ଭୁବନେଶ୍ୱର: “ମୁଁ ଗୋଟେ ଓଏଏସ୍ ଅଫିସର । ତୋ ଭଳି ଦାଦନ ଖଟୁନି । ବେଶୀ କଥାବାର୍ତ୍ତା କରୁଛୁ ତୁ । ଚୁପ୍.. ପାଟି ବନ୍ଦ କର । ବାହାରୁ ଆସି ଆମକୁ ହଇରାଣ କରୁଛ, ସେଥିରେ ପୁଣି ଅଧିକ କଥା କହୁଛ । ପାଣି ମାଗିବୁ ତ ଭଲରେ ମାଗ । ତୁ କ’ଣ ତୋ ଚଉଦ ପୁରୁଷ ଏଠି ଖରାରେ ଛିଡ଼ା ହେବ । କହିଲି ପରା ପାଟି ଚୁପ୍ କର.. ନିଜ ଔକାତ୍ ରେ ରହ ।”
ଗୁଜୁରାଟରୁ ନିଜ ଜନ୍ମମାଟିକୁ ଫେରିଥିବା ପ୍ରବାସୀ ଶ୍ରମିକଙ୍କୁ ଏମିତି ଭାଷାରେ ନିଜର ଔକାତ୍ ଦେଖାଇଛନ୍ତି ବାଲିଆପାଳ ବିଡ଼ିଓ ମ୍ୟାଡାମ୍ ଛବିରାଣୀ ସାହୁ । ଭିଡ଼ିଓ ଭାଇରାଲ୍ ହେବା ପରେ ଲଜ୍ଜିତ କିମ୍ବା ଅନୁତପ୍ତ ହେବା ବଦଳରେ ନିଜକୁ ବଞ୍ଚାଇବାକୁ ବାହାନା ଦେଖାଇଛନ୍ତି । ନିଜର ଭାବି ଏମିତି କହିଥିବା ଗତକାଲି ଟିଭିରେ ସଫେଇ ଦେବା ସହ କିଛି ଶ୍ରମିକ ତାଙ୍କୁ ଦୁର୍ବ୍ୟବହାର କରିବାରୁ ସେ ତାଗିଦ୍ କରିଥିଲେ ବୋଲି କହିଥିଲେ । ସଂପୃକ୍ତ ଶ୍ରମିକଙ୍କ ବିରୋଧରେ ଥାନାରେ ଏତଲା ଦେବେ ବୋଲି ଓଲଟାଇ ଧମକାଇଥିଲେ ।
ଘଟଣା ଥିଲା ଏମିତି । ଗୁଜୁରାଟ ସୁରେନ୍ଦ୍ରନଗରରୁ ଟ୍ରେନ୍ ଯୋଗେ ବାଲେଶ୍ୱର ଆସି ସେଠାରୁ ବସ୍ ଯୋଗେ ବୁଧବାର ସକାଳେ ବାଲିଆପାଳ ବ୍ଲକ୍ ରେ ପହଞ୍ଚିଥିଲେ ସ୍ଥାନୀୟ ଅଞ୍ଚଳର ପ୍ରବାସୀ ଶ୍ରମିକ । ନାଁ ରେଜିଷ୍ଟ୍ରେସନ୍ ସହ ଆନୁସଙ୍ଗିକ କାଗଜପତ୍ର କାମ ପାଇଁ ସେମାନଙ୍କୁ ବ୍ଲକ୍ ଫାଟକ ସମ୍ମୁଖରେ ଅପେକ୍ଷା କରିବାକୁ କୁହାଯାଇଥିଲା । ପ୍ରବଳ ଖରାରେ ସେମାନେ ଭୋକ ଉପାସରେ ଡହଳ ବିକଳ ହେଉଥିଲେ ମଧ୍ୟ ଅଧିକାରୀମାନଙ୍କର ଦେଖା ନ ଥିଲା ।
ଦୀର୍ଘ ସମୟ ପରେ ବିଡ଼ିଓ ମ୍ୟାଡାମ୍ ଆସିବାରୁ ଆଉ କେତେ ସମୟ ଖରାରେ ଛିଡ଼ା ହେବୁ ବୋଲି ଶ୍ରମିକମାନେ ପ୍ରଶ୍ନ କଲାରୁ ମ୍ୟାଡାମ୍ ଙ୍କ ସମ୍ମାନ ଉପରେ ଆଞ୍ଚ ଆସିଲା । ସେମାନଙ୍କର ଔକାତ୍ କୁ ପ୍ରଶ୍ନ କରି ନିଜର ଔକାତ୍ ଦେଖାଇଦେଲେ । ମୁଁ ଓଏଏସ୍ ଅଫିସର । ତମ ଭଳି ଦାଦନ ନୁହେଁ ବୋଲି ଶୁଣାଇଲେ ।
ଏହି ଓଏଏସ୍ ମ୍ୟାଡାମ୍ ଙ୍କ ଔକାତ୍ ର ଭିଡ଼ିଓ ସୋସିଆଲ୍ ମିଡ଼ିଆରେ ଭାଇରାଲ୍ ହେବା ପରେ ଲୋକେ ଛିଛାକର କରୁଛନ୍ତି । ରାଜ୍ୟ ସରକାରଙ୍କ ସମଗ୍ର ପ୍ରଶାସନିକ କଳ କରୋନା ମୁକାବିଲାରେ ଝାଳନାଳ ବୁହାଉଥିବା ବେଳେ ଏଭଳି କିଛି ଅଫିସରଙ୍କ ଆଚରଣ ସମଗ୍ର ବ୍ୟବସ୍ଥାକୁ ବଦନାମ କରୁଛି । ଲୋକଙ୍କ ସେବାରେ ନିଯୁକ୍ତ ଏଭଳି ଅଫିସରଙ୍କର ଯୋଗ୍ୟତା ଉପରେ ଅନେକ ପ୍ରଶ୍ନ କରିଛନ୍ତି ।
ଏହି ଓଏଏସ୍ ମ୍ୟାଡାମ୍ ଙ୍କ ଉପରେ ସରକାର କ’ଣ କାର୍ଯ୍ୟାନୁଷ୍ଠାନ ନେଉଛନ୍ତି ତାହା ଭିନ୍ନ କଥା । ମାତ୍ର ଜନସେବାରେ ନିଯୁକ୍ତ ଜଣେ ସରକାରୀ ଅଧିକାରୀଙ୍କ ସାଧାରଣ ମଣିଷଙ୍କ ପ୍ରତି ବ୍ୟବହାର ଉପରେ ଏହି ମ୍ୟାଡାମ୍ ଙ୍କୁ ଆହୁରି ଟ୍ରେନିଂ ଦେବାର ଆବଶ୍ୟକତା ରହିଛି ବୋଲି ସୋସିଆଲ୍ ମିଡ଼ିଆରେ ପ୍ରତିକ୍ରିୟା ଆସୁଛି । ନିଜର ଆଚରଣ ଜରିଆରେ ମର୍ଯ୍ୟାଦା ରଖିବା ଏବଂ ଲୋକଙ୍କ ସମ୍ମାନ ଲାଭ କରିବାର ଶିକ୍ଷା ଦରକାର ଓଏଏସ୍ ମ୍ୟାଡାମ୍ ଙ୍କୁ ।
