ଫେରିଲା ଆକ୍ସନ୍: କାମ ଦେଲାନି ପ୍ରଭାବଶାଳୀଙ୍କ ପ୍ରଭାବ

ଭୁୁବନେଶ୍ୱର: ଶିଳ୍ପ ପ୍ରତିଷ୍ଠା ପାଇଁ ଲିଜ୍ ସୂତ୍ରରେ ସରକାରଙ୍କଠୁ ଜାଗା ଆସିଲା । ତହସିଲଦାରଙ୍କୁ ଧରି ଏହି ସରକାରୀ ଜାଗାକୁ ସ୍ଥିତିବାନ୍ କରି ଦିଆଗଲା । କିସମ ଘରବାରିକୁ ବଦଳିଗଲା । ପାୱାର ଅଫ୍ ଆଟର୍ଣ୍ଣିଂ ଜରିଆରେ ମାଲିକାନା ହାସଲ ହୋଇଗଲା । ଏବେ, ବିଏମସି/ବିଡିଏର ଅନୁମୋଦନରେ ସେଠି ନିର୍ମାଣ ଚାଲିଛି ରିଅଲ୍ ଇଷ୍ଟେଟ୍ ପ୍ରକଳ୍ପ । ଏହି ବେଆଇନ କାର୍ଯ୍ୟ ଉପରେ ରାଜ୍ୟ ସରକାର କାର୍ଯ୍ୟାନୁଷ୍ଠାନ ନିର୍ଦ୍ଦେଶ ଦେଇ ତାକୁ ପ୍ରତ୍ୟାହାର କରିବା ପରେ ପୁଣି କାର୍ଯ୍ୟାନୁଷ୍ଠାନକୁ ଫେରିଲେଣି । ଅଥଚ କୌଣସି ଓଡ଼ିଆ ଖବରକାଗଜ ଏବଂ ଟିଭିରେ ଏହି ଖବର ନାହିଁ । ସଂପୃକ୍ତ ବ୍ୟକ୍ତିଙ୍କ ଅଖଣ୍ଡ ପ୍ରଭାବରେ ପ୍ରମୁଖ ଗଣମାଧ୍ୟମର ସ୍ୱର ଚପିଯାଇଛି । ତଥାକଥିତ କିଛି ସାମାଜିକ କର୍ମୀ ଉକ୍ତ ବେଆଇନ କାର୍ଯ୍ୟର ସରକାରୀ ଦସ୍ତାବିଜ୍ ଧରିଥିଲେ ମଧ୍ୟ ଆଖି ଖୋଲୁନି କି ପାଟି ଖୋଲୁନି । ସେମାନଙ୍କ ଆଖି ସେହି ପାଣ୍ଡିଆନ୍ ଙ୍କ ପାଖରେ ଅଟକି ରହିଛି । ଏକ ଦାୟିତ୍ୱ ସମ୍ପନ୍ନ ଗଣମାଧ୍ୟମ ଭାବେ ‘ମିଡ ଡେ ଓଡ଼ିଶା’ ପ୍ରଥମେ ଏହି ଖବର ସାମନାକୁ ଆଣିଥିଲା ଏବଂ ଲଗାତର ଖବର ପ୍ରକାଶ କରି ଆସୁଛି ।

ଭୁବନେଶ୍ୱର ପଟିଆରେ ୫ ଏକର ସରକାରୀ ଲିଜ୍ ଜାଗାକୁ ସ୍ଥିତିବାନ କରାଇ ସେଥିରେ ବିଶାଳ ଆପାର୍ଟମେଣ୍ଟ ନିର୍ମାଣ କରୁଥିବା ପ୍ରଭାବଶାଳୀ ବ୍ୟକ୍ତିଙ୍କୁ ସୁରକ୍ଷା ଦେଇପାରିନାହାନ୍ତି ରାଜ୍ୟ ସରକାର । ଉକ୍ତ ଜାଗାର ଆରଓଆର ସଂଶୋଧନ କରି ପୂର୍ବାବସ୍ଥାକୁ ଫେରାଇ ଆଣିବା ପାଇଁ ସାଧାରଣ ପ୍ରଶାସନ ବିଭାଗ ପକ୍ଷରୁ ସେପ୍ଟେମ୍ବର ୨୧ ତାରିଖରେ ଜାରି ନିର୍ଦ୍ଦେଶନାମାକୁ ଖୋର୍ଦ୍ଧା ଜିଲ୍ଲା ପ୍ରଶାସନ ଅକ୍ଟୋବର ୧୦ ତାରିଖରେ ପ୍ରତ୍ୟାହାର କରିଥିଲେ । ମାତ୍ର ସରକାର ପୁଣି ପୂର୍ବ ନିଷ୍ପତ୍ତିକୁ ଫେରିଛନ୍ତି । ଉକ୍ତ ବେଆଇନ କାର୍ଯ୍ୟ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ଇତିମଧ୍ୟରେ ରାଜସ୍ୱ ବିଭାଗ ପକ୍ଷରୁ ଖୋର୍ଦ୍ଧା ଜିଲ୍ଲାପାଳଙ୍କୁ ଚିଠି କରାଯାଇଛି ।

ରାଜସ୍ୱ ବିଭାଗର ଅତିରିକ୍ତ ସଚିବଙ୍କ ଦସ୍ତଖତରେ ଏହି ଚିଠିରେ ଖୋର୍ଦ୍ଧା ଜିଲ୍ଲାପାଳଙ୍କୁ କାର୍ଯ୍ୟାନୁଷ୍ଠାନ ପାଇଁ ସ୍ପଷ୍ଟ ନିର୍ଦ୍ଦେଶ ଦିଆଯାଇଛି । କୁହାଯାଇଛି ଯେ ପଟିଆର ନିର୍ଦ୍ଦିଷ୍ଟ ସରକାରୀ ଲିଜ୍ ଜାଗାକୁ ବେଆଇନ ଭାବେ ସ୍ଥିତିବାନ୍ କରାଯାଇଛି । ଚାଷଜମିରୁ ଏହାକୁ ଘରବାଡ଼ି କିସମ୍ କୁ ବଦଳାଯାଇଛି । ତତ୍କାଳୀନ ଭୁବନେଶ୍ୱର ତହସିଲଦାର ସରକାରୀ ଲିଜ୍ ସର୍ତ୍ତକୁ ଅନୁଧ୍ୟାନ ନ କରି ଉପ ଜିଲ୍ଲାପାଳଙ୍କ ଅନୁମୋଦନକ୍ରମେ ଏହି ଭୁଲ୍ କାମ କରିଛନ୍ତି । ଏହାର ସମସ୍ତ ଦିଗକୁ ବିଚାର କରି ନିମ୍ନଲିଖିତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ।

(୧) ଲିଜ୍ ରାଜିନାମା ତୁରନ୍ତ ବାତିଲ କର

(୨) ଖୋର୍ଦ୍ଧା ଜିଲ୍ଲାପାଳ ସଦଳବଳେ ଉକ୍ତ ଜାଗାରେ ନିର୍ମିତ ବିଲଡିଂ, ଗଚ୍ଛିତ ନିର୍ମାଣ ସାମଗ୍ରୀ ସମେତ ସମ୍ପୂର୍ଣ୍ଣ ଜାଗା ନିଜ ଦଖଲକୁ ଆଣନ୍ତୁ ।

(୩) ତତ୍କାଳୀନ ତହସିଲଦାର ଏବଂ ଉପଜିଲ୍ଲାପାଳ କରିଥିବା ବେଆଇନ କାର୍ଯ୍ୟ ପାଇଁ ସେମାନଙ୍କ ବିରୋଧରେ ପ୍ରୋସିଡିଂ କରାଯାଉ । ଦୁହିଁଙ୍କ ବିରୋଧରେ ଡିସପ୍ଲିନାରି ପ୍ରୋସିଡଂ ମଧ୍ୟ ଗ୍ରହଣ କରାଯାଉ ।

(୪) ସଂପୃକ୍ତ ଫାଇଲ୍ କୁ ତୁରନ୍ତ ସିଜ୍ କରାଯାଉ ଏବଂ ତକ୍ରାଳୀନ ତହସିଲଦାର ଏବଂ ଉପଜିଲ୍ଲାପାଳଙ୍କ ବିରୋଧରେ ଅପରାଧିକ ମାମଲା ପାଇଁ ଏତଲା ରୁଜୁ କରାଯାଉ ।

(୫) ଆବଶ୍ୟକସ୍ଥଳେ, ହାଇକୋର୍ଟଙ୍କ ପାଖରେ ଏକ କାଭେଟ୍ ଫାଇଲ୍ କରାଯାଉ । ଏହାଦ୍ୱାରା ସରକାରଙ୍କ ପ୍ରସ୍ତାବିତ କାର୍ଯ୍ୟାନୁଷ୍ଠାନ ବିରୋଧରେ ଲିଜଧାରୀ ରିଟ୍ ଆବେଦନ କରିପାରିବେ ନାହିଁ ।

ସୂଚନାଥାଉକି, ସେପ୍ଟେମ୍ବର୨୧ ତାରିଖରେ ରାଜ୍ୟ ସରକାରଙ୍କ ସାଧାରଣ ପ୍ରଶାସନ ବିଭାଗରୁ ଖୋର୍ଦ୍ଧା ଜିଲ୍ଲାପାଳ, ଭୁବନେଶ୍ୱର ଉପଜିଲ୍ଲାପାଳ ଏବଂ ଭୁବନେଶ୍ୱର ତହସିଲଦାରଙ୍କୁ ଏକ ଚିଠି ହୋଇଥିଲା । ପଟିଆରେ ଶିଳ୍ପ ପ୍ରତିଷ୍ଠା ପାଇଁ ଲିଜ୍ ସୂତ୍ରରେ ଦିଆଯାଇଥିବା ୫ ଏକରର ସରକାରୀ ଜାଗାକୁ ସ୍ଥିତିବାନ୍ କରାଯାଇ ସେଠାରେ ରିଅଲ୍ ଇଷ୍ଟେଟ୍ ପ୍ରକଳ୍ପ ନିର୍ମାଣ କରାଯାଉଥିବାରୁ ସାଧାରଣ ପ୍ରଶାସନ ବିଭାଗ ଆକ୍ସନ୍ ମୁଡ୍ କୁ ଆସିଥିଲା । ଏହି ଜାଗାର ଆରଓଆର ସଂଶୋଧନ କରି ସ୍ଥିତିବାନ ଷ୍ଟାଟସ୍ ହଟାଇବା ପାଇଁ ତହସିଲଦାରଙ୍କୁ ନିର୍ଦ୍ଦେଶ ଦିଆଯାଇଥିଲା । ଜିଲ୍ଲାପାଳ ଏ ଦିଗରେ ତ୍ୱରିତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ କୁହାଯାଇଥିଲା ।

ମାତ୍ର ତତକ୍ଷଣାତ୍ ଏହାକୁ ହାଇକୋର୍ଟରେ ଚାଲେଞ୍ଜ କରିଥିଲେ ଜାଗା ଲିଜଧାରୀ ପଲଟ୍ରୋନିକ୍ ଆଲାଏଡ ଇଣ୍ଡଷ୍ଟ୍ରିଜ୍ ପ୍ରୋପ୍ରାଇଟର ତେଜପାଲ୍ ସିଂ । ଆବେଦନକାରୀଙ୍କ ପକ୍ଷରୁ ବରିଷ୍ଠ ଆଇନଜୀବୀ ଅଶୋକ ପରିଜା କେସ୍ ଲଢ଼ିଥିଲେ । ଉଭୟ ପକ୍ଷର ଯୁକ୍ତି ଶୁଣିବା ପରେ ଡକ୍ଟର ଜଷ୍ଟିସ୍ ଏସ.କେ.ପାଣିଗ୍ରାହୀ ସେପ୍ଟେମ୍ବର୨୫ ତାରିଖରେ ତାଙ୍କର ନିଷ୍ପତ୍ତି ଶୁଣାଇଥିଲେ । ଉକ୍ତ ଜାଗାରେ ବିଏମସି/ବିଡିଏର ପ୍ଲାନ୍ ଅନୁମୋଦନ ବାତିଲ ଏବଂ ଆରଓଆର ସଂଶୋଧନ କରି ସ୍ଥିତିବାନ ଷ୍ଟାଟସ୍ ହଟାଇବା ପାଇଁ ରାଜ୍ୟ ସରକାରଙ୍କ ପଦକ୍ଷେପ ଉପରେ ହାଇକୋର୍ଟ ରୋକ୍ ଲଗାଇଥିଲେ । ସାଧାରଣ ପ୍ରଶାସନ ବିଭାଗର କାର୍ଯ୍ୟାନୁଷ୍ଠାନ ଚିଠିକୁ ପ୍ରିନସିପୁଲ୍ସ ଅଫ ନ୍ୟାଚୁରାଲ୍ ଜଷ୍ଟିସ୍ ର ଉଲ୍ଲଂଘନ ବୋଲି ହାଇକୋର୍ଟ ବିଚାର କରିଥିଲେ ।

ହାଇକୋର୍ଟଙ୍କ ନିଷ୍ପତ୍ତିକୁ ରାଜ୍ୟ ସରକାର ଚାହିଁଥିଲେ ସୁପ୍ରିମକୋର୍ଟରେ ଚାଲେଂଜ କରିପାରିଥାନ୍ତେ । ମାତ୍ର ତାହା ନ କରି ଓଲଟି ହାଇକୋର୍ଟଙ୍କ ନିଷ୍ପତ୍ତିକୁ ଆଳ କରି କାର୍ଯ୍ୟାନୁଷ୍ଠାନ ନିଷ୍ପତ୍ତିରୁ ଓହରି ଯାଇଥିଲେ । ଅକ୍ଟୋବର ୧୦ ତାରିଖରେ ଖୋର୍ଦ୍ଧା ଜିଲ୍ଲାପାଳଙ୍କ ଅଫିସ ପକ୍ଷରୁ ଭୁବନେଶ୍ୱର ତହସିଲଦାରଙ୍କୁ ଏକ ଚିଠି କରାଯାଇ ସଂପୃକ୍ତ ଜାଗାର ଆରଓଆର ସଂଶୋଧନ କରି ପୂର୍ବାବସ୍ଥାକୁ ଫେରାଇ ଆଣିବା ପାଇଁ ଦିଆଯାଇଥିବା ପୂର୍ବ ଆଦେଶକୁ ପ୍ରତ୍ୟାହାର କରାଯାଇଥିଲା ।

ଏହି ବେଆଇନ କାରବାରର ଘଟଣାକ୍ରମ ଆଉ ଥରେ ପାଠକଙ୍କୁ ଜଣାଇ ଦେଉଛୁ ।

ପଟିଆ ମୌଜାରେ ୫ ଏକରର ଜାଗାକୁ ରାଜ୍ୟ ସରକାର ଶିଳ୍ପ ପ୍ରତିଷ୍ଠା ଉଦ୍ଦେଶ୍ୟରେ ପଲଟ୍ରୋନିକ୍ ଆଲାଏଡ ଇଣ୍ଡଷ୍ଟ୍ରିଜ୍ ତେଜପାଲ୍ ସିଂଙ୍କୁ ୯୯ ବର୍ଷିଆ ଲିଜ୍ ସୂତ୍ରରେ ଦେଇଥିଲେ । ୧୭.୧୨.୧୯୭୯ରେ ଭୁବନେଶ୍ୱର ତହସିଲଦାରଙ୍କ ଦ୍ୱାରା ଏହି ଲିଜ୍ ଡିଡ୍ ରେଜିଷ୍ଟ୍ରି ହୋଇଥିଲା ।

ମାତ୍ର ପରବର୍ତ୍ତୀ ସମୟରେ ତେଜପାଲ୍ ସିଂ, ପ୍ରୋପ୍ରାଇଟର ପଲଟ୍ରୋନିକ୍ ଆଲାଏଡ ଇଣ୍ଡଷ୍ଟ୍ରିଜ୍ ନାଁରେ ୪୭୪/୫ ଖାତା ନମ୍ବର ପ୍ରସ୍ତୁତ କରାଯାଇ ସଂପୃକ୍ତ ଜାଗାର ଷ୍ଟାଟସ୍ ସ୍ଥିତିବାନ କରିଦିଆଗଲା । ତକ୍ରାଳୀନ ଭୁବନେଶ୍ୱର ତହସିଲଦାର ହାତକାଟି ସରକାରୀ ଜାଗାକୁ ସ୍ଥିତିବାନରେ ବଦଳେଇଦେଲେ ।

୨୦୨୨ ମସିହାରେ ଏହି ଜାଗାକୁ ‘ଘରବାରି’ କିସମ କରି ଦିଆଗଲା । ଓଏଲଆର ଆକ୍ଟର, ୧୯୬୦ର ଧାରା ୮-ଏରେ ଏହାର ସରକାରୀ ଆଦେଶ ପ୍ରକାଶ ପାଇଲା । ଅତଏବ, ୫ ଏକର ଜଙ୍ଗଲ କିସମର ମୂଳ ସରକାରୀ ଜାଗାଟି ସ୍ଥିତିବାନ ପାଲଟି ଘରବାରି କିସମକୁ ବଦଳିଗଲା ।

ପଲଟ୍ରୋନିକ୍ ଆଲାଏଡ ଇଣ୍ଡଷ୍ଟ୍ରିଜ୍ ପ୍ରୋପାଇଟର୍ ତେଜପାଲ୍ ସିଂଙ୍କ ନାଁରେ ଥିବା ଏହି ଜାଗା ପାୱାର ଅଫ୍ ଆଟର୍ଣ୍ଣିଂ ବଳରେ ଜନୈକ ପ୍ରଭାବଶାଳୀ ବ୍ୟକ୍ତିଙ୍କ ଅକ୍ତିଆରକୁ ଶେଷରେ ଚାଲି ଆସିଲା । ସଂପୃକ୍ତ ପ୍ରଭାବଶାଳୀ ବ୍ୟକ୍ତିଙ୍କ ତତ୍ତ୍ୱାବଧାନରେ ସେଠାରେ ବିଶାଳ ଗୃହ ନିର୍ମାଣ ପ୍ରକଳ୍ପ ନିର୍ମାଣ ଚାଲିଛି । ଶିଳ୍ପ ପ୍ରତିଷ୍ଠା ଉଦ୍ଦେଶ୍ୟରେ ଦିଆଯାଇଥିବା ଏକ ଲିଜହୋଲ୍ଡ ଜାଗା ଉପରେ ରେସିଡେନସିଆଲ୍ କମ୍ପ୍ଲେକ୍ସ ନିର୍ମାଣ ପାଇଁ ବିଏମସି/ବିଡିଏ ଅନୁମତି ଦେଇଛନ୍ତି ।

‘ମିଡ ଡେ ଓଡ଼ିଶା’ରେ ପ୍ରଥମେ ଏହି ଖବର ପ୍ରକାଶ ପାଇଥିଲା । ଯାହା ଆପଣ ଦେଖିପାରିବେ ।

କିଏ ସେହି ପ୍ରଭାବଶାଳୀ ବ୍ୟକ୍ତି?

କିଏ ସେହି ପ୍ରଭାବଶାଳୀ ବ୍ୟକ୍ତି?