ଅଭିବୃଦ୍ଧିମୂଳକ ବଜେଟ୍: ମୁଖ୍ୟମନ୍ତ୍ରୀ
କେନ୍ଦ୍ର ବଜେଟ୍ କୁ ଅଭିବୃଦ୍ଧିମୂଳକ ବଜେଟ୍ ବୋଲି କହିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ସେ କହିଛନ୍ତି ଯେ ସମାଜର ସବୁବର୍ଗର ଲୋକଙ୍କ ଅଭିବୃଦ୍ଧି ଉପରେ ଏଥିରେ ଗୁରୁତ୍ୱ ଦିଆଯାଇଛି । ଯୁବଶକ୍ତିର ବିକାଶ ଉପରେ ସ୍ୱତନ୍ତ୍ର ଫୋକସ୍ ରହିଛି । ଯୁବବର୍ଗଙ୍କ ଦକ୍ଷତା ବୃଦ୍ଧିକୁ ପ୍ରାଥମିକତା ଦିଆଯାଇଛି । ଶିଳ୍ପ ଓ କୃଷିକୁ ପ୍ରାଧାନ୍ୟ ଦିଆଯାଇଛି । ଦେଶର ଆର୍ଥିକ ଅଭିବୃଦ୍ଧିକୁ ଗୁରୁତ୍ୱ ଦିଆଯାଇଛି । ଆତ୍ମନିର୍ଭର ଭାରତ ପାଇଁ ଏହି ବଜେଟ୍ । ବଜେଟ୍ ରେ ଓଡ଼ିଶାକୁ ଗୁରୁତ୍ୱ ମିଳିଛି । ବିରଳ ଖଣିଜ ପଦାର୍ଥ ପାଇଁ କରିଡର, ଜାତୀୟ ଜଳମାର୍ଗ ବ୍ୟବସ୍ଥା, ଇ-ବସ୍, କଇଁଚ କରିଡର ପ୍ରତିଷ୍ଠା ଆଦି ଡବଲ ଇଞ୍ଜିନ ସରକାର ପାଇଁ ଲାଭଜନକ ବୋଲି କହିଛନ୍ତି ମୁଖ୍ୟମନ୍ତ୍ରୀ ।
ନୈରାଶ୍ୟଜନକ ବଜେଟ୍: ନବୀନ
କେନ୍ଦ୍ର ବଜେଟ୍ କୁ ନୈରାଶ୍ୟଜନକ କହିଛନ୍ତି ବିରୋଧୀ ଦଳ ନେତା ନବୀନ ପଟ୍ଟନାୟକ । ସେ ତାଙ୍କ ପ୍ରତିକ୍ରିୟାରେ କହିଛନ୍ତି ଯେ ଓଡ଼ିଶା ଓ ରାଜ୍ୟବାସୀଙ୍କ ପାଇଁ ଏଥିରେ କିଛି ନାହିଁ । ଡବଲ ଇଞ୍ଜିନ ସରକାରଠାରୁ ବହୁତ କିଛି ଆଶା କରାଯାଉଥିଲା । ଆଶା ଥିଲା, ଡବଲ ଇଞ୍ଜିନ ସରକାର ବିକାଶଧାରାକୁ ବଜାୟ ରଖିବ । ନିଯୁକ୍ତି ସୃଷ୍ଟି ସହ ଅନ୍ୟ ଆବଶ୍ୟକ ସହାୟତା ଯୋଗାଇଦେବ । ମାତ୍ର ବଜେଟରୁ ରାଜ୍ୟକୁ ଯାହା ମିଳିଛି ତାହା ଅତି ନଗନ୍ୟ । ଜାତୀୟ ଜଳମାର୍ଗ ଯୋଜନା ଦଶନ୍ଧି ତଳର ପୁରୁଣା । ଏକ ଦଶନ୍ଧି ତଳର ଏହି ଯୋଜନାରେ କୌଣସି ଅଗ୍ରଗତି ହୋଇନାହିଁ । ସାତୋଟି ହାଇସ୍ପିଡ ରେଳ କରିଡରରେ ଓଡ଼ିଶା ସ୍ଥାନ ନ ପାଇବା ଦୁର୍ଭାଗ୍ୟଜନକ । ବୁଦ୍ଧ ସର୍କିଟରେ ମଧ୍ୟ ଓଡ଼ିଶାର ନାମ ନ ଥିବାରୁ ସେ ନିରାଶବ୍ୟକ୍ତ କରିଛନ୍ତି । ତେବେ ବିରଳା ମୃତ୍ତିକା କରିଡରକୁ ସ୍ୱାଗତ କରିଛନ୍ତି । କେନ୍ଦ୍ର ବଜେଟରୁ ଆମେ ଅଧିକ ପାଇବା ଦରକାର । ରାଜ୍ୟର ବିଜେପି ସରକାର ଓଡ଼ିଶାବାସୀଙ୍କ ହକ୍ ଦାବି କରୁ ବୋଲି ନବୀନ ପରାମର୍ଶ ଦେଇଛନ୍ତି ।
ସବୁ ବର୍ଗ ପାଇଁ ବଜେଟ୍: ମନମୋହନ
କେନ୍ଦ୍ର ବଜେଟ୍ କୁ ସ୍ୱାଗତ କରିଛନ୍ତି ବିଜେପି ରାଜ୍ୟ ସଭାପତି ମନମୋହନ ସାମଲ । ସେ କହିଛନ୍ତି ଯେ ଏହା ସବୁ ବର୍ଗ ପାଇଁ ବଜେଟ୍ । ମହିଳା, କୃଷକ ଓ ସାଧାରଣ ଲୋକ ଏଥିରୁ ବିଶେଷ ଉପକୃତ ହେବେ । ବଜେଟ୍ ରେ ସାମଗ୍ରିକ ବିକାଶ ଉପରେ ଗୁରୁତ୍ୱ ଦିଆଯାଇଛି । ଦେଶର ବିକାଶକୁ ଏହା ଆଗକୁ ବଢ଼ାଇବ । ପ୍ରତିରକ୍ଷା କ୍ଷେତ୍ରକୁ ବିଶେଷ ଦୃଷ୍ଟି ଦିଆଯାଇଛି । ସହର ବିକାଶ ଯୋଜନାରେ ଓଡ଼ିଶାକୁ ଲାଭ ମିଳିବ ବୋଲି ସେ କହିଛନ୍ତି ।
