ଭୁବନେଶ୍ୱର: ବର୍ଷ ବର୍ଷ ଧରି ନିଜର ଅଭିନୟ ଯାଦୁରେ ଦର୍ଶକଙ୍କୁ ହସେଇ ହସେଇ ବେଦମ୍ କରୁଥିବା ବର୍ଷୀୟାନ୍ ଅଭିନେତା ରବି ମିଶ୍ର ଆଉ ନାହାନ୍ତି । ହୃଦଘାତ୍ ରେ ତାଙ୍କର ପରଲୋକ ହୋଇଯାଇଛି । ମୃତ୍ୟୁ ବେଳକୁ ତାଙ୍କୁ ୬୪ ବର୍ଷ ହୋଇଥିଲା । ଟେଲି ସିରିୟଲ୍ ‘ଗୋପାଳ ରହସ୍ୟ’ ର ମୁଖ୍ୟ ଚରିତ୍ରରେ ଅଭିନୟ କରି ଘରେ ଘରେ ପରିଚିତ ଏହି ଲୋକପ୍ରିୟ ଅଭିନେତାଙ୍କ ଅକାଳ ବିୟୋଗ ମଞ୍ଚ ଓ ଫିଲ୍ମ ଜଗତରେ ଶୋକର ଛାୟା ଖେଳାଇ ଦେଇଛି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କଠାରୁ ଆରମ୍ଭ କରି କଳା ଓ ସଂସ୍କୃତି ଜଗତର ବିଶିଷ୍ଟ ବ୍ୟକ୍ତିମାନେ ଗଭୀର ଶୋକ ପ୍ରକାଶ କରିଛନ୍ତି ।
ଏକ ଘରୋଇ ଚାନେଲରେ ପ୍ରସାରିତ ମେଗା ସିରିୟଲ୍ ‘ହେ ପ୍ରଭୁ’ ର ସୁଟିଂ ବେଳେ ଗତକାଲି ଶ୍ରୀ ମିଶ୍ର ଅସୁସ୍ଥ ହୋଇପଡ଼ିଥିଲେ । ମିଛିମିଛିକା ହୃଦଘାତ୍ ର ଏକ ଦୃଶ୍ୟକୁ ଜୀବନ୍ତ କରିବାକୁ ଚେଷ୍ଟା କରି ନିଜେ ହୃଦଘାତ୍ ର ଶିକାର ହୋଇଥିଲେ । ଚିକିତ୍ସା ପାଇଁ ପ୍ରଥମେ ତାଙ୍କୁ କଟକ ବଡ଼ ମେଡ଼ିକାଲ୍ ରେ ଭର୍ତ୍ତି କରାଯାଇଥିଲା । ପରେ ତାଙ୍କୁ ଭୁବନେଶ୍ୱରର କେୟାର୍ ହସ୍ପିଟାଲ୍ ରେ ଭର୍ତ୍ତି କରାଯାଇଥିଲା । ତେବେ ଚିକିତ୍ସାଧୀନ ଅବସ୍ଥାରେ ଆଜି ସକାଳୁ ତାଙ୍କର ମୃତ୍ୟୁ ହୋଇଯାଇଛି ।
ନିଖୁଣ ଓ ବଳିଷ୍ଠ ଅଭିନୟ ଜରିଆରେ ରବି ମିଶ୍ର ନିଜ ପାଇଁ ସ୍ୱତନ୍ତ୍ର ପରିଚୟ ସୃଷ୍ଟି କରିଥିଲେ । ମଞ୍ଚ ନାଟକ ସହ ଅନେକ ଫିଲ୍ମ ଓ ଟେଲି ସିରିୟଲ୍ ରେ ତାଙ୍କର ନିଖୁଣ ଅଭିନୟର ଛାପ ଛାଡ଼ି ଦେଇଛନ୍ତି । ଟେଲି ସିରିୟଲ୍ ‘ଗୋପାଳ ରହସ୍ୟ’ ର ମୁଖ୍ୟ ଚରିତ୍ର ତାଙ୍କୁ ଘରେ ଘରେ ପରିଚିତ କରାଇଥିଲା । ଅପରାହ୍ନରେ କଟକ ଖାନନଗର ଶ୍ମଶାନରେ ତାଙ୍କର ଶେଷକୃତ୍ୟ ସମ୍ପନ୍ନ ହେଉଥିବା ପରିବାର ସୂତ୍ରରୁ ଜଣାପଡ଼ିଛି ।
