ଭୁୁବନେଶ୍ୱର: ବିବାଦରେ ଘରଡିଆଁ ରାଜ୍ୟସଭା ସାଂସଦ ସୁଜିତ କୁମାର । ଦଳୀୟ ମାମଲାରେ ତାଙ୍କର ମାମଲତିକୁ ନେଇ ବରିଷ୍ଠ ନେତାମାନେ ଅସନ୍ତୋଷ ପ୍ରକାଶ କରିଛନ୍ତି । ନୂଆପଡ଼ା ଉପନିର୍ବାଚନ ପାଇଁ ବିଜେପି ପ୍ରାର୍ଥୀଙ୍କ ନାଁ ଆଗତୁରା ଘୋଷଣା କରିବାର ଅଧିକାର ତାଙ୍କୁ କିଏ ଦେଲା ବୋଲି ପ୍ରଶ୍ନ ଉଠିଛି । ରାଜ୍ୟ ସଭାପତି ମନମୋହନ ସାମଲ ମଧ୍ୟ ଏଥିରେ କ୍ଷୁବ୍ଧ ହୋଇଛନ୍ତି । ପୁନଶ୍ଚ ରାଜ୍ୟସଭା ଯିବା ଚକରରେ ଥିବା ସୁଜିତ କୁମାରଙ୍କ ପାଇଁ ଏହା ଘୋର ବିପଦ ସୃଷ୍ଟି କରିଛି ।
ବିଜେଡି ନେତାଙ୍କୁ ଭକୁଆ ବନାଇ ସ୍ୱର୍ଗତ ରାଜେନ୍ଦ୍ର ଢ଼ୋଲକିଆଙ୍କ ପାଳିତ ପୁଅ ଜୟ ଢ଼ୋଲକିଆଙ୍କୁ ବିଜେପି ରାତାରାତି ନିଜ ପଟକୁ ନେଇଆସିଲା । ଗତ ୧୧ ତାରିଖ ଦିନ ବିଜେପି କାର୍ଯ୍ୟାଳୟରେ ସଭାପତି ଶ୍ରୀ ସାମଲ, ମୁଖ୍ୟମନ୍ତ୍ରୀ ମୋହନ ମାଝୀଙ୍କ ଉପସ୍ଥିତିରେ ସେ ପଦ୍ମ ଧରିଲେ । ତେବେ ନୂଆପଡ଼ାରେ ସେ ପ୍ରାର୍ଥୀ ହେବେ ବୋଲି କେହି କହିଲେନି । କାରଣ ବିଜେପି ଏକ ଜାତୀୟ ଦଳ । ଏଠି କୌଣସି ନିର୍ବାଚନ ପାଇଁ ପ୍ରାର୍ଥୀ ଚୟନରେ ଏକ ପ୍ରକ୍ରିୟା ରହିଛି । ପ୍ରାର୍ଥୀ ଘୋଷଣା କ୍ଷମତା ରାଜ୍ୟ ସଭାପତିଙ୍କର ନାହିଁ । ଦିଲ୍ଲୀରୁ ହିଁ ପ୍ରାର୍ଥାଙ୍କ ନାମ ଘୋଷଣା ହୁଏ ।
ଜୟ ଢ଼ୋଲକିଆ ବିଜେପିକୁ ଆସିଲା ପରେ ଭୁବନେଶ୍ୱରରେ ଅନୁଷ୍ଠିତ ଦଳର କୋର୍ କମିଟି ବୈଠକରେ ନୂଆପଡ଼ା ଉପନିର୍ବାଚନ ରଣନୀତି ଏବଂ ସମ୍ଭାବ୍ୟ ପ୍ରାର୍ଥୀଙ୍କ ନାଁ ଚର୍ଚ୍ଚା ହୋଇଥିଲା । ଜୟଙ୍କ ସମେତ ଆଉ କିଛି ସମ୍ଭାବ୍ୟ ପ୍ରାର୍ଥୀଙ୍କ ନାଁ ଚର୍ଚ୍ଚା ହୋଇ କେନ୍ଦ୍ରୀୟ କମିଟିକୁ ଅନୁମୋଦନ ଗଲା । ଦିଲ୍ଲୀରୁ ନାଁ ଘୋଷଣାକୁ ସମସ୍ତଙ୍କର ଅପେକ୍ଷା ରହିଲା ।
ଠିକ୍ ଏତିକିବେଳେ ରାଜ୍ୟସଭା ସାଂସଦ ସୁଜିତ କୁମାର ଗତକାଲି କିଛି ଗଣମାଧ୍ୟମରେ ଜୟ ଢ଼ୋଲକିଆଙ୍କୁ ନୂଆପଡ଼ା ପ୍ରାର୍ଥୀ ବୋଲି ଘୋଷଣା କରିଥିଲେ । ୫୦ ହଜାରରୁ ଅଧିକ ଭୋଟରେ ସେ ଜିତିବେ ବୋଲି ମଧ୍ୟ ଦମ୍ଭ ଦେଖାଇଥିଲେ ।
ଯଦିଓ ଆଜି ଦିଲ୍ଲୀରୁ ଜୟ ଢ଼ୋଲକିଆଙ୍କ ପ୍ରାର୍ଥତ୍ୱ ଘୋଷଣା ହୋଇଛି, ତେବେ ସୁଜିତ ଆଗତୁରା ନାଁ ଘୋଷଣା କରିବା ଦଳୀୟ ବିଶୃଙ୍ଖଳା ଏବଂ କେନ୍ଦ୍ରୀୟ ନେତୃତ୍ୱଙ୍କ ପ୍ରତି ଅପମାନ ବୋଲି ଖୋଦ୍ ବିଜେପି ମହଲରେ ଆଲୋଚନା ହେଉଛି । ଏଭଳି କହିବାକୁ ତାଙ୍କୁ କିଏ ଅଧିକାର ଦେଲା ବୋଲି ଅନେକ ପ୍ରଶ୍ନ କରିଛନ୍ତି । ଦଳର ବରିଷ୍ଠ ନେତାମାନଙ୍କର ଅସନ୍ତୋଷ ପରିପ୍ରେକ୍ଷୀରେ ସଭାପତି ମନମୋହନ ସାମଲଙ୍କର ମୁଣ୍ଡ ବିଗିଡ଼ି ଯାଇଛି ।
ବିଜେପିର ଜଣେ ବିଧାୟକ କହିଛନ୍ତି ଯେ ସୁଜିତ କୁମାର ଭଲ ଡିଲ୍ ମାଷ୍ଟର ହୋଇପାରନ୍ତି । ମାତ୍ର ରାଜନୀତିରେ ତାଙ୍କର ପରିପକ୍ୱତା ଆସିନାହିଁ । ତା’ ହୋଇଥିଲେ ବିଜେଡି ମଜ୍ଜା ବିଜେପିରେ ଖୋଜନ୍ତେନି । ସେଠି ପାଣ୍ଡିଆନ ତାଙ୍କୁ ବଳୀୟାନ୍ କରିଥିଲେ, ମାତ୍ର ବିଜେପିରେ ସେଭଳି ସୁଯୋଗ ନାହିଁ । ଏଠି ହାତେ ମାପି ଚାଖଣ୍ଡେ ଚାଲିବାକୁ ପଡ଼ିବ । ନହେଲେ ନାମ ନେବେ ବୋଲି ସେ କଟାକ୍ଷ କରିଛନ୍ତି ।
ଶେଷ ଖବର ଅନୁଯାୟୀ, ସୁଜିତ କୁମାର ନିଜର ଭୁଲ ପାଇଁ ଅନୁତାପ କରି ନେତୃତ୍ୱଙ୍କ ପାଖରେ କ୍ଷମା ମାଗିଛନ୍ତି । କହୁ କହୁ ତାଙ୍କ ପାଟିରୁ ବାହାରି ପଡ଼ିଛି ବୋଲି ସେ ଜଣାଇଛନ୍ତି । ସଭାପତି ଶ୍ରୀ ସାମଲ ମଧ୍ୟ ତାଙ୍କୁ ସତର୍କ କରାଇ ଛାଡ଼ି ଦେଇଛନ୍ତି । ନୂଆପଡ଼ା ଉପନିର୍ବାଚନ ବ୍ୟସ୍ତତା କାରଣରୁ ସେ ବେଶୀ କଥା ହୋଇ ନ ଥିଲେ ମଧ୍ୟ ଆଗକୁ ଏହା ସୁଜିତଙ୍କ ପାଇଁ ଅସୁବିଧା ସୃଷ୍ଟି କରିପାରେ ବୋଲି କୁହାଯାଉଛି ।
