୩ ରାଜ୍ୟରେ ପୋଛିନେଲା ବିଜେପି

ବିଧାନସଭା ଫଳାଫଳ

ମଧ୍ୟପ୍ରଦେଶ(୨୩୦): ବିଜେପି-୧୬୪, କଂଗ୍ରେସ-୬୫, ଅନ୍ୟାନ୍ୟ-୧
ରାଜସ୍ଥାନ(୧୯୯): ବିଜେପି-୧୧୫, କଂଗ୍ରେସ-୬୯, ଅନ୍ୟାନ୍ୟ-୧୫
ତେଲେଙ୍ଗାନା(୧୧୯): କଂଗ୍ରେସ-୬୪, ବିଆରଏସ-୩୯, ବିଜେପି-୮, ଅନ୍ୟାନ୍ୟ-୮
ଛତିଶଗଡ(୯୦): ବିଜେପି-୫୪, କଂଗ୍ରେସ-୩୫

ଭୁବନେଶ୍ୱର: ମଧ୍ୟପ୍ରଦେଶ, ରାଜସ୍ଥାନ, ଛତିଶଗଡ଼ରେ ବିଜେପି ଓ କଂଗ୍ରେସ ମଧ୍ୟରେ କଡ଼ା ମୁକାବିଲା ନେଇ ରାଜନୈତିକ ବିଶେଷଜ୍ଞଙ୍କ ମତ ତଥା ଅଧିକାଂଶ ଏକଜିଟ୍ ପୋଲ ଭୁଲ୍ ପ୍ରମାଣିତ ହୋଇଛି । ଏହି ତିନୋଟି ଯାକ ରାଜ୍ୟରେ ବିଜେପି ସ୍ପଷ୍ଟ ବହୁମତ ସହ ସରକାର ଗଠନ କରିବାକୁ ସକ୍ଷମ ହୋଇଛି । ତେଲେଙ୍ଗାନାରେ ବିଆରଏସ ସହ କଂଗ୍ରେସର କଡ଼ା ମୁକାବିଲା ଅନୁମାନ ବି ଭୁଲ୍ ହୋଇଛି । ଏଠାରେ କଂଗ୍ରେସକୁ ସ୍ପଷ୍ଟ ବହୁମତ ମିଳିଛି ।

ମଧ୍ୟପ୍ରଦେଶରେ ଶିବରାଜ ସିଂହ ଚୌହାନଙ୍କ ସରକାରଙ୍କ ଅମଳରେ ଅନେକ ଜନକଲ୍ୟାଣ ସ୍କିମ୍ ହୋଇଥିଲେ ମଧ୍ୟ ସରକାର ବିରୋଧୀ ହାୱା (ଇନକମ୍ବେନ୍ସି) ଯେ ନ ଥିଲା ତାହା ନୁହେଁ । ପୁନର୍ବାର ନିର୍ବାଚନୀ ବୈତରଣୀ ପାର୍ କରିବା ଦଳ ପକ୍ଷରେ ଏତେ ସହଜ ନ ଥିଲା । ଗତଥର ନିର୍ବାଚନ ଜିତି ସରକାର ଗଠନ କରିଥିବା କଂଗ୍ରେସରେ ବିଭାଜନ ଘଟାଇ କ୍ଷମତା ଦଖଲ କରିଥିବା ବିଜେପିକୁ ଏଥର ଭୋଟର ପାନେ ଦେବେ ବୋଲି କୁହାଯାଉଥିଲା । ମାତ୍ର ସେୟା ହୋଇ ନାହିଁ । ବରଂ ବିଜେପିକୁ ସ୍ପଷ୍ଟ ବହୁମତ ମିଳିଛି । କଂଗ୍ରେସ ୭୦ ଆସନ ବି ଛୁଇଁ ପାରିନାହିଁ ।

ରାଜସ୍ଥାନରେ ଅଶୋକ ଗେହଲଟ୍ ସରକାରଙ୍କ ବିରୋଧରେ ଜନମତ ଥିଲା । ନିର୍ବାଚନ ବେଳକୁ ଗେହଲଟ୍ ଏବଂ ସଚିନ ପାଇଲଟଙ୍କ ମଧ୍ୟରେ ପ୍ୟାଚ୍ କଂଗ୍ରେସରେ ଲାଗି ରହିଥିବା ଗୋଷ୍ଠୀ କନ୍ଦଳ ଉପରେ ଫରକ୍ ପକାଇ ନ ଥିଲା । ଅନ୍ୟପକ୍ଷରେ ବିଜେପିରେ ବି ଗୋଷ୍ଠୀ କନ୍ଦଳ ଥିଲା । ମାତ୍ର କଂଗ୍ରେସକୁ ତାହା ସୁଯୋଗ ଦେଲା ନାହିଁ । ପ୍ରତିଥର ଶାସକ ଦଳ ବିରୋଧରେ ଭୋଟ ଦେଉଥିବା ରାଜସ୍ଥାନବାସୀ ଏଥର ବି କ୍ଷମତାସୀନ କଂଗ୍ରେସ ଗଣିତକୁ ଓଲଟେଇଦେଲେ ।

ଛତିଶଗଡ଼ରେ ମୁଖ୍ୟମନ୍ତ୍ରୀ ଭୂପେଶ ବାଘେଲ କ୍ଷମତା ବଜାୟ ରଖିବାକୁ ସକ୍ଷମ ହେବେ ବୋଲି ୯ଟି ସଂସ୍ଥାର ଏକଜିଟ୍ ପୋଲ କହିଥିଲା । ସରକାର ଗଢ଼ିବା ପାଇଁ ଆବଶ୍ୟକ ସଂଖ୍ୟା ୪୬କୁ କଂଗ୍ରେସ ଅଚିରେ ହାସଲ କରିବ ବୋଲି କୁହାଗଲା । ମାତ୍ର ଫଳାଫଳ ଓଲଟପାଲଟ କରିଦେଇଛି । ୫୪ ଆସନ ପାଇ ବିଜେପି କ୍ଷମତା ଦଖଲ କରିବାକୁ ସକ୍ଷମ ହୋଇଛି ।

ତେଲେଙ୍ଗାନାରେ କେ.ଚନ୍ଦ୍ରଶେଖର ରାଓ ବିପର୍ଯ୍ୟୟର ସମ୍ମୁଖୀନ ହେବେ ବୋଲି ଅଧିକାଂଶ ସଂସ୍ଥାର ଏକଜିଟ୍ ପୋଲ ରେ କୁହାଯାଇଥିଲା । ତେବେ ସେଠାରେ କଂଗ୍ରେସ ସହ ବିଆରଏସ୍ ର କଡ଼ା ମୁକାବିଲା ହେବ ବୋଲି ଅନୁମାନ କରାଯାଉଥିଲା । ହେଲେ ସରକାର ଗଢ଼ିବା ପାଇଁ ମ୍ୟାଜିକ ନମ୍ବର ୬୦ ଥିବା ବେଳେ କଂଗ୍ରେସ ୬୪ ଆସନ ଦଖଲ କରି ପୂର୍ଣ୍ଣ ସଂଖ୍ୟା ଗରିଷ୍ଠତା ପାଇଛି ।

ମଧ୍ୟପ୍ରଦେଶ, ରାଜସ୍ଥାନ ଓ ଛତିଶଗଡ଼ରେ ବିଜେପିର ବିପୁଳ ବିଜୟ ପଛରେ ମୁଖ୍ୟତଃ ଚାରୋଟି କାରଣ ଉପରେ ଚର୍ଚ୍ଚା ହେଉଛି । ପ୍ରଥମ ମୁଖ୍ୟ କାରଣ ହେଉଛି ମୋଦୀ ଫ୍ୟାକ୍ଟର । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଲୋକପ୍ରିୟତା ଓ ଗ୍ରହଣୀୟତା କମିନାହିଁ ଏବଂ ଭୋଟରଙ୍କ ମଧ୍ୟରେ ମୋଦୀ ମ୍ୟାଜିକ୍ ଅତୁଟ ରହିଛି ତାହା ଏହି ଫଳାଫଳ ପ୍ରମାଣିତ କରିଛି । ସୂଚନା ଥାଉକି, ୨୦୧୮ ବିଧାନସଭା ନିର୍ବାଚନରେ ଏହି ତିନୋଟି ଯାକ ରାଜ୍ୟରେ ବିଜେପି ପରାଜିତ ହୋଇଥିଲା । ତେବେ ବର୍ଷେ ପରେ ଅନୁଷ୍ଠିତ ଲୋକସଭା ନିର୍ବାଚନରେ ବିଜେପିକୁ ଆଖିଦୃଶିଆ ସଫଳତା ମିଳିଥିଲା । ଏହା ମୋଦୀ ଫ୍ୟାକ୍ଟର ର କମାଲ୍ ବୋଲି କୁହାଯାଇଥିଲା ।

ମହିଳା ଭୋଟରଙ୍କୁ ଫୋକସ୍ ହେଉଛି ବିଜେପି ବିଜୟର ଦ୍ୱିତୀୟ କାରଣ । ହିନ୍ଦୀ ହାର୍ଟଲ୍ୟାଣ୍ଡ ଭାବେ ପରିଚିତ ମଧ୍ୟପ୍ରଦେଶ ଓ ଛତିଶଗଡ଼ରେ ବିଜେପିର ବିଶାଳ ବିଜୟ ମହିଳା ଭୋଟରଙ୍କ ସମର୍ଥନ ପାଇଁ ସମ୍ଭବ ହୋଇଛି । କେନ୍ଦ୍ରୀୟ ଯୋଜନା ବାଦ୍ ମଧ୍ୟପ୍ରଦେଶରେ ଅଢ଼େଇ କୋଟିରୁ ଅଧିକ ମହିଳା ଭୋଟରଙ୍କ ପାଇଁ ଶିବରାଜ ସିଂହ ଚୌହାନଙ୍କ ସରକାର ଅନେକ ଯୋଜନା କରିଛନ୍ତି । ଛତିଶଗଡ଼ରେ ବି ମହିଳାଙ୍କ ପାଇଁ ପ୍ରତିଶ୍ରୁତିର ଭଣ୍ଡାର ଛିଡ଼ା କରାଇଥିଲା ବିଜେପି ।

ତୃତୀୟ କାରଣ ହେଉଛି ବିଜେପିର ସାଂଗଠନିକ ଶକ୍ତି । ହିନ୍ଦୁ ବହୁଳ ତିନୋଟି ଯାକ ରାଜ୍ୟରେ ବିଜେପିର ତୃଣମୂଳ ସଂଗଠନ ସୁଦୃଢ଼ ଥିଲା । ୨୦୨୪ ସାଧାରଣ ନିର୍ବାଚନ ପୂର୍ବରୁ ଏହି ବିଧାନସଭା ନିର୍ବାଚନକୁ ସେମି ଫାଇନାଲ୍ କୁହାଯାଉଥିବାରୁ ବିଜେପି ଦଳୀୟ ଗୋଷ୍ଠୀ ବିବାଦକୁ ତୁଟାଇ ସଂଗଠନ ଉପରେ ଅଧିକ ଧ୍ୟାନ ଦେଇଥିଲା ।

ଚତୁର୍ଥ କାରଣ ହେଉଛି, ବିଜେପିର ହିନ୍ଦୁତ୍ୱ ଏଜେଣ୍ଡା ସହ ବିକାଶର ତାଳମେଳ । କେବଳ ଯୋଜନା ଘୋଷଣା କି ମିଥ୍ୟା ପ୍ରତିଶ୍ରୁତି ନୁହେଁ, ଏହାକୁ ସଠିକ୍ ଢ଼ଙ୍ଗରେ କାର୍ଯ୍ୟକାରୀ କଲେ ଯାଇ ଲୋକଙ୍କ ଆସ୍ଥା ଜିଣିହେବ । ଲୋକଙ୍କ ହୃଦୟ ଜିଣିବା ପାଇଁ ବିକାଶର କୌଣସି ବିକଳ୍ପ ନାହିଁ ତାହା ଏହି ଚାରୋଟି ଯାକ ବିଧାନସଭା ନିର୍ବାଚନ ଫଳାଫଳରୁ ସ୍ପଷ୍ଟ ସଙ୍କେତ ଆସିଛି ।

ଐତିହାସିକ ବିଜୟ: ମୋଦୀ

ତିନୋଟି ରାଜ୍ୟରେ ବିପୁଳ ସଫଳତାରେ ବିଜେପି ସାରା ଦେଶରେ ବିଜୟୀ ଉତ୍ସବ ପାଳନ କରିଛି । ଦିଲ୍ଲୀର ମୁଖ୍ୟ ବିଜେପି କାର୍ଯ୍ୟାଳୟରେ ମୁଖ୍ୟ ଉତ୍ସବ ପାଳିତ ହୋଇଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏଥିରେ ଯୋଗଦେଇ ଏହା ଐତିହାସିକ ବିଜୟ ବୋଲି କହିଛନ୍ତି । ଦଳୀୟ କାର୍ଯ୍ୟକର୍ତ୍ତାଙ୍କୁ ଉଦବୋଧନ ଦେଇ ପ୍ରଧାନମନ୍ତ୍ରୀ କହିଛନ୍ତି, ଏହି ବିଜୟ ବିକଶିତ ଭାରତର ଲକ୍ଷ୍ୟ ହାସଲ ପାଇଁ ଉଦ୍ଦିଷ୍ଟ । ଦେଶରେ ୪ ଜାତିର ବିକାଶ ଦ୍ୱାରା ଦେଶର ବିକାଶ ସମ୍ଭବ । ନାରୀ ଶକ୍ତି, ଯୁବ ଶକ୍ତି, କୃଷକ ଓ ଗରିବଙ୍କ ପାଇଁ ବିକାଶ ଜରୁରୀ । ଏହି ବିଜୟ ସହ ମୋର ଦାୟିତ୍ୱ ଆହୁରି ବଢ଼ିଯାଇଛି ବୋଲି ପ୍ରଧାନମନ୍ତ୍ରୀ କହିଥିଲେ ।