ସ୍ୱାସ୍ଥ୍ୟ ବିଭାଗ: ଚିହ୍ନିରଖ ବାବୁଙ୍କ ବଦନ

– ବିଚିତ୍ର ପଦୋନ୍ନତି ଓ ବଦଳି ନିୟମର ସୂତ୍ରଧର କରିତକର୍ମା ବାବୁ
– ପକେଟ ଗରମର ଚାଲ
– ମୁଖ୍ୟମନ୍ତ୍ରୀଙ୍କ ମୋହର ନ ପାଇ ବ୍ୟସ୍ତବିବ୍ରତ

ଭୁବନେଶ୍ୱର: ସ୍ୱାସ୍ଥ୍ୟ ବିଭାଗରେ ଏବେ ଏକ ବିଚିତ୍ର ବଦଳି ନିୟମ ପ୍ରସ୍ତୁତ ହୋଇଛି । ସ୍ୱାସ୍ଥ୍ୟ ବିଭାଗର ଯୁଗ୍ମ ନିର୍ଦ୍ଦେଶକ ପାହ୍ୟାରେ ଥିବା ଡାକ୍ତରମାନେ ବରିଷ୍ଠତା ଭିତ୍ତିରେ ଅତିରିକ୍ତ ନିର୍ଦ୍ଦେଶକ ପାହ୍ୟାକୁ ପଦୋନ୍ନତି ପାଇବେ । ପଦୋନ୍ନତି ସହ ସର୍ତ୍ତ ରହିଛି, ଯେଉଁମାନେ ଚାକିରିକାଳରେ କେବିକେ ଅଞ୍ଚଳରେ ୫ ବର୍ଷ କାମ କରି ନ ଥିବେ ସେମାନେ ପଦୋନ୍ନତି ପାଇଁ କେବିକେ ଯିବାକୁ ବାଧ୍ୟ । ଏହି ନିୟମ ସର୍ତ୍ତବଳୀ କେଉଁଠୁ ଆସିଲା ତାହା କେହି କହିପାରୁନାହାନ୍ତି । ଏହି ତାଲିକା ପ୍ରସ୍ତୁତ ସରିଛି ଏବଂ ମନ୍ତ୍ରୀଙ୍କ ଅନୁମୋଦନ ପାଇସାରିଲା ପରେ ମୁଖ୍ୟମନ୍ତ୍ରୀଙ୍କ ଅନୁମୋଦନ ପାଇଁ ଯାଇଛି । ତେବେ ଗତମାସରୁ ଫାଇଲ୍ ତୃତୀୟ ମହଲାକୁ ଯାଇଥିବା ବେଳେ ଏଥିରେ ଥିବା ଅସଙ୍ଗତି ଦେଖି ଅଫିସରଙ୍କ ମୁଣ୍ଡ ଜାମ୍ ହୋଇଯାଇଛି । ଖୋଦ୍ ମୁଖ୍ୟମନ୍ତ୍ରୀଙ୍କୁ ଏହା ଖଟକା ଲାଗିଥିବାରୁ ମୋହର ମାରୁନାହାନ୍ତି ।

ସମସ୍ୟାଟି ହୋଇଛି, ପଦୋନ୍ନତି ତାଲିକାରେ ଥିବା ଡାକ୍ତରମାନେ ଏବେ ଚାକିରିର ଅନ୍ତିମ ପର୍ଯ୍ୟାୟରେ । କାହାର ଅବସର ସମୟ ୪ ମାସ ତ କାହାରି ୬ ମାସ ବାକି ଅଛି । ସ୍ୱଳ୍ପ ସମୟର ଚାକିରି ଓ ବୟସ ଦୃଷ୍ଟିରୁ ସେମାନେ ମାଲକାନଗିରି, କୋରାପୁଟ, ନବରଙ୍ଗପୁର, ରାୟଗଡ଼ା ଭଳି ଜିଲ୍ଲାକୁ ଯାଇ କାର୍ଯ୍ୟ କରିବା ବାସ୍ତବ ଦୃଷ୍ଟିକୋଣରୁ ସମ୍ଭବ ନୁହେଁ । ଦ୍ୱିତୀୟ କଥା ହେଉଛି, ବଦଳି ତାଲିକାରେ ଥିବା ଅନେକ ବରିଷ୍ଠ ଡାକ୍ତର ଏବେ ଗୁରୁତ୍ୱପୂର୍ଣ୍ଣ ପ୍ରଶାସନିକ ଦାୟିତ୍ୱରେ ଅଛନ୍ତି । ସେମାନଙ୍କ ମଧ୍ୟରୁ ଅଧିକାଂଶ ମାତ୍ର ୪/୬ ମାସ ତଳେ ରାଜଧାନୀକୁ ବଦଳି ହୋଇ ଆସିଛନ୍ତି । ଏବେ ପଦୋନ୍ନତି ନାଁରେ ସେମାନଙ୍କୁ ପୁଣି ଦୂର ଦୂରାନ୍ତକୁ ତଡ଼ିବା ଯୋଜନା ହୋଇଛି । ପଦୋନ୍ନତି ତାଲିକା ଗନ୍ଧ ପାଇଲା ପରେ ସଂପୃକ୍ତ ଡାକ୍ତରମାନଙ୍କ ମଧ୍ୟରୁ କିଛି ଆଇନ ଅଦାଲତର ଆଶ୍ରୟ ନେବା ପାଇଁ ସଜବାଜ ହେଉଥିଲା ବେଳେ ଆଉ କିଛି ବ୍ୟକ୍ତିଗତ କାରଣ ଦର୍ଶାଇ ଅବସର ପର୍ଯ୍ୟନ୍ତ ଛୁଟିରେ ରହିଯିବା ପାଇଁ ମନସ୍ଥିର କରିଛନ୍ତି ।

ବିଶ୍ୱସ୍ତ ସୂତ୍ରରୁ ମିଳିଥିବା ଖବର ଅନୁଯାୟୀ, ବିଭାଗର ଦୁଇଜଣ କରିତକର୍ମା ବାବୁ ହେଉଛନ୍ତି ଏହି ବଦଳି ଗେମ୍ ର କିଙ୍ଗପିନ୍ । ସେମାନେ ହିଁ ଡାକ୍ତରଙ୍କ ପଦୋନ୍ନତି ଓ ବଦଳି ତାଲିକା ପ୍ରସ୍ତୁତ କରିଛନ୍ତି । ଏଥିରୁ ଭଲ ଦି ପଇସା ରୋଜଗାର କରିବାର ବୁଦ୍ଧି ପାଞ୍ଚିଛନ୍ତି । ମାଲ୍ ଖାଇବାରେ ଓସ୍ତାଦ ଏହି ବାବୁଯୋଡି ବର୍ଷ ବର୍ଷ ଧରି ଡାକ୍ତର ବଦଳିରୁ ଭଲ ମାଲ୍ କମାଉଥିବା ଅଭିଯୋଗ ହୋଇଆସୁଛି । ନିଜ ପକେଟକୁ ସବଳ ରଖିବା ପାଇଁ ଆଇନକାନୁକୁ ମୋଡ଼ି ଦେବାର ପ୍ରବଳ କ୍ଷମତା ସେମାନଙ୍କର । ବିଭାଗରେ କିଛି କିରାଣୀଙ୍କୁ ଧରି ସେମାନଙ୍କର ଏକ ବଡ଼ ରାକେଟ୍ କାମ କରୁଛି । ମନ୍ତ୍ରୀ, ସଚିବଙ୍କୁ ସେମାନଙ୍କର ଡର କି ଖାତିର ନାହିଁ । ସେମାନଙ୍କର ଅଦୃଶ୍ୟ ଶକ୍ତି ଆଗରେ ମନ୍ତ୍ରୀ, ସଚିବ ବି ହାର୍ ମାନୁଥିବା ବିଭାଗରେ ଚର୍ଚ୍ଚା ହେଉଛି । ଆହୁରି ଗୁରୁତର କଥା ହେଉଛି, ମୁଖ୍ୟମନ୍ତ୍ରୀଙ୍କ ଅଫିସ୍ ରୁ ପଦୋନ୍ନତି ଓ ବଦଳି ଫାଇଲ୍ କ୍ଲିୟରାନ୍ସ ହେଉ ନ ଥିବାରୁ ଦୁଇ କରିତକର୍ମା ବାବୁ କିଛି ଗଣମାଧ୍ୟମ ଓ ସୋସିଆଲ୍ ମିଡ଼ିଆକୁ ହାତ କରି ମିଥ୍ୟା ଅପପ୍ରଚାର ଚଳାଇଛନ୍ତି । ଖୋଦ୍ ମୁଖ୍ୟମନ୍ତ୍ରୀଙ୍କୁ ବଦନାମ କରିବାର ସାହାସ କରିଛନ୍ତି ।

ଏ ସମ୍ପର୍କରେ ସ୍ୱାସ୍ଥ୍ୟମନ୍ତ୍ରୀ ଭଲ ଭାବେ ଅବଗତ ଥିଲେ ମଧ୍ୟ ତାଙ୍କ ପାୱାର କାଟୁ କରୁନି । ଓଲଟି ଅଫିସରଙ୍କ ପ୍ରାଦୁର୍ଭାବରେ ହାତ ଟେକିଦେଇଛନ୍ତି । ଫାଇଲରେ ମନ୍ତ୍ରୀଙ୍କ ମୋହର ନେଇ ସେମାନେ ତାଙ୍କୁ ଅଡୁଆ ଭିତରକୁ ଠେଲିଦେଇଛନ୍ତି । ଏବେ ମୁଖ୍ୟମନ୍ତ୍ରୀଙ୍କ ମୋହର ମିଳୁ ନ ଥିବାରୁ ଦୁଇବାବୁ ଭୀଷଣ ବିବ୍ରତ ହୋଇପଡ଼ିଛନ୍ତି । ଯେନତେନ ପ୍ରକାରେ ମୁଖ୍ୟମନ୍ତ୍ରୀଙ୍କ ମୋହର ଆଣିବା ପାଇଁ ସେମାନେ କୌଶଳ ଖଟାଇଛନ୍ତି । ତେବେ ଏହା ସଫଳ ହେଲେ ସ୍ୱାସ୍ଥ୍ୟ ବିଭାଗର ଅଧିକାଂଶ ଅଫିସରଙ୍କ ଆଶଙ୍କା ବଢ଼ିଯାଇଛି । ରାଜ୍ୟରେ ଡାକ୍ତର ସଙ୍କଟ ଲାଗିରହିଥିବା ବେଳେ ଯଦି ୨୦୦ରୁ ୨୫୦ ଡାକ୍ତର ଛୁଟିରେ ରହିଯିବେ ସ୍ଥିତି ସଙ୍ଗୀନ ହୋଇଯିବ ବୋଲି ସେମାନେ ଆଶଙ୍କା କରିଛନ୍ତି ।