ଭୁବନେଶ୍ୱର: ଜାନୁଆରୀ ୩୧ ତାରିଖ ସୁଦ୍ଧା ସମ୍ପତ୍ତି ତାଲିକା ନଦେଲେ ଯୋଗ୍ୟ ସରକାରୀ ବାବୁଙ୍କୁ ମିଳିବନି ପଦୋନ୍ନତି । ବିଭାଗୀୟ ପଦୋନ୍ନତି କମିଟି(ଡିପିସି) ବୈଠକ ବେଳକୁ ସମ୍ପତ୍ତି ତାଲିକା ଦାଖଲ କରି ନ ଥିବା ବାବୁଙ୍କ ପଦୋନ୍ନତି ବିଚାରକୁ ନିଆଯିବ ନାହିଁ । ଖାଲି ଥିବା ପଦବୀ ଅନୁଯାୟୀ ପଦୋନ୍ନତି ଜାଗା ପୂରଣ ହୋଇଯିବ । ସାଧାରଣ ପ୍ରଶାସନ ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ସୁରେନ୍ଦ୍ର କୁମାର ଏହି ମର୍ମରେ ସବୁ ବିଭାଗକୁ ଚିଠି ଲେଖିଛନ୍ତି । ୨୦୨୫ ମସିହାର ସମ୍ପତ୍ତି ତାଲିକା ଦେଇ ନ ଥିବା ସରକାରୀ କର୍ମଚାରୀଙ୍କୁ ସେଥିରେ ଚେତାବନୀ ଦିଆଯାଇଛି ।
ସମ୍ପତ୍ତି ତାଲିକା ଦାଖଲକୁ ନେଇ କିଛି କର୍ମଚାରୀଙ୍କ ମନରେ ରହିଥିବା ଦ୍ୱନ୍ଦ ଦୂର କରିଛି ସାଧାରଣ ପ୍ରଶାସନ ବିଭାଗ । ବିଭାଗ ପକ୍ଷରୁ ଜାରି ବିଜ୍ଞପ୍ତିରେ କୁହାଯାଇଛି ଯେ ଓଡ଼ିଶା ସରକାରୀ କର୍ମଚାରୀଙ୍କ ଆଚରଣ(ସଂଶୋଧନ) ନିୟମ, ୨୦୨୧ ଅନୁଯାୟୀ, ସରକାରୀ କର୍ମଚାରୀଙ୍କ ପଦୋନ୍ନତି ବିଚାର ନିମନ୍ତେ ନିୟମିତ ସମ୍ପତ୍ତି ତାଲିକା ଦାଖଲ ବାଧ୍ୟତାମୂଳକ ରହିଛି । ସୁତରାଂ ଡିପିସି ବୈଠକ ବେଳକୁ ସମ୍ପତ୍ତି ତାଲିକା ଦାଖଲ ହୋଇଯିବା କଥା । ତାହା ହେଲେ ଯାଇ ଯୋଗ୍ୟ କର୍ମଚାରୀଙ୍କ ପଦୋନ୍ନତି କଥା ବିଚାର କରାଯିବ ଏବଂ ପଦୋନ୍ନତି ମିଳିବ । ଡିପିସି ବୈଠକ ପରେ ସରକାରଙ୍କ ଅନୁମତିକ୍ରମେ ଖିଲାପୀ ବାବୁ ସମ୍ପତ୍ତି ତାଲିକା ଦାଖଲ କଲେ, ପରବର୍ତ୍ତୀ ଡିପିସି ବୈଠକରେ ଯାଇ ତାଙ୍କର ପଦୋନ୍ନତି ବିଚାର କରାଯିବ । ଅବଶ୍ୟ ସେଥିପାଇଁ ତାଙ୍କର ବରିଷ୍ଠତାରେ କୌଣସି ଆଞ୍ଚ ଆସିବ ନାହିଁ । କନିଷ୍ଠମାନେ ପାଇଥିବା ପଦୋନ୍ନତି ତାରିଖରୁ ତାଙ୍କର ପଦୋନ୍ନତି ଗଣନା ହେବ ।
