ଭୁବନେଶ୍ୱର: ଜଣେ ସରକାରୀ ବାବୁ ତାଙ୍କ ଦରମା ଟଙ୍କାରେ ଏତେ ବିଶାଳ ସମ୍ପତ୍ତି ଆହରଣ କରିବା ସମ୍ଭବପର ନୁହେଁ । ମାସେ କି ବର୍ଷେ ଭିତରେ ଏତେ କୋଠାବାଡ଼ି, ସମ୍ପତ୍ତି ଅଚାନକ କରିପକାଇ ନ ଥିବେ । ଚାକିରିର ସ୍ଥାନ, କାଳରୁ ଫାଇଦା ନେଇ ବ୍ୟବସ୍ଥାକୁ ଲୁଟି ଚାଲିଥିବେ । ବିଡ଼ମ୍ବନା ଯେ ଏଭଳି ଦୁର୍ନୀତିଗ୍ରସ୍ତ ବ୍ୟକ୍ତି ଧରାପଡ଼ିଲା ବେଳକୁ ନେଡି ଗୁଡ଼ କହୁଣୀକୁ ବୋହି ସାରିଥାଏ । ଭିଜିଲାନସ୍ ଦ୍ୱାରା ଧରାପଡ଼ି ଜେଲ୍ ଯିବାକୁ ଏମିତିକା ବେଲଜ୍ୟା, ଦୁର୍ନୀତିଗ୍ରସ୍ତ ବ୍ୟକ୍ତି ମାନସିକସ୍ତରରେ ପ୍ରସ୍ତୁତ ରହିବା ବିଚିତ୍ର ନୁହେଁ । କାରଣ ଏହି ମାମଲାରୁ ନିଦେ୍ର୍ଦାଷରେ ଖଲାସ ହେବାର ବାଟ ବି ତାଙ୍କୁ ଜଣାଥିବ । ବ୍ୟବସ୍ଥାର ଗଳାବାଟ ଏବଂ ଲୋକଙ୍କ କ୍ଷୀଣ ସ୍ମରଣ ଶକ୍ତି ସମ୍ପର୍କରେ ମଧ୍ୟ ସେମାନେ ଯଥେଷ୍ଟ ସଚେତନ ।
ବଲାଙ୍ଗୀର ଲୋୟଲ୍ ସୁକତେଲ ପ୍ରକଳ୍ପର ମୁଖ୍ୟ ନିର୍ମାଣ ଇଞ୍ଜିନିୟର ସୁନୀଲ କୁମାର ରାଉତଙ୍କୁ ଆଜି ଗିରଫ କରିଛି ଭିଜିଲାନସ୍ । ଦୁଇଦିନ ଧରି ଚାଲିଥିବା ଚଢ଼ଉ ଓ ଖୋଳତାଡ଼ରୁ ତାଙ୍କର ଠାବ ସମ୍ପତ୍ତି ସମସ୍ତଙ୍କୁ ତାଜୁବ୍ କରିଦେଇଛି । ଭୁବନେଶ୍ୱରରେ ତାଙ୍କର ଦୁଇଟି ସୁରମ୍ୟ ଅଟ୍ଟାଳିକା, ପୁରୀରେ ଦୁଇଟ ଫ୍ଲାଟ୍, ୟୁପିର ମଥୁରାରେ ଗୋଟିଏ ଫ୍ଲାଟ୍, ୩୪ଟି ପ୍ଲଟ୍, ଗୋଟିଏ ଫାର୍ମ ହାଉସ୍, କେଜିଏ ସୁନା, ପାଖାପାଖି ୩ କୋଟି ବ୍ୟାଙ୍କ ଡିପୋଜିଟ୍, ଘରୁ ନଗଦ ୨ ଲକ୍ଷ ୩୪ ହଜାର ଟଙ୍କା, ଗୋଟିଏ ଟ୍ରକ୍, ଦୁଇଟି ବେନାମୀ କାର୍(କ୍ରେଟା ଏବଂ ଥର୍), ୪ଟି ବାଇକ୍ । ତାଙ୍କ ଆୟଠାରୁ ଏହି ସମ୍ପତ୍ତି ୨୫୭% ଅଧିକ ବୋଲି ଭିଜିଲାନସ୍ ଆକଳନ କରିଛି ।
ସୁନୀଲ ରାଉତଙ୍କର ଭୁବନେଶ୍ୱର ନିଳାଦ୍ରୀବିହାର ପ୍ଲଟ୍ ନଂ ୯୦ରେ ତିନି ମହଲାର ଚକାଚକ୍ କୋଠା । ଏହି ସୁରମ୍ୟ ଅଟ୍ଟାଳିକାରେ ସେ ଓ ତାଙ୍କ ପରିବାର ରହୁଛନ୍ତି । ନୟାପଲ୍ଲୀର ନୀଳକଣ୍ଠନଗର ପ୍ଲଟ୍ ନଂ ୪୯୪ରେ ଦୁଇ ମହଲାର କୋଠା, ପୁରୀ ଦୋଳମଣ୍ଡପସାହିର ଶ୍ରୀକ୍ଷେତ୍ର ଭକ୍ତ ନିବାସରେ ୨ ବିଏଚକେ( ଫ୍ଲଟ୍ ନଂ-୦୦୨, ବ୍ଲକ୍-ଜେ), ପୁରୀ ଭିଆଇପି ରୋଡ୍ ରେ ଥିବା କ୍ରିଷ୍ଣାଧାମ ଆପାର୍ଟମେଣ୍ଟରେ ଏକ ଫ୍ଲାଟ୍( ନଂ.ସି/୧୦୪) । ଭଗବାନ କୃଷ୍ଣଙ୍କ ଜନ୍ମସ୍ଥଳୀ ମଥୁରାରେ ବି ଏକ ୨ ବିଏଚକେ ଫ୍ଲାଟ୍ କିଣିଛନ୍ତି । ଢ଼େଙ୍କାନାଳର ପ୍ରାକୃତିକ ସୌନ୍ଦର୍ଯ୍ୟଭରା ସପ୍ତଶଯ୍ୟାରେ ୮ ଏକର ଜାଗା ଉପରେ ତାଙ୍କର ଅଛି ଫାର୍ମ ହାଉସ୍ । ସେଠାରେ ଦୁଇ ମହଲାର କୋଠା ସାଙ୍ଗକୁ ଏକ କୁକୁଡ଼ା ଫାର୍ମ ଏବଂ ଗୋଶାଳା କରିଛନ୍ତି । କୁକୁଡ଼ା ଫାର୍ମରେ ୧୦୦ କୁକୁଡ଼ା ଓ ବତକ ରଖିଥିବା ବେଳେ ଗୋଶାଳକରେ ୭୦ ଗାଈ ଓ ବଳଦ ରଖିଛନ୍ତି ।
ଖାଲି ସେତିକି ନୁହେଁ । ଏହି କରିତକର୍ମା ଇଞ୍ଜିନିୟରଙ୍କର ଭୁବନେଶ୍ୱର, କଟକ, ପୁରୀ, ଢ଼େଙ୍କାନାଳରେ ରହିଛି ୩୪ ଟି ପ୍ଲଟ୍ । ସେଥିମଧ୍ୟରୁ ଭୁବନେଶ୍ୱରରେ ୫ଟି, ପୁରୀରେ ୩ଟି, କଟକରେ ୧୯ଟି ଏବଂ ଢ଼େଙ୍କାନାଳରେ ୭ଟି ପ୍ଲଟ୍ ଅଛି । ଭୁବନେଶ୍ୱରରେ ଥିବା ପ୍ଲଟ୍ ଗୁଡ଼ିକ ନିଳାଦ୍ରୀବିହାର, ମଳିପଡ଼ା ମୌଜାରେ ୦.୧୬୭ ଡିସିମିଲିର ପ୍ଲଟ୍, ନୟାପଲ୍ଲୀ ନୀଳକଣ୍ଠନଗରରେ ୧ ଏକର ୭୪ ଡିସିମିଲ୍ ର ପ୍ଲଟ୍(ନଂ୪୯୪), ରଘୁନାଥପୁର ମୌଜାରେ ୦.୨୧୫ ଡିସିମିଲିର ପ୍ଲଟ୍ ଏବଂ ଧାୱନ୍ ମୌଜାରେ(୦.୨ ଡିସିମିଲି) ଅଛି ।
ସୁନୀଲ ରାଉତଙ୍କର ବିଭିନ୍ନ ଇନସୁ୍ୟରାନ୍ସ କମ୍ପାନୀରେ ୧ କୋଟି ୮୬ ଲକ୍ଷ ଟଙ୍କା ଡିପୋଜିଟ୍ ଥିଲା ବେଳେ ୯୮ ଲକ୍ଷ ୧୧ ହଜାର ଟଙ୍କା ବ୍ୟାଙ୍କ ଡିପୋଜିଟ୍ ଅଛି । ୨ ଲକ୍ଷ ୩୪ ହଜାର ୧୨୦ ଟଙ୍କା ନଗଦ ଟଙ୍କା ବାହାରିଛି । ଘରୁ ବାହାରିଛି କେଜିଏ ସୁନା । ଗୋଟିଏ ଟ୍ରକ୍, ଦୁଇଟି ବେନାମୀ କାର୍( ହୁଣ୍ଡାଇ କ୍ରେଟା ଏବଂ ମହିନ୍ଦ୍ରା ଥର୍), ୪ଟି ବାଇକ୍ । ୧୫ ଲକ୍ଷ ଟଙ୍କାର ଘର ଆସବାବପତ୍ର ମଧ୍ୟ ତାଙ୍କ ଘରୁ ମିଳିଛି ।
