ଭୁୁବନେଶ୍ୱର: ଚର୍ଚ୍ଚିତ ଆଇଏଏସ୍ ଅଧିକାରୀ ସୁଜାତା କାର୍ତ୍ତିକେୟନ ତାଙ୍କ କାର୍ଯ୍ୟରେ ଯୋଗ ଦେଇଛନ୍ତି । ଆଉ ୬ ମାସ ଛୁଟି ପାଇଁ ତାଙ୍କର ଆବେଦନକୁ ରାଜ୍ୟ ସରକାର ଗତକାଲି ଅଗ୍ରାହ୍ୟ କରିଦେଇଥିଲେ । ଆଜି ତାଙ୍କୁ କାର୍ଯ୍ୟରେ ଯୋଗ ଦେବାକୁ କୁହାଯାଇଥିଲା । ସେ କାର୍ଯ୍ୟରେ ଯୋଗଦେବେ ନା ନାହିଁ ତାହାକୁ ନେଇ କଳ୍ପନାଜଳ୍ପନା ଲାଗି ରହିଥିଲା । ମାତ୍ର ତାହାର ଅବସାନ ଘଟାଇ କାର୍ଯ୍ୟକ୍ଷେତ୍ରକୁ ଫେରିଛନ୍ତି ସୁଜାତା । ଅର୍ଥ ବିଭାଗର ସ୍ୱତନ୍ତ୍ର ସଚିବ ଭାବେ କାର୍ଯ୍ୟରେ ଯୋଗ ଦେଇଛନ୍ତି ।
୨୦୦୦ ବ୍ୟାଚ୍ ର ଆଇଏଏସ୍ ସୁଜାତା କାର୍ତ୍ତିକେୟନ ହେଉଛନ୍ତି ପୂର୍ବତନ ଆଇଏଏସ୍ ତଥା ବିଜେଡିର ବହୁ ଚର୍ଚ୍ଚିତ ଭି.କେ.ପାଣ୍ଡିଆନଙ୍କର ପତ୍ନୀ । ଗତ ମେ’ ୩୧ ତାରିଖରୁ ସେ ଚାଇଲଡ୍ କେୟାର୍ ଲିଭ୍(ସିସିଏଲ) ରେ ୬ ମାସ ପାଇଁ ଛୁଟିରେ ଯାଇଥିଲେ । ଝିଅର ଦଶମ ପରୀକ୍ଷା ପାଇଁ ଯତ୍ନ ନେବା ସକାଶେ ଏହି ଛୁଟି ନେଇଥିଲେ । ଜୁନ୍ ୪ ରେ ନିର୍ବାଚନ ଫଳାଫଳ ପ୍ରକାଶ ପାଇବାର ଦିନକ ପରେ ସାଧାରଣ ପ୍ରଶାସନ ବିଭାଗ ତାଙ୍କର ଛୁଟି ମଞ୍ଜୁର କରିଥିଲା । ପିଛିଲା ଭାବେ ମେ ୩୧ ରୁ ଏହି ଛୁଟି ଲାଗୁ ହୋଇଥିଲା । ନଭେମ୍ବର ୨୬ ଯାଏ ଥିଲା ତାଙ୍କର ଛୁଟି ଅବଧି ।
ତେବେ ଏହିି ଅବଧି ସରିବା ପୂର୍ବରୁ ରାଜ୍ୟ ସରକାରଙ୍କୁ ଆଉ ୬ ମାସ ଛୁଟି ମାଗିଥିଲେ ସୁଜାତା । ମାତ୍ର ସରକାର ଏହାକୁ ଗ୍ରହଣ କରି ନ ଥିଲେ । ସାଧାରଣ ପ୍ରଶାସନ ବିଭାଗ ପକ୍ଷରୁ ଗତକାଲି ତାଙ୍କୁ ଏ ସଂକ୍ରାନ୍ତରେ ଅବଗତ କରାଯାଇ ୨୭ ତାରିଖରେ କାର୍ଯ୍ୟରେ ଯୋଗଦେବାକୁ କୁହାଯାଇଥିଲା ।
ବିଜେଡି ସରକାରରେ କ୍ଷମତାଶାଳୀ ଥିଲେ ସୁଜାତା । ମିସନ୍ ଶକ୍ତି ବିଭାଗ ସହ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗର ସଚିବ ଭାବେ ଅତିରିକ୍ତ ଦାୟିତ୍ୱ ତୁଲାଉଥିଲେ । ତେବେ ନିର୍ବାଚନ ବେଳେ ବିଜେପି ତାଙ୍କ ବିରୋଧରେ ଶାସକ ଦଳକୁ ସହଯୋଗ କରୁଥିବା ଅଭିଯୋଗ ଆଣିଥିଲା । ବିଜେପିର ଏହି ଅଭିଯୋଗ ଉପରେ ନିର୍ବାଚନ କମିସନ କାର୍ଯ୍ୟାନୁଷ୍ଠାନ ଗ୍ରହଣ କରିଥିଲେ । ତାଙ୍କୁ ମିଶନ ଶକ୍ତିରୁ ହଟାଯାଇ ଅର୍ଥ ବିଭାଗର ସ୍ୱତନ୍ତ୍ର ସଚିବ ଭାବେ ଅବସ୍ଥାପିତ କରାଯାଇଥିଲା ।
