ନୟାଗଡ଼: ଯଦୁପୁର ଗାଁ ପୋଖରୀରୁ ମିଳିଲା ‘ପରୀ’ ର ଲେଗିନ୍ସ । ସୋମବାରଠାରୁ ପୋଖରୀ ପାଣି ନିଷ୍କାସନ କରି ଲେଗିନ୍ସ ଉଦ୍ଧାର କାର୍ଯ୍ୟରେ ଲାଗିଥିବା ଅଗ୍ନିଶମ ବାହିନୀ ଓ ଓଡ୍ରାଫ୍ ଟିମ୍ ଆଜି ବିଳମ୍ବିତ ରାତିରେ ସଫଳ ହୋଇଛନ୍ତି । ଏକ ପଲିଥିନ୍ ଭିତରେ ପଥର ଦ୍ୱାରା ବନ୍ଧା ହୋଇ ରହିଥିଲା କଳା ରଙ୍ଗର ଏହି ଲେଗିନ୍ସ ।
ପରୀକୁ ହତ୍ୟା କରି ଦୁଷ୍କର୍ମ କରିଥିବା ସୈତାନ୍ ସରୋଜ ସେଠୀ ଏହି ଲେଗିନ୍ସକୁ ପୋଖରୀରେ ଫିଙ୍ଗି ଦେଇଥିବା ଏସଆଇଟି ଟିମ୍ ଆଗରେ ସ୍ୱୀକାର କରିଥିଲେ । ଏସଆଇଟି ମୁଖ୍ୟ ଅରୁଣ ବୋଥ୍ରା ମଙ୍ଗଳବାର ଏକ ସାମ୍ବାଦିକ ସମ୍ମିଳନୀ କରି ଏହାର ବିସ୍ତୃତ ତଥ୍ୟ ଦେଇଥିଲେ । ପୋଖରୀରୁ ଅଧା ପାଣି ନିଷ୍କାସନ କଲା ପରେ ଲେଗିନ୍ସ ଖୋଜାଯିବ ଏବଂ ତାହା ମିଳିଲେ କୋର୍ଟରେ ଏହା ଦାଖଲ କରାଯିବ ବୋଲି ଶ୍ରୀ ବୋଥ୍ରା କହିଥିଲେ ।
ଏସଆଇଟିର ପ୍ରତ୍ୟକ୍ଷ ତତ୍ତ୍ୱାବଧନରେ ଦୁଇଦିନ ହେଲା ପୋଖରୀ ପାଣି ନିଷ୍କାସନ କାର୍ଯ୍ୟ ଚାଲିଥିଲା । ପାଣି କମିଗଲା ପରେ ମଙ୍ଗଳବାର ବିଳମ୍ବିତ ରାତିରେ ଓଡ୍ରାଫ୍ ଟିମ୍ ପ୍ରବଳ ଶୀତ ସତ୍ତ୍ୱେ ପୋଖରୀରେ ଖୋଜାଖୋଜି କରି ଏକ ପଲିଥିନ୍ ଭିତରୁ ପଥରରେ ବନ୍ଧା ହୋଇଥିବା ଲେଗିନ୍ସ ପାଇଥିଲେ । ଦୀର୍ଘ ୫ ମାସ ପରେ ଏହା ଉଦ୍ଧାର ହୋଇଥିବାରୁ କପଡ଼ା ନଷ୍ଟ ହୋଇଯାଇଥିଲେ ମଧ୍ୟ ଏହା ପରୀର ଲେଗିନ୍ସ ବୋଲି ସ୍ପଷ୍ଟ ହୋଇଛି ।
ଏହି ଖବର ପାଇଲା ମାତ୍ରେ ପୁରୀରେ ମହାପ୍ରଭୁଙ୍କ ଆର୍ଶିବାଦ ଭିକ୍ଷା କରିବାକୁ ଯାଇଥିବା ଶ୍ରୀ ବୋଥ୍ରା ସେଠାରୁ ସିଧାସଳଖ ବିଳମ୍ବିତ ରାତିରେ ଯଦୁପୁର ଆସି ପହଞ୍ଚିଛନ୍ତି । ସେଠାରେ ଉପସ୍ଥିତ ଅଧିକାରୀମାନଙ୍କ ସହ ଆଲୋଚନା କରି ସେ ତାଙ୍କର ତଦନ୍ତ ଚଳାଇଛନ୍ତି । ଏହି ସଫଳତା ପଛରେ ସମସ୍ତଙ୍କର ସହଯୋଗ ବା ଟିମ୍ ୱାର୍କ ଥିବା ସେ କହିଛନ୍ତି । କାହାର ଚାଲେଂଜର ଏହା ଜବାବ ନୁହେଁ, ବରଂ ସେ ତାଙ୍କର କାର୍ଯ୍ୟ କରୁଥିବା ଶ୍ରୀ ବୋଥ୍ରା କହିଛନ୍ତି । ପରୀ ଆମ ସମସ୍ତଙ୍କର ଝିଅ । ତାକୁ ନ୍ୟାୟ ଦେବା ଆମର ଦାୟିତ୍ୱ । ଏଥିପାଇଁ କୋର୍ଟ ଓ ଭଗବାନଙ୍କ ପାଖରେ ସେ ଉତ୍ତରଦାୟୀ ବୋଲି ଦୃଢ଼ ଓ ଭାବବିହ୍ୱଳ ଶ୍ରୀ ବୋଥ୍ରା କହିଛନ୍ତି ।
ବଡ଼କଥା ହେଉଛି, ସାମ୍ବାଦିକମାନଙ୍କ ପ୍ରଶ୍ନରେ ଶ୍ରୀ ବୋଥ୍ରା କହିଛନ୍ତି ଯେ ଏହା ଆରମ୍ଭ ମାତ୍ର । ଏହି ଘଟଣା ପଛରେ ଆଉ କାହାର ସଂପୃକ୍ତି ଅଛି ନା ନାହିଁ ତାହା ଖୁବ୍ ଶୀଘ୍ର ବାହାର କରାଯିବ ।
ପୋଖରୀରୁ ପରୀର ଲେଗିନ୍ସ ମିଳିବା ପରେ ଶ୍ରୀ ବୋଥ୍ରାଙ୍କ ତଦନ୍ତ ଉପରେ ପ୍ରଶ୍ନ କରୁଥିବା ଲୋକଙ୍କ ପାଟି ଚୁପ୍ ହୋଇଯାଇଛି । ଶ୍ରୀ ବୋଥ୍ରା ତାଙ୍କର ଦାୟିତ୍ୱକୁ ଅତ୍ୟନ୍ତ ଦକ୍ଷ ଓ ନିଷ୍ଠାର ସହ ତୁଲାଇ ପରୀକୁ ନ୍ୟାୟ ଦେଇପାରିଛନ୍ତି ବୋଲି କୁହାଯିବ । ସରୋଜ ସେଠୀ ଯେ ପରୀକୁ ମାରିଛି ଏବଂ ଏହା ପଛରେ ଯୌନ ଲାଳସା ମୁଖ୍ୟ କାରଣ ତାହା ଅଧିକ ସ୍ପଷ୍ଟ ହୋଇଛି । ମାତ୍ର ୨୦ ଦିନରେ ଏହି ଜଘନ୍ୟ କାଣ୍ଡର ପର୍ଦ୍ଦାଫାସ କରିବାରେ ସଫଳ ହୋଇଥିବା ଶ୍ରୀ ବୋଥ୍ରା ଏବଂ ତାଙ୍କର ଟିମ୍ କୁ ପ୍ରଶଂସାର ସୁଅ ଛୁଟିଛି ।
