କେନ୍ଦ୍ରାପଡ଼ା/ ଭୁବନେଶ୍ୱର: ଘଟଣାଟି ଅତ୍ୟନ୍ତ ମର୍ମସ୍ପର୍ଶୀ, ହୃଦୟ ବିଦାରକ । ଗୋଟିଏ ଅସହାୟ ବାପାର କରୁଣ କାହାଣୀ । ଜନ୍ମ କଲା ତିନି ତିନିଟି ପିଲାକୁ ବହୁ କଷ୍ଟରେ ପାଠଶାଠ ପଢ଼େଇ ମଣିଷ କରିବା ପରେ ସେମାନେ ତାଙ୍କୁ ପର କରିଦେଇଛନ୍ତି । ଏପରିକି ବୃଦ୍ଧ ବୟସରେ ରୋଗରେ ସଢ଼ି ମରିଗଲା ପରେ ବି ପିଲାମାନେ ତାଙ୍କ ମୁହଁ ଚାହିଁନାହାନ୍ତି । ମୁହଁରେ ନିଆଁ ଦେବାକୁ ଆସିଲା ନାହିଁ ଏକମାତ୍ର ଇଂଜିନିୟର ପୁଅ । କେନ୍ଦ୍ରାପଡ଼ା ଜିଲ୍ଲାର ପଟ୍ଟାମୁଣ୍ଡାଇରେ ଦେଖିବାକୁ ମିଳିଛି ବିଚଳିତ କଲା ଭଳି ଏମିତି ଘଟଣା ।
ରାଜନଗର ଅଞ୍ଚଳର ବିଘ୍ନେଶ୍ୱର ବାହାଦୂର । ବିଦୁ୍ୟତ ବିଭାଗରେ ଚାକିରି କରିଥିଲେ । ପତ୍ନୀଙ୍କ ନାଁ ହେଉଛି ଭଗବତୀ । ସେମାନଙ୍କର ଗୋଟିଏ ପୁଅ ଓ ଦୁଇଟି ଝିଅ । ସ୍ୱଳ୍ପ ଦରମା ପାଉଥିଲେ ମଧ୍ୟ ପିଲାମାନଙ୍କ ଦାୟିତ୍ୱ ନେବାରେ କେବେ ବି ଅବହେଳା କରିନାହାନ୍ତି । ଅଭାବ ଅନାଟନ ଭିତରେ ସମସ୍ତଙ୍କୁ ଭଲ ପାଠ ପଢ଼ାଇ ମଣିଷ କରିଛନ୍ତି । ପୁଅକୁ ଇଂଜିନିୟର କରିଛନ୍ତି । ଚାକିରିରୁ ଅବସର ନେବା ପରେ ବିଘ୍ନେଶ୍ୱର ତାଙ୍କ ପେନସନ୍ ଟଙ୍କାରେ ଘର ଚଳାଇବା ସହ ଧାର କରଜ କରି ଦୁଇ ଝିଅକୁ ବାହା କରାଇଥିଲେ । ଭୁବନେଶ୍ୱରରେ ଚାକିରି କରୁଥିବା ପୁଅ ପ୍ରେମ ବିବାହ କରିଥିଲେ ।
ତେବେ ପୁଅଝିଅ ସମସ୍ତଙ୍କୁ ବାହା କରିସାରିଲା ପରେ ବିଘ୍ନେଶ୍ୱର ଦମ୍ପତ୍ତିଙ୍କର ଯାତନା ଆରମ୍ଭ ହୋଇଥିଲା । ଗାଁ ଜମିବାଡ଼ି ଏବଂ ଘରଦ୍ୱାର ବିକ୍ରି କରି ସେହି ଟଙ୍କାରେ ଭୁବନେଶ୍ୱରରେ ଘର କରି ସମସ୍ତେ ସେଠାରେ ରହିବା ବୋଲି ବାପାମାଆଙ୍କୁ ମନାଇଥିଲେ ଇଂଜିନିୟର ପୁଅ । ଗୋଟିଏ ବୋଲି ପୁଅର ସବୁକଥା ସେମାନେ ମାନିଯାଇଥିଲେ । ଗାଁର ସବୁ ବିକ୍ରି କରି ଟଙ୍କାତକ ପୁଅକୁ ଧରାଇ ଦେଇଥିଲେ । ତେବେ ପୁଅ ସେହି ଟଙ୍କା ଧରି ଭୁବନେଶ୍ୱର ଆସିଲା ପରେ ଘରକୁ ଆଉ ଫେରିଲା ନାହିଁ କି ବୃଦ୍ଧ ବାପାମାଆଙ୍କୁ ପଚାରିଲା ନାହିଁ । ସମ୍ପତ୍ତି ବିକ୍ରୀ ହୋଇଯିବା ରାଗରେ ଦୁଇଝିଅ ମଧ୍ୟ ବାପାମାଆଙ୍କଠାରୁ ମୁହଁ ଫେରାଇନେଲେ ।
ଗାଁର ଭିଟାମାଟି ହରାଇଥିବା ଏବଂ ପିଲାମାନଙ୍କଠାରୁ ଅଲୋଡ଼ା ହୋଇଥିବା ବୃଦ୍ଧ ଦମ୍ପତ୍ତି ଅନୋନ୍ୟପାୟ ହୋଇ ପଟ୍ଟମୁଣ୍ଡାଇ ପଳାଇ ଆସିଥିଲେ । ବକ୍ତରପୁରରେ ଏକ ଛୋଟ ଘର ଭଡ଼ା ନେଇ ରହିଲେ ଏବଂ ପେନସନ୍ ପଇସାରେ ଚଳିଲେ । ଇତିମଧ୍ୟରେ ୮୫ ବର୍ଷରେ ପଦାର୍ପଣ କରିଥିବା ବିଘ୍ନେଶ୍ୱରଙ୍କୁ ବାର୍ଦ୍ଧକ୍ୟ ରୋଗ ମାଡ଼ି ବସିଥିଲା । ଏକମାତ୍ର ଭରସା ଥିଲେ ୮୦ ବର୍ଷୀୟ ପତ୍ନୀ ଭଗବତୀ । ତାଙ୍କର ମଧ୍ୟ ଦେହ ଭଲ ନାହିଁ । ତେବେ ଦୁହେଁ ଦୁହିଁଙ୍କ ମୁହଁକୁ ଚାହିଁ ବଞ୍ଚି ଯାଉଥିଲେ ।
ଗତକାଲି(ଶୁକ୍ରବାର) ରାତି ପ୍ରାୟ ୧୦ଟା ବେଳେ ବିଘ୍ନେଶ୍ୱରଙ୍କର ଦେହ ଗୁରୁତର ଅସୁସ୍ଥ ହୋଇପଡ଼ିଥିଲା । ଯନ୍ତ୍ରଣାରେ ଛଟପଟ ହୋଇଥିଲେ । ପଡ଼ୋଶୀଙ୍କ ସହାୟତାରେ ବୃଦ୍ଧା ପତ୍ନୀ ତାଙ୍କୁ ପଟ୍ଟାମୁଣ୍ଡାଇ ଡାକ୍ତରଖାନାକୁ ନେଇ ଆସିଥିଲେ । ଡାକ୍ତର ତାଙ୍କୁ ଚିକିତ୍ସା କରିଥିଲେ ମଧ୍ୟ ବଞ୍ଚାଇ ପାରି ନ ଥିଲେ । ରାତି ପ୍ରାୟ ୧୧ଟା ବେଳକୁ ତାଙ୍କର ପ୍ରାଣବାୟୁ ଉଡ଼ି ଯାଇଥିଲା । ନିଜର ଏକମାତ୍ର ମଣିଷକୁ ହରାଇ ମ୍ରିୟମାଣ ହୋଇଯାଇଥିବା ବୃଦ୍ଧା ଭଗବତୀଙ୍କୁ ଦୁଃଖ ସେଇଠୁ ଆହୁରି ବଢ଼ିଯାଇଥିଲା । କାରଣ ଡାକ୍ତରଖାନାରୁ ଶବ ଉଠାଇ କେମିତି ଶ୍ମଶାନକୁ ନେବେ ବୁଦ୍ଧି ବାଟ ଦିଶିଲାନି ।
ଆଶା ବାନ୍ଧିଲେ କି ଏତିକିବେଳେ ପୁଅ ଝିଅ ନିଶ୍ଚିତ ଆସିବେ ଏବଂ ବାପାଙ୍କ ମୁହଁରେ ନିଆଁ ଦେବେ । ମୃତ ସ୍ୱାମୀ ହସ୍ପିଟାଲ୍ ବେଡ୍ ରେ ପଡ଼ିଥିଲା ବେଳେ ସେ ପୁଅ ପାଖକୁ ଫୋନ୍ କଲେ । ଥରେ ନୁହେଁ ୧୫/୨୦ ଥର ଫୋନ୍ ଲଗେଇଲେ । ହେଲେ ପୁଅ ଫୋନ୍ ଧରିଲାନି । ପଡୋଶୀମାନେ ଫୋନ୍ କରିଥିଲେ ବି ତାହା ମଧ୍ୟ ଉଠାଇଲେନି । ଦୁଇ ଝିଅଙ୍କୁ ଫୋନ୍ କରି ଡକାଯାଇଥିଲେ ବି ସେମାନେ ଆସିଲେନି ।
ନିଜର ପିଲାମାନେ ନ ଆସିବାରୁ ହସ୍ପିଟାଲ୍ ବେଡ୍ ରେ ଶବ ଦୀର୍ଘ ୧୬ ଘଣ୍ଟା କାଳ ସେମିତି ପଡ଼ି ରହିଥିଲା । ଆଜି ଦିନ ୧ଟା ବେଳକୁ ଅଚାନକ ତାଙ୍କ ସାନ ଝିଅ ସେଠାରେ ପହଞ୍ଚଞ୍ଚିଥିଲେ ଏବଂ ସାହି ପଡ଼ିଶାଙ୍କ ସାଙ୍ଗରେ ମିଶି ଶବ ସହ ମଶାଣି ପର୍ଯ୍ୟନ୍ତ ଯାଇଥିଲେ । ମାତ୍ର ମଶାଣିରେ ବାପାଙ୍କ ଶବ ଛାଡ଼ି ସେଠୁଁ ଛୁ ମାରିଥିଲେ । ତାଙ୍କର ଆଉ ଦେଖା ମିଳିଲାନି କି କାହାରି ଫୋନ୍ ଉଠାଇ ନ ଥିଲେ । ଶେଷରେ ସେହି ସାହି ପଡ଼ିଶା ଏବଂ କିଛି ସ୍ୱେଚ୍ଛାସେବୀ ମିଶି ଶବ ସତ୍କାର କରିଥିଲେ । ଅଞ୍ଚଳର ସ୍ୱେଚ୍ଛାସେବୀ ଡମ୍ବରୁଧର ରାଉତ ମୁଖାଗ୍ନି ଦେଇଥିଲେ ।
