ଭୁବନେଶ୍ୱରରୁ ଜୟପୁରକୁ ଉଡ଼ିଲା ବିମାନ

ଭୁବନେଶ୍ୱର: କୋରାପୁଟ ଜିଲ୍ଲା ଜୟପୁର ସହରକୁ ଉଡ଼ିଛି ବିମାନ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ଭୁବନେଶ୍ୱର ବିଜୁ ପଟ୍ଟନାୟକ ଆନ୍ତର୍ଜାତୀୟ ବିମାନବନ୍ଦରରେ ପତାକା ଦେଖାଇ ବିମାନ ଉଡ଼ାଣର ଶୁଭାରମ୍ଭ କରିଥିଲେ । ଇଣ୍ଡିଆୱାନ୍ ଏୟାର ବିମାନ ସପ୍ତାହରେ ୬ ଦିନ ଭୁବନେଶ୍ୱରରୁ ଜୟପୁରକୁ ଉଡ଼ାଣ କରିବ । ଏହି ବିମାନ ନିୟମିତ ଭୁବନେଶ୍ୱରରୁ ଜୟପୁର ଏବଂ ଜୟପୁରରୁ ବିଶାଖାପାଟଣା ଯିବ ଏବଂ ବିଶାଖାପାଟଣାରୁ ଜୟପୁର ହୋଇ ଭୁବନେଶ୍ୱର ଫେରିବ ।

ପ୍ରଥମ ପର୍ଯ୍ୟାୟରେ ୯ ସିଟ୍ ବିଶିଷ୍ଟ ଏହି ବିମାନର ଉଡ଼ାଣ ହୋଇଛି । ବିମାନ ୧୧.୩୫ ରେ ଭୁବନେଶ୍ୱରରୁ ବାହାରି ଜୟପୁରରେ ୧.୨୦ ମିନିଟ୍ ରେ ପହଞ୍ଚିବ । ଜୟପୁରରୁ ୧.୪୦ରେ ବାହାରି ବିଶାଖାପାଟଣାରେ ୨.୩୦ ମିନିଟ୍ ରେ ପହଞ୍ଚିବ । ସେହିଭଳି ବିଶାଖାପାଟଣାରୁ ବିମାନ ୩ଟାରେ ବାହାରି ଜୟପୁରରେ ୩.୫୦ ରେ ପହଞ୍ଚିବ ଏବଂ ଜୟପୁରରୁ ୪.୦୫ ରେ ବାହାରି ଭୁବନେଶ୍ୱରରେ ୫.୫୦ ମିନିଟ୍ ରେ ପହଞ୍ଚିବ । ଭୁବନେଶ୍ୱରରୁ ଜୟପୁର ବିମାନ ଭଡ଼ା ୨୫୦୦ ଟଙ୍କା ରଖାଯାଇଛି ।

ବିମାନ ଉଡାଣର ଶୁଭାରମ୍ଭ ଅବସରରେ ନଭେମ୍ବର ୯ ତାରିଖ ପର୍ଯ୍ୟନ୍ତ ଯାତ୍ରୀଙ୍କ ପାଇଁ ୯୯୯ ଟଙ୍କାର ଟିକେଟ୍ ଅଫର୍ ରହିଥିଲା । ତେବେ ବୁକିଂ ଆରମ୍ଭର କିଛି ସମୟ ଭିତରେ ସବୁ ବିକ୍ରୀ ହୋଇଯାଇଥିଲା । ପରବର୍ତ୍ତୀ ଟିକେଟ ଦର ଆନୁଷ୍ଠାନିକ ଭାବେ ଘୋଷଣା ହୋଇ ନ ଥିଲେ ମଧ୍ୟ ୨୫୦୦ ଟଙ୍କା ଧାର୍ଯ୍ୟ ହୋଇଥିବା ଜଣାପଡ଼ିଛି ।

ସୂଚନାଥାଉ କି ଓଡ଼ିଶା ସରକାର, ବେସାମରିକ ବିମାନ ଚଳାଚଳ ମନ୍ତ୍ରଣାଳୟ, ଭାରତ ସରକାର ଏବଂ ଭାରତୀୟ ବିମାନ ବନ୍ଦର ପ୍ରାଧିକରଣଙ୍କ ମିଳିତ ଉଦ୍ୟମରେ ଜୟପୁର ବିମାନବନ୍ଦରକୁ ‘ଉଡ଼ାନ’ ଯୋଜନାରେ ନିର୍ଦ୍ଧାରିତ ବାଣିଜ୍ୟିକ ବିମାନ ଚଳାଚଳ ପାଇଁ ଲାଇସେନ୍ସ ଦିଆଯାଇଛି ।