ଭୁବନେଶ୍ୱର: ଭୁବନେଶ୍ୱର ସହରକୁ ‘ଫନି’ ବିପଦରୁ ରକ୍ଷା କରିବାକୁ ଏକ ଆକ୍ସନ୍ ପ୍ଲାନ୍ ପ୍ରସ୍ତୁତ କରାଯାଇଛି । ବାତ୍ୟା ଓ ବର୍ଷା ଯୋଗୁଁ ସହରବାସୀ ଯେଭଳି ଅସୁବିଧାରେ ନ ପଡ଼ନ୍ତି ଏବଂ କାହାର କିଛି କ୍ଷୟକ୍ଷତି ନ ହେବ ସେଥିପ୍ରତି ଟିକନିକ୍ ନଜର ରଖାଯାଇଛି । ସ୍ଥାନାନ୍ତର, ଉଦ୍ଧାର ଓ ରିଲିଫ୍ କାର୍ଯ୍ୟକୁ ସହଜ କରିବା ପାଇଁ ମଲ୍ଟି ଏଜେନ୍ସୀ ଟିମ୍ ଗଠନ କରାଯାଇଛି । ପୂର୍ତ୍ତ ସଚିବ ତଥା ଭୁବନେଶ୍ୱର ସହର ପାଇଁ ସ୍ୱତନ୍ତ୍ର ଦାୟିତ୍ୱରେ ଥିବା ଡ. କ୍ରିଷାନ୍ କୁମାର ନିଜ ଉପରକୁ ସବୁ ଦାୟିତ୍ୱ ନେଇଛନ୍ତି ।
ଆଜି ଅପରାହ୍ନରେ ବିଏମସି କନଫରେନ୍ସ ହଲ୍ ରେ ଡ. କୁମାର ଏକ ସମୀକ୍ଷା ବୈଠକ କରି ପ୍ରସ୍ତୁତି ଓ ମୁକାବିଲା ଯୋଜନାକୁ ଜୋରଦାର କରିଛନ୍ତି । ସହରର ରାସ୍ତା, ଡ୍ରେନେଜ୍, ବିଜୁଳି ଆଦି ଯେ କୌଣସି ସମସ୍ୟା ଦେଖାଦେଲେ ଯୁଦ୍ଧକାଳୀନ ଭିତ୍ତିରେ ସମାଧାନ କରିବାକୁ ବିଭିନ୍ନ ବିଭାଗକୁ ସଜାଗ କରାଯାଇଛି । ସହରବାସୀଙ୍କ ତ୍ୱରିତ୍ ଆପତ୍ତି ଅଭିଯୋଗ ପାଇଁ ଟୋଲ୍ ଫି୍ର ନମ୍ବର ୧୮୦୦୩୪୫୦୦୬୧ ଏବଂ ଲ୍ୟାଣ୍ଡଲାଇନ୍ ୦୬୭୪-୨୪୩୧୨୫୩ ଖୋଲାଯାଇଛି । ସହରବାସୀ ଏହି ନମ୍ବରରେ ସେମାନଙ୍କ ସମସ୍ୟା ଜଣାଇଲେ ତୁରନ୍ତ ପଦକ୍ଷେପ ନିଆଯିବ । ଏଥିସହ ବିଏମସିରେ ଏକ କଣ୍ଟ୍ରୋଲ୍ ରୁମ୍ ଖୋଲାଯାଇଛି ।
ସହରକୁ ୧୩ ଟି ସେକ୍ଟରରେ ବିଭକ୍ତ କରାଯାଇ ଜଣେ ଲେଖାଏଁ ଓଏଏସ୍ ଅଫିସରଙ୍କୁ ଦାୟିତ୍ୱ ଦିଆଯାଇଛି । ଜଣେ ସିଭିଲ୍ ଇଂଜିନିୟର ଏବଂ ଜଣେ ଡ୍ରେନେଜ୍ ଇଂଜିନିୟରଙ୍କୁ ସହଯୋଗୀ ଭାବେ ଅବସ୍ଥାପିତ କରାଯାଇଛି । ଏହି ଟିମ୍ ରେ ସଂପୃକ୍ତ ୱାର୍ଡ ଅଫିସର, କମୁ୍ୟନିଟି ଅର୍ଗାନାଇଜର୍, ଅଙ୍ଗନବାଡ଼ି କର୍ମୀ, ଆଶା କର୍ମୀ ଏବଂ ବସ୍ତିନେତାମାନଙ୍କୁ ରଖାଯାଇଛି । ଏହି ସେକ୍ଟରଗୁଡ଼ିକ ହେଲା, ଇନଫୋସିଟି, ଜାଭିଅର୍, ବାଣୀବିହାର, କୁଆଖାଇ, ଖଣ୍ଡଗିରି, ଇସକନ୍ ଅଞ୍ଚଳ, ଓୟୁଏଟି, ଏୟାରପୋର୍ଟ, ସ୍ମାର୍ଟ ଡିଷ୍ଟ୍ରିକ୍ଟ ଏରିଆ, ସଚିବାଳୟ ମାର୍ଗ, କଟକ ରୋଡ, କଳ୍ପନା ଏବଂ ଲିଙ୍ଗରାଜ ଅଞ୍ଚଳ । ‘ଫନି’ ବିପଦର ମୁକାବିଲା ପାଇଁ ସେକ୍ଟର ଅଫିସରଙ୍କୁ ପୂର୍ଣ୍ଣ ସ୍ୱାଧୀନତା ଦିଆଯାଇଛି । କାହାରି ନିଦେ୍ର୍ଦଶ ବା ଅନୁମତିକୁ ଅପେକ୍ଷା ନକରି ଗ୍ରାଉଣ୍ଡ ଜିରୋରେ ଯାହା ଠିକ୍ ସେହି ନିଷ୍ପତ୍ତି ନେବେ ।
