ଧନ୍ୟବାଦ ସାର୍! ଆପଣଙ୍କ ସହଯୋଗ ବିନା ଏହା ସମ୍ଭବ ହୋଇ ନଥାନ୍ତା!!

ଭୁବନେଶ୍ୱର: ଦୀର୍ଘ ଚାରି ଦଶନ୍ଧୀ ପରେ ଭାରତୀୟ ହକି ତା’ର ପୂର୍ବ ଗୌରବ ଫେରାଇ ଆଣିଥିବାରୁ ସବୁଆଡ଼େ ଖୁସିର ମାହୋଲ୍ । ଭାରତୀୟ ଟିମ୍ କୁ ଚାରିଆଡୁ ପ୍ରଶଂସା ଓ ଶୁଭେଚ୍ଛାର ସୁଅ ଛୁଟିଛି । ତେବେ ଭାରତୀୟ ହକ ଟିମ୍ ର ଏହି ସଫଳତାର ପ୍ରମୁଖ ଶ୍ରେୟ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ପାଖକୁ ଆସି ତାଙ୍କୁ ଚର୍ଚ୍ଚାର କେନ୍ଦ୍ରବିନ୍ଦୁ କରିଛି ।

ନବୀନ ପଟ୍ଟନାୟକଙ୍କ ପୃଷ୍ଠପୋଷକତା ଓ ନିଷ୍ଠାପର ଉଦ୍ୟମ ସୋସିଆଲ୍ ମିଡ଼ିଆରେ ଟ୍ରେଣ୍ଡିଂ ହେଉଥିବା ବେଳେ ଜାତୀୟ ଗଣମାଧ୍ୟମ ଭୁରି ଭୁରି ପ୍ରଶଂସା କରୁଛନ୍ତି । ଖୋଦ୍ ହକି ଟିମ୍ ଅଧିନାୟକ ମନପ୍ରୀତ୍ ସିଂ ମୁଖ୍ୟମନ୍ତ୍ରୀଙ୍କୁ ପ୍ରଶଂସାରେ ପୋତି ଦେଇଛନ୍ତି । ଧନ୍ୟବାଦ ସାର୍, ଆପଣଙ୍କ ସହଯୋଗ, ପ୍ରେରଣା ଓ ଦୂରଦୃଷ୍ଟି ବିନା ଏହି ସ୍ୱପ୍ନ ସମ୍ଭବ ହୋଇ ନ ଥାନ୍ତା ବୋଲି ନବୀନଙ୍କ ଉଦ୍ଦେଶ୍ୟରେ ଏକ ଭିଡ଼ିଓ ବାର୍ତ୍ତରେ କହିଛନ୍ତି ମନପ୍ରୀତ୍ ।

ରାଜନୀତିରେ ସଫଳତାର ଶୀର୍ଷରେ ଥାଇ ବି ହକିରେ ବିଶେଷ ରୁଚି ରଖିଥିବା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ପ୍ରେରଣା ଓ ସହଯୋଗ ଭାରତୀୟ ହକି ଟିମ୍ ପାଇଁ କିଭଳି ଆଶିର୍ବାଦ ପାଲଟିଲା ତାହା ଏହା ପ୍ରମାଣିତ କରିଛି ।

୪ ବର୍ଷ ତଳେ ଟିମ୍ ଇଣ୍ଡିଆର ପ୍ରାୟୋଜନରୁ ସାହାରା ଇଣ୍ଡିଆ ଓହରିଯିବା ପରେ ବେସାହାରା ହୋଇଯାଇଥିଲା ଟିମ୍ । ହକିର ଦୁର୍ବଳ ଅବସ୍ଥା ଯୋଗୁଁ ପ୍ରାୟୋଜକ ସଂସ୍ଥା ମିଳି ନ ଥିଲେ । ଆଉ ଏହି ସମୟରେ ଟିମ୍ ଇଣ୍ଡିଆର ହାତ ଧରିବାକୁ ଆଗେଇ ଆସିଥିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ୫ ବର୍ଷ ପାଇଁ ଭାରତୀୟ ହକି ଟିମ୍ ର ଦାୟିତ୍ୱ ନେଇ ହକି ଇଣ୍ଡିଆ ସହ ୧୫୦ କୋଟି ଟଙ୍କାର ଚୁକ୍ତି କରିଥିଲେ ।

୨୦୧୮ ରେ ହକି ୱାଲର୍ଡ ଲିଗ୍ ଏବଂ କଳିଙ୍ଗ ଷ୍ଟାଡିୟମ୍ ରେ ପୁରୁଷ ବିଶ୍ୱକପ୍ ର ସଫଳ ଆୟୋଜନ ପାଇଁ ମୁଖ୍ୟମନ୍ତ୍ରୀ ବେଶ୍ ପ୍ରଶଂସା ଗୋଟାଇଥିଲେ । ପରବର୍ତ୍ତୀ ସମୟରେ ୨୦୧୯ ଏଫଆଇଏଚ ମେନସ୍ ସିରିଜ୍ ଫାଇନାଲସ୍ ତଥା ଅଲିମ୍ପିକ ହକି କ୍ୱାଲିଫାଏର୍ସ ଏବଂ ୨୦୨୦ ଏଫଆଇଏଚ ପ୍ରୋ ଲିଗ୍ ହକି ଟୁର୍ଣ୍ଣାମେଣ୍ଟର ଆୟୋଜକ ଥିଲେ ରାଜ୍ୟ ସରକାର । ୨୦୧୮ ପୁରୁଷ ବିଶ୍ୱକପ୍ ର ସଫଳତା ଯୋଗୁଁ ୨୦୨୩ ବିଶ୍ୱକପ୍ ର ଆୟୋଜନ ଓଡ଼ିଶାକୁ ମିଳିଛି । ଭୁବନେଶ୍ୱର ଓ ରାଉରକେଲାରେ ଏହା ଅନୁଷ୍ଠିତ ହେବ ।

ସେ ଯାହା ହେଉ, ଆଜି ଦେଶ ପାଇଁ ଗର୍ବ ଓ ଗୌରବ ଆଣିଛନ୍ତି ଭାରତୀୟ ହକି ଦଳ । ଭାରତୀୟ ହକି ଦଳର ଐତିହାସିକ ବିଜୟ ପରେ ରାଷ୍ଟ୍ରପତି, ପ୍ରଧାନମନ୍ତ୍ରୀଙ୍କ ସମେତ ମୁଖ୍ୟମନ୍ତ୍ରୀ ଭାରତୀୟ ଟିମ୍ କୁ ଶୁଭେଚ୍ଛା ଜଣାଇଥିଲେ । ଦେଶ ପାଇଁ ଗୌରବର ମୁହୁର୍ତ୍ତରେ ସେମାନଙ୍କ ଖୁସିକୁ ସେୟାର କରିଥିଲେ । ପ୍ରଧାନମନ୍ତ୍ରୀ ଶ୍ରୀ ମୋଦି ଓ ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ ଭାରତୀୟ ଟିମ୍ ସଦସ୍ୟଙ୍କ ସହ ଭିଡିଓ ବାର୍ତ୍ତଳାପ କରି ଧନ୍ୟବାଦ ଓ ଶୁଭେଚ୍ଛା ଜଣାଇଥିଲେ ।

ଓଡ଼ିଶାର ଦୁଇ ଖେଳାଳୀ ଅମିତ ରୋହିଦାସ ଓ ବୀରେନ୍ଦ୍ର ଲାକ୍ରାଙ୍କ ପରିବାର ସହ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଭିଡ଼ିଓ କନଫରେନ୍ସିଂରେ ଯୋଡି ହୋଇଥିଲେ । ଅମିତ ଓ ବୀରେନ୍ଦ୍ରଙ୍କ ବାପା ଓ ମା’ ଙ୍କ ସହ ମୁଖ୍ୟମନ୍ତ୍ରୀ କଥା ହୋଇ ସେମାନଙ୍କ ପୁଅ ପାଇଁ ରାଜ୍ୟ ଗର୍ବିତ ବୋଲି କହିବା ସହ ସେମାନଙ୍କୁ ଧନ୍ୟବାଦ ଜଣାଇଥିଲେ ।