ଭୁବନେଶ୍ୱର: ରାଜ୍ୟପାଳ ରଘୁବର ଦାସଙ୍କ ପୁଅ ତଥା ଝଡ଼ଖଣ୍ଡୀ ଯୁବକ ଲଳିତ କୁମାରଙ୍କ ବିରୋଧରେ ଆସିଛି ସାଂଘାତିକ ଅଭିଯୋଗ । ରାଜଭବନରେ କାର୍ଯ୍ୟ କରୁଥିବା ଆସିଷ୍ଟାଣ୍ଟ ସେକ୍ସନ ଅଫିସର(ଏଏସଓ) ବୈକୁଣ୍ଠ ପ୍ରଧାନଙ୍କୁ ସେ ତାଙ୍କର ବନ୍ଧୁମାନଙ୍କ ସହ ପିଟି ଲହୁଲୁହାଣ କରିଛନ୍ତି । ରାଜ୍ୟପାଳଙ୍କ ପୁଅ ବିରୋଧରେ ଏହି ଅଭିଯୋଗର ୬ ଦିନ ପରେ ବି ପୁଲିସ ଚୁପ୍ ବସିଛି । ଏହି ଘଟଣାକୁ ନେଇ ରାଜ୍ୟର ବିଜେପି ସରକାର ହରଡ଼ଘଣାରେ ପଡ଼ିଥିବା ବେଳେ ଅଭିଯୁକ୍ତଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଛନ୍ତି ବିରୋଧୀ ଦଳ ।
ରାଜଭବନର ହାଉସହୋଲ୍ଟ ସେକ୍ସନର ଏଏସଓ ହେଉଛନ୍ତି ବୈକୁଣ୍ଠ ପ୍ରଧାନ । ୧୩ ବର୍ଷ ହେଲା ସେଠାରେ କାର୍ଯ୍ୟ କରୁଛନ୍ତି । ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ୭ ଓ ୮ ତାରିଖ ପୁରୀ ଗସ୍ତ ପାଇଁ ତାଙ୍କର ପୁରୀ ରାଜଭବନ ଇନଚାର୍ଜ ଡୁ୍ୟଟି ପଡ଼ିଥିଲା । ଗତ ୫ ତାରିଖରୁ ସେ ସେଠାରେ ଡୁ୍ୟଟିରେ ଥିଲେ । ବୈକୁଣ୍ଠଙ୍କ ଅଭିଯୋଗ ଅନୁଯାୟୀ, ୭ ତାରିଖ ରାତି ପ୍ରାୟ ୧୧ଟା ୪୫ରେ ସେ ରାଜଭବନ ଅଫିସ ରୁମ୍ ରେ ବସିଥିଲେ । ସେହି ସମୟରେ ରାଜ୍ୟପାଳଙ୍କ ରୋଷେୟା ଆକାଶ ସିଂ ତାଙ୍କ ପାଖକୁ ଆସି ରାଜ୍ୟପାଳଙ୍କ ପୁଅ ଲଳିତ କୁମାର ଡାକୁଥିବା କହିଥିଲେ । ବୈକୁଣ୍ଠ ତୁରନ୍ତ ଲଳିତଙ୍କ ପାଖକୁ(ସୁଟ୍ ନଂ-୪)ଯାଇଥିଲେ ।
ବୈକୁଣ୍ଠଙ୍କୁ ଦେଖୁ ଦେଖୁ ଲଳିତ ରାଗି ଯାଇ ଅଶ୍ଲୀଳ ଭାଷାରେ ଗାଳିଗୁଲଜ କରିଥିଲେ । ମାତ୍ର ବୈକୁଣ୍ଠ ଏହାର ପ୍ରତିବାଦ କରିବାରୁ ଲଳିତ ଆହୁରି ରାଗିଯାଇ ତାଙ୍କୁ ଚାପୁଡ଼ା ମାରିଥିଲେ । ରାଜ୍ୟପାଳଙ୍କ ପୁଅ ପାଖରୁ ଚାପଡ଼ା ଖାଇଲା ପରେ ସେ ଭୟରେ ସେଠାରୁ ଦୌଡ଼ି ଆସି ଆନେକ୍ସ ବିଲଡିଂରେ ଲୁଚି ଯାଇଥିଲେ । ହେଲେ ଲଳିତଙ୍କର ଦୁଇଜଣ ପିଏସଓ ତାଙ୍କୁ ଖୋଜି ପୁଣି ସେଠାକୁ ଟେକି ନେଇଥିଲେ । ସେଠାରେ ସମସ୍ତେ ମିଶି(ମୋଟ ୬ ଜଣ) ତାଙ୍କୁ ନିସ୍ତୁକ ପିଟିଥିଲେ । ତତେ ଏଠି ମାରିଦେଲେ କେହି ପିଠିରେ ପଡ଼ିବେନି ବୋଲି ଧମକାଇଥିଲେ । ଜୋତାରେ ଛେପ ପକାଇ ଚାଟିବାକୁ କହିଥିଲେ ।
ବୈକୁଣ୍ଠଙ୍କର ଭୁଲ୍ ଥିଲା ଯେ ରାଜ୍ୟପାଳଙ୍କ ପୁଅ ଲଳିତ, ତାଙ୍କର ଦୁଇବନ୍ଧୁ, ଦୁଇ ପିଏସଓ ଏବଂ ରାଜ୍ୟପାଳଙ୍କ ରୋଷେୟାଙ୍କୁ ଷ୍ଟେସନରୁ ସେଠାକୁ ଆଣିବା ପାଇଁ ଦାମୀ ଗାଡ଼ି ପଠାଇ ନ ଥିଲେ । ରାଜ୍ୟପାଳଙ୍କ ପୁଅ ଏଥିରେ ଭୀଷଣ ରାଗିଯାଇଥିଲେ ।
ଯାହା ବି ହେଉ, ରାଜ୍ୟପାଳ ପୁଅଙ୍କ ମାଡ଼ମରା ଘଟଣା ସମ୍ପର୍କରେ ପରଦିନ ଅର୍ଥାତ ୮ ତାରିଖରେ ବୈକୁଣ୍ଠ ରାଜ୍ୟପାଳଙ୍କ ପ୍ରମୁଖ ସଚିବଙ୍କୁ ଜଣାଇ ନ୍ୟାୟ ଭିକ୍ଷା କରିଥିଲେ । ପରେ ଏ ନେଇ ତାଙ୍କ ପତ୍ନୀ ସାୟୋଜି ପ୍ରଧାନ ସମୁଦ୍ରକୂଳ ଥାନାରେ ଏତଲା ଦେଇଥିଲେ । ମାତ୍ର ପୁଲିସ ଏହାକୁ ଗ୍ରହଣ କଲାନାହିଁ । ଏଏସଓ ସଂଘର ଅଭିଯୋଗକ୍ରମେ ରାଜ୍ୟ ସଚିବାଳୟ ସେବା ସଂଘ ଘଟଣାରେ ହସ୍ତକ୍ଷେପ କରିବା ପରେ ସମୁଦ୍ରକୂଳ ଥାନା ମାମଲାକୁ ପଞ୍ଜୀକରଣ କରିଛି । ହେଲେ ଏ ପର୍ଯ୍ୟନ୍ତ ଅଭିଯୁକ୍ତଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିନାହିଁ ।
ରାଜ୍ୟପାଳଙ୍କ ପୁଅ ଏଏସଓଙ୍କୁ ମାଡ଼ ମାରିବା ଘଟଣାରେ ପୁଲିସର ନିଷ୍କ୍ରିୟତାକୁ ନିନ୍ଦା କରିଛନ୍ତି ବିଜେଡି ଓ କଂଗ୍ରେସ । ଏହାର ପ୍ରତିବାଦରେ ଯୁବ ଓ ଛାତ୍ର କଂଗ୍ରେସ ପକ୍ଷରୁ ଆଜି ରାଜଭବନ ଘେରାଉ କରାଯାଇ ଅଭିଯୁକ୍ତଙ୍କ ବିରୋଧରେ ତୁରନ୍ତ କାର୍ଯ୍ୟାନୁଷ୍ଠାନ ଦାବି କରାଯାଇଥିଲା । ସେହିଭଳି ବିଜେଡି ମୁଖପାତ୍ର ତଥା ବିଧାୟକ ପ୍ରତାପ ଦେବ ଏହି ଘଟଣାକୁ ନିନ୍ଦା କରି ବିବୃତି ଦେଇଛନ୍ତି । ସେ କହିଛନ୍ତି, ମୁଖ୍ୟମନ୍ତ୍ରୀ ନିଜେ ଗୃହ ଓ ସାଧାରଣ ପ୍ରଶାସନ ବିଭାଗର ମନ୍ତ୍ରୀ । ଜଣେ ସାଧାରଣ କର୍ମଚାରୀଙ୍କୁ ମୁଖ୍ୟମନ୍ତ୍ରୀ ନ୍ୟାୟ ଦିଅନ୍ତୁ ବୋଲି ସେ କହିଛନ୍ତି । କଂଗ୍ରେସ ବିଧାୟକ ତାରାପ୍ରସାଦ ବାହିନୀପତି ଅଭିଯୁକ୍ତ ରାଜ୍ୟପାଳଙ୍କ ପୁଅକୁ ଗିରଫ କରିବାକୁ ଦାବି କରିଛନ୍ତି ।
ଅନ୍ୟପକ୍ଷରେ, ପୁଲିସ ଘଟଣାର ତଦନ୍ତ କରୁଛି ଏବଂ ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବ ବୋଲି ବିଜେପି ମୁଖପାତ୍ର ଦିଲ୍ଲୀପ ମଲ୍ଲିକ କହିଛନ୍ତି ।
ତେବେ ଏ ଘଟଣା ସମ୍ପର୍କରେ ରାଜଭବନ ପକ୍ଷରୁ କୌଣସି ପ୍ରତିକ୍ରିୟା ଆସିନାହିଁ ।
