ଭୁବନେଶ୍ୱର: ଦୟାନଦୀ ଲିଙ୍ଗିପୁର ପଠାରେ ଘଟିଥିବା ବହୁ ଚର୍ଚ୍ଚିତ ନାବାଳିକା ଗଣଦୁଷ୍କର୍ମ ଘଟଣାର ମୁଖ୍ୟ ଅଭିଯୁକ୍ତ ସତ୍ୟପ୍ରକାଶ ହାତୀ ଓରଫ ଜୋକର ହାପି ଗିରଫ ହୋଇଛି । ଫେରାର ହୋଇଯାଇଥିବା ଏହି ଦୁର୍ଦ୍ଦାନ୍ତ ଅପରାଧୀକୁ କମିଶନରେଟ୍ ପୁଲିସର ସ୍ୱତନ୍ତ୍ର ସ୍କ୍ୱାଡ୍ ଗତ ରାତିରେ ଗଞ୍ଜାମ ଜିଲ୍ଲାରୁ ଗିରଫ କରିଥିଲା । ଆଜି ସକାଳେ ଘଟଣାସ୍ଥଳକୁ ନେଇ ତା’ର କ୍ରାଇମ୍ ସିନ୍ ରିକ୍ରିଏସନ୍ କରିଥିଲା । ସେଦିନ ରାତିରେ ସେହି ନାବାଳିକା ଓ ତାଙ୍କ ପୁରୁଷ ବନ୍ଧୁଙ୍କ ସହ ଯାହା ହୋଇଥିଲା ପୁଲିସ ଆଗରେ କରିକି ଦେଖାଇଲା । ପୁଲିସ ଆଖିରେ ଧୂଳି ଦେଇ କେମିତି କୁଆଡ଼େ ଗଲା ତାହା ବି କହିଲା । ଡାକ୍ତରୀ ପରୀକ୍ଷା ପରେ ତାକୁ କୋର୍ଟ ଚାଲାଣ କରାଯାଇଥିଲା । ଏହି ଜଘନ୍ୟ କାଣ୍ଡରେ ଜୋକର ହାପିର ଦୁଇ ସହଯୋଗୀ କଟକ ଜିଲ୍ଳା ବାଙ୍କୀର ବିଭୁପ୍ରସାଦ ମିଶ୍ର ଓ ଓଲଟପୁରର କାଳନ୍ଦୀ ପାତ୍ର ପୂର୍ବରୁ ଗିରଫ ହୋଇଥିଲେ । ଆଉ ୨ ଜଣ ଅଭିଯୁକ୍ତ ଏବେ ବି ଫେରାର ଅଛନ୍ତି ।
ଶିଶୁପାଳଗଡ଼ର ଜୋକର ହାପି ଜଣେ ଦୁର୍ଦ୍ଦନ୍ତ ଅପରାଧୀ । ତା’ ନାଁରେ ଚୋରି, ଛିନତାଇ, ଡକାୟତି, ହତ୍ୟା ଉଦ୍ୟମ, ଦାଦାବଟି ଭଳି ୨୦ରୁ ଅଧିକ ଅପରାଧିକ ମାମଲା ଅଛି । ୨୦୧୮ ମସିହାରେ ପ୍ରଥମେ ସେ ଏକ ଗାଡ଼ି ଚୋରି ମାମଲାରେ ଗିରଫ ହୋଇଥିଲା । ୨୦୨୨ ମସିହାରେ ଜଣଙ୍କୁ ବ୍ଲେଡ୍ ରେ ମାରିବାକୁ ଉଦ୍ୟମ କରି ଜେଲ୍ ଯାଇଥିଲା । ୨୦୨୪ ମସିହାରେ ଜଣେ ପୁଲିସ ଏସଆଇଙ୍କୁ ମରଣାନ୍ତକ ଆକ୍ରମଣ କରିଥିଲା । ୬ ମାସ ତଳେ ପୁରୀ ବାଇପାସରେ ଜଣେ ବ୍ୟକ୍ତିଙ୍କୁ ଭଙ୍ଗା ମଦ ବୋତଲରେ ଭୂଷି ଦେଇଥିଲା । ଏହି ମାମଲାରେ ସେ ଗିରଫ ହୋଇ ଝରପଡ଼ା ଜେଲରେ ଥିଲା । ୯ ତାରିଖରେ ଜେଲ୍ ରୁ ଫେରିଥିଲା । ଆଉ ୧୦ ତାରିଖ ସଂଧ୍ୟାରେ ସାଙ୍ଗମାନଙ୍କ ସହ ମିଶି ଧଉଳି ପୁରୁଷ ବନ୍ଧୁଙ୍କ ସହ ବୁଲିବାକୁ ଆସିଥିବା ନାବାଳିକା ଗଣଦୁଷ୍କର୍ମ କରିଥିଲା ।
ସୂଚନାଥାଉକି, ୧୦ ତାରିଖ ସଂଧ୍ୟାରେ ଘଟିଥିବା ଏହି ବର୍ବରୋଚିତ କାଣ୍ଡ ସମଗ୍ର ରାଜ୍ୟରେ ଆଲୋଡ଼ନ ସୃଷ୍ଟି କରିଛି । ଏହି ସଙ୍ଗୀନ ମାମଲାକୁ ରାଜ୍ୟ ସରକାର ରେଡ୍ ଫ୍ଲାଗ୍ ଶ୍ରେଣୀଭୁକ୍ତ କରି କ୍ରାଇବ୍ରାଞ୍ଚକୁ ତଦନ୍ତ ଭାର ଦେଇଛନ୍ତି । ଅତି ଶୀଘ୍ର ଚାର୍ଜସିଟ୍ କରାଯାଇ ଫାଷ୍ଟ ଟ୍ରାକ୍ କୋର୍ଟରେ ମାମଲାର ବିଚାର ହେବ ବୋଲି ଜଣାପଡ଼ିଛି ।
ଏହି ନାରକୀୟ କାଣ୍ଡକୁ ନେଇ ରାଜ୍ୟ ମହିଳା କଂଗ୍ରେସ ଆଜି ରାଜ୍ୟ ସରକାରଙ୍କୁ ଟାର୍ଗେଟ୍ କରିଛି । ନାରୀଙ୍କୁ ସୁରକ୍ଷା ଦେବାରେ ସରକାରଙ୍କ ବିଫଳତା ପୁଣି ଥରେ ପ୍ରମାଣିତ ହୋଇଛି ବୋଲି ସଭାନେତ୍ରୀ ମିନାକ୍ଷୀ ବାହିନୀପତି କହିଛନ୍ତି । ସମସ୍ତ ଅଭିଯୁକ୍ତଙ୍କୁ ଗିରଫ ସହ ପୀଡ଼ିତା ନାବାଳିକାଙ୍କୁ ତୁରନ୍ତ ନ୍ୟାୟ ନ ମିଳିଲେ ରାଜଭବନ ଘେରାଉ କରାଯିବ ବୋଲି ସେ ଚେତାବନୀ ଦେଇଛନ୍ତି ।
ପୂର୍ବରୁ ବିରୋଧୀ ଦଳ ନେତା ନବୀନ ପଟ୍ଟନାୟକ ସରକାରଙ୍କୁ କଡ଼ା ସମାଲୋଚନା କରିଥିଲେ । ରାଜଧାନୀରେ ମହିଳାଙ୍କ ପାଇଁ ସୁରକ୍ଷିତ ପରିବେଶ ସୁନିଶ୍ଚିତ କରି ନ ପାରିବା ବିଜେପି ସରକାରରେ ଅପାରଗତା ଓ ସମ୍ବେଦନହୀନ ଆଚରଣକୁ ଦର୍ଶାଉଛି ବୋଲି କହିଥିଲେ । ବିଜୁ ମହିଳା ଜନତା ଦଳ ପକ୍ଷରୁ ସଭାପତି ସ୍ନେହାଙ୍ଗିନୀ ଛୁରିଆ ପ୍ରେସ୍ ମିଟ୍ କରି ମହିଳାଙ୍କୁ ସୁରକ୍ଷା ଦେବାରେ ବିଫଳ ରାଜ୍ୟ ସରକାର ଗାଦି ଛାଡ଼ିଦେବାକୁ ଆହ୍ୱାନ ଦେଇଥିଲେ ।
ତେବେ ଏହି ମାମଲାକୁ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଗମ୍ଭୀରତାର ସହ ନେଇଛନ୍ତି । ତାଙ୍କ ନିର୍ଦ୍ଦେଶରେ ମୁଖ୍ୟ ଅଭିଯୁକ୍ତକୁ ଧରିବା ପାଇଁ ପୁଲିସ ଅକ୍ଲାନ୍ତ ପରିଶ୍ରମ କରିଥିଲା । ଜୋକର ହାପିର ମୋବାଇଲ୍ ଫୋନ୍ ଟ୍ରାକ୍ କରି ଗଞ୍ଜାମ ଜିଲ୍ଲାରୁ ଉଠାଇ ଆଣିଥିଲା । ଅତିଶୀଘ୍ର ଅନ୍ୟ ୨ ଅଭିଯୁକ୍ତକୁ ଧରିବା ପାଇଁ ପୁଲିସର ଧରପଗଡ଼ ଜାରି ରହିଛି ।
