ଭୁବନେଶ୍ୱର: ବିଜେଡିରୁ ତଡ଼ା ଖାଇଛନ୍ତି ପାଣ୍ଡିଆନଙ୍କ ପୂର୍ବ ଚାଟୁକାର ୭୮ ବର୍ଷୀୟ ପ୍ରଫୁଲ୍ଲ ମଲ୍ଲିକ । ଦଳବିରୋଧୀ କାର୍ଯ୍ୟ ଅଭିଯୋଗରେ ସୁପ୍ରିମୋ ନବୀନ ପଟ୍ଟନାୟକଙ୍କ ଆଦେଶରେ ତାଙ୍କୁ ବିଜେଡିରୁ ନିଲମ୍ବିତ କରାଯାଇଛି । ଦଳର ଉପସଭାପତି(ମୁଖ୍ୟାଳୟ) ପ୍ରତାପ ଜେନାଙ୍କ ଦସ୍ତଖତରେ ପ୍ରଫୁଲ୍ଲଙ୍କ ଉପରେ ନିଲମ୍ବନ ଆଦେଶ ଜାରି ହୋଇଛି ।
ଏକଦା ପାଣ୍ଡିଆନଙ୍କ ଦୃଢ଼ ସମର୍ଥକ ଥିଲେ ୪ ଥରିଆ ବିଧାୟକ ତଥା ପୂର୍ବତନ ମନ୍ତ୍ରୀ ପ୍ରଫୁଲ୍ଲ ମଲ୍ଲିକ । ପାଣ୍ଡିଆନ ଏକାଡେମୀର ସେ ଥିଲେ ଆଜ୍ଞାଧୀନ ଛାତ୍ର । କୁହାଯାଏ, ପାଣ୍ଡିଆନଙ୍କ ଚାଟୁକାରିତା କରି ଗତ ସରକାରରେ ସେ ପୂର୍ତ୍ତ, ଖଣି ଭଳି ଏକାଧିକ ଗୁରୁତ୍ୱପୂର୍ଣ୍ଣ ବିଭାଗର ମନ୍ତ୍ରୀ ପଦ ପାଇଥିଲେ । ନାଁକୁ ମନ୍ତ୍ରୀ, ମାତ୍ର ସବୁ କାମ ହେଉଥିଲା ତୃତୀୟ ମହଲାରେ । ସେ କେବଳ ଫାଇଲ୍ ରେ ଦସ୍ତଖତ କରୁଥିଲେ । ସେ ଯାହା ହେଉ, ୨୦୨୪ ନିର୍ବାଚନରେ ତାଙ୍କର ପାରମ୍ପରିକ କାମାକ୍ଷନଗର ଆସନରୁ ଟିକେଟ୍ ବଜାୟ ରଖିବାକୁ ତାଙ୍କୁ କିନ୍ତୁ ବହୁତ ପରିଶ୍ରମ କରିବାକୁ ପଡ଼ିଥିଲା । କାରଣ ବୟସ ଅଧିକ ହୋଇଯାଇଥିବା କାରଣରୁ ତାଙ୍କର ଟିକେଟ୍ କଟିବାର ଯଥେଷ୍ଟ ସମ୍ଭାବନା ଥିଲା । ମାତ୍ର ପାଣ୍ଡିଆନଙ୍କ ନାଁ ଜପି ଜପି ସେ ପୁନର୍ବାର ଟିକେଟ୍ ନେଇଥିଲେ ।
ଦୁର୍ଭାଗ୍ୟକୁ, ପ୍ରଫୁଲ୍ଲ ବାବୁ ୪ ହଜାରରୁ ଅଧିକ ଭୋଟରେ ବିଜେପି ପ୍ରାର୍ଥୀ ଶତ୍ରୁଘ୍ନ ଜେନାଙ୍କଠାରୁ ହାରିଗଲେ । ରାଜ୍ୟରେ ବିଜେଡି ସରକାରର ବି ପତ୍ତନ ହେଲା । ଏହା ପରଠୁ ତାଙ୍କର ଆଭିମୁଖ୍ୟରେ ବିରାଟ ପରିବର୍ତ୍ତନ ଆସିଲା । ପାଣ୍ଡିଆନ୍ କବଳିତ ବିଜେଡି କାର୍ଯଧାରାକୁ ନେଇ ସେ ଅସୁଖୀ ହୋଇପଡ଼ିଲେ । ବିଜେଡିର ନୀତି, ଆଦର୍ଶ ଲୋପ ପାଇଯାଇଛି ବୋଲି ହୃଦୟଙ୍ଗମ କଲେ । ବିଜେଡିର ପୂର୍ବ ବିଚାରାଧାରାକୁ ଝୁରି ହେଲେ । ଏହା ତାଙ୍କୁ ବ୍ୟଥିତ କଲା । ବିଜେଡି ଠିକଣା ଢ଼ଙ୍ଗରେ ନ ଚାଲିଲେ ଦଳ ଛାଡ଼ିଦେବେ ବୋଲି ଗତକାଲି ଗଣମାଧ୍ୟମକୁ ବାଇଟ୍ ଦେଇଥିଲେ ।
ପ୍ରଫୁଲ୍ଲ ମଲ୍ଲିକଙ୍କ ଚେତାବନୀକୁ ୧୨ ଘଣ୍ଟା ପୂରିନି, ବିଜେଡି ମୁଖିଆ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି । ଆଜି ସକାଳ ୧୦ଟା ୧୦ ମିନିଟ୍ ରେ ଦଳ ପକ୍ଷରୁ ଜାରି ହୋଇଛି ପ୍ରଫୁଲ୍ଲ ମଲ୍ଲିକଙ୍କ ନିଲମ୍ବନ ଆଦେଶ । ତେବେ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେବା ପୂର୍ବରୁ ସେ ଆଗ ବିଜେଡିରୁ ଇସ୍ତଫା ଦେଇଛନ୍ତି ବୋଲି ଗଣମାଧ୍ୟମରେ ସଫେଇ ଦେଇଛନ୍ତି । ଆଜି ସକାଳେ ସେ ତାଙ୍କ ଇସ୍ତଫାପତ୍ର ଦଳ ସଭାପତିଙ୍କ ପାଖକୁ ପଠାଇଥିଲେ ବୋଲି କହିଛନ୍ତି । ଅବଶ୍ୟ କାହା କଥା ସତ ତାହା ସ୍ପଷ୍ଟ ହୋଇନାହିଁ ।
