ଭୁବନେଶ୍ୱର: ଇସ୍କନ୍ ଆୟୋଜିତ ଅଦିନିଆ ରଥଯାତ୍ରାକୁ ନେଇ ନିକଟ ଅତୀତରେ ବହୁତ ଝଡ଼ ବୋହିଥିଲା । ରଥଯାତ୍ରା ସମୟ, ବିଧି ଓ ନୀତିକାନ୍ତି ଉଲ୍ଲଂଘନକୁ ସବୁଆଡୁ ବିରୋଧ ହୋଇଥିଲା । ଜଗନ୍ନାଥ ସଂସ୍କୃତିର ଏହା ଘୋର ଅବମାନନା ବୋଲି କୁହାଗଲା । ବିଶ୍ୱର କୋଣ ଅନୁକୋଣରେ ରହୁଥିବା ଓଡ଼ିଆ ଭକ୍ତମାନେ ପ୍ରତିବାଦ କଲେ । ଓଡ଼ିଶାର ସବୁ ଗଣମାଧ୍ୟମ ଇସ୍କନ୍ ଆୟୋଜିତ ଅଦିନିଆ ରଥଯାତ୍ରା ବିରୋଧରେ ଫାଳ ଫାଳ ଖବର ଛାପିଲେ । ଟିଭିରେ ପଣ୍ଡିତମାନଙ୍କୁ ବସାଇ ଘଣ୍ଟା ଘଣ୍ଟା ଧରି ଡିବେଟ୍ ହେଲା । ଅଦିନିଆ ରଥଯାତ୍ରାକୁ ମହାରାଜା ଗଜପତି ଦିବ୍ୟସିଂହ ଦେବ ବିରୋଧ କରି ଆଇନ ଅଦାଲତର ଧମକ ଦେଲେ । ଓଡ଼ିଆ ଅସ୍ମିତା ଏବଂ ମହାପ୍ରଭୁଙ୍କ ସୁରକ୍ଷା ଦ୍ୱାହିରେ କ୍ଷମତାକୁ ଆସିଥିବା ମୋହନ ସରକାର ଇସ୍କନ୍ କୁ ଛାଟ ଦେଖାଇଲେ । କେଉଁଠି ବି ଅଦିନିଆ ରଥଯାତ୍ରା ହୋଇପାରିବ ନାହିଁ ବୋଲି ଆଇନମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ଗଣମାଧ୍ୟମରେ ବିବୃତି ଦେଲେ ।
ମାତ୍ର ବିଡ଼ମ୍ବନା ହେଉଛି ଯେ ଖୁବ୍ କମ ସମୟ ବ୍ୟବଧାନରେ ମିଳିମିଶି ଏହାକୁ ସମସ୍ତେ ଭୁଲିଗଲେ । ଦୁଇଦିନ ତଳେ ଦିଲ୍ଲୀରେ ଆୟୋଜିତ ଅଦିନିଆ ରଥଯାତ୍ରାକୁ କେହି ବିରୋଧ କରିନାହାନ୍ତି କି ପ୍ରତିବାଦ ହୋଇ ନାହିଁ । ନା ସରକାର, ନା ବିରୋଧୀ, ନା ସାଧାରଣ ଜନତା । ଗଣମାଧ୍ୟମରେ ମଧ୍ୟ ଏହି ଅଦିନିଆ ରଥଯାତ୍ରା ବିରୋଧରେ ଧାଡ଼ିଟିଏ ଆସିଲାନି । ଇସ୍କନ୍ ଅଦିନିଆ ରଥଯାତ୍ରାଠାରୁ ଦିଲ୍ଲୀ କମଳା ନଗରରେ ଆୟୋଜିତ ଅଦିନିଆ ରଥଯାତ୍ରା ଆହୁରି ମାରାତ୍ମକ । କାରଣ, ଶ୍ରୀକ୍ଷେତ୍ରରେ ମହାପ୍ରଭୁଙ୍କ ଅଣସର ବେଳେ ଦିଲ୍ଲୀରେ ଜଗନ୍ନାଥଙ୍କ ରଥଯାତ୍ରା କରିବାର ସାହାସ ହୋଇଛି । ଜଗନ୍ନାଥ ସଂସ୍କୃତିର ଧଜିଆ ଉଡ଼ାଯାଇଛି । ମାତ୍ର ପ୍ରତିବାଦ ପାଇଁ କାହା ଜିଭ ଲେଉଟିନି ।
ତେବେ ଏମିତି କାହିଁକି? ଦିଲ୍ଲୀ ଅଦିନିଆ ରଥଯାତ୍ରାକୁ ନେଇ ସମସ୍ତେ ଚୁପ୍ କାହିଁକି??
ଏହାର ଉତ୍ତର ହେଉଛି, ବିଜେପି ଶାସିତ ଦିଲ୍ଲୀ ମୁଖ୍ୟମନ୍ତ୍ରୀ ରେଖା ଗୁପ୍ତାଙ୍କର ଉପସ୍ଥିତି । ସେହି ଅଦିନିଆ ରଥଯାତ୍ରାରେ ସେ ଥିଲେ ମୁଖ୍ୟ ଅତିଥି । ସେଥିପାଇଁ ସମସ୍ତଙ୍କ ପାଟି ବନ୍ଦ, ହୋ ହଲ୍ଲା ନାହିଁ ।
ବିଜେପିର ଦିଲ୍ଲୀ ମୁଖ୍ୟମନ୍ତ୍ରୀଙ୍କ ଉପସ୍ଥିତିରେ ଆୟୋଜିତ ଅଦିନିଆ ରଥଯାତ୍ରାକୁ ବିରୋଧ କରିବାକୁ ମୋହନ ସରକାରଙ୍କ ଜୁ ନ ଥିଲା ବେଳେ ସ୍ୱଂୟ ଗଜପତି ମହାରାଜା ମଧ୍ୟ ଏହାର ପ୍ରତିବାଦ କରିବାକୁ ବଳ ଜୁଟାଇ ପାରିନାହାନ୍ତି । ନଗଦ ଡବଲ ଇଞ୍ଜିନ ସରକାରର ପୂର୍ତ୍ତି ଭୋଜି ଖାଇଥିବା ଏବଂ ଲକ୍ଷ ଲକ୍ଷ ଟଙ୍କାର ବିଜ୍ଞାପନ ପାଇଥିବା ପ୍ରମୁଖ ଗଣମାଧ୍ୟମ ଭୟ ହେଉ ଅଥବା ଚାପରେ ହେଉ, ବିଜେପିକୁ ବଦନାମ କରିବାକୁ ଉଚିତ ମଣିନାହାନ୍ତି । ଗଣମାଧ୍ୟମରେ ଖବର ନ ଥିବାରୁ ସାଧାରଣ ଭକ୍ତମାନଙ୍କ ମଧ୍ୟରେ ଏହାର ପ୍ରତିକ୍ରିୟା ନାହିଁ ।
ସୁତରାଂ ମହାପ୍ରଭୁଙ୍କ ପ୍ରତି ଆବେଗ ଏବଂ ଓଡ଼ିଆ ଅସ୍ମିତା ରଫାଦଫା ହୋଇଯାଇଛି । ରାଜନୈତିକ ବାଛବିଚାରରେ ସରକାର ଏଥିପ୍ରତି ଆଖି ବୁଜି ଦେଇଥିଲା ବେଳେ ସାଧାରଣ ଭକ୍ତ ପ୍ରତିକ୍ରିୟାଶୂନ୍ୟ ହୋଇ ପାପ ମୁଣ୍ଡାଇଛନ୍ତି । ଓଡ଼ିଆଙ୍କର ଏହା ଦୁର୍ବଳତା ବୋଲି କୁହାଯାଉଛି ।
