ଭୁୁବନେଶ୍ୱର: ଗୃହମନ୍ତ୍ରୀ ଅମିତ ଶାହଙ୍କ ଅତ୍ୟନ୍ତ ବିଶ୍ୱସ୍ତ ୫୨ ବର୍ଷୀୟ ସୁନୀଲ ବଂଶଲଙ୍କୁ ଓଡ଼ିଶା ବିଜେପି ପ୍ରଭାରୀ ଭାବେ ନିଯୁକ୍ତି ଦିଆଯାଇଛି । ଓଡ଼ିଶା ସମେତ ପଶ୍ଚିମବଙ୍ଗ ଓ ତେଲେଙ୍ଗାନା ରାଜ୍ୟର ପ୍ରଭାରୀ ଭାବେ ମଧ୍ୟ ସେ କାର୍ଯ୍ୟ କରିବେ । ଉତ୍ତର ପ୍ରଦେଶ ବିଜେପିର ସାଧାରଣ ସମ୍ପାଦକ(ସାଂଗଠନିକ) ଥିବା ବଂଶଲଙ୍କୁ ରାଷ୍ଟ୍ରୀୟ ଅଧ୍ୟକ୍ଷ ଜେ.ପି.ନଡ୍ଡା ଆଜି ତିନି ତିନୋଟି ରାଜ୍ୟର ଦାୟିତ୍ୱ ସହ ରାଷ୍ଟ୍ରୀୟ ସାଧାରଣ ସମ୍ପାଦକ ଭାବେ ନିଯୁକ୍ତି ଦେଇଛନ୍ତି ।
ଅମିତ ଶାହଙ୍କ ଓଡ଼ିଶା ଗସ୍ତର ଦିନକ ପରେ ତାଙ୍କର ଖାସ୍ ସହଯୋଗୀ ଏବଂ ଅତି ବିଶ୍ୱସ୍ତ ସୁନୀଲ ବଂଶଲଙ୍କୁ ଓଡ଼ିଶା ପ୍ରଭାରୀ ଭାବେ ନିଯୁକ୍ତି ଦିଆଯିବା ରାଜନୈତିକ ଗୁରୁତ୍ୱ ବହନ କରୁଛି । ଡି. ପୁରନ୍ଦେଶ୍ୱରୀଙ୍କ ଜାଗାରେ ସେ ଓଡ଼ିଶା ବିଜେପିକୁ ସମ୍ଭାଳିବେ । ଦିଗଦର୍ଶନ ଦେବେ ।
ଓଡ଼ିଶାରେ ବିଜେପିର ସ୍ଥିତି ଓ ସାଂଗଠନିକ କାର୍ଯ୍ୟକଳାପକୁ ନେଇ ଅମିତ ଶାହ ଆଦୌ ସନ୍ତୁଷ୍ଟ ନାହାନ୍ତି । ଦିନିକିଆ ଓଡ଼ିଶା ଗସ୍ତର ଶେଷରେ ସେ ଦଳୀୟ ନେତାଙ୍କ ସହ ରୁଦ୍ଧଦ୍ୱାର ବୈଠକରେ ଦଳର ସ୍ଥିତି ସମୀକ୍ଷା କରିଥିଲେ । ୨୦୨୪ ରେ ବିଜେପି ଓଡ଼ିଶାରେ କ୍ଷମତାକୁ ଆସିବ ବୋଲି ସେ ବାହାରେ ଦମ୍ଭ ଦେଖାଇଥିଲେ ମଧ୍ୟ ବାସ୍ତବରେ ସ୍ଥିତି ସେୟା ନାହିଁ ବୋଲି ତାଙ୍କର ଅନୁଭବ ହୋଇଥିଲା । ବିଶେଷକରି ଦଳୀୟ କନ୍ଦଳ ଓ କିଛି ନେତାଙ୍କ ହାମବଡ଼ା ନୀତି ତାଙ୍କ ଦୃଷ୍ଟିକୁ ଆସିଥିଲା । ଏଥିରେ ସେ ବିରକ୍ତି ପ୍ରକାଶ କରିବା ସହ ରାଜ୍ୟ ନେତାଙ୍କୁ ଟାକ୍ସ ଦେଇ ଦିଲ୍ଲୀ ଫେରିଯାଇଥିଲେ ।
ତାଙ୍କ ଗସ୍ତର ଦିନକ ପରେ ରାଜ୍ୟ ପ୍ରଭାରୀ ଭାବେ ବଂଶଲଙ୍କୁ ନିଯୁକ୍ତି ମିଳିଥିବାରୁ ଓଡ଼ିଶା ବିଜେପିକୁ ଅଧିକ ଶକ୍ତିଶାଳୀ କରିବାକୁ ଅମିତ ଶାହଙ୍କ ଯୋଜନା ସ୍ପଷ୍ଟ ହୋଇଛି । ଏଥିପାଇଁ ବିଜେପି କର୍ମୀଙ୍କ ମନରେ ନୂଆ ଆଶା ସଞ୍ଚାର ହୋଇଛି ।
ସୂଚନାଥାଉକି ବିଜେପିର ଜଣେ ଦକ୍ଷ ସଂଗଠକ ଭାବେ ସୁନୀଲ ବଂଶଲଙ୍କର ଖ୍ୟାତି ରହିଛି । ୨୦୧୪ ସାଧାରଣ ନିର୍ବାଚନ ବେଳେ ତାଙ୍କ ଉପରେ ଉତ୍ତର ପ୍ରଦେଶ ଦାୟିତ୍ୱ ନ୍ୟସ୍ତ କରାଯାଇଥିଲା । ୨୦୧୭ ଉତ୍ତର ପ୍ରଦେଶ ନିର୍ବାଚନରେ ବିଜେପିର ବୃହତ୍ତ ବିଜୟ ପଛରେ ଅମିତ ଶାହଙ୍କ ସହଯୋଗୀ ଭାବେ ତାଙ୍କର ବିଶେଷ ଭୂମିକା ଥିଲା । ୟୁପି ବିଜେପି ୟୁନିଟ୍ ର ସାଧାରଣ ସମ୍ପାଦକ (ସାଂଗଠନିକ) ଭାବେ ଗତ ନିର୍ବାଚନରେ ମଧ୍ୟ ତାଙ୍କର ଅଗ୍ରଣୀ ଭୂମିକା ଥିଲା । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ସହ କାମ କରିଥିଲେ ।
