ଅପରାଜିତାଙ୍କ ମନମାନି, ଦଳୀୟ ନେତାଙ୍କୁ ଅସମ୍ମାନ !

ଭୁବନେଶ୍ୱର: ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀଙ୍କ ଅହଂକାର ଓ ମନମାନି ବିଜେପିରେ ଭୟଙ୍କର ପରିସ୍ଥିତି ସୃଷ୍ଟି କରିବାକୁ ଯାଉଛି । ସମାନ୍ତରାଳ ସଂଗଠନରେ ବିଶ୍ୱାସ ରଖୁଥିବା ଏହି ବିଜେପି ସାଂସଦ ନିଜର ଦଳୀୟ ସାଥୀ, ସହଯୋଗୀଙ୍କୁ ଅଣଦେଖା କରୁଥିବାରୁ ପ୍ରତିକ୍ରିୟା ତୀବ୍ର ହୋଇଛି । ସାଂସଦଙ୍କୁ ପାନେ ଦେବା ପାଇଁ ଶକ୍ତିଶାଳୀ ଗୋଷ୍ଠୀ ପକ୍ଷରୁ ପ୍ରସ୍ତୁତି ଆରମ୍ଭ ହୋଇଯାଇଥିବା ଦଳୀୟ ସୂତ୍ରରୁ ଆଭାସ ମିଳିଛି ।

ଅପରାଜିତାଙ୍କ ମନମାନି ଏବଂ ଦଳୀୟ ନେତାଙ୍କୁ ଅସମ୍ମାନର ଦୁଇଟି ସଦ୍ୟତମ ଘଟଣା ବିଜେପି ମହଲରେ ଚର୍ଚ୍ଚାର ବିଷୟ ହୋଇଛି ।

ଗତ ୧୩ ତାରିଖରେ ଖୋର୍ଦ୍ଧା ଜିଲ୍ଲା ବିଜେପି କାର୍ଯ୍ୟକାରିଣୀ ବୈଠକ ବୋଲଗଡ଼ରେ ଅନୁଷ୍ଠିତ ହୋଇଥିଲା । ବୈଠକର ମୁଖ୍ୟ ପୁରୋଧା ଥିଲେ ସାଂସଦ ମହୋଦୟା । ତାଙ୍କ ହିସାବକୁ ଡେଇଁ ସଭାମଞ୍ଚରେ ଚେୟାର ପଡ଼ିଥିବା ଦେଖି ସେ ପ୍ରଥମରୁ ଉତକ୍ଷିପ୍ତ ହୋଇପଡ଼ିଥିଲେ । ୬ ଟି ଚେୟାର ରଖି ଅନ୍ୟ ୩/୪ ଟି ଚେୟାର ହଟାଇ ଦେଇଥିଲେ । ଫଳରେ ପୂର୍ବତନ ସାଂଗଠନିକ ସମ୍ପାଦକ ଶାରଦା ଶତପଥୀ, ରାଜ୍ୟ ପ୍ରବକ୍ତା ସୋନାଲି ସାହୁ ଏବଂ ଯତୀନ ମହାନ୍ତିଙ୍କ ଭଳି ବରିଷ୍ଠ ନେତାଙ୍କୁ ସଭାମଞ୍ଚ ତଳେ ଆସନ ମିଳିଥିଲା ।

ତେବେ ସେତିକିରେ କଥା ସରିଲାନି । ସାଂସଦ ତାଙ୍କ ପ୍ରାରମ୍ଭିକ ଭାଷଣରେ ଉପସ୍ଥିତ ନେତୃମଣ୍ଡଳୀଙ୍କ ନାଁ ସମ୍ବୋଦନ କରିଥିଲେ ମଧ୍ୟ ସୋନାଲି ସାହୁଙ୍କ ନାଁ ଧରି ନ ଥିଲେ । ଏହା ସୋନାଲିଙ୍କୁ ବାଧିବାରୁ ସେ ମାଇକ୍ରୋଫୋନ୍ ଭିଡ଼ିଆଣିଥିଲେ ଏବଂ ଧିସେଇଁ ହୋଇ ନିଜର ପରିଚୟ ଦେଇଥିଲେ । ଏଥିରେ ସାଂସଦ ଉତକ୍ଷିପ୍ତ ହୋଇ ସୋନାଲିଙ୍କ ଉଦ୍ଦେଶ୍ୟରେ ଆକ୍ଷେପମୂଳକ ମନ୍ତବ୍ୟ ଦେଇଥିଲେ ।

କହିଥିଲେ, କଂଗ୍ରେସରୁ ବିଜେପିକୁ ଆସିଥିବା ଅଧିକାଂଶ ଲୋକ ଏମିତି ବିଶୃଙ୍ଖଳିତ । କଂଗ୍ରେସର ଏହି ବିଶୃଙ୍ଖଳିତ ଚରିତ୍ର ଯୋଗୁଁ ସେ ସେହି ଦଳରେ ଯୋଗଦେବାକୁ ପ୍ରଥମେ ଅଫର୍ ପାଇଥିଲେ ମଧ୍ୟ ଗ୍ରହଣ କରି ନ ଥିଲେ । କଂଗ୍ରେସରୁ ଆସିଥିବା ନେତାମାନେ ଶୃଙ୍ଖଳା ଜ୍ଞାନ ଶିଖ ବୋଲି ସାଂସଦ କହିଥିଲେ । ସାଂସଦଙ୍କର ଏହି ମନ୍ତବ୍ୟ ସେଠାରେ ନିଆଁ ଲଗାଇ ଦେଇଥିଲା । ବୋଲଗଡ଼-ବେଗୁନିଆ ଅଞ୍ଚଳର ଅଧିକାଂଶ କର୍ମୀ ସାଂସଦଙ୍କ ଏହି ମନ୍ତବ୍ୟର ବିରୋଧ କରି ପ୍ରବଳ ହୋ ହଲ୍ଲା କରିଥିଲେ ଏବଂ ଚେୟାର ଫିଙ୍ଗା ଫୋପଡ଼ା କରି ପଳାଇ ଯାଇଥିଲେ ।

ଆଲୋଚନା ବେଳେ ମଧ୍ୟ ଅପରାଜିତା ଓ ସୋନାଲିଙ୍କ ମଧ୍ୟରେ ତୁ ତୁ ମେଁ ମେଁ ମଧ୍ୟ ଦେଖିବାକୁ ମିଳିଥିଲା । ରାଜନୈତିକ ଚିଠା ପ୍ରସ୍ତାବରେ ମହିଳାଙ୍କ ସୁରକ୍ଷା ସମ୍ପର୍କିତ ଦୁଇଠି ପ୍ରସଙ୍ଗ ଯୋଡିବାକୁ ଚାହିଁଥିଲେ ସୋନାଲି । ମାତ୍ର ସୋନାଲିଙ୍କ ମୁହଁରୁ କଥା ନ ସରୁଣୁ ସାଂସଦ ତାହାକୁ ଅଗ୍ରାହ୍ୟ କରିଦେଇଥିଲେ ।

ସେହିଭଳି, ଗତକାଲି ଅର୍ଥାତ୍ ୧୪ ତାରିଖରେ ଅପରାଜିତାଙ୍କ କୋଣାର୍କ ଗସ୍ତକୁ ଦଳୀୟ ମହଲରେ ଅସନ୍ତୋଷ ଦେଖାଦେଇଛି । କୋଣାର୍କ ସୁରକ୍ଷା ପରିଷଦ ଆମନ୍ତ୍ରଣରେ ସେଠାରେ ପଦଯାତ୍ରା ଏବଂ ସାଧାରଣ ସଭାରେ ଯୋଗଦେଇଥିଲେ । ପୁରୀ ଲୋକସଭା ନିର୍ବାଚନମଣ୍ଡଳୀ ଅନ୍ତର୍ଗତ କୋଣାର୍କରେ ଏହିସବୁ କାର୍ଯ୍ୟକ୍ରମ ଭୁବନେଶ୍ୱର ସାଂସଦଙ୍କ ପ୍ରାୟୋଜିତ ଥିଲା ବୋଲି କୁହାଯାଉଛି ।

ରୋଚକ କଥା ହେଉଛି, ଅପରାଜିତାଙ୍କ ଏହି କାର୍ଯ୍ୟକ୍ରମରେ ବିଜେପିର କୌଣସି ସ୍ଥାନୀୟ ନେତା କିମ୍ବା ନେତ୍ରୀଙ୍କୁ ଆମନ୍ତ୍ରଣ କରାଯାଇ ନ ଥିଲା । ସ୍ଥାନୀୟ ବିଧାୟକ ପ୍ରାର୍ଥୀ ପ୍ରଭାତୀ ପରିଡ଼ାଙ୍କୁ ମଧ୍ୟ ଅଣଦେଖା କରାଯାଇଥିଲା । ନିଜ ଅଞ୍ଚଳ ବାହାରେ ଅନୁପ୍ରବେଶ କରି ଅପରାଜିତା ନିଜର ଶକ୍ତି ଦେଖାଇବାକୁ ଉଦ୍ୟମ କରିଥିବା କୁହାଯାଉଛି । ଏହା ଶ୍ରୀମତୀ ପରିଡ଼ାଙ୍କ ସମେତ ସ୍ଥାନୀୟ ପ୍ରଭାବଶାଳୀ ନେତାଙ୍କୁ ଅପମାନିତ ଓ କ୍ରୋଧିତ କରିଥିବା ଜଣାପଡ଼ିଛି ।

ସୂଚନାଥାଉକି, ରାଜ୍ୟ ସାରା ବୁଲି ନିଜର ପ୍ରଚାର କରୁଥିବା ସାଂସଦ ଅପରାଜିତାଙ୍କୁ ରାଜ୍ୟ ବିଜେପିର କୌଣସି ଗୁରୁତ୍ୱପୂର୍ଣ୍ଣ କାର୍ଯ୍ୟକ୍ରମ ଓ ଆନ୍ଦୋଳନରେ ଦର୍ଶନ ମିଳେନି । ଏହା ପଛରେ ତାଙ୍କର ଅହଂକାର ସ୍ୱଭାବକୁ କିଛି ନେତା ଦାୟୀ କରନ୍ତି । ଅନ୍ୟମାନଙ୍କୁ ଛୋଟ ଓ ଘୃଣା ଦୃଷ୍ଟିରେ ଦେଖୁଥିବାରୁ ସେ ଏଠିକା ଦଳୀୟ ସଂଗଠନରେ ସାମିଲ ନହୋଇ ୟୁଥ୍ ଫର ଆକ୍ସନ୍, ଅଜିତା ଭଳି ବିଭିନ୍ନ ସମାନ୍ତରାଳ ସଂଗଠନ ଗଢ଼ିଥିବା କୁହାଯାଏ । ସାଂସଦଙ୍କର ବ୍ୟକ୍ତିଗତ ସ୍ୱାର୍ଥ ହାସଲରେ ଏହା ସହାୟକ ହେଉଥିବା ବେଳେ ଦଳୀୟ ଦୃଷ୍ଟିକୋଣରୁ ଏହା ସ୍ୱାର୍ଥ ଅନୁକୂଳ ହୋଇନାହିଁ ।

ସର୍ବୋପରି ଶକ୍ତିଶାଳୀ ଗୋଷ୍ଠୀକୁ ଚାଲେଂଜ ଏବଂ କର୍ମକର୍ତ୍ତାଙ୍କୁ ତାଙ୍କର ରୁକ୍ଷ ବ୍ୟବହାର ଯୋଗୁଁ ଦଳରେ ତାଙ୍କର ଗ୍ରହଣୀୟତା ଆଉ ନାହିଁ ବୋଲି ଜଣେ ବରିଷ୍ଠ ନେତା କହିଛନ୍ତି । ବୈଜୟନ୍ତ ପଣ୍ଡାଙ୍କ ପ୍ରଚ୍ଛନ୍ନ ସହଯୋଗରେ ଧର୍ମେନ୍ଦ୍ର ପ୍ରଧାନଙ୍କୁ ବିରୋଧ କରୁଥିବା ଅପରାଜିତା ନିଜର ପତିଆରା ବଢ଼ାଇବା ପାଇଁ ଜାରି ରଖିଥିବା ଏହି ଅଭିଯାନ ସଫଳ ହେବାକୁ ଦିଆଯିବ ନାହିଁ ବୋଲି ଏହି ନେତାଜଣଙ୍କ କହିଛନ୍ତି ।