼େ ଗଲେ କେହି ଜାଣିନାହାନ୍ତି । ପ୍ରତିଦିନ ୧୫ ମହିଳାଙ୍କୁ ଦୁଷ୍କର୍ମ ହେଉଛି । ହେଲେ ସରକାରର କିଛି ଦେଣନେଣ ନାହିଁ ।

ରଥଯାତ୍ରା ବିଭ୍ରାଟ୍ କୁ ନେଇ ରାହୁଲ ସିଧାସଳଖ ଗୌତମ ଅଦାନୀଙ୍କ ନାଁ ନେଇଥିଲେ । କହିଥିଲେ, ଅଦାନୀ ଓଡ଼ିଶା ସରକାର ଓ ମୋଦୀଙ୍କୁ ଚଳାଉଛନ୍ତି । ଅଦାନୀ ଆଉ ତାଙ୍କ ପରିବାର ପାଇଁ ମହାପ୍ରଭୁଙ୍କ ରଥ ଅଟକାଯାଉଛି । ଏହା ଓଡ଼ିଶାବାସୀଙ୍କ ଭାବାବେଗ ସହ ଖେଳ । ଏଥିରୁ ବୁଝନ୍ତୁ ଓଡ଼ିଶାରେ ସରକାର କିଏ ଚଳାଉଛି । ଏହା ଆପଣଙ୍କ ନୁହେଁ, ଆରବପତିଙ୍କ ସରକାର । ଏହାର ଲକ୍ଷ୍ୟ ଆପଣଙ୍କ ଜମି, ଜଙ୍ଗଲ ଆଉ ଭବିଷ୍ୟତକୁ ଲୁଟିବା ବୋଲି ରାହୁଲ କହିଥିଲେ ।

ରାହୁଲ କହିଥିଲେ ଯେ ବିକାଶ ଓଡ଼ିଶାର ଜନତାଙ୍କ ପାଇଁ କରିବା ଉଚିତ୍ । ଏଠାକାର ସରକାର ଜଙ୍ଗଲ, ଜମିରୁ ଆପଣଙ୍କୁ ହଟାଉଛି । ତେବେ ନିର୍ଯ୍ୟାତିତ ଲୋକଙ୍କ ପାଇଁ କଂଗ୍ରେସ ଠିଆ ହୋଇ ରହିବ । ଆପଣଙ୍କ ଜମି ପଟ୍ଟା କଂଗ୍ରେସ ହିଁ ଫେରସ୍ତ କରିବ । ମୁଁ ଏହି ସରକାର ବିରୋଧରେ ଲଢ଼ିବାକୁ ଚାହୁଁଛି । ଏଠାକାର ସରକାରକୁ ହଟାଇବାକୁ ଚାହୁଁଛି । କଂଗ୍ରେସର ଲକ୍ଷ୍ୟ ବିକାଶରେ । ଯେତେବେଳେ ବି ଯାହା ହେବ ଆପଣମାନେ ମୋତେ ଡାକିଲେ ମୁଁ ଆସିବି, ଆପଣଙ୍କ ସହ ଛିଡ଼ା ହେବି । ଆପଣମାନେ ଆସନ୍ତୁ । ଆଗକୁ ବଢ଼ନ୍ତୁ । ଓଡ଼ିଶାର ଭାଗ୍ୟ ବଦଳାନ୍ତୁ ବୋଲି ସେ ଆହ୍ୱାନ କରିଥିଲେ ।

ରାହୁଲ ତାଙ୍କ ଭାଷଣରେ ଡ୍ରାଇଭର ମହାସଂଘର ଆନ୍ଦୋଳନ ବିଷୟ ଉଲ୍ଲେଖ କରିଥିଲେ । କହିଥିଲେ, ଡ୍ରାଇଭରଙ୍କ ଉପରେ ଚାପ ପକାଇବାକୁ ଚେଷ୍ଟା ହୋଇଥିଲା । କଂଗ୍ରେସ ସମାବେଶକୁ ଭଣ୍ଡୁର ପାଇଁ ଉଦ୍ୟମ ହୋଇଥିଲା । ମାତ୍ର ଡ୍ରାଇଭର ସଂଘ ତାଙ୍କ କଥା ନ ଶୁଣି କଂଗ୍ରେସକୁ ସମର୍ଥନ କରିଥିବାରୁ ହୃଦୟରୁ ଧନ୍ୟବାଦ । ଡ୍ରାଇଭର ସଂଘର ଦାବି ପୂରଣ ଜରୁରୀ ବୋଲି ସେ କହିଥିଲେ ।

ଏଆଇସିସି ସଭାପତି ମଲ୍ଲିକାର୍ଜୁନ୍ ଖଡଗେ ତାଙ୍କ ଭାଷଣରେ ଓଡ଼ିଶାକୁ ବିଜେପିର ଅବଦାନ କ’ଣ ବୋଲି ପ୍ରଶ୍ନ କରିଥିଲେ । ସେ କହିଥିଲେ, ଭୁବନେଶ୍ୱରକୁ ରାଜଧାନୀ ନେହେରୁ କରିଥିଲେ । ଭୁବନେଶ୍ୱର ଏମସ୍ କଂଗ୍ରେସ ସରକାର ଅମଳରେ ହୋଇଛି । ଭୁବନେଶ୍ୱରରେ ପଦାର୍ଥ ବିଜ୍ଞାନ ପ୍ରତିଷ୍ଠାନ କଂଗ୍ରେସ ସରକାର କରିଛନ୍ତି । ଜଙ୍ଗଲ, ଜମି ଆଇନ କଂଗ୍ରେସ କରିଥିଲା । ସର୍ବୋପରି ରାଜ୍ୟ ତଥା ଦେଶରେ ଯାହା ବିକାଶ ହୋଇଛି, ସବୁ କଂଗ୍ରେସ ଅମଳରେ ହୋଇଛି । ମାତ୍ର ବିଜେପି ଖାଲିଟାରେ ଶ୍ରେୟ ନେବାକୁ ଚେଷ୍ଟା କରୁଛି ।

ସିବିଆଇ ଏବଂ ଇଡିକୁ ପ୍ରଧାନମନ୍ତ୍ରୀ ମୋଦୀ ରାଜନୈତିକ ଅସ୍ତ୍ର ଭାବେ ବ୍ୟବହାର କରୁଥିବାରୁ ସେ ତୀବ୍ର ସମାଲୋଚନା କରିଥିଲେ । ମୋଦୀ ଏ ଯାଏଁ ମଣିପୁର କାହିଁକି ଯାଇନାହାନ୍ତି ବୋଲି ସେ ପ୍ରଶ୍ନ କରିଥିଲେ । ସେହିଭଳି ଗୋପାଳପୁର ଗଣଦୁଷ୍କର୍ମ ମାମଲା ଏବଂ ସରକାରୀ ଅଧିକାରୀଙ୍କୁ ମାଡ଼ ପ୍ରସଙ୍ଗ ଉଠାଇ ଓଡ଼ିଶାର ଡବଲ୍ ଇଞ୍ଜିନ୍ ସରକାରଙ୍କ ଉପରେ ବର୍ଷିଥିଲେ ଖଡଗେ ।

ପିସିସି ସଭାପତି ଭକ୍ତ ଚରଣ ଦାସ ତାଙ୍କ ସ୍ୱାଗତ ଭାଷଣରେ ଡବଲ ଇଞ୍ଜିନ୍ ସରକାର ବିରୋଧରେ ଅଗ୍ନିବର୍ଷି ଭାଷଣ ଦେଇଥିଲେ । ସରକାରଙ୍କ ଦୁର୍ନୀତି, ଭ୍ରଷ୍ଟାଚାର, ଅନ୍ୟାୟ ଅନୀତି ବିରୋଧରେ ଜବରଦସ୍ତ ଲଢ଼େଇ ହେବ ବୋଲି ଘୋଷଣା କରିଥିଲେ ।

ସଭାରେ ଏଆଇସିସି ସମ୍ପାଦକ(ସଂଗଠନ) କେ.ସି.ଭେନୁଗୋପାଳ, ପ୍ରଭାରୀ ଅଜୟ କୁମାର ଲଲ୍ଲୁଙ୍କ ସମେତ ରାଜ୍ୟର ବରିଷ୍ଠ କଂଗ୍ରେସ ନେତୃବୃନ୍ଦ ଉପସ୍ଥିତ ଥିଲେ ।

ସମ୍ବିଧାନ ବଞ୍ଚାଅ ସମାବେଶରେ ଯୋଗଦେବା ପାଇଁ ରାହୁଲ ଗାନ୍ଧୀ ଆଜି ଭୁବନେଶ୍ୱରରେ ପହଞ୍ଚିଲା ପରେ ତାଙ୍କୁ ଭବ୍ୟ ସ୍ୱାଗତ ସମ୍ବର୍ଦ୍ଧନା ଦିଆଯାଇଥିଲା । ସଭାସ୍ଥଳ ବରମୁଣ୍ଡା ପଡ଼ିଆ ଯାଏଁ ବିଭିନ୍ନ ଛକରେ ଦଳୀୟ କର୍ମୀମାନେ ତାଙ୍କୁ ସମ୍ବର୍ଦ୍ଧନା ଜଣାଇଥିଲେ । ରାହୁଲଙ୍କୁ ଦେଖିବା ପାଇଁ ରାସ୍ତା କଡ଼ରେ ପ୍ରବଳ ଭିଡ଼ ହୋଇଥିଲା । ବରମୁଣ୍ଡାରେ ରାହୁଲଙ୍କ ସଭା ଜନସମୁଦ୍ର ପାଲଟିଥିଲା ।

ରାଜ୍ୟରେ ବିଜେପି ସରକାର ଆସିଲା ପରେ ରାହୁଲଙ୍କ ଏହା ପ୍ରଥମ ଓଡ଼ିଶା ଗସ୍ତ ହୋଇଥିବା ବେଳେ ତାଙ୍କୁ ଶୁଣିବା ଏବଂ ସମାବେଶକୁ ସଫଳ କରିବା ପାଇଁ ବିଭିନ୍ନ ସ୍ଥାନରୁ ଦଳୀୟ ନେତା ଓ କର୍ମୀଙ୍କର ଏଭଳି ସୁଅ ବିଜେପି ଏବଂ ବିଜେଡି ଶିବିରିକୁ ଚକିତ କରିଛି । ଓଡ଼ିଶାରେ କଂଗ୍ରେସର ପୁର୍ନଅଭ୍ୟୁଦୟର ଏହା ଆଭାସ ବୋଲି କୁହାଯାଉଛି ।