ଭୁବନେଶ୍ୱର: ଓଡ଼ିଶା ସଙ୍ଗୀତ ତଥା ଓଲିଉଡ଼ ଜଗତର ପ୍ରସିଦ୍ଧ ଗାୟକ ହ୍ୟୁମାନ ସାଗର ଆଉ ନାହାନ୍ତି । ଏମ୍ସରେ ଚିକିତ୍ସାଧୀନ ଅବସ୍ଥାରେ ଆଜି ସଂଧ୍ୟାରେ ସେ ଆଖି ବୁଜି ଦେଇଛନ୍ତି । ତାଙ୍କୁ ମାତ୍ର ୩୪ ବର୍ଷ ହୋଇଥିଲା । ଏତେ କମ୍ ବୟସରେ ସଫଳତାର ଶୀର୍ଷରେ ପହଞ୍ଚିଥିବା ଏହି ସ୍ୱନାମଧନ୍ୟ କଣ୍ଠଶିଳ୍ପୀଙ୍କ ଅକାଳ ମୃତ୍ୟୁକୁ ନେଇ ସମଗ୍ର ରାଜ୍ୟର ସଙ୍ଗୀତପ୍ରେମୀଙ୍କ ମଧ୍ୟରେ ଶୋକର ଛାୟା ଖେଳିଯାଇଛି ।
ଅସୁସ୍ଥତା କାରଣରୁ କିଛି ଦିନ ତଳେ ହ୍ୟୁମାନ୍ କଟକର ଏକ ଘରୋଇ ହସ୍ପିଟାଲରେ ଭର୍ତ୍ତି ହୋଇଥିଲେ । ମାତ୍ର ତାଙ୍କ ଅବସ୍ଥା ଆହୁରି ଖରାପ ହୋଇପଡ଼ିଲା । ଅତି ସଙ୍କଟାପନ୍ନ ଅବସ୍ଥାରେ ଗତ ୧୪ ତାରିଖ ଦିନ ଭୁବନେଶ୍ୱର ଏମ୍ସରେ ସେ ଭର୍ତ୍ତି ହୋଇଥିଲେ । ତାଙ୍କ ଲିଭର୍, କିଡନୀ ସମେତ ଏକାଧିକ ଅଙ୍ଗ ଅଚଳ ହୋଇପଡ଼ିଥିଲା । ଏକମୋ ବିଶେଷଜ୍ଞ ଡାକ୍ତର ଶ୍ରୀକାନ୍ତ ବେହେରାଙ୍କ ନେତୃତ୍ୱରେ ଏକ ଡାକ୍ତରୀ ଟିମ୍ ତାଙ୍କର ଜୀବନ ବଞ୍ଚାଇବା ପାଇଁ ଆପ୍ରାଣ ଉଦ୍ୟମ କରିଥିଲେ । ମାତ୍ର ସବୁ ଚେଷ୍ଟା ବିଫଳ ହୋଇଥିଲା । ଆଜି ରାତି ୯ଟା ୮ ମିନିଟ୍ ରେ ଆଖି ବୁଜିଦେଇଥିଲେ ହ୍ୟୁମାନ୍ ।
୧୯୯୦ ନଭେମ୍ବର ୨୫ରେ ଟିଟିଲାଗଡ଼ରେ ଜନ୍ମିତ ହୁ୍ୟମାନ୍ ୨୦୧୨ରେ ତରଙ୍ଗ ଭଏସ୍ ଅଫ ଓଡ଼ିଶା ସିଜିନ୍-୨ରେ ଭାଗ ନେଇ ବିଜୟୀ ହୋଇଥିଲେ । ତାଙ୍କ କଣ୍ଠର ଯାଦୁ ସମସ୍ତଙ୍କର ଦୃଷ୍ଟି ଆକର୍ଷଣ କରିଥିଲା । ୨୦୧୫ରେ ତରଙ୍ଗ ପ୍ରଡକ୍ସନ୍ ର ଫିଲ୍ ‘ତୁ ହିଁ ତୁ’ ର ଟାଇଟିଲ୍ ସଙ୍ଗୀତ ଗାଇବାର ସୁଯୋଗ ତାଙ୍କୁ ମିଳିଥିଲା । ଏହି ଗୀତଟି ଅଦ୍ଭୂତପୂର୍ବ ସଫଳତା ହାସଲ କରିଥିଲା । ଏହାପରଠାରୁ ସେ ଆଉ ପଛକୁ ଫେରିନଥିଲେ । ଗୋଟିଏ ପରେ ଗୋଟିଏ ହିଟ୍ ସଙ୍ଗୀତ ଦେଇ ଚାଲିଥିଲେ । ୧୯ଟି ଓଡ଼ିଆ ଫିଲ୍ମ ସମେତ ଅନେକ ଆଲବମ୍ ସଙ୍ଗୀତରେ ସେ କଣ୍ଠଦାନ କରିଥିଲେ । ସବୁ ପ୍ରକାର ଗୀତ ଗାଇବାରେ ସେ ଓସ୍ତାଦ୍ ଥିଲେ । ତାଙ୍କର ପ୍ରେମ, ବିରହ ଗୀତଗୁଡ଼ିକ ଯୁବପୀଢ଼ିଙ୍କୁ ମତୁଆଲା କରୁଥିଲା ।
ହ୍ୟୁମାନ୍ ଙ୍କ ଅକାଳ ବିୟୋଗରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ, କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ବିରୋଧୀ ଦଳ ନେତା ନବୀନ ପଟ୍ଟନାୟକ, ପିସିସି ସଭାପତି ଭକ୍ତ ଚରଣ ଦାସଙ୍କଠାରୁ ଆରମ୍ଭ କରି ସଙ୍ଗୀତ ଜଗତର ବିଶିଷ୍ଟ ବ୍ୟକ୍ତିମାନେ ଗଭୀର ଶୋକପ୍ରକାଶ କରିଛନ୍ତି । ତାଙ୍କର ଶେଷ ଦର୍ଶନ ପାଇଁ ଏମ୍ସ ହସ୍ପିଟାଲରେ ପ୍ରବଳ ଭିଡ଼ ହୋଇଛି ।
