ଭୁୁବନେଶ୍ୱର: ମୁଣ୍ଡ ଉପରେ ରାଜ୍ୟସଭା ନିର୍ବାଚନ ଥିବା ବେଳେ ବିଜେଡି ସୁପ୍ରିମୋ ନବୀନ ପଟ୍ଟନାୟକ ଆଜି ଏକ ବଡ଼ ପଦକ୍ଷେପ ନେଇଛନ୍ତି । ଦୁଇ ବିଧାୟକ ସନତାନ ମହାକୁଡ଼(ଚମ୍ପୁଆ) ଏବଂ ଅରବିନ୍ଦ ମହାପାତ୍ର(ପାଟକୁରା)ଙ୍କୁ ଦଳରୁ ନିଲମ୍ବିତ କରିଛନ୍ତି । ଦଳବିରୋଧୀ କାର୍ଯ୍ୟରେ ସଂପୃକ୍ତ ଦର୍ଶାଯାଇ ସେମାନଙ୍କ ବିରୋଧରେ ଏହି କାର୍ଯ୍ୟାନୁଷ୍ଠାନ ନିଆଯାଇଛି । ଏ ସମ୍ପର୍କରେ ତୁରନ୍ତ ବାଚସ୍ପତିଙ୍କୁ ମଧ୍ୟ ଅବଗତ କରାଯାଇଛି । ଆଜି ସଂଧ୍ୟାରେ ନବୀନଙ୍କର ଏହି ଅପ୍ରତ୍ୟାଶିତ ନିଷ୍ପତ୍ତି ବିଜେଡି ରାଜନୀତିରେ ହଟଚମଟ ସୃଷ୍ଟି କରିଛି । ସନା ମହାକୁଡ଼ଙ୍କ ଦଳବିରୋଧୀ କାର୍ଯ୍ୟ ଜଣାପଡୁଥିଲେ ମଧ୍ୟ ଅରବିନ୍ଦ ମହାପାତ୍ରଙ୍କ ବିରୋଧରେ କାର୍ଯ୍ୟାନୁଷ୍ଠାନ ସମସ୍ତଙ୍କୁ ଆଶ୍ଚର୍ଯ୍ୟଚକିତ କରିଛି । ନିର୍ଦ୍ଦିଷ୍ଟ ଭାବେ ତାଙ୍କର ଦଳବିରୋଧୀ କାର୍ଯ୍ୟ ସ୍ପଷ୍ଟ ହୋଇନାହିଁ ।
କଂଗ୍ରେସ ଦଳରୁ ରାଜନୀତି କ୍ୟାରିୟର୍ ଆରମ୍ଭ କରିଥିବା ସନାତନ ମହାକୁଡ଼ ଚମ୍ପୁଆରୁ ଦ୍ୱିତୀୟ ଥର ପାଇଁ ବିଧାୟକ ଅଛନ୍ତି । ପ୍ରଥମ ଥର ୨୦୧୪ ମସିହାରେ ସେ ସ୍ୱାଧୀନ ପ୍ରାର୍ଥୀ ଭାବେ ଲଢ଼ି ବିଧାୟକ ହୋଇଥିଲେ । ପରବର୍ତ୍ତୀ ସମୟରେ ବିଜେଡି ସହ ହାତ ମିଶାଇଥିଲେ । ୨୦୧୯ ନିର୍ବାଚନରେ କୌଣସି କାରଣରୁ ବିଜେଡିରୁ ପ୍ରାର୍ଥୀ ହୋଇ ନ ଥିଲେ ମଧ୍ୟ ତାଙ୍କ ସମର୍ଥକ ମିନାକ୍ଷୀ ମହନ୍ତଙ୍କୁ ପ୍ରାର୍ଥୀ କରିବାରେ ସମର୍ଥ ହୋଇଥିଲେ । ୨୦୨୪ ନିର୍ବାଚନରେ ବିଜେଡି ଟିକେଟରେ ଲଢ଼ି ଦ୍ୱିତୀୟ ଥର ବିଧାୟକ ହୋଇଥିଲେ ସନା ।
ତେବେ ବିଜେଡି ସରକାର ପଳାଇବା ଏବଂ ମୋହନ ମାଝୀଙ୍କ ନେତୃତ୍ୱରେ ବିଜେପି ସରକାର ଆସିବା ପରେ ସନାଙ୍କ ମନ ବିଜେଡିରେ ରହିଲାନି । ତାଙ୍କ ଜିଲ୍ଲାର ସାଥୀ ମୁଖ୍ୟମନ୍ତ୍ରୀ ମୋହନ ମାଝୀଙ୍କ ନିକଟତର ହେବାକୁ ଲାଗିପଡ଼ିଲେ । ବିଜେପି ପ୍ରତି ତାଙ୍କ ମନରେ ନରମ ଭାବ ଆସିଲା ଏବଂ ସୁଯୋଗ ପାଇଲା କ୍ଷଣି ବିଜେପିକୁ ପ୍ରଶଂସାରେ ପୋତି ପକାଇଲେ । ବିଜେଡି ପ୍ରତି ଘୃଣା ଭାବ ନେଇ ସମସ୍ତ କାର୍ଯ୍ୟକ୍ରମରୁ ନିଜକୁ ଦୂରେଇ ଦେଲେ । ବିଧାନସଭା ସମୟରେ ବିଧାୟକ ଦଳ ବୈଠକରେ ମଧ୍ୟ ଯୋଗ ଦେଉ ନ ଥିଲେ । ତାଙ୍କର ପରିବର୍ତ୍ତିତ ହାବଭାବକୁ ଲକ୍ଷ୍ୟ କରି ଥରେ ବିଧାନସଭା ପରିସରରେ ଖୋଦ୍ ନବୀନ ପଟ୍ଟନାୟକ ଉପହାସ କରିଥିଲେ ଏବଂ ଆପଣ ବିଜେପିକୁ ଯାଉଛନ୍ତି କି ବୋଲି ସନାଙ୍କୁ ପଚାରିଥିଲେ । ସେତେବେଳେ ମିଡିଆରେ ଏହାକୁ ନେଇ ବହୁତ ଚର୍ଚ୍ଚା ହୋଇଥିଲା ।
ମୁଖ୍ୟମନ୍ତ୍ରୀଙ୍କ ଏଇ କେନ୍ଦୁଝର ଗସ୍ତ ବେଳେ ତାଙ୍କୁ ସ୍ୱାଗତ ଜଣାଇ ପ୍ରଶଂସାରେ ପୋତିଥିଲେ ସନା । ୨୪ ବର୍ଷର ବିଜେଡି ସରକାରରେ କେନ୍ଦୁଝରରେ କିଛି ଉନ୍ନତି ହୋଇନାହିଁ ବୋଲି କହି ପୂର୍ବ ନବୀନ ସରକାରକୁ କଡ଼ା ସମାଲୋଚନା କରିଥିଲେ । ସନାତନ ମହାକୁଡ଼ଙ୍କର ଏଭଳି କାର୍ଯ୍ୟ ଯେ ଦଳବିରୋଧୀ ତାହା ସ୍ପଷ୍ଟ ଅନୁମେୟ । ଏହି କାରଣରୁ ନବୀନ ତାଙ୍କୁ ଦଳରୁ ବିଦା କରିଛନ୍ତି ବୋଲି ବୁଝାପଡୁଛି ।
ମାତ୍ର ଅରବିନ୍ଦ ମହାପାତ୍ରଙ୍କ କ୍ଷେତ୍ରରେ ନିର୍ଦ୍ଦିଷ୍ଟ କାରଣ ଜଣାପଡୁନାହିଁ । ପାଟକୁରାରୁ ବିଜେଡି ଟିକେଟରେ ପ୍ରଥମ ଥର ପାଇଁ ନିର୍ବାଚନ ଲଢ଼ି ସେ ବିଧାୟକ ହୋଇଛନ୍ତି । ନବୀନଙ୍କର ପରମ ଶତ୍ରୁ ବିଜୟ ମହାପାତ୍ରଙ୍କର ସେ ପୁଅ ହୋଇଥିଲେ ମଧ୍ୟ ଗତ ନିର୍ବାଚନରେ ବିଜେଡି ତାଙ୍କୁ ଟିକେଟ୍ ଦେଇଥିଲା । ନବୀନଙ୍କ ଆଶୀର୍ବାଦ ପାଇଁ ନବୀନ ନିବାସ ଯାଇଥିବା ଅରବିନ୍ଦଙ୍କୁ ନବୀନ ବହୁତ ଆଦର କରିଥିଲେ । ବାପା(ବିଜୟ ମହାପାତ୍ର)ଙ୍କ ବିଷୟରେ ପଚାରିଥିଲେ ।
ବିଧାନସଭାରେ ବିଭିନ୍ନ ପ୍ରସଙ୍ଗରେ ଅରବିନ୍ଦଙ୍କର ଉପସ୍ଥାପନା ଖୁବ୍ ସୁନ୍ଦର । ବୁଲେଇ ବଙ୍କେଇ ତୀର ମାରିବାରେ ସେ ତାଙ୍କର ଦକ୍ଷତା ପ୍ରତିପାଦନ କରିଛନ୍ତି । ତେବେ ନିର୍ଦ୍ଦିଷ୍ଟ ଭାବେ ତାଙ୍କର ଦଳବିରୋଧୀ କାର୍ଯ୍ୟ କ’ଣ ତାହା ଜଣାପଡ଼ିନାହିଁ । ତେବେ ବିଜେଡି ସହ ନିଜକୁ ଯୋଡ଼ିପାରି ନ ଥିଲେ ଏବଂ ପାର୍ଟି ଲାଇନ୍ ରେ କାର୍ଯ୍ୟ କରୁ ନ ଥିଲେ । ତାଙ୍କର ସମସ୍ତ କାର୍ଯ୍ୟ ଦଳକୁ କ୍ଷତି କରୁଥିଲା ବୋଲି ଦଳୀୟ ବିଚାରରେ କୁହାଯାଇଛି । ଗୁଇନ୍ଦା ସୂଚନା ଆଧାରରେ ନବୀନ ବାବୁ କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି ବୋଲି ଦଳର କିଛି ବରିଷ୍ଠ ନେତା ଗଣମାଧ୍ୟମକୁ ପ୍ରତିକ୍ରିୟା ଦେଇଛନ୍ତି ।
ତେବେ ସେ କୌଣସି ଦଳବିରୋଧୀ କାର୍ଯ୍ୟ କରିନାହାନ୍ତି ବୋଲି ଶ୍ରୀ ମହାପାତ୍ର ତାଙ୍କ ପ୍ରତିକ୍ରିୟାରେ କହିଛନ୍ତି । ସୋସିଆଲ୍ ମିଡିଆରୁ ସେ ପ୍ରଥମେ ଏହି ଖବର ପାଇଲା ପରେ ବିସ୍ମିତ ହୋଇଛନ୍ତି । କ’ଣ ପାଇଁ କାର୍ଯ୍ୟାନୁଷ୍ଠାନ ହେଲା ଜାଣିନାହାନ୍ତି । ସେ କୌଣସି ମେଳିକୁ ଯାଇନାହାନ୍ତି କି ଭୋଜିରେ ଯୋଗ ଦେଇନାହାନ୍ତି । ତାଙ୍କ ବାପାଙ୍କ ଉପରେ ଥିବା ରାଗ ନବୀନ ବାବୁ ତାଙ୍କ ଉପରେ ସୁଝାଇଛନ୍ତି କି ବୋଲି ଗଣମାଧ୍ୟମ ପ୍ରଶ୍ନକୁ ସେ ଏଡ଼ାଇ ଦେଇଛନ୍ତି । ତାଙ୍କ ବିଷୟ ସହ ବାପାଙ୍କୁ ନ ଯୋଡିବାକୁ ସେ ଅନୁରୋଧ କରିଛନ୍ତି ।
ଅରବିନ୍ଦଙ୍କ ବାପା ବରିଷ୍ଠ ନେତା ବିଜୟ ମହାପାତ୍ର ମଧ୍ୟ କିଛି ଜାଣିନାହାନ୍ତି ବୋଲି କହିଛନ୍ତି । ତାଙ୍କ ପୁଅ ଦଳ ବିରୋଧରେ କୌଣସି କାମ କରିନାହାନ୍ତି ବୋଲି ମଧ୍ୟ କହିଛନ୍ତି ।
