ଶୁଣିଲି ଯେ ଆପଣମାନେ ସେପ୍ଟେମ୍ବର ୨୫ ତାରିଖକୁ ଭାରତ ବନ୍ଦ ଡାକରା ଦେଇଛନ୍ତି । ଶାନ୍ତିପୂର୍ଣ୍ଣ ଭାବେ ବିରୋଧ କରିବା ଆପଣମାନଙ୍କର ଲୋକତାନ୍ତ୍ରିକ ଅଧିକାର ଅଟେ । ମୋ କାମ ହେଉଛି ସରକାରଙ୍କ ସହ ଆପଣମାନଙ୍କର ବି ଭୁଲ୍ ଦର୍ଶାଇବା । ଭାରତ ବନ୍ଦ ପାଇଁ ସେପ୍ଟେମ୍ବର ୨୫ ତାରିଖକୁ ବାଛି ଆପଣମାନେ ଭୁଲ୍ କରିଛନ୍ତି । ୨୫ ସେପ୍ଟେମ୍ବରକୁ ଫିଲିମ୍ ଅଭିନେତ୍ରୀ ଦୀପିକା ପାଦୁକୋନଙ୍କୁ ଡକାଯାଇଛି । ନାର୍କୋଟିକ୍ସ କଣ୍ଟ୍ରୋଲ ବ୍ୟୁରୋ ନିଶା ସେବନ ଭଳି ଏକ ଗମ୍ଭୀର ବିଷୟକୁ ନେଇ ତାଙ୍କୁ ଏକ ଦୀର୍ଘ ପଚରାଉଚରା କରିବ । ୨୦୧୪ ପର ଠାରୁ ଯେଉଁ ନିଉଜ୍ ଚାନେଲଠାରୁ ଆପଣମାନେ ରାଷ୍ଟ୍ରବାଦ ଓ ସାଂପ୍ରଦାୟିକ ଜନମଘୁଟି ପିଇ ଆସୁଛନ୍ତି, ସେହିମାନେ ଏବେ ଆପଣମାନଙ୍କୁ ଛାଡି ଦୀପିକାର ଯିବା-ଆସିବା ଠାରୁ ଆରମ୍ଭ କରି ଖାଇବା-ପିଇବା ପର୍ଯ୍ୟନ୍ତ କଭର କରିବେ । ଅତି ବେଶିରୁ ବେଶି ଆପଣମାନେ ସେହି ଟିଭି ଚ୍ୟାନେଲ ମାନଙ୍କୁ ଏତିକି ମାତ୍ର ଅନୁରୋଧ କରିପାରିବେ ଯେ ସେମାନେ ଦୀପିକାକୁ ପଚାରନ୍ତୁ ସେ ଭାରତୀୟ କୃଷକମାନଙ୍କ ଦ୍ବାରା ଉତ୍ପାଦିତ ଖାଦ୍ୟ ଖାଆନ୍ତି ନା ଇଉରୋପର କୃଷକ ଉପୁଜାଉଥିବା ଖାଦ୍ୟ ଖାଆନ୍ତି । ବାସ୍, ଏହା ହେଉଛି ଗୋଟିଏ ମାତ୍ର ପ୍ରଶ୍ନ ଯାହା ଜରିଆରେ ୨୫ ସେପ୍ଟେମ୍ବର ଦିନ ସେମାନଙ୍କ ଦ୍ବାରା କୃଷକମାନଙ୍କ କଥା କଭର କରିବାର ସମ୍ଭାବନା ରହିଛି । ଏହାଦ୍ବାରା କୃଷକମାନଙ୍କ କଥା ବ୍ରେକିଂ ନ୍ୟୁଜ୍ ହୋଇପାରିବ । ନହେଲେ ନାହିଁ ।
ଆପଣ ଭାରତ ବନ୍ଦ କରିବେ । ଆପଣଙ୍କ ଭାରତ ବନ୍ଦ ପୂର୍ବରୁ ନିଉଜ ଚାନେଲମାନେ ଆପଣମାନଙ୍କୁ ଭାରତରେ ବନ୍ଦ କରି ସାରିଛନ୍ତି । ଚାନେଲମାନଙ୍କର ଭାରତରେ ବେରୋଜଗାର ବନ୍ଦ ଅଛି । ଯେଉଁମାନଙ୍କ ଚାକିରି ଯାଇଛି ସେମାନେ ବନ୍ଦ ଅଛନ୍ତି । ଏହି ଭଳି ଆପଣ ଚାଷୀ ମାନେ ବି ବନ୍ଦ ଅଛନ୍ତି । ଆପଣମାନଙ୍କ ପାଇଁ କିଛି ଜାଗା ହୁଏତ ଖବରକାଗଜର ଜିଲ୍ଲା ସଂସ୍କରଣରେ ବଞ୍ଚିଛି ଯେଉଁଠି ଆପଣମାନଙ୍କ ସମ୍ପର୍କରେ ଇଆଡୁ ସିଆଡୁ ଖବର ଥିବ ଯାହାର କୈାଣସି ମାନେ ନ ଥିବ । ସେହି ଖବରରେ ଆପଣଙ୍କ ଗାଁର ନାମ ଥିବ, ଆପଣମାନଙ୍କ ମଧ୍ୟରୁ ଦୁଇ ଚାରି ଜଣଙ୍କ ନାଁ ଥିବ, ଟ୍ରାକ୍ଟରର ଫଟୋ ଥିବ, ଜଣେ ବୁଢୀ ମହିଳା ବିଷୟରେ ଗୋଟିଏ କଲମର ଲେଖା ଥିବ । ଜିଲ୍ଲା ସଂସ୍କରଣର କଥା ଏଇଥିପାଇଁ କହିଲି ଯେ ଆପଣମାନେ ଆଉ ରାଷ୍ଟ୍ରୀୟ ସଂସ୍କରଣର ଯୋଗ୍ୟ ହୋଇ ରହି ନାହାନ୍ତି । ନ୍ୟୁଜ ଚାନେଲରେ ଆପଣ ସମସ୍ତଙ୍କର ଭାରତ ବନ୍ଦକୁ ସ୍ପିଡ୍ ନ୍ୟୁଜରେ ଯଦି ଜାଗା ମିଳି ଯାଏ ତେବେ ସେହି ଖୁସିରେ ଆପଣ ଗୋଟିଏ ଛୋଟ ଗାଁ ବନ୍ଦ କରି ଦିଅନ୍ତୁ ।
୨୫ ସେପ୍ଟେମ୍ବର ଦିନ ରାଷ୍ଟ୍ରୀୟ ଚାନେଲର ମଲ୍ଲିକା ଦୀପିକାଜୀ ହେବେ । ସେଦିନ ସେ ଯେତେବେଳେ ଘରୁ ବାହାରିବେ ସେତେବେଳେ ରାସ୍ତାରେ ଟ୍ରାଫିକ ପୋଲିସ ଜାଗାରେ ରିପୋର୍ଟର ଠିଆ ହୋଇଥିବେ । ଯଦି ସେ ଉଡାଜାହାଜରେ ଉଡ଼ି ମୁମ୍ବାଇରେ ପହଞ୍ଚିବେ ତାହେଲେ ଜାହଜରେ ତାଙ୍କ ବ୍ୟତୀତ ଆଉ ଯେତେ ସିଟ୍ ଖାଲି ଥିବ ସେସବୁରେ ରିପୋର୍ଟର ଥିବେ । ତାଙ୍କ ଗାଡିଠାରୁ ଆରମ୍ଭ କରି ଶାଢ଼ୀ ପର୍ଯ୍ୟନ୍ତ ଚର୍ଚ୍ଚା ହେବ । ନ୍ୟୁଜ ଚାନେଲରେ ତାଙ୍କ ଫିଲିମର ଗୀତ ଚାଲିବ । ଦୀପିକା ଯଦି କୈାଣସି ଫିଲିମରେ ମଦ କିମ୍ବା ନିଶାର ସିନ୍ କରିଥିବେ ତାହେଲେ ତାହା ହିଁ ଦିନସାରା ଚାଲିବ ।
୨୦୧୭ ମସିହା କଥା ମନେ ପକାନ୍ତୁ । ସଞ୍ଜୟ ଲୀଳା ଭଁଷାଳୀଙ୍କ ଫିଲିମ୍ ପଦ୍ମାବତ୍ ରିଲିଜ୍ ହେବାର ଥିଲା । ତାକୁ ନେଇ ଗୋଟିଏ ଜାତି ବିଶେଷର ଲୋକେ ବବାଲ୍ ତିଆରି କଲେ । ତାକୁ ନେଇ ଅନେକ ସପ୍ତାହ ଧରି ଟିଭିରେ ଡିବେଟ୍ ଚାଲିଲା । ସେତେବେଳେ ଆପଣମାନେ ବି ସେହି କଭରେଜରେ ନିଜକୁ ହଜାଇ ଦେଇଥିଲେ । ହରିଆଣା, ଗୁଜୁରାଟ ଓ ମଧ୍ୟପ୍ରଦେଶ ସମେତ ଅନେକ ରାଜ୍ୟରେ ସେହି ଫିଲିମର ପ୍ରଦର୍ଶନ ରୋକିବା ପାଇଁ ହିଁସା ହୋଇଥିଲା । ଦୀପିକାଙ୍କର ମୁଣ୍ଡ କାଟ ପାଇଁ ୫ କୋଟି ଟଙ୍କାର ପୁରସ୍କାର ଘୋଷଣା ହୋଇଥିଲା । ସେହି ଦୀପିକା ଏବେ ଯେତେବେଳେ ନାର୍କୋଟିକ୍ କଣ୍ଟ୍ରୋଲ୍ ବ୍ୟୁରୋ ଯିବେ ସେତେବେଳେ ଚାନେଲମାନଙ୍କ କ୍ୟାମେରା ସବୁ ତାଙ୍କ ପାଦକୁ ଚୁମା ଦେବେ । ସେମାନଙ୍କ ରେଟିଙ୍ଗ୍ ଆକାଶଛୁଆଁ ହେବ । କୃଷକଙ୍କ ପ୍ରସଙ୍ଗରେ ଚାନେଲମାନଙ୍କୁ କିଛି ମିଳିବ ନାହିଁ । ଏମିତି ବି ଅନେକ ଆଙ୍କର୍ ଖାନା କମ୍ ଖାଆନ୍ତି । ସେମାନଙ୍କ ଫିଟନେସ୍ ଜଣାଉଛି ଯେ ସେମାନେ ଆପଣଙ୍କ ଖାଦ୍ୟରୁ ମୁଠିଏ ମାତ୍ର ଖାଉଥିବେ । କ୍ଷେତରେ କୀଟ ଆକ୍ରମଣ ହେବ ତ ଏହି ଆଙ୍କର୍ ମାନଙ୍କୁ ଡାକି ନେବେ । ଜଣେ ଆଙ୍କର୍ ତ ଏତେ ଜୋରରେ ହଲ୍ଲା କରୁଛି ଯେ ତା’ର ଚିତ୍କାରରେ ସବୁ କୀଟ ପାକିସ୍ତାନ ଫେରିଯିବେ । ଆପଣଙ୍କୁ ଥାଳି ବଜେଇବାକୁ କି ଡିଜେ ବଜେଇବାକୁ ଦରକାର ପଡିବ ନାହିଁ ।
୨୦୧୪ ଠାରୁ ଆପଣ ଚାଷୀଭାଇମାନେ ତ ଏହିସବୁ ନ୍ୟୁଜ୍ ଚାନେଲରେ ଦେଖି ଆସୁଛନ୍ତି । ଯେତେବେଳେ ଆଙ୍କର୍ ଗୋରକ୍ଷାକୁ ନେଇ ଭଡକାଇବା ଭଳି କଭରେଜ କରୁଥିଲେ ସେତେବେଳେ ଆପଣମାନଙ୍କର ବି ତ ରକ୍ତ ଗରମ ହେଉଥିଲା । ସେତେବେଳେ ଆପଣମାନଙ୍କୁ ଲାଗୁଥିଲା ଆପଣ ଆଉ କେତେ ସମୟ ବିଲବାଡ଼ି କରିବେ , କିଛି ଧର୍ମର ବି ରକ୍ଷା ବକ୍ଷା ହେଇଯାଉ । ଧର୍ମ ନାଁରେ ଘୃଣାର ଅଫିମ ଆପଣମାନଙ୍କୁ ଧରେଇ ଦିଆଗଲା । ବିଚାର ଜାଗାରେ ଖଣ୍ଡା ବୁଲାଇବା ପାଇଁ ଆପଣମାନଙ୍କ ମଧ୍ୟରେ ଯୋଶ୍ ଭରି ଦିଆଗଲା । ଆପଣଙ୍କୁ ଲାଗିଲା ଆପଣଙ୍କ ତାକତ ବଢି ଯାଇଛି । ଆପଣଙ୍କ ମଧ୍ୟରୁ ନବଯୁବକଙ୍କୁ ହ୍ବାଟସପ୍ ରେ ଯୋଡ଼ି ଭିଡ଼ରେ ପରିଣତ କରି ଦିଆଗଲା ।
ମୁଁ ଗଣିକରି ତ କହିପାରିବି ନାହିଁ ଯେ ଆପଣମାନଙ୍କ ମଧ୍ୟରୁ କେତେଜଣ ସେତେବେଳେ ସାମ୍ପ୍ରଦାୟିକ ହୋଇ ଯାଇଥିଲେ କିନ୍ତୁ ଯେତେଜଣ ବି ହୋଇଥିଲେ ଏବେ ତାହା ପାଇଁ ଆପଣ ସମସ୍ତଙ୍କୁ ଏବେ ମୂଲ୍ୟ ଦେବାକୁ ପଡ଼ିବ । ଏ ବାବଦରେ ଆପଣମାନଙ୍କୁ ଏଇଥିପାଇଁ ଚିଠି ଲେଖୁଛି ଯେ ୨୫ ସେପ୍ଟେମ୍ବରକୁ ଆପଣଙ୍କୁ କଭରେଜ ନ ମିଳିଲେ ଆପଣ ଆଉ ଅଭିଯୋଗ କରିବେ ନାହିଁ । ଆପଣ ଏହି ଗୋଦି ମିଡିଆରେ ଜନତାଙ୍କୁ କେବେ ଦେଖିଛନ୍ତି ଯେ ? ୧୭ ସେପ୍ଟେମ୍ବରରେ ଯେଉଁ ବେରୋଜଗାରମାନେ ଆନ୍ଦୋଳନ କରିଥିଲେ ସେମାନେ ବି ତ ଆପଣମାନଙ୍କ ପିଲା ଥିଲେ । ସେମାନଙ୍କର କ’ଣ କଭରେଜ୍ ହୋଇଥିଲା ? କ’ଣ ସେମାନଙ୍କ ବିଷୟକୁ ନେଇ ଡିବେଟ୍ ହେବା ଆପଣମାନେ ଦେଖିଛନ୍ତି ?
ମନେ ପକାନ୍ତୁ ମୁଜାଫରନଗରରେ ଯେତେବେଳେ ଦଙ୍ଗା ହୋଇଥିଲା । ଗୋଟିଏ ଘଟଣାକୁ ନେଇ କୁପ୍ରଚାର ଦ୍ବାରା କିପରି ଆପଣମାନଙ୍କ ମଧ୍ୟରେ ଘୃଣା ଭରି ଦିଆ ଯାଇଥିଲା । ଯେତେବେଳେ ଆପଣଙ୍କୁ ସାମ୍ପ୍ରଦାୟିକ ବନାଇ ଦିଆଯାଏ ସେତେବେଳେ ଆପଣଙ୍କୁ ଗୁଲାମ ବନାଇ ଦିଆଯାଇଥାଏ । ଆଜି ବି ଦୁଇ ଚାରିଟା ଗୁଜବ ଦ୍ବାରା ଆପଣମାନଙ୍କୁ ଭିଡ଼ରେ ପରିଣତ କରି ଦିଆଯାଇ ପାରିବ । ହ୍ବାଟସପରେ ନମ୍ବର ଯୋଡ଼ି ଯୋଡ଼ି ଏକ ସମୂହ ବନାଇ ଦିଆଯାଏ । ପୁଣି ଆସିବାକୁ ଲାଗିବ ଆପଣଙ୍କ ପାଖକୁ କିସମ କିସମର ମିଥ୍ୟା ମେସେଜ୍ । ଯେମିତି ଆପଣଙ୍କ ଫୋନ୍ ରେ କେତେଥର ମେସେଜ୍ ଆସିଥିବ ଯେ ନେହେରୁ ମୁସଲମାନ ଥିଲେ । ଯେଉଁମାନେ ଏସବୁ କରୁଥିଲେ ସେମାନେ ଜାଣି ସାରିଛନ୍ତି ଯେ ଆପଣମାନଙ୍କୁ ସାଂପ୍ରଦାୟିକ ବନେଇବାର କାମ ପୁରା ହୋଇ ସାରିଛି । ଆପଣ ଯେତେ ବି ଆନ୍ଦୋଳନ କରନ୍ତୁ, ସାଂପ୍ରଦାୟିକତାର ଗୋଟିଏ ବଟମ୍ ଦବାଯିବ ଏବଂ ଗାଁକୁ ଗାଁ ଭିଡ଼ରେ ପରିଣତ ହୋଇଯିବ । ଗାଁରେ ପଚାରି ନିଅନ୍ତୁ ରବୀଶକୁମାର ସତ କହିଥିଲା କି ନାହିଁ ।
ସତରେ ଆମ ଦେଶ ଆମର ବହୁତ ପ୍ରୀୟ । ଏହା ଭିତରେ ଅନେକ ଜିନିଷର ଅଭାବ ଅଛି । ଏହାର ଲୋକତନ୍ତ୍ରରେ ବି ଅନେକ ଅଭାବ ଅଛି । କିନ୍ତୁ ଏହାର ଲୋକତନ୍ତ୍ରର ପରିବେଶରେ କୈାଣସି ଅଭାବ ନଥିଲା । ମିଡ଼ିଆର ଚକ୍କରରେ ଆସି ଯେଉଁ ଗୋଷ୍ଠି ଏହାକୁ ଖତମ କରିଛନ୍ତି ସେମାନଙ୍କ ମଧ୍ୟରେ ଆପଣମାନେ ବି ଅଛନ୍ତି । ଆପଣମାନେ ଜଣକୁ ଭୋଟ ଦେଉଥିଲେ ଓ ଅନ୍ୟକୁ ପାଖରେ ବସାଉଥିଲେ । ଏବେ ଆପଣ ତାହା କରୁନାହାନ୍ତି । ଆପଣଙ୍କ ମନରୁ ବିକଳ୍ପ ଶବ୍ଦଟି ଲିଭେଇ ଦିଆଯାଇ ସରିଛି । ଆପଣ ଏବେ ଜଣକୁ ଭୋଟ ଦେଉଛନ୍ତି ଓ ଅନ୍ୟକୁ ଲାଠି ମାରି ହଟାଇ ଦେଉଛନ୍ତି । କେବଳ ଆପଣମାନେ ନୁହନ୍ତି, ଏମିତି ବହୁତ ଲୋକ କରିବାରେ ଲାଗିଛନ୍ତି । ଯେମିତି ଆପଣଙ୍କ କଥାବାର୍ତ୍ତାରୁ ବିକଳ୍ପ ଶବ୍ଦଟି ହଟି ଯାଉଛି, ସେତିକିବେଳେ ବିପକ୍ଷ ଖତମ ହୋଇ ଚାଲୁଛି । ବିପକ୍ଷ ଖତମ ହେବା ସଙ୍ଗେ ସଙ୍ଗେ ଜନତା ମଧ୍ୟ ଖତମ ହେବା ମନେ ହେଉଛି । ବିପକ୍ଷକୁ ଜନତା ତିଆରି କରେ । ବିପକ୍ଷକୁ ମାରି ଜନତା କେବେ ଠିଆ ହୋଇ ପାରିବ ନାହିଁ । ମୋର ଏହି କଥାକୁ ଗାଢ଼ ରଙ୍ଗରେ ନିଜ ଗାଁର କାନ୍ଥରେ ଲେଖି ଦିଅନ୍ତୁ ଏବଂ ପିଲାମାନଙ୍କୁ କହି ଦିଅନ୍ତୁ ଯେ ଆପଣମାନଙ୍କ ଦ୍ବାରା ଭୁଲ୍ ହୋଇ ଯାଇଛି ଯାହା ସେମାନେ ଯେମିତି ନ କରିବେ ।
କୃଷକମାନଙ୍କ ପାଖରେ କେବେ ବି କୈାଣସି ତାକତ ନଥିଲା । ଗୋଟିଏ ବୋଲି ତାକତ ଥିଲା ଯେ ସେମାନେ ହେଉଛନ୍ତି କୃଷକ । କୃଷକର ଅର୍ଥ ଜନତା । କୃଷକ ରାସ୍ତାକୁ ଓହ୍ଲାଇବ, ଏହା ଗୋଟିଏ ସମୟରେ ଏକ ଶକ୍ତ ଚେତାବନୀ ହେଉଥିଲା । ହେଡଲାଇନ୍ ହେଉଥିଲା । ଖବରକାଗଜ ଠାରୁ ଆରମ୍ଭ କରି ନ୍ୟୁଜ୍ ଚାନେଲ ପର୍ଯ୍ୟନ୍ତ ଥରୁଥିଲେ । ଏବେ ଆପଣ ଆଉ ଜନତା ନୁହଁନ୍ତି । ଯେତେବେଳେ ଆପଣ ଜନତା ବନିବାକୁ ଚେଷ୍ଟା କରିବେ ଚାନେଲଗୁଡିକରେ ଦୀପିକା ର କଭରେଜ ବଢିଯିବ । ଏହା ସହିତ ଆପଣଙ୍କ ପିଠିରେ ଲାଠି ଚାଲିବା ଆରମ୍ଭ ହୋଇଯିବ । ମୋକଦ୍ଦମା ରୁଜ୍ଜୁ ହେବା ଆରମ୍ଭ ହୋଇଯିବ । ଭାରତ ବନ୍ଦ ସମୟରେ ଆପଣଙ୍କୁ ଖୁବ୍ କ୍ୟାମେରାମ୍ୟାନ୍ ଦେଖାଯିବେ କିନ୍ତୁ କଭରେଜ ଦେଖାଯିବ ନାହିଁ । ଏଣୁ ନିଜ ଭାରତ ବନ୍ଦ ଆନ୍ଦୋଳନର ଭିଡିଓ ବନେଇ ନିଅନ୍ତୁ ଯେପରି କି ଆପଣଙ୍କ ଗାଁରେ ଭାଇରାଲ୍ ହୋଇ ପାରିବ ।
ଆପଣଙ୍କୁ ଏହି ଚାନେଲମାନେ ଏକ ଶସ୍ତା ଭିଡ଼ରେ ପରିଣତ କରି ଦେଇଛନ୍ତି । ଆପଣ ସହଜରେ ସେହି ଭିଡରୁ ବାହାରି ଆସି ପାରିବେ ନାହିଁ । ମୋ କଥାରେ ଯଦି ବିଶ୍ବାସ ନ ହେଉଛି ତେବେ ଚେଷ୍ଟା କରି ଦେଖି ନିଅନ୍ତୁ । ମୋଦିଜୀ କହିଛନ୍ତି ଯେ ଏହି ତିନୋଟି କାନୁନ୍ ଆପଣମାନଙ୍କ ଆଜାଦୀ ପାଇଁ ଅଣା ଯାଇଛି । ଏହା ଉପରେ ପକ୍ଷ-ବିପକ୍ଷ ଆଲୋଚନା ହୋଇପାରେ । ଯେଉଁ ପତ୍ରକାରମାନେ ଆପଣଙ୍କ କ୍ଷେତରେ ଆଖୁ ଭାଙ୍ଗି ଫ୍ରିରେ ଖାଇବାର ଫଟୋ ଉଠାଇଥିଲେ ସେମାନେ ଏବେ ସରକାରଙ୍କ ପକ୍ଷରେ କହୁଛନ୍ତି । ମୁଁ ତ କହୁଛି କାହିଁକି ଏ ଭାରତ ବନ୍ଦ କରୁଛନ୍ତି, ଏହି ଆଙ୍କର୍ ମାନଙ୍କ ଠାରୁ କ୍ଷେତବାଡି ଶିଖିନିଅନ୍ତୁ । ସେଇମାନଙ୍କ ଠାରୁ ବୁଝି ଯାଆନ୍ତୁ ।
ଶାସ୍ତ୍ରୀଜୀଙ୍କର ଗୋଟିଏ ଆହ୍ଵାନରେ ଆପଣମାନେ ଜୀବନ ଲଗେଇ ଦେଇଥିଲେ । ସେ ଗୋଟିଏ ସ୍ଲୋଗାନ ଦେଇଥିଲେ ଜୟ ଜବାନ୍ ଜୟ କିଷାନ୍ । ତାଙ୍କ ପରେ ଯେବେ ବି ଏହି ସ୍ଲୋଗାନ ଦିଆଯାଉଛି କିଷାନର ପକେଟମାର ହୋଇଯାଉଛି । ନେତାମାନଙ୍କୁ ଜଣା ପଡିଗଲାଣି ଯେ ଆମ କିଷାନ୍ ବହୁତ ଭୋଳା । ଭାବୁକତାରେ ଆସି ଯାଆନ୍ତି । ଦେଶ ପାଇଁ ବେଟା ଓ ଶସ୍ୟ ସବୁ ଦେଇଦେବ । ଆପଣଙ୍କ ଏହି ଭୋଳାପଣ ପ୍ରକୃତରେ ବହୁତ ସୁନ୍ଦର । ଆପଣ ଏହିପରି ଭୋଳା ହୋଇ ରହିଥାନ୍ତୁ । ସବୁ ନ୍ୟୁଜ୍ ଚାନେଲଙ୍କ ଦ୍ବାରା ବନାଯାଇଥିବା ପିଆଦା ଭଳି ରହିଲେ କେମିତି ଚଳିବ ? ବାସ୍, ଯେବେ ବି କୈାଣସି ନେତା ଜୟ ଜବାନ୍ ଜୟ କିଷାନ ସ୍ଲୋଗାନ ଦେବ ଆପଣମାନେ ନିଜ ପକେଟକୁ ଜାବୁଡି ଧରନ୍ତୁ ।
ଆପଣ ତ ବହୁ ଦିନରୁ ପ୍ରଦର୍ଶନ କରି ଆସୁଛନ୍ତି । ନ୍ୟୁଜ ଚାନେଲ ଚାହିଁଥିଲେ ସେବେଠାରୁ ଡିବେଟ୍ କରିଥାନ୍ତେ । ବାକି କୃଷକଙ୍କୁ ଜଣା ପଡ଼ିଥାନ୍ତା ଯେ କ’ଣ ଆଇନ୍ ଆସୁଛି, କ’ଣ ହେବ ଓ କ’ଣ ନ ହେବ । କିନ୍ତୁ ତାହା ହେଲା ନାହିଁ । ମୁଁ ତ କହିଥିଲି ଯେ ନ୍ୟୁଜ୍ ଚାନେଲ ଓ ଖବରକାଗଜ କିଣିବା ବନ୍ଦ କରି ଦିଅନ୍ତୁ । ସେହି ପଇସା ପ୍ରଧାନମନ୍ତ୍ରୀ ରିଲିଫ ପାଣ୍ଠିକୁ ଦେଇ ଦିଅନ୍ତୁ । କିନ୍ତୁ ଆପଣମାନେ ମୋ କଥା ମାନିଲେ ନାହିଁ । ଯିଏ ଗୋଲାମ ମିଡ଼ିଆର କ୍ରେତା ହୁଏ ତାକୁ ବି ଗୋଲାମ ବୋଲି ବୁଝାଯାଏ । ଏମିତି ବି ମଇ ୨୦୧୫ରୁ ପ୍ରଧାନମନ୍ତ୍ରୀ ଆପଣମାନଙ୍କ ପାଇଁ କିଷାନ ଚାନେଲ ଆରମ୍ଭ କରିଛନ୍ତି । ଭାବୁଛି ଆପଣମାନେ ତାକୁ ଦେଖୁଥିବେ ।
ଏହି ଚିଠିଟି ଲମ୍ବା ହୋଇଗଲା । ଆପଣଙ୍କ ବିଷୟରେ କିଛି ତ ଛପିବ ନାହିଁ କି ଦେଖାଯିବ ନାହିଁ । ସେଇଥିପାଇଁ ଏ ଲମ୍ବା ଚିଠି ଲେଖିଲି ଯାହା ଫଳରେ ୨୫ ତାରିଖରେ ଆପଣ ଏହାକୁ ହିଁ ପଢୁଥିବେ । ମୋର ଏ ଚିଠି କୃଷି ଆଇନ୍ ବିଷୟରେ ନୁହେଁ । ଏ ଚିଠି ସେହି ମିଡ଼ିଆ ସଂସ୍କୃତି ବିଷୟରେ ଯେଉଁଠି ଜଣେ ଚଳଚ୍ଚିତ୍ର ଅଭିନେତାର ମୃତ୍ୟୁ ବାହାନାରେ ବଲିଉଡକୁ ଶରବ୍ୟ କରି ତିନି ମାସ ହେଲା କାର୍ଯ୍ୟକ୍ରମ ଚାଲିଛି । ଆପଣମାନେ ବି ସେଇଆ ଦେଖୁଛନ୍ତି । ଆପଣମାନେ କେବଳ ଏକଥା ଦେଖି ପାରୁନାହାନ୍ତି ଯେ ନିଶାନାରେ ଆପଣମାନେ ବି ଅଛନ୍ତି ।
ରବିଶ କୁମାର ।
(ମିଡିଆଭିଜିଲ୍ ରେ ହିନ୍ଦୀରେ ପ୍ରକାଶିତ ଲେଖାରୁ ଅନୁବାଦ )
ଓଡ଼ିଆ ଅନୁବାଦ: ରଙ୍ଗା ଚରଣ ପ୍ରଧାନ
