ଭୁବନେଶ୍ୱର(ମିଡ-ଡେ ଓଡ଼ିଶା): ଜେଲ୍ ଖୁଆଡରେ ପଶିଥିବା ପପୁ ପମ୍ ପମ୍ଙ୍କ ନାବାଳିକା ଯୌନ ନିର୍ଯ୍ୟାତନା ମାମଲାରେ ରୋମାଞ୍ଚକର ମୋଡ଼ । ୩ ଦିନ ତଳେ କଏଦୀ ସାଜିଥିବା ପପୁଙ୍କୁ ଜେଲ୍ରୁ ମୁକୁଳାଇ ଆପୋଷ ବୁଝାମଣାରେ କାମ ସାରିଦେବେ ବୋଲି ନାବାଳିକା ବାପାଙ୍କର ମନ ହୋଇଛି । ଗତକାଲି ଏଥିପାଇଁ କୋର୍ଟରେ କମ୍ପ୍ରମାଇଜ୍ ପିଟିସନ୍ ଦାଖଲ କରିଥିଲେ । ମାତ୍ର କୋର୍ଟ ତାହାକୁ ଗ୍ରହଣ କରିନାହିଁ । ତେବେ କୋର୍ଟରୁ ଧିକ୍କାର ପାଇଲା ପରେ ମାମଲା ମୋଡ଼ିବାର ନୂଆ ପାଠ ଧରିଛନ୍ତି ବାପା । ଗଳା ଫଟାଇ କହିଛନ୍ତି, ମାଜିଷ୍ଟ୍ରେଟ୍ଙ୍କ ସାମନାରେ ସିଆରପିସିର ୧୬୪ ଧାରାରେ ବୟାନ ରେକର୍ଡ କରାଇଥିବା ଝିଅଟି ତାଙ୍କ ଝିଅ ନୁହେଁ । ତାଙ୍କ ଝିଅର ନାଁ ନେଇ ଅନ୍ୟ କେଉଁ ଝିଅର ବୟାନ ରେକର୍ଡ କରାଯାଇଥିବା ଭଳି ସଙ୍ଗୀନ ଅଭିଯୋଗ ଆଣିଛନ୍ତି ବାପା । ଆଶ୍ଚର୍ଯ୍ୟର କଥା ନିଜେ ପୀଡ଼ିତା ନାବାଳିକା ତାଙ୍କ ବାପାଙ୍କ ଅଭିଯୋଗ ସହ ସ୍ୱର ମିଳାଇଛନ୍ତି । ଏହି ମର୍ମରେ ପୀଡ଼ିତାର ରୋକଠୋକ୍ ବୟାନ ନିଜ ପାଖରେ ସାଇତି ରଖିଥିବା ନିର୍ଦ୍ଦିଷ୍ଟ ଟିଭି ଚାନେଲ ଦାବି କରିଛି । ସେପଟେ ସିଡବ୍ଲୁସି ଏହାକୁ ଖଣ୍ଡନ କରି ପୀଡ଼ିତା ବାପାଙ୍କ ବିରୋଧରେ ସଙ୍ଗୀନ ଅଭିଯୋଗ ଆଣିଛନ୍ତି । ମାମଲାର ରଫାଦଫା ପାଇଁ ୧୫ ଲକ୍ଷ ଟଙ୍କାର ଡିଲ୍ ହୋଇଥିବା ଅଭିଯୋଗ ଆଣିଛନ୍ତି ସିଡବ୍ଲୁସି ସଦସ୍ୟା ନିରୂପମା ରଥ । ଏଭଳି ଅଭିଯୋଗ ଓ ପ୍ରତି ଅଭିଯୋଗ ଭିତରେ ମାମଲାଟି ଅଧିକ ଜଟିଳ ହୋଇଯାଇଛି ।
ସପ୍ତାହ ତଳେ ପପୁଙ୍କ ବିରୋଧରେ ମହିଳା ଥାନାରେ ନାବାଳିକା ଯୌନ ନିର୍ଯ୍ୟାତନା ଅଭିଯୋଗ ଆସିଥିଲା । ଗିରଫ ଭୟରେ ସେବେଠାରୁ ପପୁ ଫେରାର ହୋଇଗଲେ । ସିଆରପିସିର ୧୬୧ ଧାରାରେ ମହିଳା ଥାନା ପୁଲିସ ପୀଡ଼ିତା ନାବାଳିକାର ବୟାନ ରେକର୍ଡ କରିଥିଲା ବେଳେ ଧାରା ୧୬୪ ଆଧାରରେ କୋର୍ଟରେ ତାଙ୍କର ବୟାନ ରେକର୍ଡ ହୋଇଥିଲା । ଏହି ନାବାଳିକାର ବରିଷ୍ଠ ଅଭିଯୋଗ ଆଧାରରେ ହିଁ ପପୁଙ୍କୁ ପୁଲିସ ଗୋଡେଇ ଗୋଡେଇ ଗତ ୩୦ ତାରିଖରେ ଧରିଲା ପୁରୀରୁ । ବର୍ତ୍ତମାନ ଭିନ୍ନ ମୋଡ଼ ନେଇଥିବା ମାମଲାଟିକୁ ନେଇ ଲୋକଙ୍କ ମନରେ ଉଙ୍କି ମାରିଛି ଅନେକ ପ୍ରଶ୍ନ । ଏକଥା ଜଣାଶୁଣା ଯେ ଉଭୟ ଫିଲ୍ମ ଓ ରାଜନୀତି କ୍ଷେତ୍ରରେ ପପୁଙ୍କ ଚେର ବହୁତ ଲମ୍ବା । ଧନ, ଯଶ ଓ ଖ୍ୟାତି କେଉଁଥିରେ ପପୁଙ୍କର ଅଭାବ ନାହିଁ । ଫିଲ୍ମ ଲାଇନ୍ରେ କାଷ୍ଟିଂ କାଉଚ୍ ଭଳି ଗର୍ହିତ ପ୍ରଥାର ବଶ ହୋଇ ପପୁ ନବମ ଶ୍ରେଣୀରେ ପଡୁଥିବା ଝିଅଟିକୁ ଯୌନ ନିର୍ଯ୍ୟାତନା ଯେ ଦେଇ ନ ଥିବେ ତାହା କେହି ଅବିଶ୍ୱାସ କରୁନାହାନ୍ତି । ବାରମ୍ବାର ଏଭଳି ନିର୍ଯ୍ୟାତନା ଦେଇଛନ୍ତି । ଆମ ପାଖରେ ଯାହା ଖବର, କଥା ପ୍ରଘଟ ହୋଇଯିବା ଡରରେ ପପୁ ପ୍ରବଳ ବ୍ଲାକ୍ ମେଲିଂର ଶିକାର ହୋଇଛନ୍ତି । ଏବେ ପୀଡ଼ିତା ବାପାଙ୍କ ବୟାନ ବିଶ୍ୱାସ କରାଗଲେ, ପପୁଙ୍କ ସହ ତାଙ୍କର ଅପଡ଼ ନ ଥିଲା ବୋଲି ସ୍ପଷ୍ଟ ହୋଇଯାଇଛି । ଖାଲି ସେତିକି ନୁହେଁ, ଝିଅ ପ୍ରତି ପପୁଙ୍କ କଦର୍ଯ୍ୟ କାରନାମାକୁ ବାପା ମାଫ୍ କରିଛନ୍ତି । ବର୍ଷେ ତଳୁ ଉଭୟ ପକ୍ଷ ଏକାଠି ବସି ଏହାର ସମାଧାନ କରିସାରିଛନ୍ତି ବୋଲି ପୀଡ଼ିତାଙ୍କ ବାପା ବୟାନ ଦେଇଛନ୍ତି ।
ଯଦି ଏହା ସତ, ତେବେ କେଉଁ ପରିସ୍ଥିତିରେ ଦେଢ଼ବର୍ଷ ତଳର ପୁରୁଣା କଥା ପଦାକୁ ଆସିଲା ଏବଂ ଶିଶୁ କଲ୍ୟାଣ ସମିତି ଆଗରେ ସେଇ ଝିଅ ଓ ତାଙ୍କ ମାଆ, ପପୁଙ୍କ ସଙ୍ଗୀନ କାରନାମା ବଖାଣି ଅଭିଯୋଗ ଦାଏର କଲେ ତାହା ରହସ୍ୟ ମନେ ହେଉଛି । ଏହା ପଛରେ ଯେ ଲକ୍ଷ ଲକ୍ଷ ଟଙ୍କାର ବାଜି ଲାଗିଛି ସେହି ଆଶଙ୍କାକୁ ବି ଏଡ଼ାଇ ହେବନି । ଆଉ ରହିଲା ଚାପର କଥା । ହଁ ଏୟା ବି ଅସମ୍ଭବ ନୁହେଁ ଯେ ପପୁ ଦୀର୍ଘକାଳୀନ ବ୍ଲାକ୍ ମେଲିଂକୁ ସାମନା କରିପାରିନାହାନ୍ତି । ଆଉ ତାହା ଭୟଙ୍କର ପରିଣାମ ଦେଇଛି । ଏଥିସହ ଏୟା ବି ଅସମ୍ଭବ ନୁହେଁ ଯେ ପପୁଙ୍କ ବିରୋଧରେ ଏତଲା ହେବା ପରେ ସେ କମ୍ପ୍ରମାଇଜ୍ର ବାଟ ଖୋଜିଛନ୍ତି ଏବଂ ଝିଅର ବାପାଙ୍କୁ ଯେ କୌଣସି ଉପାୟରେ ମନେଇଛନ୍ତି । ତେବେ ନିଜ ଝିଅର ଯୌନ ଅତ୍ୟାଚାରୀକୁ ବାପା ମାଫ୍ କରି କମ୍ପ୍ରମାଇଜ୍ ପିଟିସନ୍ ଦେବା ସମସ୍ତଙ୍କୁ ବିଚଳିତ କରିଛି । କୋର୍ଟରେ ବୟାନ ଦେଇଥିବା ଝିଅଟି ତାଙ୍କର ନୁହେଁ ବୋଲି ବାପା କହିଲେଣି । ନିଜେ ଝିଅ ବି ସେଥିରେ ମୁଣ୍ଡ ହଲାଇଲେଣି ।
ତେଣୁ କାହା କଥା ସତ ତାହା ଏବେ ସମସ୍ତଙ୍କ ମନରେ ପ୍ରଶ୍ନ ସୃଷ୍ଟି କରିଛି । ମିଡ଼ିଆରେ ନିଜକୁ ବଡ଼ ସ୍ୱେଚ୍ଛାସେବୀ କି ପ୍ରକାଣ୍ଡ ଆଡଭୋକେଟ୍ ଦର୍ଶାଇ ବିଭିନ୍ନ ଅଲୋଚନାରେ ଭାଗ ନେଉଥିବା ମହିଳା/ପୁରୁଷମାନେ ବି ସେଥିରୁ ଚେତିବା କଥା । କିଏ ସତ କହୁଛି କି ମିଛ । ବାସ୍ତବରେ ମିଡ଼ିଆରେ ପ୍ରଚାରିତ ପୀଡ଼ିତାଙ୍କ ବାପାଙ୍କ କଥା ସତ ହୋଇଥିଲେ ନିଶ୍ଚିତ ସାଂଘାତିକ । କୋର୍ଟରେ ବୟାନ ଦେଇଥିବା ଝିଅଟି କିଏ ତାହା ଜାଣିବା ପାଇଁ ଫୋରେନସିକ୍ ଲାବରେଟୋରିକୁ ସ୍ୱର ପଠଇବା ନିତାନ୍ତ ଜରୁରୀ । ସ୍ୱରର ସତ୍ୟତା ନ ପରଖିଲା ଯାଏଁ ଝିଅଟିର ବାପାଙ୍କ ଦାବି ସତ ନା ମିଛ କହିବା ସମ୍ଭବ ନୁହେଁ । ଶେଷରେ କିଛି ହାତଗଣତି ମିଡ଼ିଆ ସଂସ୍ଥାଙ୍କ ଭୂମିକା ବି ଏବେ ସନ୍ଦେହରେ । ଟିଆରପି ଚକ୍କରରେ ପପୁ ଖବରକୁ ସେମାନେ ଏଭଳି ଦେଖାଉଛନ୍ତି ଯେ ସେଥିରେ ବାଡ଼ବତା ରହୁନି । ଷ୍ଟୋରୀ ଓ ଫଲୋ ଅପ୍ ଷ୍ଟୋରୀ ନାଁରେ ଯାଛାତା ଦେଖାଉଛନ୍ତି ସେମାନେ । ଗୋଟିଏ ଦିନରେ ସେମାନେ ପୁଲିସ ହୋଇ କାହାରିକୁ ବାନ୍ଧୁଛନ୍ତି ତ ଓକିଲ ହୋଇ କେସ୍ ଲଢ଼ୁଛନ୍ତି । ଜଜ୍ ହୋଇ ଗୋଟିଏ ଦିନରେ ରାୟ ବି ଶୁଣାଇ ଦେଉଛନ୍ତି । ଓଡ଼ିଶା ମିଡିଆ ଜଗତ ପାଇଁ ଏହାଠାରୁ ଅଧିକ ଲଜ୍ଜାଜନକ ଖବର ଆଉ କିଛି ନାହିଁ ।
