ଅପରାଜିତାଙ୍କ ଗୋଷ୍ଠୀକୁ ବାଜିଲା ଦଳୀୟ ଛାଟ

ଭୁବନେଶ୍ୱର: ତୃଣମୂଳସ୍ତରରେ ଦଳକୁ ବିଭାଜନ ଓ ଦଳୀୟ ଶୃଙ୍ଖଳା ଭଙ୍ଗ ଅଭିଯୋଗରେ କୋଣାର୍କର ପୂର୍ବତନ ମଣ୍ଡଳ ସଭାପତି ତଥା ପୁରୀ ଜିଲ୍ଲା କାର୍ଯ୍ୟକାରିଣୀ ସଭ୍ୟ ସୁରେନ୍ ପାଲ ଏବଂ ପୂର୍ବତନ ରାଜ୍ୟ ଯୁବମୋର୍ଚ୍ଚା ର କାର୍ଯ୍ୟକାରିଣୀ ସଭ୍ୟ ପ୍ରଶାନ୍ତ ସ୍ୱାଇଁଙ୍କୁ ବିଜେପିର ପ୍ରାଥମିକ ସଦସ୍ୟ ପଦରୁ ନିଲମ୍ବନ କରାଯାଇଛି । ପୁରୀ ଜିଲ୍ଲା ବିଜେପି ସଭାପତି ଆଶ୍ରିତ ପଟ୍ଟନାୟକ ଏହି ନିଲମ୍ବନ ଆଦେଶ ଜାରି କରିଛନ୍ତି । ଖାଲି ନିଲମ୍ବନ କରିନାହାନ୍ତି, ସେମାନଙ୍କୁ ଦଳରୁ ବହିଷ୍କାର ପାଇଁ ରାଜ୍ୟ ସଭାପତିଙ୍କୁ ସୁପାରିଶ କରିଛନ୍ତି ।

ଏହି କାର୍ଯ୍ୟାନୁଷ୍ଠାନ ପଛରେ ରହିଛି ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀଙ୍କ ମନମାନି ଏବଂ ତୃଣମୂଳସ୍ତରରେ ଦଳକୁ ବିଭାଜନ ଉଦ୍ୟମର ଭିତିରି କଥା । ଦଳୀୟ କାର୍ଯ୍ୟାନୁଷ୍ଠାନର ଶିକାର ହୋଇଥିବା ସ୍ଥାନୀୟ ଅଞ୍ଚଳର ସଂପୃକ୍ତ ଦୁଇ ନେତା ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀଙ୍କ କୋଣାର୍କ କାର୍ଯ୍ୟକ୍ରମ ଆୟୋଜନରେ ମୁଖ୍ୟ ସହଯୋଗୀ ଥିବା କୁହାଯାଉଛି । ଏହା ଦଳୀୟ କାର୍ଯ୍ୟକ୍ରମ ନ ଥିଲା କି ଅପରାଜିତା ଏହି କାର୍ଯ୍ୟକ୍ରମରେ ବିଧିବଦ୍ଧ ଭାବେ ସ୍ଥାନୀୟ ଦଳୀୟ ନେତୃବୃନ୍ଦଙ୍କୁ ସାମିଲ କରି ନ ଥିଲେ । ସୁରେନ୍ ଓ ପ୍ରଶାନ୍ତଙ୍କ ଭଳି ତାଙ୍କର ବଛା ବଛା ସମର୍ଥକଙ୍କୁ ଆଗରେ ରଖି ଅପରାଜିତା ଏହି କାର୍ଯ୍ୟକ୍ରମର ଆୟୋଜନ କରିଥିଲେ ।

ଅପରାଜିତାଙ୍କ ଏଭଳି କାର୍ଯ୍ୟ ତୃଣମୂଳସ୍ତରରେ ଦଳକୁ ବିଭାଜନମୁଖୀ କରୁଥିବା ଜିଲ୍ଲା ନେତୃତ୍ୱ ଅନୁଭବ କରିବା ପରେ କାର୍ଯ୍ୟାନୁଷ୍ଠାନ ଆରମ୍ଭ ହୋଇଛି । ଏଭଳି କାର୍ଯ୍ୟକୁ କେବେ ବି ପ୍ରଶୟ ଦିଆଯିବ ନାହିଁ ବୋଲି କଡ଼ା ବାର୍ତ୍ତା ଦିଆଯାଇଛି ।

ସୂଚନାଥାଉକି, ନିଜକୁ ବିଜେପିର ରାଜ୍ୟ ଛବି ବୋଲାଉଥିବା ସାଂସଦ ଅପରାଜିତା ଷଡ଼ଙ୍ଗୀଙ୍କ ଅହଂକାର ଓ ମନମାନି ଦଳରେ ଭୟଙ୍କର ପରିସ୍ଥିତି ସୃଷ୍ଟି କରିବାକୁ ଯାଉଥିବା ଗତକାଲି ଆମେ ଏକ ଖବର ଲେଖିଥିଲୁ । ବୋଲଗଡ଼ରେ ଖୋର୍ଦ୍ଧା ଜିଲ୍ଲା କାର୍ଯ୍ୟକାରିଣୀରେ ଅପରାଜିତାଙ୍କ ହାକିମାତି ଏବଂ କୋଣାର୍କରେ ଦଳୀୟ ନେତାଙ୍କୁ ଉପେକ୍ଷା କରି ନିଜସ୍ୱ ସଂଯୋଜନାରେ ସାଧାରଣ ସଭା କରିଥିବା ଘଟଣା ଉଲ୍ଲେଖ କରିଥିଲୁ । କୋଣାର୍କ ଘଟଣାରେ ଏବେ ଦୁଇ ନେତାଙ୍କ ବିରୋଧରେ ଦଳ ପକ୍ଷରୁ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ବିଜେପି ଆଭ୍ୟନ୍ତରୀଣ ରାଜନୀତିରେ ଉଷ୍ମତା ଆଣିଛି ।

ଆହୁରି ସାଂଘାତିକ କଥା ହେଉଛି, ପୁରୀ ଜିଲ୍ଲା ବିଜେପିରେ ଅସ୍ଥିିରତା ସୃଷ୍ଟି କରି ଦଳକୁ ଭାଗ ଭାଗ କରିବାକୁ ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀ ଉଦ୍ୟମ କରୁଥିବାର ଏକ ଅଭିଯୋଗ ପତ୍ର ରାଜ୍ୟ ସଭାପତିଙ୍କ ପାଖରେ ପହଞ୍ଚିଛି । ଦୁଇ ବିଧାୟକଙ୍କ ସମେତ ଜିଲ୍ଲାର ସମସ୍ତ ବିଧାୟକ ପ୍ରାର୍ଥୀ ଏଥିରେ ସ୍ୱାକ୍ଷର କରିଥିବା ବିଶ୍ୱସ୍ତ ସୂତ୍ରରୁ ଜଣାପଡ଼ିଛି । ଜିଲ୍ଲାର ସବୁ ଜାଗାରେ ଭୁବନେଶ୍ୱର ସାଂସଦ ନିଜସ୍ୱ ସଂଗଠନ କରୁଥିବାରୁ ଏହା ଦଳରେ ଗୋଷ୍ଠୀ ବିବାଦ ସୃଷ୍ଟି କରିଛି । ଆଗାମୀ ନିର୍ବାଚନରେ ଏହା ଦଳ ପାଇଁ ପ୍ରଭୂତ କ୍ଷତି ଆଣିବ ବୋଲି ସେମାନଙ୍କର କୁଆଡ଼େ ହୃଦୟଙ୍ଗମ ହୋଇଛି । ରାଜ୍ୟ ସଭାପତି ତୁରନ୍ତ ଏଥିରେ ହସ୍ତକ୍ଷେପ କରିବାକୁ ଦାବି କରାଯାଇଛି ବୋଲି ଏହି ସୂତ୍ରରୁ ଜଣାପଡ଼ିଛି ।

ଏହାର ସତ୍ୟତା ଜାଣିବା ପାଇଁ ଆମେ ଦୁଇ ବିଧାୟକଙ୍କ ସହ ଯୋଗାଯୋଗ କରିବାକୁ ଉଦ୍ୟମ କରିଥିଲୁ । ମାତ୍ର ସେମାନଙ୍କ ମତାମତ ମିଳିନାହିଁ । ଅନ୍ୟପକ୍ଷରେ ଜିଲ୍ଲାର ଜଣେ ବରିଷ୍ଠ ନେତା ନିଜ ନାଁ ଗୋପନ ରଖିବା ସର୍ତ୍ତରେ ଏହି ଘଟଣାକୁ ସ୍ୱୀକାର କରିଛନ୍ତି । ଅପରାଜିତା ନିଜ ନିର୍ବାଚନମଣ୍ଡଳୀ ଉପରେ ଧ୍ୟାନ ରଖିବା ପରିବର୍ତ୍ତେ ସବୁଆଡ଼େ ବୁଲି ବୁଲି ସମାନ୍ତରାଳ ସଂଗଠନ କରୁଥିବା ସେ ରୋକଠୋକ ଜଣାଇଛନ୍ତି ।

ଉଲ୍ଲେଖଥାଉକି, ଗତବର୍ଷ ରାୟଗଡ଼ା ଜିଲ୍ଲାରେ ଅପରାଜିତାଙ୍କ କାର୍ଯ୍ୟକ୍ରମରେ ଯୋଗ ଦେଇଥିବା ଦୁଇ କାର୍ଯ୍ୟକର୍ତ୍ତାଙ୍କ ବିରୋଧରେ ଦଳ ପକ୍ଷରୁ ଶୃଙ୍ଖଳତାଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିଲା । ନିଜର ଏହି ସମର୍ଥକଙ୍କୁ ନେଇ ଦଳର ବିନା ଅନୁମୋଦନରେ ଅପରାଜିତା ସେଠାରେ କାର୍ଯ୍ୟକ୍ରମ କରିଥିଲେ ।