ଏଥର ଜାଗରରେ ଝଲସିବ ଏକାମ୍ର କ୍ଷେତ୍ର

ଭୁୁବନେଶ୍ୱର: ଆଗାମୀ ମହାଶିବରାତ୍ରୀରେ ଭକ୍ତମାନେ ନୂଆ ଅନୁଭବ ନେଇ ଏକାମ୍ରକ୍ଷେତ୍ରରୁ ଫେରିବେ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ପ୍ରତିଶ୍ରୁତିକୁ କାର୍ଯ୍ୟକାରୀ କରିବାର ଦାୟିତ୍ୱ ନେଇଥିବା ୫-ଟି ସଚିବ ଭି.କେ.ପାଣ୍ଡିଆନ୍ ଆଜି ବଡି ଭୋର୍ ରୁ ଏକାମ୍ର କ୍ଷେତ୍ର ଯାଇ ସମସ୍ତ କାର୍ଯ୍ୟର ଅନୁଧ୍ୟାନ କରିଛନ୍ତି । ବର୍ତ୍ତମାନ ସୁଦ୍ଧା ୮୦ ପ୍ରତିଶତ ଜମି ଅଧିଗ୍ରହଣ ସରିଯାଇଥିବାରୁ ଶ୍ରୀ ପାଣ୍ଡିଆନ୍ ପ୍ରଶାସନର ତାରିଫ୍ କରିବା ସହ ନଭେମ୍ବର ସୁଦ୍ଧା ଏହି କାର୍ଯ୍ୟ ସମ୍ପୂର୍ଣ୍ଣ କରିବାକୁ ଡେଡଲାଇନ୍ ଦେଇଛନ୍ତି ।

ଆଗାମୀ ମହାଶିବରାତ୍ରୀ ପୂର୍ବରୁ ମନ୍ଦିର ସଂଲଗ୍ନ ସମସ୍ତ ରାସ୍ତାକୁ ଚଉଡ଼ା କରାଯିବ । ଭକ୍ତମାନଙ୍କ ସୁବିଧା ପାଇଁ ନୂଆ ବିକଳ୍ପ ରାସ୍ତା କାମ ସମ୍ପୂର୍ଣ୍ଣ କରିବାକୁ ଶ୍ରୀ ପାଣ୍ଡିଆନ୍ ନିର୍ଦ୍ଦେଶ ଦେଇଛନ୍ତି । ଏହାଦ୍ୱାରା ମନ୍ଦିର ଦର୍ଶନ ସହ ବିନ୍ଦୁସାଗର କୂଳକୁ ଭକ୍ତମାନେ ସୁବିଧାରେ ଯାଇ ବୁଲିପାରିବେ । ମନ୍ଦିର ଯିବା ପାଇଁ ଇ-ଭେଇକିଲ୍ ବ୍ୟବସ୍ଥା କରାଯାଉଛି । ମନ୍ଦିର ଓ ଆଖପାଖ ଅଞ୍ଚଳକୁ ପ୍ରଦୂଷଣମୁକ୍ତ କରିବା ଲକ୍ଷ୍ୟରେ ଏହାକୁ ଗୁରୁତ୍ୱ ଦିଆଯାଇଛି ।

ଉକ୍ତ ଯୋଜନାରେ ଲିଙ୍ଗରାଜ ମାର୍କେଟ୍ ଠାରୁ ତାଳେଶ୍ୱର ଛକ ପର୍ଯ୍ୟନ୍ତ ନୂଆ ରାସ୍ତା, ନୂଆ ଲିଙ୍ଗରାଜ ମାର୍କେଟ୍ ଠାରୁ ବିନ୍ଦୁସାଗର ସଂଯୋଗ କରୁଥିବା ରାସ୍ତା, ମନ୍ଦିର ସମ୍ମୁଖ ଅଞ୍ଚଳ, ବ୍ରଜବନ୍ଧୁ କଲ୍ୟାଣ ମଣ୍ଡପ ନିକଟରେ ବସ୍ ପାର୍କିଂ ଏବଂ ବଢ଼େଇବାଙ୍କ ଛକର ଉନ୍ନତି କରଯିବ । ଲିଙ୍ଗରାଜ ମନ୍ଦିର ସମେତ ଅନ୍ୟାନ୍ୟ ମନ୍ଦିରଗୁଡ଼ିକର ଚାରିପଟେ ଉତ୍ତମ ଡ୍ରେନେଜ୍ ବ୍ୟବସ୍ଥାକୁ ଅଧିକ ଫୋକସ୍ ଦିଆଯାଉଛି ।

ଇତିମଧ୍ୟରେ ଗୋପାଳତୀର୍ଥ ମଠ ଏବଂ ଶଙ୍କରାନନ୍ଦ ମଠର ଅଧିଗ୍ରହଣ କାର୍ଯ୍ୟ ସରିଛି । ଅବଶିଷ୍ଟ କୋଠା, ଜାଗାର ଅଧିଗ୍ରହଣ କାର୍ଯ୍ୟ ସରିବା ପରେ ଲିଙ୍ଗରାଜ ଉତ୍ତର ଦ୍ୱାରରୁ ଭକ୍ତମାନେ ଖୋଲା ବିନ୍ଦୁସାଗର ଦର୍ଶନ କରିପାରିବେ ।

ସମୀକ୍ଷା ବେଳେ ଶ୍ରୀ ପାଣ୍ଡିଆନ୍ ମହାଶିବରାତ୍ରୀ ପୂର୍ବରୁ ଏ କାର୍ଯ୍ୟଗୁଡ଼ିକୁ ସମ୍ପୂର୍ଣ୍ଣ କରିବା ପାଇଁ ନିର୍ଦ୍ଦେଶ ଦେବା ସହ ତୀର୍ଥଯାତ୍ରୀଙ୍କ ରହଣୀ ଏବଂ ଆନୁସଙ୍ଗିକ ବ୍ୟବସ୍ଥା ଉପରେ ଆଲୋଚନା କରିଥିଲେ ।

ପୂର୍ତ୍ତ ସଚିବ ଡ. କ୍ରିଷନ୍ କୁମାର, ବିଏମସି କମିଶନର ପ୍ରେମଚନ୍ଦ୍ର ଚୌଧୁରୀ ଏବଂ ଅନ୍ୟାନ୍ୟ ଅଧିକାରୀମାନେ ଉପସ୍ଥିତ ଥିଲେ ।