ରୋମ୍ ରେ ପହଞ୍ଚିଲେ ନବୀନ

ଭୁୁବନେଶ୍ୱର: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କର ୧୦ ଦିନିଆ ବିଦେଶ ଗସ୍ତ ଆଜିଠାରୁ ଆରମ୍ଭ ହୋଇଛି । ଆଜି ଭୋର ୪ଟା ୧୫ ରେ ଦିଲ୍ଲୀ ଅନ୍ତର୍ଜାତୀୟ ବିମାନ ବନ୍ଦରରୁ ରୋମ୍ ଅଭିମୁଖେ ଯାତ୍ରା କରିଥିଲେ । ଭାରତୀୟ ସମୟ ଅପରାହ୍ନ ପ୍ରାୟ ୩ଟାରେ ମୁଖ୍ୟମନ୍ତ୍ରୀ ସେଠାରେ ପହଞ୍ଚିଥିଲେ । ମୁଖ୍ୟମନ୍ତ୍ରୀଙ୍କ ସହ ବ୍ୟକ୍ତିଗତ(୫-ଟି) ସଚିବ ଭି.କେ.ପାଣ୍ଡିଆନ୍, ଯୋଗାଣ ସଚିବ ଭି.ଭି ଯାଦବ, ଶିଳ୍ପ ସଚିବ ହେମନ୍ତ ଶର୍ମା ଓ ଦିଲ୍ଲୀସ୍ଥିତ ଆବାସିକ କମିସନର ରବି କାନ୍ତ ଯାଇଛନ୍ତି । ଜରୁରୀ କାର୍ଯ୍ୟ ଯୋଗୁଁ ମୁଖ୍ୟ ଶାସନ ସଚିବ ସୁରେଶ ମହାପାତ୍ର ଆଜିର ଗସ୍ତରେ ସାମିଲ ହୋଇପାରିନାହାନ୍ତି ।

ମୁଖ୍ୟମନ୍ତ୍ରୀ ରୋମ୍ ରେ ପହଞ୍ଚିଲା ପରେ ସେଠାରେ ଅବସ୍ଥାପିତ ଭାରତୀୟ ରାଷ୍ଟ୍ରଦୂତ ନୀନା ମାଲହୋତ୍ରା ତାଙ୍କୁ ସ୍ୱାଗତ ଜଣାଇଥିଲେ । ଉଭୟଙ୍କ ମଧ୍ୟରେ ପ୍ରାୟ ଅଧ ଘଣ୍ଟା ଧରି ସୌଜନ୍ୟମୂଳକ ସାକ୍ଷାତ ଆଲୋଚନା ହୋଇଥିଲା ।

ମୁଖ୍ୟମନ୍ତ୍ରୀ ୫ ଦିନ ରୋମ୍ ରେ ଅବସ୍ଥାନ କରିବେ । ଦ ୱାଲର୍ଡ ଫୁଡ୍ ପ୍ରୋଗ୍ରାମ ବା ବିଶ୍ୱ ସ୍ୱାସ୍ଥ୍ୟ କାର୍ଯ୍ୟକ୍ରମ ଆମନ୍ତ୍ରଣକ୍ରମେ ଓଡ଼ିଶାର ଖାଦ୍ୟ ସୁରକ୍ଷା ଏବଂ ବିପର୍ଯ୍ୟୟ ପରିଚାଳନାର ସଫଳ କାହାଣୀ ସାରା ବିଶ୍ୱକୁ ଜଣାଇବେ । ଏକଦା ଖାଦ୍ୟ ନିରାପତ୍ତା ପାଇଁ ଅନ୍ୟ ଉପରେ ନିର୍ଭର କରୁଥିବା ଓଡ଼ିଶା ଆଜି କିଭଳି ଖାଦ୍ୟ ସୁରକ୍ଷାରେ ବଳକା ରାଜ୍ୟ ହୋଇପାରିଛି ଏବଂ ୧୯୯୯ ମହାବାତ୍ୟାରେ ବିଧ୍ୱଂସ୍ତ ଓଡ଼ିଶା ବର୍ତ୍ତମାନ ବିପର୍ଯ୍ୟୟ ପରିଚାଳନାରେ କିଭଳି ମଡେଲ ରାଜ୍ୟ ହୋଇପାରିଛି ତାହା ଉପରେ ବକ୍ତବ୍ୟ ରଖିବେ ନବୀନ ।

ଏହି ଅବସରରେ ଦ ୱାଲର୍ଡ ଫୁଡ୍ ପ୍ରୋଗ୍ରାମର କାର୍ଯ୍ୟନିର୍ବାହୀ ନିର୍ଦ୍ଦେଶକ ଡାଭିଡ୍ ବେସଲେ ଏବଂ ଅନ୍ୟ ବରିଷ୍ଠ ପଦାଧିକାରୀଙ୍କ ସହ ମୁଖ୍ୟମନ୍ତ୍ରୀ ସାକ୍ଷାତ ଆଲୋଚନା କରିବେ । ଓଡ଼ିଶାକୁ ଖାଦ୍ୟ ସୁରକ୍ଷାରେ ନିରନ୍ତର ଭାବେ ସଶକ୍ତ କରିବାକୁ ବିଭିନ୍ନ ପ୍ରକଳ୍ପ ଏବଂ ଡବ୍ଲୁଏଫପିର ସହଭାଗିତା ଉପରେ ମଧ୍ୟ ଆଲୋଚନା କରିବେ ।

ଖ୍ରୀଷ୍ଟିଆନ୍ ଧର୍ମଗୁରୁ ପୋପ୍ ଙ୍କୁ ଭେଟିବେ ନବୀନ । ପୋପ୍ ଙ୍କୁ ଭେଟିବାରେ ସେ ହେବେ ପ୍ରଥମ ଭାରତୀୟ ମୁଖ୍ୟମନ୍ତ୍ରୀ । ଏଥିପାଇଁ ଭାରତ ସରକାର ତାଙ୍କୁ ଅନୁମତି ଦେଇଛନ୍ତି ।

ରୋମ୍ ଅବସ୍ଥାନ କାଳରେ ମୁଖ୍ୟମନ୍ତ୍ରୀ ୟୁରୋପର ବିଭିନ୍ନ ଅଞ୍ଚଳରେ ଥିବା ପ୍ରବାସୀ ଓଡ଼ିଆ ନିବେଶକଙ୍କ ସହ ଆଲୋଚନା କରିବେ । ଓଡିଶାର ରୂପାନ୍ତର କାର୍ଯ୍ୟକ୍ରମରେ ସେମାନଙ୍କ ସହଭାଗିତା ଏବଂ ଓଡିଶାର କଳା ଏବଂ ସଂସ୍କୃତିର ବିକାଶ କାର୍ଯ୍ୟକ୍ରମରେ ସେମାନଙ୍କୁ ସାମିଲ କରିବା ପାଇଁ ଆଲୋଚନା ହେବ ।

ରୋମ୍ ରୁ ଫେରି ୨୬ ତାରିଖରେ ମୁଖ୍ୟମନ୍ତ୍ରୀ ଦୁବାଇ ଯିବେ । ମଧ୍ୟପ୍ରାଚ୍ୟର ନିବେଶକଙ୍କୁ ସେଠାରେ ଭେଟିବେ । ଓଡିଶାରେ ପୁଞ୍ଜି ଖଟାଇବାକୁ ଆଗ୍ରହୀ ଥିବା ନିବେଶକଙ୍କୁ ଆମନ୍ତ୍ରିତ କରାଯାଇ ଏଠାରେ ଶିଳ୍ପ ପ୍ରତିଷ୍ଠା ପାଇଁ ରାଜ୍ୟ ସରକାର ସବୁ ପ୍ରକାର ସାହାଯ୍ୟ ସହଯୋଗ ଯୋଗାଇଦେବାର ପ୍ରତିଶ୍ରୁତି ଦିଆଯିବ । କିଛି ଶିଳ୍ପପତିଙ୍କ ସହ ମୁଖ୍ୟମନ୍ତ୍ରୀ ୱାନ୍ ଟୁ ୱାନ୍ ଆଲୋଚନା କରିବେ । ଇନଭେଷ୍ଟର୍ସ ମିଟ୍ କାର୍ଯ୍ୟକ୍ରମରେ ଓଡିଶାରୁ ଯାଇଥିବା ଏକ ଉଚ୍ଚସ୍ତରୀୟ ଶିଳ୍ପ ପ୍ରତିନିଧି ଦଳ ଉପସ୍ଥିତ ରହିବେ । ପ୍ରବାସୀ ଓଡ଼ିଆ ନିବେଶକଙ୍କୁ ମଧ୍ୟ ମୁଖ୍ୟମନ୍ତ୍ରୀ ସେଠାରେ ଭେଟିବାର କାର୍ଯ୍ୟକ୍ରମ ଅଛି ।