୬ ବିଜେଡି ବିଧାୟକ ନିଲମ୍ବିତ

ଭୁବନେଶ୍ୱର: କ୍ରସ୍ ଭୋଟିଂ ପାଇଁ ମିଳିଲା ଦଣ୍ଡ । ରାଜ୍ୟସଭା ନିର୍ବାଚନରେ ଦଳୀୟ ନିଷ୍ପତ୍ତି ବିରୋଧରେ ଯାଇଥିବା ବିଜେଡିର ୬ ବିଧାୟକଙ୍କୁ ଦଣ୍ଡ ମିଳିଛି । ବିଜେଡିରୁ ଆଜି ସେମାନଙ୍କୁ ନିଲମ୍ବନ କରାଯାଇଛି । ନିଲମ୍ବିତ ବିଧାୟକମାନେ ହେଲେ ଚକ୍ରମଣି କହଁର, ନବ କିଶୋର ମଲ୍ଲିକ, ସୌଭିକ ବିଶ୍ୱାଳ, ସୁବାସିନୀ ଜେନା, ରମାକାନ୍ତ ଭୋଇ ଏବଂ ଦେବୀ ରଞ୍ଜନ ତ୍ରିପାଠୀ । ରାଜ୍ୟସଭା ନିର୍ବାଚନରେ ଦଳର ହ୍ୱିପ୍ ଭାଙ୍ଗି ଏମାନେ ବିଜେପି ସମର୍ଥିତ ପ୍ରାର୍ଥୀ ଦିଲ୍ଲୀପ ରାୟଙ୍କୁ ଭୋଟ ଦେଇଥିଲେ ।

ସଂପୃକ୍ତ ବିଧାୟକମାନଙ୍କ ସଭ୍ୟପଦ ରବ୍ଦ ପାଇଁ ବାଚସ୍ପତିଙ୍କୁ ଅନୁରୋଧ କରାଯିବ ବୋଲି ଦଳର ରାଜନୈତିକ ବ୍ୟାପାର କମିଟି(ପିଏସି) ବୈଠକରେ ହୋଇଥିବା ନିଷ୍ପତ୍ତି ସଂକ୍ରାନ୍ତରେ ସୂଚନା ଦେଇଛନ୍ତି ସଦସ୍ୟ ତଥା ମୁଖ୍ୟ ସଚେତକ ଶ୍ରୀମତୀ ପ୍ରମିଳା ମଲ୍ଲିକ । ସେହିଭଳି ଡବଲ୍ ବ୍ୟାଲେଟ୍ ବ୍ୟବହାର କରିଥିବା ବିଜେପିର ଉପାସନା ମହାପାତ୍ର ଏବଂ ପୂର୍ଣ୍ଣଚନ୍ଦ୍ର ସେଠୀଙ୍କ ଭୋଟକୁ ଅବୈଧ ଘୋଷଣା ପାଇଁ ଦଳ ନିର୍ବାଚନ କମିସନଙ୍କ ଦ୍ୱାରସ୍ଥ ହେବ । ବିଜେଡି ବିଧାୟକଙ୍କ ସଭ୍ୟପଦ ରଦ୍ଦ ଏବଂ ଦୁଇ ବିଜେପି ବିଧାୟକଙ୍କ ଭୋଟ ଅବୈଧ ଘୋଷଣା ପାଇଁ ଆଇନଗତ ଲଢ଼େଇ କରାଯିବ ବୋଲି ଶ୍ରୀମତୀ ମଲ୍ଲିକ କହିଛନ୍ତି ।

ଗତ ୧୬ ତାରିଖରେ ଅନୁଷ୍ଠିତ ରାଜ୍ୟସଭା ନିର୍ବାଚନରେ ବିଜେଡିରୁ ପୂର୍ବ ନିଲମ୍ବିତ ଦୁଇ ବିଧାୟକ ସନାତନ ମହାକୁଢ଼ ଏବଂ ଅରବିନ୍ଦ ମହାପାତ୍ରଙ୍କ ସମେତ ଉପରୋକ୍ତ ୬ ବିଧାୟକ କ୍ରସ୍ ଭୋଟିଂ କରିଥିଲେ । ୧୭ ତାରିଖରେ ଏହି ୬ ଜଣ ବିଧାୟକଙ୍କୁ ଦଳ ପକ୍ଷରୁ କାରଣ ଦର୍ଶାଅ ନୋଟିସ୍ ଜାରି କରିଥିଲେ ମୁଖ୍ୟ ସଚେତକ ଶ୍ରୀମତୀ ପ୍ରମିଳା ମଲ୍ଲିକ । ୨୦ ତାରିଖ ଅପରାହ୍ନ ୫ଟା ସୁଦ୍ଧା ଉତ୍ତର ରଖିବାକୁ କୁହାଯାଇଥିଲା । କଣ୍ଟ ପୂରିବା ପୂର୍ବରୁ ଗତକାଲି ପ୍ରଥମେ ବିଧାୟକ ଦେବୀ ରଞ୍ଜନ ତ୍ରିପାଠୀ ଉତ୍ତର ଦେଇଥିଲେ । ସେଥିରେ ପ୍ରମିଳା ମଲ୍ଲିକଙ୍କୁ ସେ କେସ୍ ଧମକ ଦେଇଥିଲେ । ସୋ କଜ୍ ନୋଟିସ୍ ପ୍ରତ୍ୟାହାର ନ କଲେ ଫୌଜଦାରୀ ମାମଲା ରୁଜୁ କରିବାକୁ ଧମକାଇ ଥିଲେ । ସମସ୍ତଙ୍କ ଉତ୍ତରକୁ ଗତକାଲି ଅନୁଷ୍ଠିତ ଦଳର ଶୃଙ୍ଖଳା କମିଟି ବୈଠକରେ ତର୍ଜମା କରାଯାଇ ଉତ୍ତର ସନ୍ତୋଷଜନକ ନୁହେଁ ବୋଲି ବିଚାର କରାଯାଇଥିଲା । ସେମାନଙ୍କୁ ଦଳରୁ ନିଲମ୍ବନ ପାଇଁ କମିଟି ସୁପାରିଶ କରିଥିଲେ । ଆଜି ସଂଧ୍ୟାରେ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ଅନୁଷ୍ଠିତ ଦଳର ରାଜନୈତିକ ବ୍ୟାପାର କମିଟି ବୈଠକରେ ଏହି ସୁପାରିଶକୁ ଗ୍ରହଣ କରାଯାଇଥିଲା ।