ଭୁୁବନେଶ୍ୱର: ମାଓ ଦମନ କ୍ଷେତ୍ରରେ ଓଡ଼ିଶାକୁ ସବୁଠାରୁ ବଡ଼ ସଫଳତା । ମାଓବାଦୀଙ୍କ କେନ୍ଦ୍ରୀୟ କମିଟି ସଦସ୍ୟ ତଥା ଓଡ଼ିଶାରେ ମାଓ ଅପରେସନ୍ ମୁଖ୍ୟ ଗଣେଶ ଉଇକେ ନିପାତ ହୋଇଛି । କନ୍ଧମାଳ ସୀମାରେ ସୁରକ୍ଷା କର୍ମୀଙ୍କ ଗୁଳିରେ ଟଳିପଡ଼ିଛନ୍ତି ଏହି ଟପ୍ ମାଓନେତା । ଗଣେଶ ସହ ଅନ୍ୟ ୩ ଜଣ ମାଓବାଦୀ ମଧ୍ୟ ନିହତ ହୋଇଛନ୍ତି । ସେମାନଙ୍କ ମଧ୍ୟରେ ଦୁଇଜଣ ମହିଳା ଅଛନ୍ତି । ସେହି ୩ ଜଣଙ୍କ ପରିଚୟ ମିଳିପାରିନାହିଁ । ଗଣେଶ ନିହତ ପରେ ଓଡ଼ିଶାରେ ମାଓବାଦୀଙ୍କ ମେରୁଦଣ୍ଡ ଭାଙ୍ଗିଗଲା ବୋଲି ପୁଲିସ ଡିଜି ୱାଇ.ବି ଖୁରାନିଆ କହିଛନ୍ତି ।
ସୁରକ୍ଷା କର୍ମୀଙ୍କ ଗୁଳିରେ ନିହତ ୬୯ ବର୍ଷୀୟ ଗଣେଶଙ୍କ ଘର ତେଲେଙ୍ଗାନାର ନଲଗୋଣ୍ଡା ଜିଲ୍ଲାରେ । ଓଡ଼ିଶା ସମେତ ୪ଟି ରାଜ୍ୟରେ ଏହି ଦୁର୍ଦ୍ଦନ୍ତ ମାଓନେତାଙ୍କ ମୁଣ୍ଡ ଉପରେ ଥିଲା ପୁରସ୍କାର ରାଶି । ଓଡ଼ିଶାରେ ସର୍ବାଧିକ ୧ କୋଟି ୧୦ ଲକ୍ଷ ଟଙ୍କାର ପୁରସ୍କାର ଘୋଷଣା କରାଯାଇଥିଲା । ଛତିଶଗଡ଼ରେ ୪୦ ଲକ୍ଷ, ତେଲେଙ୍ଗାନା ଓ ଆନ୍ଧ୍ର ପ୍ରଦେଶରେ ଥିଲା ୨୫ ଲକ୍ଷ ଲେଖାଏଁ ପୁରସ୍କାର ରାଶି ।
ଏକ ସାମ୍ବାଦିକ ସମ୍ମିଳନୀରେ ଡିଜିପି ଶ୍ରୀ ଖୁରାନିଆ ସୁରକ୍ଷା କର୍ମୀଙ୍କ ଅପରେସନ୍ ସମ୍ପର୍କରେ ବିସ୍ତୃତ ସୂଚନା ଦେଇଥିଲେ । ଗୁଇନ୍ଦା(ଏସଆଇଡବ୍ଲୁ) ସୂଚନା ଆଧାରରେ କନ୍ଧମାଳର ଚକାପାଦ ଅଞ୍ଚଳ ଏବଂ ଗଞ୍ଜାମର ରମ୍ଭା ଜଙ୍ଗଲ ସୀମାରେ ୩ ଦିନ ହେଲା ଅପରେସନ୍ ଚାଲିଛି । ଆଇଜି ଗୁଇନ୍ଦା ନିଜେ ଅପରେସନରେ ସାମିଲ ଅଛନ୍ତି । ଗତରାତିରୁ ଏହି ଅପରେସନକୁ ଜୋରଦାର କରାଯାଇଥିଲା । ଏଥିରେ ଓଡ଼ିଶା ପୁଲିସ ସ୍ପେଶାଲ୍ ଅପରେସନ୍ ଗ୍ରୁପ୍(ଏସଓଜି)ର ୨୦ଟି ଟିମ୍, ସିଆରପିଏଫର ଦୁଇଟି ଟିମ୍ ଏବଂ ବିଏସଏଫର ଗୋଟିଏ ଟିମ୍ ସାମିଲ ଥିଲେ । ସୁରକ୍ଷା କର୍ମୀଙ୍କ ଏହି ୨୩ଟି ଅପରେସନ୍ ଟିମ୍ ମିଳିତ ଭାବେ ମାଓ କ୍ୟାମ୍ପଗୁଡ଼ିକରେ ଚଢ଼ଉ କରିଥିଲେ । ବିଭିନ୍ନ ସ୍ଥାନରେ ମାଓବାଦୀଙ୍କ ସହ ଏନକାଉଣ୍ଟର ହୋଇଥିଲା । ଗୋଟିଏ କ୍ୟାମ୍ପ ଉପରେ ସୁରକ୍ଷାକର୍ମୀଙ୍କ ଗୁଳିମାଡ଼ରେ ଗଣେଶ ଓ ଅନ୍ୟ ୩ ଜଣ ଟଳିପଡ଼ିଥିଲେ । ସେମାନଙ୍କ ପାଖରୁ ଦୁଇଟି ଇନସାସ୍ ରାଇଫଲ୍ ଏବଂ ଗୋଟିଏ ୩୦୩ ରାଇଫଲ୍ ମିଳିଛି । ଏନକାଉଣ୍ଟର ପରେ ସଂପୃକ୍ତ ଅଞ୍ଚଳରେ ସର୍ଚ୍ଚ ଅପରେସନ୍ ଜାରି ରହିଛି ।
ପୂର୍ବରାତିରେ ବେଲଘର ଥାନା ଅନ୍ତର୍ଗତ ଗୁମାରିଜା ଜଙ୍ଗଲରେ ଏସଓଜି ବାହିନୀ ଓ ମାଓବାଦୀଙ୍କ ମଧ୍ୟରେ ଗୁଳି ବିନିମୟ ହୋଇ ଦୁଇଜଣ ନକ୍ସଲ ନିହତ ହୋଇଥିଲେ । ଦୁଇ ନିହତଙ୍କ ମଧ୍ୟରେ ଜଣେ ଏରିଆ କମାଣ୍ଡର ଏବଂ ଜଣେ ପାର୍ଟି ମେମ୍ବର ଥିଲେ । ସେମାନଙ୍କ ପାଖରୁ ଗୋଟେ ୩୦୩ ରାଇଫଲ୍ ଏବଂ ଗୋଟେ ରିଭଲଭର୍ ସିଜ୍ ହୋଇଥିଲା । ସେମାନଙ୍କ ଉପରେ ୨୩ ଲକ୍ଷରୁ ଅଧିକ ପୁରସ୍କାର ଥିଲା ।
ଡିଜିପିଙ୍କ ସୂଚନା ଅନୁଯାୟୀ, ଡିସେମ୍ବର ୨୩ରେ ୨୨ ଜଣ ନକ୍ସଲ ମାଲକାନଗିରି ଜିଲ୍ଲାରେ ଆତ୍ମସମର୍ପଣ କରିଥିଲେ । ସେଥିରେ ଜଣେ ଡିସିଏମ୍, ୧୪ ଏସିଏମ୍ ଓ ୧୫ ପାର୍ଟି ମେମ୍ବର ଥିଲେ । ସେମାନଙ୍କ ପାଖରୁ ଗୋଟେ ଏକେ ୪୭, ଦୁଇଟି ଇନସାସ୍, ଗୋଟେ ଏସଏଲଆର, ତିନିଟି ୩୦୩ ରାଇଫଲ୍, ଦୁଇଟି ସିଙ୍ଗଲ୍ ସର୍ଟ ରାଇଫଲ ଏବଂ ଅନ୍ୟାନ୍ୟ ଅନ୍ୟାନ୍ୟ ସାମଗ୍ରୀ ଜବତ ହୋଇଥିଲା । ସେମାନଙ୍କ ଉପରେ ୧.୮୪ କୋଟିର ପୁରସ୍କାର ରହିଥିଲା । ମାଓବାଦୀମାନେ ହିଂସା ଛାଡ଼ି ମୁଖ୍ୟସ୍ରୋତରେ ସାମିଲ ହୁଅନ୍ତୁ । ଗଣେଶ ନିହତ ହେବା ପରେ ଓଡ଼ିଶା ମାଓବାଦୀଙ୍କ ମେରୁଦଣ୍ଡ ଭାଙ୍ଗିଯାଇଛି ବୋଲି ଶ୍ରୀ ଖୁରାନିଆ କହିଛନ୍ତି ।
ମୁୁଖ୍ୟମନ୍ତ୍ରୀ ମୋହନ ଚରଣ ମାଝୀ ମାଓ ଅପରେନର ଏହି ସଫଳତାରେ ଖୁସି ପ୍ରକଟ କରି ଆମର ସୁରକ୍ଷାକର୍ମୀଙ୍କ ଅଦମ୍ୟ ସାହାସ ଓ ସଠିକ ସମନ୍ୱୟ ପାଇଁ ସାଧୁବାଦ ଜଣାଇଛନ୍ତି । ସେମାନଙ୍କର ଏହି ନିଷ୍ଠାପର ଉଦ୍ୟମ ଓଡ଼ିଶାକୁ ନକ୍ସଲବାଦ ମୁକ୍ତ କରିବା ପାଇଁ ଆମର ପ୍ରତିବଦ୍ଧତାକୁ ଆହୁରି ସୁଦୃଢ଼ କରିଛି ବୋଲି ମୁଖ୍ୟମନ୍ତ୍ରୀ ଟୁଇଟ୍ କରିଛନ୍ତି ।
ଓଡ଼ିଶାରେ ମାଓ ଦମନର ଏହି ବିରାଟ ସଫଳତାରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଟୁଇଟ୍ କରିଛନ୍ତି । ମାଓ ମୁକ୍ତ ହେବାର ଦ୍ୱାରଦେଶରେ ଓଡ଼ିଶା ପହଞ୍ଚିଛି । ମାଓମୁକ୍ତ ଭାରତ ଦିଗରେ ଏହା ଉଲ୍ଲେଖନୀୟ ମାଇଲଖୁଣ୍ଟ । ୨୦୨୬ ମାର୍ଚ୍ଚ ୩୧ ସୁଦ୍ଧା ଭାରତ ମାଓ ମୁକ୍ତ ହେବ ବୋଲି ସେ କହିଛନ୍ତି ।
