ମାଣ୍ଡିପଙ୍କା ଗ୍ରାମବାସୀଙ୍କ ଆକ୍ରୋଶରେ ଆରଡିସି

ଭୁବନେଶ୍ୱର: କନ୍ଧମାଳ ଜିଲ୍ଲା ମାଣ୍ଡିପଙ୍କା ଗାଁରେ ଆମ୍ବଟାକୁଆ ମୃତ୍ୟୁ ଘଟଣାର ତଦନ୍ତ ଆରମ୍ଭ ହୋଇଛି । ଦକ୍ଷିଣାଞ୍ଚଳ ଆରଡିସି ଶ୍ରୀମତୀ ରୂପା ରୋସନ ସାହୁ ଆଜି ସେହି ଗାଁକୁ ଯାଇ ଲୋକଙ୍କୁ ଭେଟିଥିଲେ । ତାଙ୍କ ସାଙ୍ଗରେ ଥିଲେ ଜିଲ୍ଲାପାଳ ଅମ୍ରିତ ଋତୁରାଜ । ଆମ୍ବଟାକୁଆ ସେମାନଙ୍କର ପାରମ୍ପରିକ ଖାଦ୍ୟ ଏବଂ ସେମାନଙ୍କ ପାଖରେ ପର୍ଯ୍ୟାପ୍ତ ରାସନ ଚାଉଳ ମହଜୁଦ ଅଛି ବୋଲି ଉପମୁଖ୍ୟମନ୍ତ୍ରୀ, ଯୋଗାଣ ମନ୍ତ୍ରୀ ଏବଂ ବିଧାୟକ ଦେଇଥିବା ମନ୍ତବ୍ୟରେ ଗ୍ରାମବାସୀ ତୀବ୍ର ପ୍ରତିକ୍ରିୟା ପ୍ରକାଶ କରିଥିଲେ । ଆରଡିସି ଏବଂ ଜିଲ୍ଲାପାଳଙ୍କୁ ସେମାନଙ୍କ ଆକ୍ରୋଶର ସାମନା କରିବାକୁ ପଡ଼ିଥିଲା । ଗ୍ରାମବାସୀଙ୍କୁ ବୁଝାସୁଝା କରି ସେଠାରୁ ଫେରିଥିଲେ ଆରଡିସି ।

ଆମ୍ବଟାକୁଆ ମୃତ୍ୟୁ ଖବର ଆସିବା ପରଠୁ ବିଭିନ୍ନ ଦଳର ନେତା ଏବଂ ଗଣମାଧ୍ୟମର ପ୍ରତିନିଧିମାନେ ମାଣ୍ଡିପଙ୍କା ଗାଁକୁ ଯାଇ ବାସ୍ତବତା ଅନୁଧ୍ୟାନ କରିଛନ୍ତି । ଗ୍ରାମବାସୀମାନେ ୩ ମାସର ରାସନ୍ ଚାଉଳ ପାଇ ନ ଥିଲେ । ଅଘଟଣ ଘଟିବା ପରେ ଚଳିତ ମାସ ୨ ତାରିଖରେ ତରବରିଆ ଭାବେ ଚାଉଳ ବଣ୍ଟନ କରାଯାଇଛି । ଲୋକଙ୍କ ରାସନ୍ କାର୍ଡରୁ ଏହା ସ୍ପଷ୍ଟ ହୋଇସାରିଛି । ଆମ୍ବଟାକୁଆ ଜାଉ ସେମାନଙ୍କର ପାରମ୍ପରିକ ଖାଦ୍ୟ ନୁହେଁ । ଅଭାବ ପଡ଼ିଲେ ଏହା ଖାଇବାକୁ ବାଧ୍ୟ ହୋଇଥାନ୍ତି ବୋଲି ଗାଁ ଓ ଅଞ୍ଚଳବାସୀ କହିଛନ୍ତି ।

ମାତ୍ର ଏହି ସତ୍ୟକୁ ଲୁଚାଇବା ପାଇଁ ସରକାର ଓ ଜିଲ୍ଲା ପ୍ରଶାସନ ପ୍ରଥମରୁ ଉଦ୍ୟମ କରିଥିଲେ । ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା ଏବଂ ଯୋଗାଣମନ୍ତ୍ରୀ କୃଷ୍ଣଚନ୍ଦ୍ର ପାତ୍ର କହିଥିଲେ ଯେ ଆମ୍ବଟାକୁଆ ସ୍ଥାନୀୟ ଆଦିବାସୀଙ୍କର ପାରମ୍ପରିକ ଖାଦ୍ୟ । ତେଣୁ ଅଭାବ ଯୋଗୁଁ ସେମାନେ ଆମ୍ବଟାକୁଆ ଖାଇନାହାନ୍ତି । ଲୋକଙ୍କୁ ଠିକ୍ ଭାବରେ ରାସନ୍ ଚାଉଳ ଦିଆଯାଇଛି ଏବଂ ସମସ୍ତଙ୍କ ପରିବାରରେ ପର୍ଯ୍ୟାପ୍ତ ଚାଉଳ ମହଜୁଦ ଅଛି ବୋଲି ଯୋଗାଣମନ୍ତ୍ରୀ ମନ୍ତବ୍ୟ ଦେଇଥିଲେ ।

ଯୋଗାଣମନ୍ତ୍ରୀଙ୍କର ଏଭଳି ମିଛ ଓ ଦାୟିତ୍ୱହୀନ ମନ୍ତବ୍ୟ ପାଇଁ ବିଜେଡି ତାଙ୍କର ଇସ୍ତଫା ଦାବି କରିଛି । ଯୋଗାଣମନ୍ତ୍ରୀ ଏବଂ ଉପମୁଖ୍ୟମନ୍ତ୍ରୀ ରାଜ୍ୟବାସୀଙ୍କ ନିକଟରେ କ୍ଷମା ମାଗନ୍ତୁ ବୋଲି ଦାବି କରାଯାଇଛି ।

ଆଜି ଶଙ୍ଖ ଭବନଠାରେ ଏକ ସାମ୍ବାଦିକ ସମ୍ମିଳନୀରେ ଦଳର ମୁଖପାତ୍ର ଡ. ଲେଖାଶ୍ରୀ ସାମନ୍ତସିଂହାର କହିଥିଲେ, ରାଜ୍ୟରେ ସାଧାରଣ ବଣ୍ଟନ ବ୍ୟବସ୍ଥା ଭୁଶୁଡ଼ି ପଡ଼ିବା କାରଣରୁ ମାଣ୍ଡପଙ୍କା ଗ୍ରାମର ୮ଟି ପରିବାରର ମହିଳାମାନେ ଆମ୍ବଟାକୁଆ ଜାଉ ଖାଇବାକୁ ବାଧ୍ୟ ହୋଇଥିଲେ । ରାଜ୍ୟବାସୀଙ୍କ ପାଖରେ ରାସନ ପହଞ୍ଚାଇବାରେ ରାଜ୍ୟ ସରକାର ବିଫଳ ହୋଇଥିବା କାରଣରୁ ଦୁଇ ଜଣଙ୍କର ମୃତ୍ୟୁ ହୋଇଛି ଓ ଅନ୍ୟ ୪ ଜଣ ମୃତ୍ୟୁ ସହ ସଂଗ୍ରାମ କରୁଛନ୍ତି । ତେଣୁ ରାଜ୍ୟର ଯୋଗାଣ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ରଙ୍କ ତୁରନ୍ତ ଇସ୍ତଫା ଆମେ ଦାବି କରୁଛୁ । ଏଥିସହ ତାଙ୍କୁ କ୍ରିମିନାଲ୍ ନେଗଲିଜେନ୍ସ କେସ୍ ରେ ଗିରଫ କରାଯାଉ ।

ଡ. ସାମନ୍ତସିଂହାର କହିଥିଲେ, ରାଜ୍ୟବାସୀଙ୍କୁ ବିଭିନ୍ନ ମିଥ୍ୟା ପ୍ରତିଶ୍ରୁତି ଦେଇ ଏବଂ ସୁନେଲି ସ୍ୱପ୍ନ ଦେଖାଇ ରାଜ୍ୟରେ ବିଜେପି କ୍ଷମତାକୁ ଆସିଛି । କିନ୍ତୁ, ଗତ ୪ ମାସରେ ରାଜ୍ୟର ଶାସନ ବ୍ୟବସ୍ଥା ହୁଗୁଳା ହୋଇଯାଇଛି । ଯାହାର ଫଳ ହେଉଛି ଅଖାଦ୍ୟ ଆମ୍ବଟାକୁଆ ଖାଇ ଲୋକ ମରିବା । ବିଜେପି ସରକାର ସ୍ୱପ୍ନର ସୌଦାଗରରୁ ମିଥ୍ୟାର ସୌଦାଗର ଓ ଏବେ ମୃତ୍ୟୁର ସୌଦାଗର ସାଜିଛନ୍ତି । ବର୍ତ୍ତମାନ ରାଜ୍ୟର ମୁଖ୍ୟମନ୍ତ୍ରୀ ଆଦିବାସୀ, ଦେଶର ଆଦିବାସୀ ବ୍ୟାପାର ମନ୍ତ୍ରୀ ଆମ ରାଜ୍ୟର ଆଦିବାସୀ ଓ ମହାମହିମ ରାଷ୍ଟ୍ରପତି ମଧ୍ୟ ଆମ ରାଜ୍ୟର ଆଦିବାସୀ ମହିଳା ଅଟନ୍ତି । କିନ୍ତୁ ଏହି ସମୟରେ ଆମ ରାଜ୍ୟର ଆଦିବାସୀ ଭଉଣୀ ଦୁଇ ଜଣ ଖାଦ୍ୟ ଅଭାବରୁ ଆମ୍ବଟାକୁଆ ଖାଇ ମୃତ୍ୟୁବରଣ କରିଛନ୍ତି ।

ଏହି ଘଟଣାରେ ରାଜ୍ୟ ସରକାରଙ୍କ ବିଫଳତା ଜଳ ଜଳ ଦିଶୁଥିବା ବେଳେ ମୁଖ୍ୟମନ୍ତ୍ରୀ ଘୋଷଣା କରିଥିବା ଆରଡିସି ତଦନ୍ତ ଉପରେ ରାଜ୍ୟବାସୀଙ୍କ ଭରସା ନାହିଁ ବୋଲି ବିଜେଡି ମୁଖପାତ୍ର କହିଛନ୍ତି । ଗତ ୪ ମାସରେ ବିଜେପି ସରକାରଙ୍କ ଦ୍ୱାରା ଘୋଷଣା କରାଯାଇଥିବା ତଦନ୍ତ ପ୍ରହସନରେ ପରିଣତ ହୋଇଛି । ରାଜ୍ୟପାଳଙ୍କ ପୁଅ ବିରୋଧରେ ଆସିଥିବା ଅଭିଯୋଗ, ରଥଯାତ୍ରା ସମୟରେ ବଡ଼ ଠାକୁର ପଡ଼ିଯିବା ଘଟଣା, ଚିକିଟି ମଦମୃତ୍ୟୁ ଘଟଣା ତଥା ଭରତପୁର ଥାନାରେ ମହିଳା ଓ ତାଙ୍କ ପୁରୁଷ ବନ୍ଧୁଙ୍କ ଉପରେ ଅତ୍ୟାଚାର ଘଟଣା, ସମସ୍ତ ଘଟଣାରେ ତଦନ୍ତ ଶୀତଳ ଭଣ୍ଡାରରେ ଅଛି ।

ଆମ୍ବଟାକୁଆ ମୃତ୍ୟୁ ଘଟଣାର ତଦନ୍ତକୁ ସେମିତି ଶୀତଳ ଭଣ୍ଡାରକୁ ନ ଠେଲି ମନ୍ତ୍ରୀଙ୍କଠାରୁ ଆରମ୍ଭ କରି ଜିଲ୍ଲାପାଳଙ୍କ ସମେତ ଏଥିପାଇଁ ଦାୟୀ ସମସ୍ତ ଅଧିକାରୀଙ୍କ ବିରୋଧରେ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ପାଇଁ ସେ ଦାବି କରିଛନ୍ତି ।