ଭୁବନେଶ୍ୱର: ରାଜ୍ୟ ପ୍ରଶାସନରେ ଅଭାବନୀୟ ସ୍ଥିତି । ସଚିବଙ୍କ ଆଦେଶକୁ ମାନୁନାହାନ୍ତି ଅଧସ୍ତନ ଅଧିକାରୀ । ଗୃହ ବିଭାଗର ଏକ ଚିଠିରୁ ଏହି ସତ୍ୟ ଧରାପଡ଼ିଛି । ବିଭାଗରେ କେତେ ପଦବୀ ଖାଲି ଅଛି ସେହି ତଥ୍ୟ ବାରମ୍ବାର ମାଗିବା ପରେ ମଧ୍ୟ ବିଭାଗୀୟ ଅଧିକାରୀମାନେ ଦେଉନାହାନ୍ତି । ୧୫ ତାରିଖ(ଆସନ୍ତାକାଲି) ସୁଦ୍ଧା ଯେମିତି ହେଲେ ଏହି ତଥ୍ୟ ଦେବାକୁ ତୃତୀୟ ଚିଠି କରାଯାଇଛି । ପୁଲିସ ଡିଜି, ଅଗ୍ନିଶମ ଡିଜି, ଜେଲ୍ ଡିଜି, ହାଇକୋର୍ଟ ରେଜିଷ୍ଟ୍ରାର ଓ ଜୁଡିସିଆଲ୍ ଏକାଡେମୀକୁ ଗୃହ ବିଭାଗର ସ୍ୱତନ୍ତ୍ର ସଚିବ ଏହି ଚିଠି ଲେଖିଛନ୍ତି ।
ଶ୍ରୀମତୀ ଅନୁ ଗର୍ଗ ମୁଖ୍ୟ ଶାସନ ସଚିବ ଦାୟିତ୍ୱ ନେବା ପରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ତାଙ୍କୁ ୧୫ ସୂତ୍ରୀ କାର୍ଯ୍ୟକ୍ରମର ଟାକ୍ସ ଦେଇଛନ୍ତି । ଏଥିରେ ଖାଲି ଥିବା ସରକାରୀ ପଦବୀ ପୂରଣ ରହିଛି । ତାଙ୍କର ପ୍ରଥମ ସଚିବସ୍ତରୀୟ ବୈଠକରେ ଶ୍ରୀମତୀ ଗର୍ଗ ଏହି ବିଷୟ ଉପରେ ଆଲୋଚନା କରିଥିଲେ ଏବଂ ସବୁ ବିଭାଗରେ କେତେ ପଦବୀ ଖାଲି ଅଛି ତାହାର ତଥ୍ୟ ମାଗିଥିଲେ । ଏହା କିଭଳି ତୁରନ୍ତ ପୂରଣ ହୋଇପାରିବ ପରବର୍ତ୍ତୀ ବୈଠକରେ ତାହାର ତର୍ଜମା କରାଯିବ ବୋଲି କୁହାଯାଇଥିଲା । ଅଧିକାଂଶ ବିଭାଗରୁ ଏହି ତଥ୍ୟ ଆସି ସାରିଥିଲେ ମଧ୍ୟ ଗୃହ ବିଭାଗର ଖାଲି ପଦବୀ ତଥ୍ୟ ବିଭାଗୀୟ ମୁଖିଆମାନେ ଦେଇନାହାନ୍ତି । ଦୁଇ ଦୁଇଟି ଚିଠି ପରେ ମଧ୍ୟ ଖାତିର କରୁନାହାନ୍ତି । ୧୫ ତାରିଖ ସୁଦ୍ଧା ସେହି ତଥ୍ୟ ଯୋଗାଇ ଦେବାକୁ ତୃତୀୟ ଚିଠିରେ କଡ଼ା ଭାଷାରେ କୁହାଯାଇଛି ।
ଆସନ୍ତାକାଲି ମୁଖ୍ୟ ଶାସନ ସଚିବଙ୍କ ଦ୍ୱିତୀୟ ସଚିବସ୍ତରୀୟ ବୈଠକ ଥିବା ବେଳେ ଏବଂ ଖାଲି ଥିବା ସରକାରୀ ପଦବୀ ପୂରଣ ସଂକ୍ରାନ୍ତରେ ଆଲୋଚନାର ଅନ୍ୟତମ ପ୍ରସଙ୍ଗ ଥିବା ବେଳେ ଖୋଦ୍ ଗୃହ ବିଭାଗ ଅଧିକାରୀମାନଙ୍କ ହେୟଜ୍ଞାନ ପାୱାର କରିଡରରେ ଚର୍ଚ୍ଚାର ବିଷୟ ହୋଇଛି । ଏହା ଉପରେ ମୁଖ୍ୟ ଶାସନ ସଚିବଙ୍କ ଆଭିମୁଖ୍ୟ କ’ଣ ହେବ ତାହା ଉପରେ ସମସ୍ତଙ୍କ ନଜର ରହିଛି ।
