ଭୁବନେଶ୍ୱର(ମିଡ-ଡେ ଓଡ଼ିଶା): ଦଳୀୟ ନେତା ଓ ବ୍ୟୁରୋକ୍ରାଟ୍ଙ୍କ ଉପରୁ ମୁଖ୍ୟମନ୍ତ୍ରୀଙ୍କ ଭରସା ତୁଟିଯାଇଛି । କ୍ରମାଗତ ଭାବେ ଦଳ ଯେଭଳି ଅଡୁଆ ସୂତାରେ ଘୁରୁଛି ନବୀନଙ୍କୁ ତାହା ବିବ୍ରତ କରିଛି । ଚଳନ୍ତି ଟିମ୍ ଉପରେ ଆସ୍ଥା ଓ ବିଶ୍ୱାସ ରଖି ୨୦୧୯ ନିର୍ବାଚନ ଯୁଦ୍ଧ ଲଢ଼ିବାକୁ ତାଙ୍କର ସାହାସ ପାଉନି । ତେଣୁ କାଳ ବିଳମ୍ବ ନ କରି ନୂଆ ଅଙ୍କ ଖେପିଛନ୍ତି ନବୀନ । ବିଜେଡ଼ି ରାଜନୀତିକୁ ହଲଚଲ କରିବାକୁ ଯାଉଥିବା ନବୀନଙ୍କ ନୂଆ ଅଙ୍କରେ ଆର୍ବିଭାବ ହୋଇଛନ୍ତି ସୁବ୍ରତ୍ ବାଗ୍ଚୀ । ପ୍ରଚ୍ଛଦପଟ ରାଜନୀତିରେ ଚର୍ଚ୍ଚିତ ଜାତୀୟ ଚେହେରା ପ୍ରଶାନ୍ତ କିଶୋରଙ୍କ ଭୂମିକାରେ ନବୀନ ତାଙ୍କୁ ଅବତୀର୍ଣ୍ଣ କରାଇଛନ୍ତି । ଦକ୍ଷତା କର୍ତ୍ତୃପକ୍ଷ ଅଧ୍ୟକ୍ଷର ଥୋପ ଉପରେ ସେ ହେବେ ନବୀନଙ୍କ ମାର୍ଗଦର୍ଶକ । ମାନେ ବିଜେଡ଼ିର ନୂଆ ଚାଣକ୍ୟ । ବିନା ଖାତା ଖତିଆନରେ ପ୍ୟାରୀମୋହନ ମହାପାତ୍ରଙ୍କ ଯେଭଳି ଭୂମିକା ଥିଲା ଏବେ ଖାତା ଖତିଆନା ସହ ବାଗ୍ଚୀ ଅଧିକ ଶକ୍ତିଶାଳୀ ଭୂମିକାରେ ଆସିବେ । ମୋଟାମୋଟି କହିଲେ, ଆଗାମୀ ୩ ବର୍ଷ ପାଇଁ ବିଜେଡ଼ିକୁ ସଠିକ ମାର୍ଗଦର୍ଶନର ଲଗାମ ବାଗ୍ଚୀଙ୍କୁ ଧରାଇଛନ୍ତି ନବୀନ ।
ବିଶ୍ୱସ୍ତ ସୂତ୍ରର ଖବର ଅନୁଯାୟୀ, ବିଜେଡ଼ି ଆଭ୍ୟନ୍ତରୀଣ ସମସ୍ୟାକୁ ନେଇ ବିଚଳିତ ନବୀନଙ୍କୁ ବାଗ୍ଚୀ ମନ୍ତ୍ର ଦେଇଛନ୍ତି ଭଉଣୀ ଗୀତା ମେହେଟ୍ଟା । ବଲାଙ୍ଗୀରର ପାଟଣାଗଡ଼ରେ ଜନ୍ମିତ ବାଗ୍ଚୀ ଜଣେ କମ୍ପୁଟର ବିଶାରଦ । ମାଇଣ୍ଡ ଟ୍ରି ସଂସ୍ଥା ଜରିଆରେ ଆମେରିକାରେ ତାଙ୍କର ମୂଳ ବ୍ୟବସାୟ ସାମ୍ରାଜ୍ୟ ଥିବା ବେଳେ ସାରା ବିଶ୍ୱକୁ କାୟା ବିସ୍ତାର କରିଛି । ଜଣେ ପ୍ରତିଷ୍ଠିତ ଓ ସଫଳ ବ୍ୟବସାୟୀ ଭାବେ ବାଗ୍ଚୀ ଆମେରିକାରେ ବେଶ୍ ଜଣାଶୁଣା । ବ୍ୟବସାୟ କ୍ଷେତ୍ରରେ ବାଗ୍ଚୀଙ୍କ ବିଚକ୍ଷଣତା ଓ ଜଟିଳ ସୂତ୍ରର ସହଜ ସମାଧାନର ଦକ୍ଷତାକୁ ଭଲ ଭାବେ ଜାଣିଥିଲେ ଗୀତା ମେହେଟ୍ଟା ଓ ତାଙ୍କ ପରିବାର । ଆଉ ଆଭ୍ୟନ୍ତରୀଣ ସଙ୍କଟରେ ଥିବା ଦଳ ଓ ସରକାରୀ ମାପଚୁପ୍ ସଜାଡ଼ିବା ପାଇଁ ନବୀନ ତାଙ୍କୁ ଓଡ଼ିଶାକୁ ଆଣି ନାଲିବତୀ ଧରାଇଛନ୍ତି । ଦକ୍ଷତା କର୍ତ୍ତୃପକ୍ଷର ଅଧ୍ୟକ୍ଷ ପଦ ସହ ତାଙ୍କୁ କ୍ୟାବିନେଟ୍ ପାହ୍ୟା ଦିଆଯାଇଛି । ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଲା, ବାଗ୍ଚୀ ସାରା ରାଜ୍ୟ ବୁଲି ସିଧାସଳଖ ମୁଖ୍ୟମନ୍ତ୍ରୀଙ୍କୁ ରିପୋର୍ଟ କରିବେ । ମୁଖ୍ୟମନ୍ତ୍ରୀ ଓ ତାଙ୍କ ମଧ୍ୟରେ ଅନ୍ୟ କାହାରି ଭୂମିକା ରହିବନି ।
ଦିଲ୍ଲୀ ସୂତ୍ରର ଖବର ଅନୁଯାୟୀ, ବାଗ୍ଚୀଙ୍କୁ ନେଇ ନବୀନ ୨୦୧୯ ନିର୍ବାଚନୀ ବ୍ଲୁ ପ୍ରିଣ୍ଟ ପ୍ରସ୍ତୁତ କରିଛନ୍ତି । ଏଥିରେ ମିଡ଼ିଆ ଓ ସୋସିଆଲ୍ ମିଡ଼ିଆକୁ ଅଧିକ ଗୁରୁତ୍ୱ ଦିଆଯାଇଛି । ନିଜର ବିଶାଳ ବିଶେଷଜ୍ଞ ଟିମ୍ ସହାୟତାରେ ବାଗ୍ଚୀ ସାରା ରାଜ୍ୟରେ ସରକାରଙ୍କ ବିଭିନ୍ନ କାର୍ଯ୍ୟକ୍ରମର ସମୀକ୍ଷା, ସରକାରଙ୍କ ସଫଳତା ଓ ଦୁର୍ବଳତାକୁ ବିଶ୍ଲେଷଣ କରିବେ । ସେହି ଅନୁଯାୟୀ କାର୍ଯ୍ୟକ୍ରମ ରୂପାୟନ ଓ ରୂପରେଖକୁ ବଦଳାଯିବ । ଏଥିସହ ଦଳୀୟ କ୍ଷେତ୍ରରେ ୧୪୭ ଟି ଯାକ ନିର୍ବାଚନମଣ୍ଡଳୀର ସ୍ଥିତି ଅନୁଧ୍ୟାନ କରି ନବୀନଙ୍କୁ ରିପୋର୍ଟ ଦେବେ ବାଗ୍ଚୀ । ଯାହା ଜଣାପଡ଼ିଛି ଆଗାମୀ ନିର୍ବାଚନରେ ଦଳୀୟ ପ୍ରାର୍ଥୀ ମନୋନୟନର ଏହା ହେବ ମୁଖ୍ୟ ଆଧାର । ଏହି କ୍ଷେତ୍ରରେ ଦଳୀୟ ନେତା ଓ ବ୍ୟୁରୋକ୍ରାଟ୍ଙ୍କ ହସ୍ତକ୍ଷେପକୁ ନବୀନ ଆଉ ଗ୍ରହଣ କରି ନ ପାରନ୍ତି । ସିଧା ସିଧା ଅର୍ଥରେ କହିଲେ ସୁବ୍ରତ୍ ବାଗ୍ଚୀ ହେବେ ନବୀନଙ୍କ ପଲିଟିକାଲ୍ ଷ୍ଟ୍ରାଟେଜିଷ୍ଟ ।
ବାଗ୍ଚୀଙ୍କ ଏହି ନୂଆ ଭୂମିକାର ଝଲକ ବି ଆସିସାରିଲାଣି । ନବୀନ ନିଜର ଟ୍ୱିଟର୍ ଓ ଫେସ୍ ବୁକ ଆକାଉଣ୍ଟ ଖୋଲି ଜନସାଧାରଣଙ୍କ ସିଧା ସମ୍ପର୍କରେ ଆସିବା ଉଦ୍ୟମ କରିଥିବା ବେଳେ ଦଳୀୟ ବିଧାୟକମାନଙ୍କ ପାଇଁ ଏହା ବାଧ୍ୟତାମୂଳକ କରିଛନ୍ତି । ସୋସିଆଲ୍ ମିଡ଼ିଆ ଜରିଆରେ ସମ୍ପର୍କ ବଢ଼ାଇବାକୁ ଏହି ଯୋଜନା ଆରମ୍ଭ ହୋଇଛି । ଏଠାରେ ଉଲ୍ଲେଖଯୋଗ୍ୟ ଯେ ଦେଶର ଖ୍ୟାତାନାମା ପଲିଟିକାଲ୍ ଷ୍ଟାଟେଜିଷ୍ଟ ପ୍ରଶାନ୍ତ କିଶୋର ସବୁ ରାଜନୈତିକ ଦଳ ପାଇଁ ହଟ୍ କେକ୍ । ନରେନ୍ଦ୍ର ମୋଦିଙ୍କୁ ଗୁଜୁରାଟରୁ ଦିଲ୍ଲୀ ଆଣିବା ପଛରେ ତାଙ୍କର ଥିଲା ଗୁରୁତ୍ୱପୂର୍ଣ୍ଣ ଭୂମିକା । ସେହିଭଳି ବିହାରରେ ନୀତିଶ କୁମାରଙ୍କୁ କ୍ଷମତାସୀନ କରାଇବା ପଛରେ ରାଜନୈତିକ ସମୀକରଣର ଖେଞ୍ଚପାଞ୍ଚ ପ୍ରସ୍ତୁତ କରିଥିଲେ ପ୍ରଶାନ୍ତ କିଶୋର । ଏବେ ତାଙ୍କ ବୁଦ୍ଧି କିଣୁଛନ୍ତି ସୋନିଆ ଓ ରାହୁଲ । ଜାତୀୟସ୍ତରରେ ପ୍ରଶାନ୍ତ କିଶୋରଙ୍କ ଭଳି ନବୀନ ପଟ୍ଟନାୟକ ନିଜ କ୍ଷେତ୍ରରେ ସୁବ୍ରତ ବାଗ୍ଚୀଙ୍କୁ ଏହି ଭୂମିକା ଦେଇ ଅସଜଡ଼ା ସରକାର ଓ ଦଳକୁ ସଜାଡ଼ିବେ । କ୍ରମାଗତ ପଞ୍ଚମ ଥର ପାଇଁ ଶାସନ ଡୋରିକୁ ହାତରେ ରଖିବାର ନବୀନଙ୍କ ଯୋଜନାରେ ଆଶ୍ଚର୍ଯ୍ୟ ହେବାର କିଛି ନାହିଁ ।
