ବାତ୍ୟା ଉଜାଡ଼ିଲା କୁନି ସଂସାର, ୫ ପିଲାଙ୍କୁ ଧରି ସ୍କୁଲ ବାରଣ୍ଡାରେ

ଭୁବନେଶ୍ୱର: ୫ଟି ପିଲାଙ୍କୁ ଧରି ଛୋଟିଆ ଝାଟିମାଟି ଘରେ ମୁଣ୍ଡ ଗୁଜୁଂଥିବା ବିଧବା କୁନି ଦାସକୁ ବେସାହାରା କରିଦେଇଛି ପ୍ରଳୟଙ୍କରୀ ବାତ୍ୟା ‘ଫନି’ । ବର୍ଷ ବର୍ଷ ଧରି ସାହାରା କରିଥିବା ଦଦରା ମାଟି ଘରଟି ମାଟିରେ ମିଶିଯିବା ପରେ ଚିନ୍ତାମଣିଶ୍ୱର ସ୍କୁଲ ବାରଣ୍ଡା ହୋଇଛି ତା ପାଇଁ ଆଶ୍ରା । ରିଲିଫ୍ ଖାଦ୍ୟ ହୋଇଯାଇଛି ତା’ ପରିବାରର ବଞ୍ଚିବାର ରାହା ।

ଚିନ୍ତାମଣିଶ୍ୱର ସ୍କୁଲ ପାଖ ଚମ୍ପାପୋଖରୀ ବସ୍ତିରେ ରୁହେ ୪୫ ବର୍ଷୀୟା କୁନି ଦାସ । ଦୁଇ ବର୍ଷ ତଳୁ ସ୍ୱାମୀଙ୍କୁ ହରାଇ ଦେଇଛି । ୪ଟି ନାବାଳିକା ଝିଅ ଏବଂ ଗୋଟିଏ କୁନି ପୁଅକୁ ନେଇ ତା ସଂସାର । ମଜୁରିଆ ଭାବେ କାମ କରି ୫ ପିଲାଙ୍କ ପେଟକୁ ଦାନା ଯୋଗାଉଥିଲା । ଗୋଟିଏ ବଖରା ଝାଟିମାଟି ଘରେ ମୁଣ୍ଡ ଗୁଂଜି ରହୁଥିଲେ ଏହି ନିଃସ୍ୱ ପରିବାର । ସମ୍ପତ୍ତି ବୋଲେ ଭାତହାଣ୍ଡି, କେଇଟା କଂସାବାସନ ଏବଂ ଲୁଗାପଟା । ତେବେ ଗତ ୩ ତାରିଖ ପ୍ରଳୟଙ୍କରୀ ବାତ୍ୟାରେ ଘର ପାଖରେ ଥିବା ଏକ ବିରାଟ ଆମ୍ବଗଛ ତା ଘର ଉପରେ ଉପୁଡ଼ି ପଡ଼ିବା ପରେ ସବୁ କିଛି ଚାଲିଯାଇଛି । ମାଟିରେ ମିଶିଯାଇଛି ତା ଝାଟିମାଟି ଘର । ଯାହା ଦୁଇଖଣ୍ଡ ଜିନିଷ ଥିଲା ତାର ଚିହ୍ନବର୍ଣ୍ଣ ନାହିଁ । ସୋ÷ଭାଗ୍ୟକୁ ବାତ୍ୟା ଆସିବା ପୂର୍ବରୁ ପିଲାମାନଙ୍କୁ ଧରି ସ୍କୁଲ ବାରଣ୍ଡାକୁ ଚାଲି ଆସିଥିବାରୁ ଜୀବନ ବଞ୍ଚିଯାଇଛି । ବାତ୍ୟା ଚାଲିଗଲା, ହେଲେ ଘର ଫେରି ପାଇଲାନି କୁନି ଦାସ । ନିଜର ପିଲାମାନଙ୍କୁ ଧରି ଏବେ ସେଇ ସ୍କୁଲ ବାରଣ୍ଡାରେ ମୁଣ୍ଡ ଗୁଜିଂଛି ।

ଦୁର୍ଦ୍ଦଶାରେ ବଞ୍ଚିଥିବା କୁନି ଦାସ ପରିବାରକୁ ପ୍ରଶାସନର ସହାୟତା ପାଇଁ ସ୍ଥାନୀୟ ଅଞ୍ଚଳର ପୂର୍ବତନ କର୍ପୋରେଟର ଅମରେଶ(ବାଇଁଆ) ଜେନା ସବୁପ୍ରକାର ସହଯୋଗ କରୁଛନ୍ତି । ବିଏମସି ପକ୍ଷରୁ ତାଙ୍କ ପାଇଁ ୨୦ ହଜାର ଟଙ୍କା ସହାୟତା ଦିଆଯାଇଛି । କିଛି ଦରଦୀ ବ୍ୟକ୍ତି ମଧ୍ୟ ଅସହାୟ କୁନି ଦାସଙ୍କୁ ସହାୟତାର ହାତ ବଢ଼ାଇଛନ୍ତି । ଓଲିଉଡ଼୍ ତାରକା ପପୁ ସନ୍ତୁକା ଏବଂ ପିଣ୍ଟୁ ମହାନ୍ତି ୫୦ ହଜାର ଟଙ୍କା ପ୍ରଦାନ କରିଛନ୍ତି । ଚିନ୍ତାମଣିଶ୍ୱର ଅଞ୍ଚଳର ଯୁବକ ସଂଘ ମଧ୍ୟ କୁନି ଦାସର ପରିବାର ମୁହଁରେ ହସ ଫୁଟାଇବା ପାଇଁ ଆଗେଇ ଆସିଛନ୍ତି ।