ଭୁବନେଶ୍ୱର: ଧାମନଗର ଆସନ ବଜାୟ ରଖିଲା ବିଜେପି । ଉପନିର୍ବାଚନରେ ବିଜେପିକୁ ହରାଇ ପାରିଲାନି ଶାସକ ବିଜୁ ଜନତା ଦଳ । ବିଜେପି ପ୍ରାର୍ଥୀ ସୂର୍ଯ୍ୟବଂଶୀ ସୂରଜ ତାଙ୍କର ନିକଟତମ ବିଜେଡି ପ୍ରତିଦ୍ୱନ୍ଦୀ ଶ୍ରୀମତୀ ଅବନ୍ତୀ ଦାସଙ୍କୁ ୯,୮୮୧ ଖଣ୍ଡ ଭୋଟରେ ପରାସ୍ତ କରିଛନ୍ତି । ସ୍ୱାଧୀନ ପ୍ରାର୍ଥୀ ଭାବେ ଅବତୀର୍ଣ୍ଣ ହୋଇଥିବା ବିଜେଡି ବିଦ୍ରୋହୀ ରାଜେନ୍ଦ୍ର ଦାସ ୮,୧୫୩ ଭୋଟ ପାଇ ତୃତୀୟ ସ୍ଥାନରେ ଅଛନ୍ତି । କଂଗ୍ରେସ ପ୍ରାର୍ଥୀ ବାବା ହରେକୃଷ୍ଣ ସେଠୀଙ୍କ ଅମାନତ ଉଡିଯାଇଛି । ମାତ୍ର ୩,୫୬୧ ଖଣ୍ଡ ଭୋଟ ପାଇଛନ୍ତି । ଅନ୍ୟତମ ସ୍ୱାଧୀନ ପ୍ରାର୍ଥୀ ପବିତ୍ର ମୋହନ ଦାସଙ୍କୁ ମିଳିଛି ୪୯୭ ଖଣ୍ଡ ଭୋଟ । ନୋଟାରେ ପଡ଼ିଛି ୬୫୦ ଭୋଟ ।
କାହାର କେତେ ଭୋଟ
ଶ୍ରୀମତୀ ଅବନ୍ତୀ ଦାସ(ବିଜେଡି)-୭୦,୪୭୦
ସୂର୍ଯ୍ୟବଂଶୀ ସୂରଜ(ବିଜେପି)- ୮୦, ୩୫୧
ବାବା ହରେକୃଷ୍ଣ ସେଠୀ(କଂଗ୍ରେସ)-୩,୫୬୧
ରାଜେନ୍ଦ୍ର ଦାସ(ସ୍ୱାଧୀନ)-୮,୧୫୩
ପବିତ୍ର ମୋହନ ଦାସ(ସ୍ୱାଧୀନ) – ୪୯୭
ନୋଟା- ୬୫୦
ଆଜି ସକାଳ ୮ଟାରୁ ଆରମ୍ଭ ହୋଇଥିଲା ଭୋଟ ଗଣତି । ପ୍ରଥମ ରାଉଣ୍ଡରୁ ହିଁ ବିଜେପି ପ୍ରାର୍ଥୀ ସୂରଜ ଆଗରେ ଚାଲିଥିଲେ । ପ୍ରତି ରାଉଣ୍ଡରେ ସେ ବିଜେଡି ପ୍ରାର୍ଥୀଙ୍କୁ ପଛରେ ପକାଇ ଆଗକୁ ବଢ଼ୁଥିଲେ । ମଝିରେ ଦୁଇଟି ରାଉଣ୍ଡରେ ବିଜେଡି ପ୍ରାର୍ଥୀ ସାମାନ୍ୟ ଅଧିକ ଭୋଟ ପାଇଥିଲେ । ତେବେ ରାଉଣ୍ଡ ବଢ଼ିବା ସହିତ ଉଭୟଙ୍କ ମଧ୍ୟରେ ଭୋଟ ବ୍ୟବଧାନ ବଢ଼ି ଚାଲିଥିଲା । ସ୍ୱାଧୀନ ପ୍ରାର୍ଥୀ ରାଜେନ୍ଦ୍ର ଦାସ ମଧ୍ୟ ଭଲ ପ୍ରଦର୍ଶନ କରିଥିଲେ ।
ଗତ ସାଧାରଣ ନିର୍ବାଚନରେ ବିଜେପି ପ୍ରାର୍ଥୀ ସ୍ୱର୍ଗତ ବିଷ୍ଣୁ ଚରଣ ସେଠୀ ୮୦,୧୧୧ ଭୋଟ ପାଇଥିଲା ବେଳେ ବିଜେଡି ପ୍ରାର୍ଥୀ ରାଜେନ୍ଦ୍ର ଦାସଙ୍କୁ ମିଳିଥିଲା ୭୫, ୪୮୬ ଭୋଟ । କଂଗ୍ରେସ ପ୍ରାର୍ଥୀ ବିଦ୍ୟାଧର ଜେନା ପାଇଥିଲେ ୭,୩୦୩ ଭୋଟ ।
ବିଧାୟକ ବିଷ୍ଣୁ ସେଠୀଙ୍କ ଅକାଳ ବିୟୋଗ ଯୋଗୁଁ ଏଠାରେ ଉପନିର୍ବାଚନ ହୋଇଥିଲା । ସ୍ୱର୍ଗତ୍ ସେଠୀଙ୍କ ପୁଅ ୨୭ ବର୍ଷୀୟ ସୂରଜଙ୍କୁ ବିଜେପି ପ୍ରାର୍ଥୀ କରିଥିଲା ବେଳେ ବିଜେଡି, ସ୍ୱୟଂ ସହାୟକ ମହିଳା ଗୋଷ୍ଠୀର ମୁହଁ ଭାବେ ଶ୍ରୀମତୀ ଅବନ୍ତୀ ଦାସଙ୍କୁ ପ୍ରାର୍ଥୀ କରିଥିଲା । ବିଜେଡିରୁ ଟିକେଟ ଆଶାୟୀ ପୂର୍ବତନ ବିଧାୟକ ରାଜେନ୍ଦ୍ର ଦାସ ସ୍ୱାଧୀନ ପ୍ରାର୍ଥୀ ଭାବେ ଲଢ଼ିଥିଲେ ।
୨୦୧୯ ସାଧାରଣ ନିର୍ବାଚନ ପରେ ଧାମନଗରକୁ ମିଶାଇ ଏ ପର୍ଯ୍ୟନ୍ତ ୫ ଟି ଉପନିର୍ବାଚନ ଅନୁଷ୍ଠିତ ହୋଇଛି । ୪ଟି ଆସନରେ ବିଜେଡି ପ୍ରାର୍ଥୀଙ୍କର ଜିତାପଟ ହୋଇଥିଲା । ସେଥିମଧ୍ୟରୁ ବାଲେଶ୍ୱର ଆସନଟି ପୂର୍ବରୁ ବିଜେପି ହାତରେ ଥିଲେ ମଧ୍ୟ ଉପନିର୍ବାଚନରେ ବିଜେଡି ତାହାକୁ ଛଡ଼ାଇ ଆଣିଥିଲା । ଏବେ ଧାମନଗରରେ କିନ୍ତୁ ସେଭଳି ସ୍ଥିତି ରହିଲା ନାହିଁ । ବିଜେଡିକୁ ଉପନିର୍ବାଚନ ପରାଜୟ ବରଣ କରିବାକୁ ପଡ଼ିଛି ।
