ଭୁବନେଶ୍ୱର: ମାତ୍ର ୬ ମାସ ତଳେ ବିବାହ କରିଥିବା ସ୍ୱାମୀଙ୍କର ମୃତ୍ୟୁ ତାଙ୍କୁ ଗ୍ରହଣ ହେଲାନି । ଦୁଃଖରେ ଭାଙ୍ଗିପଡ଼ିଲେ । ପେଟରେ ଧରିଥିବା ଛୁଆର ଭବିଷ୍ୟତ ନେଇ ଚିନ୍ତିତ ହୋଇପଡ଼ିଲେ । ଶେଷରେ ନିଜ ଜୀବନ ହାରିବାକୁ ନିଷ୍ପତ୍ତି ନେଇ ଫାଶି ଦେଇଦେଲେ । ତାଙ୍କର ଆୟୁଷ ପୂରି ନ ଥିଲା ବୋଧହୁଏ । ଭଗବାନଙ୍କ କୃପାରୁ ତାଙ୍କ ଜୀବନ ରହିଯାଇଛି । ଗୁରୁତର ଅବସ୍ଥାରେ କଟକ ବଡ଼ ଡାକ୍ତରଖାନାରେ ଚିକିତ୍ସିତ ହେଉଛନ୍ତି । ଏକ ଦୁଃଖୀ ପରିବାରର ଏହି କରୁଣ କାହାଣୀ ସ୍ଥାନୀୟ ଅଞ୍ଚଳବାସୀଙ୍କ ଆଖିରେ ଲୁହ ଭରିଦେଇଛି । ପରିବାରର ଏହି ଅବସ୍ଥା ପାଇଁ ଇମ୍ଫା କର୍ତ୍ତୃପକ୍ଷଙ୍କ ଦାୟିତ୍ୱହୀନତା ଏବଂ ହୃଦୟହୀନତାକୁ ସମସ୍ତେ ଦାୟୀ କରିଛନ୍ତି ।
ଆତ୍ମହତ୍ୟା ଉଦ୍ୟମ କରିଥିବା ଏହି ମହିଳା ହେଉଛନ୍ତି ଦୁଇଦିନ ତଳେ ମୃତ୍ୟୁବରଣ କରିଥିବା ଚୌଦ୍ୱାରସ୍ଥିତ ଇମ୍ଫା କମ୍ପାନୀ ଶ୍ରମିକ ରାକେଶ ମୁଦୁଲିଙ୍କ ପତ୍ନୀ ସୋନାଲି ମୁଦୁଲି(୨୨) । ବର୍ତ୍ତମାନ କଟକ ବଡ଼ ଡାକ୍ତରଖାନାରେ ଜୀବନ ମରଣ ସହ ସଂଘର୍ଷ କରୁଛନ୍ତି । ଡାକ୍ତରମାନଙ୍କ ଉଦ୍ୟମ ଯୋଗୁଁ ତାଙ୍କ ସ୍ୱାସ୍ଥ୍ୟବସ୍ଥାରେ ଉନ୍ନତି ଆସିଥିଲେ ମଧ୍ୟ ବିପଦମୁକ୍ତ ହୋଇନାହାନ୍ତି । ଏହି ଅଘଟଣକୁ ନେଇ ସ୍ଥାନୀୟ ଅଞ୍ଚଳରେ ପ୍ରବଳ ପ୍ରତିକ୍ରିୟା ପ୍ରକାଶ ପାଇଛି ।
ଗତ ୨୮ ତାରିଖରେ ସ୍ୱାମୀଙ୍କର ଅକାଳ ମୃତ୍ୟୁ ପରଠାରୁ ଦୁଃଖରେ ଭାଙ୍ଗିପଡ଼ିଥିଲେ ଗର୍ଭବତୀ ସୋନାଲି । ତାଙ୍କୁ ପରିବାର ଲୋକ ଶାନ୍ତ୍ୱନା ଦେଇ ସମ୍ଭାଳିଥିଲେ । ଆଜି ସକାଳେ ଘର ବାରଣ୍ଡାରେ ବସିଥିବା ବେଳେ ହଠାତ୍ କୋଠରୀ ଭିତରକୁ ଯାଇ ଭିତର ପଟୁ କବାଟ ବନ୍ଦ କରିଦେଇଥିଲେ ଏବଂ ଫ୍ୟାନ୍ ରେ ରସି ଲଗାଇ ଆତ୍ମହତ୍ୟା ଉଦ୍ୟମ କରିଥିଲେ । ଘରଲୋକଙ୍କ ସନ୍ଦେହ ହେବାରୁ ସେମାନେ କବାଟ ଭାଙ୍ଗି ଭିତରେ ଝୁଲନ୍ତା ଅବସ୍ଥାରେ ଦେଖିଥିଲେ । ତୁରନ୍ତ ତାଙ୍କୁ କଟକ ବଡ଼ ଡାକ୍ତରଖାନାକୁ ଆଣିଲା ପରେ ନିଶ୍ଚିତ ମୃତ୍ୟୁରୁ ରକ୍ଷା ପାଇଯାଇଛନ୍ତି । ତାଙ୍କର ଚିକିତ୍ସା ଜାରି ରହିଥିବା ଡାକ୍ତରଖାନା ସୂତ୍ରରୁ ଜଣାପଡ଼ିଛି ।
ସୋନାଲିଙ୍କ ଏହି ଅବସ୍ଥା ପାଇଁ ପରିବାର ଲୋକେ ଇମ୍ଫା କର୍ତ୍ତୃପକ୍ଷଙ୍କୁ ଦାୟୀ କରିଛନ୍ତି । ରାକେଶଙ୍କ ଜୀବନକୁ କମ୍ପାନୀ ମାତ୍ର ୫ ଲକ୍ଷ ଟଙ୍କାରେ ତଉଲିଛନ୍ତି । ୬ ମାସ ତଳେ ତାଙ୍କର ବିବାହ ହୋଇଛି । ପତ୍ନୀ ସୋନାଲି ଏବେ ଗର୍ଭବତୀ । ସ୍ୱାମୀଙ୍କ ରୋଜଗାର ଉପରେ ପରିବାର ଚଳୁଥିଲା । ସ୍ୱାମୀ ଚାଲିଗଲା ପରେ ତାଙ୍କୁ ଚତୁର୍ଦ୍ଦିଗ ଅନ୍ଧାର ଦିଶିଲା । କମ୍ପାନୀ ବାଲା ତାଙ୍କ ସ୍ୱାମୀଙ୍କୁ ନ୍ୟାୟ ଦେବା ବଦଳରେ କ୍ଷତିପୂରଣ ବାବଦ ୫ ଲକ୍ଷ ଟଙ୍କା ଦେବା ତାଙ୍କୁ ଆହୁରି କଷ୍ଟ ଓ ଅପମାନ ଦେଲା ବୋଲି ସେମାନେ ଅଭିଯୋଗ କରିଛନ୍ତି । ଏ ନେଇ ମୃତ ରାକେଶଙ୍କ ଦାଦା ଏବଂ ଭାଇ ଗଣମାଧ୍ୟମକୁ ପ୍ରତିକ୍ରିୟା ଦେଇଛନ୍ତି । କର୍ମଚାରୀଙ୍କ ପ୍ରତି ଇମ୍ଫାର ଦରଦ ନାହିଁ ବୋଲି କାନ୍ଦି କାନ୍ଦି କହିଛନ୍ତି ।
ସୂଚନାଥାଉକି, ଇମ୍ଫା କମ୍ପାନୀର ୱେଲଡିଂ କାର୍ଯ୍ୟରେ ନିୟୋଜିତ ଚୌଦ୍ୱାର ଅନ୍ତର୍ଗତ ବାଣୀପଦା ପଞ୍ଚାୟତ ଚାଙ୍ଗୁଡିଆ ଗ୍ରାମର ରାକେଶ ମୁଦୁଲି(୩୫)ଙ୍କର ଗତ ୨୮ ତାରିଖରେ ସନ୍ଦେହଜନକ ମୃତ୍ୟୁ ହୋଇଥିଲା । କମ୍ପାନୀ ବାବୁମାନଙ୍କର ଦେଖା ନ ମିଳିବାରୁ ପ୍ରବଳ ଉତ୍ତେଜନା ସୃଷ୍ଟି ହୋଇଥିଲା । ମୃତ୍ୟୁର ସଠିକ୍ ତଦନ୍ତ ଏବଂ ୫୦ ଲକ୍ଷ କ୍ଷତିପୂରଣ ଦାବିରେ ଇମ୍ଫା ଗେଟ୍ ଆଗରେ ପରିବାର ଓ ସମ୍ପର୍କୀୟମାନେ ଧାରଣା ଦେଇଥିଲେ । ୧୦ ଘଣ୍ଟା ପରେ ଇମ୍ଫା କର୍ତ୍ତୃପକ୍ଷ ୫ ଲକ୍ଷ ଟଙ୍କା କ୍ଷତିପୂରଣ ଏବଂ ସାନଭାଇକୁ ଚାକିରି ପ୍ରତିଶ୍ରୁତି ଦେଇ ସେମାନଙ୍କୁ ଧାରଣାରୁ ହଟାଇ ଦେଇଥିଲେ ।
ଇମ୍ଫା କମ୍ପାନୀର ଏହି ଅମାନବୀୟ କାର୍ଯ୍ୟକୁ ନେଇ ତାଙ୍କ ପରିବାର ଏବଂ ସ୍ଥାନୀୟ ଅଞ୍ଚଳରେ ପ୍ରବଳ ପ୍ରତିକ୍ରିୟା ପ୍ରକାଶ ପାଇଥିଲା । ୫୦ ଲକ୍ଷ କ୍ଷତିପୂରଣ ମାଗିଥିଲୁ, ହେଲେ ୫ ଲକ୍ଷ ଟଙ୍କା ଦେଇ ଆମକୁ ଭଣ୍ଡାଇଦେଲେ । ସେହି ଟଙ୍କା ପୁଣି କମ୍ପାନୀର ଠିକାଦାର ଦେଇଛନ୍ତି ବୋଲି ରାକେଶଙ୍କ ଦାଦା ଲକ୍ଷ୍ମଣ ମୁଦୁଲି ଅଭିଯୋଗ କରିଥିଲେ । ଇମ୍ଫା ମାଲିକଙ୍କ ପାଇଁ କ’ଣ ଜଣେ ଶ୍ରମିକଙ୍କ ଜୀବନର ମୂଲ୍ୟ ୫ ଲକ୍ଷ ଟଙ୍କା କି ବୋଲି ଗ୍ରାମବାସୀମାନେ ପ୍ରଶ୍ନ କରିଥିଲେ ।
