ଭୁବନେଶ୍ୱର: ବିଜେପି ସହ ଯିଏ ବି ଯୋଡ଼ି ହୋଇ ଅଛନ୍ତି, ସେଭଳି ଲୋକ ବିଜେପିକୁ ଚାଲିଯାଆନ୍ତୁ । ବିଦ୍ରୋହୀ ନେତା ମହମ୍ମଦ ମୋକିମ୍ ଙ୍କୁ ଲକ୍ଷ୍ୟ କରି ପିସିସି ସଭାପତି ଭକ୍ତ ଚରଣ ଦାସ ଏହି ଟିପ୍ପଣୀ ଦେଇଛନ୍ତି । ସୋନିଆ ଗାନ୍ଧୀଙ୍କୁ ମୋକିମ୍ ଙ୍କ ଚିଠିକୁ ନେଇ ନିରବ ଥିବା ଭକ୍ତ ଆଜି ଦିଲ୍ଲୀରେ ଗଣମାଧ୍ୟମ ଆଗରେ ମୁହଁ ଖୋଲିଛନ୍ତି । ତାଙ୍କ ସମ୍ପର୍କରେ ମୋକିମ୍ ଯାହା ଲେଖିଛନ୍ତି ତାହାକୁ ସେ ଖାତିର କରିନାହାନ୍ତି । ଦଳର ଦୁଇ ଶୀର୍ଷ ନେତା ରାହୁଲ ଗାନ୍ଧୀ ଏବଂ ମଲ୍ଲିକାର୍ଜୁନ୍ ଖଡ଼ଗେଙ୍କ ପ୍ରତି ମୋକିମଙ୍କ ଆକ୍ଷେପର ସେ କିନ୍ତୁ କଡ଼ା ଜବାବ ଦେଇଛନ୍ତି ।
ଭକ୍ତ କହିଛନ୍ତି, କଂଗ୍ରେସମୁକ୍ତ ଭାରତ ନିର୍ମାଣ ପାଇଁ ଷଡ଼ଯନ୍ତ୍ର ଚାଲିଥିବା ବେଳେ ରାହୁଲ ଗାନ୍ଧୀ କଠିନ ପରିଶ୍ରମ କରି କଂଗ୍ରେସକୁ ଆଗକୁ ନେଉଛନ୍ତି । ତାଙ୍କର ନିଷ୍ଠା ଓ ପରିଶ୍ରମ ବେକାର ଯାଇନି । ଆଜି ମଧ୍ୟ ଲୋକସଭାରେ ୯୯ ଏମପି ଅଛନ୍ତି । ଏଆଇସିସି ସଭାପତି ମଲ୍ଲିକାର୍ଜୁନ୍ ଖଡ଼ଗେ ଏହି ଯାତ୍ରାରୁ ଆସିଛନ୍ତି । କଂଗ୍ରେସ ପାଇଁ ତାଙ୍କର ତ୍ୟାଗ, ସମର୍ପଣକୁ କେହି ପ୍ରଶ୍ନ କରିପାରିବେନି । ଜୀବନ ତମାମ କଂଗ୍ରେସ ପାଇଁ ତାଙ୍କର ସଂଘର୍ଷ ଜାରି ରହିଛି । ଯାହାଙ୍କର କଂଗ୍ରେସ ପ୍ରତି ସାମାନ୍ୟତମ ଅବଦାନ ନାହିଁ ସେମାନେ ପ୍ରଶ୍ନ ପଚାରିବା ହାସ୍ୟାସ୍ପଦ । ରାହୁଲ ଓ ଖଡ଼ଗେଙ୍କ ଭଳି ନିଷ୍ଠାବାନ ନେତାଙ୍କ ଉପରକୁ ଅଙ୍ଗୁଳି ଉଠାଇବାର ସାମାନ୍ୟତମ ଯୋଗ୍ୟତା ବି ଏମାନଙ୍କର ନାହିଁ । କଂଗ୍ରେସକୁ ମାର୍ଗଦର୍ଶନ କରିବାରେ ବୟସ କେବେହେଲେ ବାଧକ ନୁହେଁ । ସେଥିପାଇଁ ପରିଶ୍ରମ ଓ ନିଷ୍ଠା ଦରକାର ବୋଲି ଭକ୍ତ ବୁଝାଇ ଦେଇଛନ୍ତି ।
ସେ ନିଜେ ଦୈନିକ ୩୦ରୁ ୪୦ କିମି ଚାଲୁଛନ୍ତି ବୋଲି ଭକ୍ତ କହିବା ସହ ଅଙ୍ଗୁଳି ଉଠାଇବା ଲୋକ ୫ କିଲୋମିଟର ଚାଲିକି ଦେଖାନ୍ତୁ ତ ବୋଲି ଆହ୍ୱାନ ଦେଇଛନ୍ତି ।
ସୂଚନାଥାଉକି, ଭକ୍ତଙ୍କ ନେତୃତ୍ୱକୁ ଖୋଲା ଚାଲେଞ୍ଜ କରିଥିଲେ କଟକ ବାରବାଟୀର ପୂର୍ବତନ ବିଧାୟକ ମହମ୍ମଦ ମୋକିମ୍ । କଂଗ୍ରେସର ସର୍ବୋଚ୍ଚ ନେତ୍ରୀ ସୋନିଆ ଗାନ୍ଧୀଙ୍କୁ ଏକ ଚିଠି ଲେଖି ସେ ଭକ୍ତଙ୍କ ଧଜିଆ ଉଡ଼ାଇଥିଲେ । ଲଗାତର ତିନିଥର ନିର୍ବାଚନ ହାରିଥିବା ଭକ୍ତ ଦାସଙ୍କୁ ଓଡ଼ିଶା କଂଗ୍ରେସର ନେତୃତ୍ୱ ଦିଆଯାଇଛି । ତାଙ୍କର ରାଜନୈତିକ ଚିନ୍ତାଧାରା କଂଗ୍ରେସଠାରୁ ସମ୍ପୂର୍ଣ୍ଣ ଭିନ୍ନ । ଜୟପ୍ରକାଶଙ୍କ ଆନ୍ଦୋଳନ ବେଳେ ସେ ଗାନ୍ଧୀ ପରିବାରକୁ ସମାଲୋଚନା କରିଥିଲେ । ସେ ଓ ତାଙ୍କ ପୁଅ କୋଶଳ ଆନ୍ଦୋଳନକୁ ସମର୍ଥନ କରି ଦଳରେ ଅଶାନ୍ତି ସୃଷ୍ଟି କରିଛନ୍ତି । ନୂଆପଡ଼ା ଉପନିର୍ବାଚନରେ କଂଗ୍ରେସ ତାଙ୍କ ନେତୃତ୍ୱରେ ୮୩ ହଜାର ଭୋଟରେ ହାରିଲା । ନୂଆପଡ଼ା ତାଙ୍କ ସଂସଦୀୟ କ୍ଷେତ୍ର ହୋଇଥିଲେ ମଧ୍ୟ ପ୍ରଦର୍ଶନ ଅତ୍ୟନ୍ତ ନିରାଶଜନକ ହେଲା । ନିଜ ସଂସଦୀୟ କ୍ଷେତ୍ର ଯେଉଁଠି ତାଙ୍କୁ ବିଶ୍ୱାସ କରୁନି, ସାରା ରାଜ୍ୟର କର୍ମୀମାନେ କିଭଳି ବିଶ୍ୱାସ କରିବେ? ସେଭଳି ବ୍ୟକ୍ତି ଓଡ଼ିଶାରେ କଂଗ୍ରେସକୁ ନେତୃତ୍ୱ ଦେବା ପାଇଁ ସମର୍ଥ ନୁହଁନ୍ତି ବୋଲି ମୋକିମ୍ ଦର୍ଶାଇଥିଲେ ।
ଅନ୍ୟପକ୍ଷରେ ମହାରାଷ୍ଟ୍ର, ହରିଆନା, ବିହାର ଓ ୟୁପି କଥା ଉଠାଇ କଂଗ୍ରେସର କେନ୍ଦ୍ରୀୟ ନେତୃତ୍ୱଙ୍କୁ ମଧ୍ୟ ଚାଲେଞ୍ଜ କରିଥିଲେ ମୋକିମ୍ । କଂଗ୍ରେସକୁ ମଜବୁତ କରିବା ପାଇଁ କେନ୍ଦ୍ରୀୟ ନେତୃତ୍ୱ କାର୍ଯ୍ୟ କରୁନାହାନ୍ତି । ସେ ବିଧାୟକ ଥିଲା ବେଳେ ୩ ବର୍ଷ ଅପେକ୍ଷା କରି ମଧ୍ୟ ରାହୁଲଙ୍କୁ ଦେଖାକରିପାରିଲେନି । ସମଗ୍ର ଦେଶରେ କଂଗ୍ରେସରେ ଆଜି ଏହି ଅବସ୍ଥା । ଖଡ଼ଗେଙ୍କୁ ୮୩ ବର୍ଷ ହେଲାଣି । ସେ କିଭଳି ଯୁବବର୍ଗଙ୍କୁ ନେତୃତ୍ୱ ଦେବେ ବୋଲି ମୋକିମ୍ ପ୍ରଶ୍ନ କରିଥିଲେ ।
ମୋକିମ୍ ଙ୍କ ଚିଠିକୁ ନେଇ ହାଇକମାଣ୍ଡ କ୍ଷୁବ୍ଧ ହୋଇଥିବା ଶୁଣାଯାଉଥିବା ବେଳେ ଦିଲ୍ଲୀ ଗସ୍ତରେ ଥିବା ଭକ୍ତ ଆଜି ମିଡିଆ ଆଗରେ ମୁହଁ ଖୋଲିବା ଏବଂ ମୋକିମ୍ ଙ୍କୁ ବିଜେପି ପଳେଇଯିବାକୁ ପରୋକ୍ଷରେ ଆହ୍ୱାନ ଦେବା ସ୍ପଷ୍ଟ ସଙ୍କେତ ଦେଉଛି । ମୋକିମ୍ ଙ୍କ ଉପରେ ଯେ କୌଣସି ମୁହୂର୍ତ୍ତରେ କାର୍ଯ୍ୟାନୁଷ୍ଠାନ ହୋଇପାରେ ବୋଲି ସୂଚନା ମିଳୁଛି । ତେବେ ଭକ୍ତଙ୍କ ଟିପ୍ପଣୀ ଉପରେ ମୋକିମ୍ ଙ୍କର ପ୍ରତିକ୍ରିୟା ଆସିନାହିଁ ।
