ଭୁବନେଶ୍ୱର: କିଟ୍ ବିଶ୍ୱବିଦ୍ୟାଳୟ ଛାତ୍ରୀ ଓ ଛାତ୍ର ଆତ୍ମହତ୍ୟା ଘଟଣାରେ ଓଟିଭି ଖବର ପ୍ରସାରଣରୁ ଦୁଇ ମାଲିକଙ୍କ ମଧ୍ୟରେ ସମ୍ପର୍କର ତାଡ଼ନା ମାପି ହେଉଛି । ଚାର୍ଟର ଦେଖାଇ ନିଜକୁ ଦାୟିତ୍ୱସମ୍ପନ୍ନ ଗଣମାଧ୍ୟମ ବୋଲି ଓଟିଭି ସଫେଇ ଦେଲେ ମଧ୍ୟ ତାହା ଆଦୌ ବିଶ୍ୱାସଯୋଗ୍ୟ ନୁହେଁ । ସିଧା ସିଧା କହିଲେ ବୈଜୟନ୍ତ ପଣ୍ଡା ଏବଂ ଅଚ୍ୟୁତ ସାମନ୍ତଙ୍କ ମଧ୍ୟରେ ସମ୍ପର୍କର ତିକ୍ତତା ହିଁ ଏଭଳି ସମ୍ବାଦ ପରିବେଷଣର କାରଣ ବୋଲି ସବୁଆଡ଼େ ଚର୍ଚ୍ଚା । ସାମ୍ବାଦିକତା ଧର୍ମରେ ସମ୍ବାଦ ପରିବେଷଣ ଡାହା ମିଛ କଥା ।
ଓଡ଼ିଶା ଗଣମାଧ୍ୟମ ଓ ରାଜନୀତିକୁ ଅତି ପାଖରୁ ଦେଖି ଆସୁଥିବା ବରିଷ୍ଠ ମହଲର କହିବାନୁଯାୟୀ, ଅଚ୍ୟୁତ ସାମନ୍ତଙ୍କ ଟିଭି ମାଲିକାନା ଏବଂ ରାଜନୈତିକ ଉତଥାନ ଉଭୟଙ୍କ ମଧ୍ୟରେ ତିକ୍ତ ସମ୍ପର୍କର ମୁଖ୍ୟ କାରଣ । ଯେଉଁ ସମୟରେ ବିଜେଡିରେ ବୈଜୟନ୍ତଙ୍କର ପ୍ରବଳ ପରାକ୍ରମ ଥିଲା ସେହି ସମୟରେ ଅଚ୍ୟୁତ ଆଗ ଗଣମାଧ୍ୟମ ଓ ଏବଂ ପରେ ରାଜନୀତି କ୍ଷେତ୍ରରେ ପ୍ରବେଶ କଲେ । ବୈଜୟନ୍ତ ଏଥିରେ ଅସହିଷ୍ଣୁ ହେବା ସ୍ୱାଭାବିକ । କାରଣ ପ୍ରତିପତ୍ତି ଦୃଷ୍ଟିରୁ ଅଚ୍ୟୁତଙ୍କୁ ସେ ନିଜର ପ୍ରତିଦ୍ୱନ୍ଦୀ ଭାବିଦେଲେ ।
ପରବର୍ତ୍ତୀ ସମୟରେ ଏହା ସତ ହେଲା । ରାଜ୍ୟ ସରକାରଙ୍କ ବିଜ୍ଞାପନ ମାପରେ ଓଟିଭିର ଏକଛତ୍ରବାଦ ଆଉ ରହିଲା ନାହିଁ । ବିଜ୍ଞାପନରେ କଳିଙ୍ଗ ଟିଭିର ଭାଗିଦାର ଓଟିଭିକୁ କ୍ଷତିଗ୍ରସ୍ତ କଲା । ପରେ ରାଜନୀତି କ୍ଷେତ୍ରକୁ ଏହା ମାଡ଼ିଗଲା । ନବୀନ ପଟ୍ଟନାୟକଙ୍କ ପାଖଲୋକ ଭାବେ ବୈଜୟନ୍ତଙ୍କ ପରିଚୟରେ ବ୍ରେକ୍ ଲାଗିଲା । କୌଣସି କାରଣରୁ ନବୀନ ତାଙ୍କ ଉପରୁ ବିଶ୍ୱାସ ହରାଇଲେ । ଶେଷରେ ୨୦୧୮ ଜାନୁଆରୀରେ ବୈଜୟନ୍ତ ଦଳରୁ ତଡ଼ାଖାଇଲେ । ଦେଢ଼ମାସ ପରେ ମାର୍ଚ୍ଚ ୮ରେ ଅଚ୍ୟୁତ ସାମନ୍ତ ଓ ସୌମ୍ୟରଂଜନ ପଟ୍ଟନାୟକ ବିଜେଡିରେ ଯୋଗଦେଲେ । ଯୋଗଦେବାର କିଛି ଘଣ୍ଟା ପରେ ନବୀନ ଉଭୟଙ୍କୁ ରାଜ୍ୟସଭା ପଠାଇଲେ । ଦିଲ୍ଲୀରେ ନବୀନଙ୍କ ପାଇଁ ବୈଜୟନ୍ତ ଯାହା କରୁଥିଲେ, ଅଚ୍ୟୁତଙ୍କୁ ସେହି ଦାୟିତ୍ୱ ମିଳିଲା ବୋଲି ଏକ ଧାରଣା ସୃଷ୍ଟି ହେଲା । ଏହା ବୈଜୟନ୍ତଙ୍କ ଅସହିଷ୍ଣୁତା ବଢ଼ାଇଲା ବୋଲି ଚର୍ଚ୍ଚା ହୁଏ ।
ଏହାର ବହୁପୂର୍ବରୁ ପ୍ରତିଦ୍ୱନ୍ଦୀଙ୍କୁ ମାରିବା କାମରେ ଓଟିଭ କିନ୍ତୁ ଆଗ ଅସ୍ତ୍ର ହୋଇସାରିଥିଲା । ନିର୍ଦ୍ଦିଷ୍ଟ ବ୍ୟକ୍ତିବିଶେଷଙ୍କୁ ହାତକରି ଅଚ୍ୟୁତ ସାମନ୍ତଙ୍କ ବିରୋଧରେ ଘନ ଘନ ଖବର କରାଗଲା । ତାଙ୍କୁ ଜମି ହଡ଼ପକାରୀ ବୋଲି ଚିତ୍ରଣ କରାଗଲା । ପରବର୍ତ୍ତୀ ସମୟରେ ଅଚ୍ୟୁତ ସାମନ୍ତଙ୍କ କଳିଙ୍ଗ ଟିଭି ମଧ୍ୟ ବୈଜୟନ୍ତଙ୍କ ବିରୋଧରେ ଖବର ହାତଛଡ଼ା କଲା ନାହିଁ । ଥେରୁବାଲି ଇମଫା କାରଖାନାରେ ଶ୍ରମିକ ଅଶାନ୍ତିଠାରୁ ଆରମ୍ଭ କରି, ନାବାଳିକା ଗଣଦୁଷ୍କର୍ମ ମାମଲା, ସାରୁଅ ଜମି ଦୁର୍ନୀତି ମାମଲାକୁ ବଡ଼ ଖବର କଲା । ଥେରୁବାଲିରେ ଇମଫା କମ୍ପାନୀ ବିରୋଧରେ ଆଦିବାସୀ ଓ ଶ୍ରମିକଙ୍କୁ ପାଣ୍ଡିଆନଙ୍କ ପ୍ରରୋଚନାରେ ଅଚ୍ୟୁତ ସାମନ୍ତ ମତେଇ ଗଣ୍ଡଗୋଳ କରାଉଛନ୍ତି ବୋଲି ବୈଜୟନ୍ତଙ୍କର ଭ୍ରମ ସୃଷ୍ଟି ହେଲା । ଯାହାର ପରିଣାମ ଏବେ ଟିଭି ସାମନାରେ ବୋଲି ରାଜନୈତିକ ମହଲରେ ଆଲୋଚନା ହେଉଛି ।
ବୁଦ୍ଧିଜୀବୀଙ୍କ ମତରେ, ବ୍ୟବସାୟ ଓ ରାଜନୀତିରେ କେହି କାହାର ସମକକ୍ଷ ହେଲେ ପରିସ୍ଥିତି ବିଷମୟ ହୁଏ । ଅସହିଷ୍ଣୁତା ସୃଷ୍ଟି ହୁଏ । ଏହି ଅସହିଷ୍ଣୁତା ଓ ଅନ୍ୟକୁ ବଦନାମ କରିବାର ଭୟଙ୍କର ଖେଳରେ କାହାର ଜିତାପଟ ହେବ ଅଲଗା କଥା । କିନ୍ତୁ ଗଣମାଧ୍ୟମକୁ ଦ୍ୱାହି ଦେଲେ ବିପଦ । କାରଣ ଜନତା ସବୁ ଦେଖୁଛନ୍ତି ।
