ଭୁବନେଶ୍ୱର: ପ୍ରଥମେ ଅସମ୍ଭବରୁ ସମ୍ଭବ ହୋଇଥିବା ଏବର୍ଷର ରଥଯାତ୍ରା କୋଭିଡ୍ ନିୟମ ଭିତରେ ସବୁଠାରୁ ଶୃଙ୍ଖଳିତ ହୋଇପାରିଛି । ସ୍ନାନ ପୂର୍ଣ୍ଣିମାଠାରୁ ଆରମ୍ଭ କରି ରଥଯାତ୍ରା, ନୀଳାଦ୍ରି ବିଜେ ପର୍ଯ୍ୟନ୍ତ ବିନା ଭକ୍ତରେ ଅତ୍ୟନ୍ତ ଶୃଙ୍ଖଳିତ ଭାବରେ ମହାପ୍ରଭୁଙ୍କର ନବଦିନ ଯାତ୍ରା ସଫଳତାର ସହ ସମ୍ପନ୍ନ କରାଇଥିବା ନାୟକମାନଙ୍କୁ ସବୁଆଡୁ ବାହାବା ମିଳିଛି ।
ସେବାୟତ ଭାଇ ଓ ପ୍ରଶାସନର ନିଷ୍ଠାପର ଉଦ୍ୟମ ଯୋଗୁଁ ଏବର୍ଷର ରଥଯାତ୍ରା ସବୁଠାରୁ ଶୃଙ୍ଖଳିତ ଓ ସୁବ୍ୟବସ୍ଥିତ ହୋଇପାରିଥିବା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସୋସିଆଲ୍ ମିଡ଼ିଆ ହାଣ୍ଡଲ୍ ରେ ପ୍ରତିକ୍ରିୟା ରଖିଛନ୍ତି ।
ମହାପ୍ରଭୁ ଶ୍ରୀଜଗନ୍ନାଥଙ୍କ କୃପାରୁ ତାଙ୍କ ରଥଯାତ୍ରା ସଫଳତାର ସହ ସମ୍ପନ୍ନ ହୋଇପାରିଲା ବୋଲି ପୁରୀ ଗଜପତି ମହାରାଜା ଶ୍ରୀ ଦିବ୍ୟସିଂହ ଦେବ ପ୍ରତିକ୍ରିୟା ଦେଇଛନ୍ତି । ମହାପ୍ରଭୁଙ୍କ ଆଶିର୍ବାଦ ସାଙ୍ଗକୁ ରାଜ୍ୟ ସରକାର, ଶ୍ରୀମନ୍ଦିର, ଜିଲ୍ଲା ପ୍ରଶାସନ ଏବଂ ଶ୍ରୀମନ୍ଦିର ସେବାୟତମାନଙ୍କ ନିଷ୍ଠାପର ଉଦ୍ୟମ ଓ ଅକ୍ଲାନ୍ତ ପରିଶ୍ରମ ଯୋଗୁଁ ଏହା ସମ୍ଭବ ହୋଇପାରିଥିବା କହି ଗଜପତି ସମସ୍ତଙ୍କୁ ଧନ୍ୟବାଦ ଜଣାଇଛନ୍ତି । କୋଭିଡ୍ ନିୟମ ମାନି ଘରେ ଟେଲିଭିଜନ୍ ରେ ସିଧା ପ୍ରସାରଣ ଦେଖିଥିବା କୋଟି କୋଟି ଭକ୍ତଙ୍କ ସହଯୋଗ ବିନା ଏହା ସମ୍ଭବ ହୋଇ ନ ଥାଆନ୍ତା ବୋଲି ମଧ୍ୟ ଗଜପତି କହିଛନ୍ତି ।
ସୂଚନାଯୋଗ୍ୟ, ରଥଯାତ୍ରାକୁ ସଫଳତାର ସହ ସମ୍ପନ୍ନ କରାଇବା ପଛରେ ଯାହାଙ୍କର ବେଶୀ ଭୂମିକା ଦେଖିବାକୁ ମିଳିଲା ସେ ହେଉଛନ୍ତି ଶ୍ରୀମନ୍ଦିର ମୁଖ୍ୟ ପ୍ରଶାସକ ଡକ୍ଟର କ୍ରିଷନ୍ କୁମାର । ରାଜ୍ୟ ସରକାରଙ୍କ ଆଦେଶକୁ ଅକ୍ଷରେ ଅକ୍ଷରେ ପାଳିବାର ତାଙ୍କ ଚାଲେଂଜ ଓ ନିଷ୍ଠାକୁ ସମସ୍ତେ ପ୍ରଶଂସା କରିଛନ୍ତି । ୧୨ ଦିନ ବିଳମ୍ବରେ ଆରମ୍ଭ ହୋଇଥିବା ରଥକାର୍ଯ୍ୟକୁ ୪ ଦିନ ଆଗରୁ ଶେଷ କରାଇବା ଏବଂ କୋଭିଡ୍ ନିୟମ ପାଳନ ସହ ରଥଯାତ୍ରାକୁ ସୁବ୍ୟବସ୍ଥିତ ଓ ସୁରୁଖୁରୁରେ ସମ୍ପନ୍ନ କରିବାରେ ତାଙ୍କର ବିଶେଷ ଅବଦାନ ଦେଖିବାକୁ ମିଳିଥିଲା ।
