ଭୁୁବନେଶ୍ୱର: ଓଡ଼ିଶାର ବିକାଶକୁ ଖୁବ୍ ତାରିଫ୍ କରିବା ସହ ରାଜ୍ୟ ସରକାରଙ୍କୁ ପ୍ରଶଂସାରେ ପୋତି ପକାଇଛନ୍ତି ପଞ୍ଚଦଶ ଅର୍ଥ କମିଶନ ଅଧ୍ୟକ୍ଷ ନନ୍ଦକିଶୋର ସିଂହ । ଏକ ସ୍ଥିର ସରକାର ଓ ନେତୃତ୍ୱ ଯୋଗୁଁ ରାଜ୍ୟରେ ଗରିବୀ କମିଛି ବୋଲି ସେ କହିଛନ୍ତି । ଓଡ଼ିଶା ସରକାରଙ୍କ ଆର୍ଥିକ ପରିଚାଳନା ଓ ପ୍ରାକୃତିକ ବିପର୍ଯ୍ୟୟ ମୁକାବିଲା ଉପରେ ଶ୍ରୀ ସିଂହ ସନ୍ତୋଷ ପ୍ରକାଶ କରିଛନ୍ତି । ରାଜ୍ୟ ସରକାର ଆରମ୍ଭ କରିଥିବା ‘କାଳିଆ’ ଯୋଜନାକୁ ମଧ୍ୟ ସେ ପ୍ରଶଂସା କରିଛି । ଏଥିରେ ସ୍ୱଚ୍ଛତା ରକ୍ଷା କରି ପ୍ରକୃତ ହିତାଧିକାରୀଙ୍କ ପାଖେ ଯୋଜନା ପହଞ୍ଚାଇବାକୁ ପରାମର୍ଶ ଦେଇଛନ୍ତି ।
ଆଜି ଭୁବନେଶ୍ୱରରେ ଏକ ସାମ୍ବାଦିକ ସମ୍ମିଳନୀରେ ସେ କହିଛନ୍ତି, ଓଡ଼ିଶାରେ ରାଜନୈତିକ ସ୍ଥିରତା ଓ ନେତୃତ୍ୱ ଯୋଗୁଁ ରାଜ୍ୟର ଅଭିବୃଦ୍ଧି ହେଉଛି । କେନ୍ଦ୍ର ସରକାରଙ୍କ ଅର୍ଥକୁ ସଠିକ୍ ବିନିଯୋଗ କରାଯାଉଛି । ତେବେ ଦାରିଦ୍ର୍ୟ ଦୂରୀକରଣରେ ରାଜ୍ୟ ଅଗ୍ରଗତି କରିଥିଲେ ମଧ୍ୟ ଏ ଦିଗରେ ଆହୁରି ଅଧିକ କାର୍ଯ୍ୟ କରିବାକୁ ରାଜ୍ୟ ସରକାରଙ୍କୁ ପରାମର୍ଶ ଦେଇଥିଲେ । ଅର୍ଥ କମିଶନ ଅଧ୍ୟକ୍ଷ କହିଥିଲେ, ବିଗତ ବର୍ଷମାନଙ୍କରେ ଓଡ଼ିଶା ଦାରିଦ୍ର୍ୟ ଦୂରୀକରଣରେ ଯଥେଷ୍ଟ ଅଗ୍ରଗତି କରିଛି । ରାଜ୍ୟର ମୁଣ୍ଡପିଛା ଆୟ ବଢ଼ିଛି । ଯାହା ଜାତୀୟ ହାରଠାରୁ ଅଧିକ ।
ତେବେ ରାଜ୍ୟର ଅଭିବୃଦ୍ଧି ପଥରେ ବାଧକ ହେଉଛି ପ୍ରାକୃତିକ ବିପର୍ଯ୍ୟୟ । ସେହିଭଳି ସ୍ୱାସ୍ଥ୍ୟ ବ୍ୟବସ୍ଥାରେ ଆହୁରି ସୁଧାର ଆଣିବାକୁ ପଡ଼ିବ । ୮ରୁ ୧୦ ହଜାର ରୋଗୀଙ୍କ ପାଇଁ ଜଣେ ଡାକ୍ତର ଆଦୌ ଭଲ ଖବର ନୁହେଁ । ରାଜ୍ୟରେ ଅଧିକ ମେଡ଼ିକାଲ କଲେଜ ସହ ଅଧିକ ଡାକ୍ତରଙ୍କ ଆବଶ୍ୟକତା ଅଛି । ଶିକ୍ଷା ବ୍ୟବସ୍ଥାରେ ରାଜ୍ୟ ସରକାର ଅନେକ ଉନ୍ନତି ଆଣିଛନ୍ତି । ତେବେ ବ୍ୟବସ୍ଥାରେ ଅଧିକ ଉନ୍ନତି ଆଣିବାକୁ ସେ ପରାମର୍ଶ ଦେଇଥିଲେ ।
