ଭୁବନେଶ୍ୱର: ନୂଆପଡ଼ାରୁ ବିଜେଡିକୁ କେହି ପ୍ରାର୍ଥୀ ମିଳିଲେନି । ବରଗଡ଼ ଜିଲ୍ଲା ଅତାବିରାର ପୂର୍ବତନ ବିଧାୟିକା, ପୂର୍ବତନ ମନ୍ତ୍ରୀ ତଥା ରାଜ୍ୟ ବିଜୁ ମହିଳା ଜନତା ଦଳର ସଭାନେତ୍ରୀ ଶ୍ରୀମତୀ ସ୍ନେହାଙ୍ଗିନୀ ଛୁରିଆଙ୍କୁ ନୂଆପଡ଼ାରେ ପ୍ରାର୍ଥୀ କରାଯାଇଛି । ଆଜି ସଂଧ୍ୟାରେ ନବୀନ ନିବାସରେ ଦଳୀୟ ନେତାଙ୍କ ସହ ବୈଠକ ପରେ ବିଜେଡି ସୁପ୍ରିମୋ ନବୀନ ପଟ୍ଟନାୟକ ଏହି ଘୋଷଣା କରିଛନ୍ତି ।
ଶ୍ରୀମତୀ ଛୁରିଆଙ୍କୁ ପଶ୍ଚିମ ଓଡ଼ିଶାର ଜଣେ ଟାଣୁଆ ନେତା ଦର୍ଶାଇଛନ୍ତି ନବୀନ । ପ୍ରାର୍ଥୀ ଘୋଷଣା କଲା ବେଳେ ନବୀନ ନୂଆପଡ଼ାରେ ଅନ୍ୟ ଦୁଇ ଆଶାୟୀ ପୂର୍ବତନ ଜିଲ୍ଲା ସଭାପତି ମନୋଜ ମିଶ୍ର ଏବଂ ଆଦିବାସୀ କଲ୍ୟାଣ ସଂଘ ସଭାପତି ଭାନୁ ପ୍ରତାପ ସିଂହ ମାଝୀଙ୍କୁ ପାଖରେ ଛିଡ଼ା କରାଇଥିଲେ । ସ୍ନେହାଙ୍ଗିନୀ ଛୁରିଆଙ୍କୁ ବୃହତ୍ତ ବ୍ୟବଧାନରେ ବିଜୟୀ କରାଇବୁ ବୋଲି ସେମାନେ ପ୍ରତିଶ୍ରୁତି ଦେଇଥିଲେ ।
ଜୟ ଢ଼ୋଲକିଆ ବିଜେପିକୁ ଚାଲିଯିବା ପରେ ବିଜେଡି ଅକଳରେ ପଡ଼ିଥିଲା । ପ୍ରାର୍ଥୀ ଚୟନରେ ସଙ୍କଟ ସୃଷ୍ଟି ହୋଇଥିଲା । ମାଳ ମାଳ ଭୁବନେଶ୍ୱରିଆ ନେତା ନୂଆପଡ଼ାରେ ଡେରା ପକାଇ ସଙ୍କଟର ସମାଧାନ ପାଇଁ ଚେଷ୍ଟା କରିଥିଲେ ମଧ୍ୟ ସଫଳ ହୋଇ ନ ଥିଲେ । ସମ୍ଭାବ୍ୟ ପ୍ରାର୍ଥୀମାନଙ୍କ ମଧ୍ୟରେ ଥିଲେ ପୂର୍ବତନ ଜିଲ୍ଲା ସଭାପତି ମନୋଜ ମିଶ୍ର, ଆଦିବାସୀ କଲ୍ୟାଣ ସଂଘ ସଭାପତି ଭାନୁ ପ୍ରତାପ ସିଂହ ମାଝୀ, ନୂଆପଡ଼ା ଏନଏସି ଅଧ୍ୟକ୍ଷ ମହମ୍ମଦ ଆଦମ, ନୂଆପଡ଼ା ବିଜେଡି ସଭାନେତ୍ରୀ ବିନ୍ଧେଶ୍ୱରୀ ସାହୁ ।
ବିଜେପି ପ୍ରାର୍ଥୀତ୍ୱରୁ ବଞ୍ଚିତ ଯଦୁମଣି ପାଣିଗ୍ରାହୀ କିମ୍ବା ପ୍ରସନ୍ନ ପାଢ଼ୀଙ୍କୁ ବିଜେଡିକୁ ଆଣି ଜୟ ଢ଼ୋଲକିଆଙ୍କ ସହ ଟକ୍କର ଦେବାକୁ କିଛି ବିଜେଡି ନେତା ଯୋଜନା କରିଥିଲେ ମଧ୍ୟ ତାହା କାର୍ଯ୍ୟକାରୀ ହୋଇପାରି ନ ଥିଲା ।
ସୂଚନାଥାଉକି, ସ୍ନେହାଙ୍ଗିନୀ ଛୁରିଆ ୨୦୧୪ ଏବଂ ୨୦୧୯ରେ ଲଗାତର ଦୁଇଥର ଅତାବିରା ଆସନରୁ ନିର୍ବାଚିତ ହୋଇଥିଲେ । ନବୀନ ତାଙ୍କୁ ଥରଟିଏ ମନ୍ତ୍ରିମଣ୍ଡଳରେ ସ୍ଥାନ ଦେଇଥିଲେ । ୨୦୨୪ ନିର୍ବାଚନରେ କଂଗ୍ରେସ ପ୍ରାର୍ଥୀ ନିହାର ରଞ୍ଜନ ମହାନନ୍ଦଙ୍କଠାରୁ ସେ ୨୮,୯୧୦ ଖଣ୍ଡ ଭୋଟରେ ପରାସ୍ତ ହୋଇଥିଲେ । ଏବେ ଦ୍ୱିତୀୟ ଥର ପାଇଁ ସେ ରାଜ୍ୟ ମହିଳା ବିଜେଡିର ସଭାନେତ୍ରୀ ଦାୟିତ୍ୱ ତୁଲାଉଛନ୍ତି ।
ପ୍ରାର୍ଥୀ ଘୋଷଣା ପରେ ଶ୍ରୀମତୀ ଛୁରିଆ ନୂଆପଡ଼ାବାସୀଙ୍କୁ ପ୍ରଣାମ କରିବା ସହ ଶେଷ ରକ୍ତ ବିନ୍ଦୁ ପର୍ଯ୍ୟନ୍ତ ଅଞ୍ଚଳବାସୀଙ୍କ ପାଇଁ ଲଢ଼େଇ କରିବାକୁ ଘୋଷଣା କରିଛନ୍ତି ।
